| Library / Tipiṭaka / तिपिटक • Tipiṭaka / परिवारपाळि • Parivārapāḷi |
२. चोदकादिपटिपत्ति
2. Codakādipaṭipatti
३६३. चोदकेन कथं पटिपज्जितब्बं? चुदितकेन कथं पटिपज्जितब्बं? सङ्घेन कथं पटिपज्जितब्बं? अनुविज्जकेन कथं पटिपज्जितब्बं? चोदकेन कथं पटिपज्जितब्बन्ति? चोदकेन पञ्चसु धम्मेसु पतिट्ठाय परो चोदेतब्बो। कालेन वक्खामि नो अकालेन, भूतेन वक्खामि नो अभूतेन, सण्हेन वक्खामि नो फरुसेन, अत्थसंहितेन वक्खामि नो अनत्थसंहितेन, मेत्ताचित्तो वक्खामि नो दोसन्तरोति – चोदकेन एवं पटिपज्जितब्बं। चुदितकेन कथं पटिपज्जितब्बन्ति? चुदितकेन द्वीसु धम्मेसु पटिपज्जितब्बं। सच्चे च अकुप्पे च – चुदितकेन एवं पटिपज्जितब्बं। सङ्घेन कथं पटिपज्जितब्बन्ति? सङ्घेन ओतिण्णानोतिण्णं जानितब्बं। सङ्घेन एवं पटिपज्जितब्बं। अनुविज्जकेन कथं पटिपज्जितब्बन्ति? अनुविज्जकेन येन धम्मेन येन विनयेन येन सत्थुसासनेन तं अधिकरणं वूपसम्मति तथा तं अधिकरणं वूपसमेतब्बं। अनुविज्जकेन एवं पटिपज्जितब्बं।
363. Codakena kathaṃ paṭipajjitabbaṃ? Cuditakena kathaṃ paṭipajjitabbaṃ? Saṅghena kathaṃ paṭipajjitabbaṃ? Anuvijjakena kathaṃ paṭipajjitabbaṃ? Codakena kathaṃ paṭipajjitabbanti? Codakena pañcasu dhammesu patiṭṭhāya paro codetabbo. Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṃhitena vakkhāmi no anatthasaṃhitena, mettācitto vakkhāmi no dosantaroti – codakena evaṃ paṭipajjitabbaṃ. Cuditakena kathaṃ paṭipajjitabbanti? Cuditakena dvīsu dhammesu paṭipajjitabbaṃ. Sacce ca akuppe ca – cuditakena evaṃ paṭipajjitabbaṃ. Saṅghena kathaṃ paṭipajjitabbanti? Saṅghena otiṇṇānotiṇṇaṃ jānitabbaṃ. Saṅghena evaṃ paṭipajjitabbaṃ. Anuvijjakena kathaṃ paṭipajjitabbanti? Anuvijjakena yena dhammena yena vinayena yena satthusāsanena taṃ adhikaraṇaṃ vūpasammati tathā taṃ adhikaraṇaṃ vūpasametabbaṃ. Anuvijjakena evaṃ paṭipajjitabbaṃ.
३६४.
364.
उपोसथो किमत्थाय, पवारणा किस्स कारणा।
Uposatho kimatthāya, pavāraṇā kissa kāraṇā;
परिवासो किमत्थाय, मूलायपटिकस्सना किस्स कारणा।
Parivāso kimatthāya, mūlāyapaṭikassanā kissa kāraṇā;
मानत्तं किमत्थाय, अब्भानं किस्स कारणा॥
Mānattaṃ kimatthāya, abbhānaṃ kissa kāraṇā.
उपोसथो सामग्गत्थाय, विसुद्धत्थाय पवारणा।
Uposatho sāmaggatthāya, visuddhatthāya pavāraṇā;
परिवासो मानत्तत्थाय, मूलायपटिकस्सना निग्गहत्थाय।
Parivāso mānattatthāya, mūlāyapaṭikassanā niggahatthāya;
मानत्तं अब्भानत्थाय, विसुद्धत्थाय अब्भानं॥
Mānattaṃ abbhānatthāya, visuddhatthāya abbhānaṃ.
छन्दा दोसा भया मोहा, थेरे च परिभासति।
Chandā dosā bhayā mohā, there ca paribhāsati;
कायस्स भेदा दुप्पञ्ञो, खतो उपहतिन्द्रियो।
Kāyassa bhedā duppañño, khato upahatindriyo;
निरयं गच्छति दुम्मेधो, न च सिक्खाय गारवो॥
Nirayaṃ gacchati dummedho, na ca sikkhāya gāravo.
न च आमिसं निस्साय।
Na ca āmisaṃ nissāya;
न च निस्साय पुग्गलं।
Na ca nissāya puggalaṃ;
उभो एते विवज्जेत्वा।
Ubho ete vivajjetvā;
यथाधम्मो तथा करे॥
Yathādhammo tathā kare.
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / चोदकपुच्छाविस्सज्जनावण्णना • Codakapucchāvissajjanāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / अनुविज्जककिच्चवण्णना • Anuvijjakakiccavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / अनुविज्जककिच्चवण्णना • Anuvijjakakiccavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / चोदकपुच्छाविस्सज्जना • Codakapucchāvissajjanā
