| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๒. โจทกาทิปฎิปตฺติ
2. Codakādipaṭipatti
๓๖๓. โจทเกน กถํ ปฎิปชฺชิตพฺพํ? จุทิตเกน กถํ ปฎิปชฺชิตพฺพํ? สเงฺฆน กถํ ปฎิปชฺชิตพฺพํ? อนุวิชฺชเกน กถํ ปฎิปชฺชิตพฺพํ? โจทเกน กถํ ปฎิปชฺชิตพฺพนฺติ? โจทเกน ปญฺจสุ ธเมฺมสุ ปติฎฺฐาย ปโร โจเทตโพฺพฯ กาเลน วกฺขามิ โน อกาเลน, ภูเตน วกฺขามิ โน อภูเตน, สเณฺหน วกฺขามิ โน ผรุเสน, อตฺถสํหิเตน วกฺขามิ โน อนตฺถสํหิเตน, เมตฺตาจิโตฺต วกฺขามิ โน โทสนฺตโรติ – โจทเกน เอวํ ปฎิปชฺชิตพฺพํฯ จุทิตเกน กถํ ปฎิปชฺชิตพฺพนฺติ? จุทิตเกน ทฺวีสุ ธเมฺมสุ ปฎิปชฺชิตพฺพํฯ สเจฺจ จ อกุเปฺป จ – จุทิตเกน เอวํ ปฎิปชฺชิตพฺพํฯ สเงฺฆน กถํ ปฎิปชฺชิตพฺพนฺติ? สเงฺฆน โอติณฺณาโนติณฺณํ ชานิตพฺพํฯ สเงฺฆน เอวํ ปฎิปชฺชิตพฺพํฯ อนุวิชฺชเกน กถํ ปฎิปชฺชิตพฺพนฺติ? อนุวิชฺชเกน เยน ธเมฺมน เยน วินเยน เยน สตฺถุสาสเนน ตํ อธิกรณํ วูปสมฺมติ ตถา ตํ อธิกรณํ วูปสเมตพฺพํฯ อนุวิชฺชเกน เอวํ ปฎิปชฺชิตพฺพํฯ
363. Codakena kathaṃ paṭipajjitabbaṃ? Cuditakena kathaṃ paṭipajjitabbaṃ? Saṅghena kathaṃ paṭipajjitabbaṃ? Anuvijjakena kathaṃ paṭipajjitabbaṃ? Codakena kathaṃ paṭipajjitabbanti? Codakena pañcasu dhammesu patiṭṭhāya paro codetabbo. Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṃhitena vakkhāmi no anatthasaṃhitena, mettācitto vakkhāmi no dosantaroti – codakena evaṃ paṭipajjitabbaṃ. Cuditakena kathaṃ paṭipajjitabbanti? Cuditakena dvīsu dhammesu paṭipajjitabbaṃ. Sacce ca akuppe ca – cuditakena evaṃ paṭipajjitabbaṃ. Saṅghena kathaṃ paṭipajjitabbanti? Saṅghena otiṇṇānotiṇṇaṃ jānitabbaṃ. Saṅghena evaṃ paṭipajjitabbaṃ. Anuvijjakena kathaṃ paṭipajjitabbanti? Anuvijjakena yena dhammena yena vinayena yena satthusāsanena taṃ adhikaraṇaṃ vūpasammati tathā taṃ adhikaraṇaṃ vūpasametabbaṃ. Anuvijjakena evaṃ paṭipajjitabbaṃ.
๓๖๔.
364.
อุโปสโถ กิมตฺถาย, ปวารณา กิสฺส การณา;
Uposatho kimatthāya, pavāraṇā kissa kāraṇā;
ปริวาโส กิมตฺถาย, มูลายปฎิกสฺสนา กิสฺส การณา;
Parivāso kimatthāya, mūlāyapaṭikassanā kissa kāraṇā;
มานตฺตํ กิมตฺถาย, อพฺภานํ กิสฺส การณาฯ
Mānattaṃ kimatthāya, abbhānaṃ kissa kāraṇā.
อุโปสโถ สามคฺคตฺถาย, วิสุทฺธตฺถาย ปวารณา;
Uposatho sāmaggatthāya, visuddhatthāya pavāraṇā;
ปริวาโส มานตฺตตฺถาย, มูลายปฎิกสฺสนา นิคฺคหตฺถาย;
Parivāso mānattatthāya, mūlāyapaṭikassanā niggahatthāya;
มานตฺตํ อพฺภานตฺถาย, วิสุทฺธตฺถาย อพฺภานํฯ
Mānattaṃ abbhānatthāya, visuddhatthāya abbhānaṃ.
ฉนฺทา โทสา ภยา โมหา, เถเร จ ปริภาสติ;
Chandā dosā bhayā mohā, there ca paribhāsati;
กายสฺส เภทา ทุปฺปโญฺญ, ขโต อุปหตินฺทฺริโย;
Kāyassa bhedā duppañño, khato upahatindriyo;
นิรยํ คจฺฉติ ทุเมฺมโธ, น จ สิกฺขาย คารโวฯ
Nirayaṃ gacchati dummedho, na ca sikkhāya gāravo.
น จ อามิสํ นิสฺสาย;
Na ca āmisaṃ nissāya;
น จ นิสฺสาย ปุคฺคลํ;
Na ca nissāya puggalaṃ;
อุโภ เอเต วิวเชฺชตฺวา;
Ubho ete vivajjetvā;
ยถาธโมฺม ตถา กเรฯ
Yathādhammo tathā kare.
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / โจทกปุจฺฉาวิสฺสชฺชนาวณฺณนา • Codakapucchāvissajjanāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / อนุวิชฺชกกิจฺจวณฺณนา • Anuvijjakakiccavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / อนุวิชฺชกกิจฺจวณฺณนา • Anuvijjakakiccavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / โจทกปุจฺฉาวิสฺสชฺชนา • Codakapucchāvissajjanā
