| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
២. ចោទកាទិបដិបត្តិ
2. Codakādipaṭipatti
៣៦៣. ចោទកេន កថំ បដិបជ្ជិតព្ពំ? ចុទិតកេន កថំ បដិបជ្ជិតព្ពំ? សង្ឃេន កថំ បដិបជ្ជិតព្ពំ? អនុវិជ្ជកេន កថំ បដិបជ្ជិតព្ពំ? ចោទកេន កថំ បដិបជ្ជិតព្ពន្តិ? ចោទកេន បញ្ចសុ ធម្មេសុ បតិដ្ឋាយ បរោ ចោទេតព្ពោ។ កាលេន វក្ខាមិ នោ អកាលេន, ភូតេន វក្ខាមិ នោ អភូតេន, សណ្ហេន វក្ខាមិ នោ ផរុសេន, អត្ថសំហិតេន វក្ខាមិ នោ អនត្ថសំហិតេន, មេត្តាចិត្តោ វក្ខាមិ នោ ទោសន្តរោតិ – ចោទកេន ឯវំ បដិបជ្ជិតព្ពំ។ ចុទិតកេន កថំ បដិបជ្ជិតព្ពន្តិ? ចុទិតកេន ទ្វីសុ ធម្មេសុ បដិបជ្ជិតព្ពំ។ សច្ចេ ច អកុប្បេ ច – ចុទិតកេន ឯវំ បដិបជ្ជិតព្ពំ។ សង្ឃេន កថំ បដិបជ្ជិតព្ពន្តិ? សង្ឃេន ឱតិណ្ណានោតិណ្ណំ ជានិតព្ពំ។ សង្ឃេន ឯវំ បដិបជ្ជិតព្ពំ។ អនុវិជ្ជកេន កថំ បដិបជ្ជិតព្ពន្តិ? អនុវិជ្ជកេន យេន ធម្មេន យេន វិនយេន យេន សត្ថុសាសនេន តំ អធិករណំ វូបសម្មតិ តថា តំ អធិករណំ វូបសមេតព្ពំ។ អនុវិជ្ជកេន ឯវំ បដិបជ្ជិតព្ពំ។
363. Codakena kathaṃ paṭipajjitabbaṃ? Cuditakena kathaṃ paṭipajjitabbaṃ? Saṅghena kathaṃ paṭipajjitabbaṃ? Anuvijjakena kathaṃ paṭipajjitabbaṃ? Codakena kathaṃ paṭipajjitabbanti? Codakena pañcasu dhammesu patiṭṭhāya paro codetabbo. Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṃhitena vakkhāmi no anatthasaṃhitena, mettācitto vakkhāmi no dosantaroti – codakena evaṃ paṭipajjitabbaṃ. Cuditakena kathaṃ paṭipajjitabbanti? Cuditakena dvīsu dhammesu paṭipajjitabbaṃ. Sacce ca akuppe ca – cuditakena evaṃ paṭipajjitabbaṃ. Saṅghena kathaṃ paṭipajjitabbanti? Saṅghena otiṇṇānotiṇṇaṃ jānitabbaṃ. Saṅghena evaṃ paṭipajjitabbaṃ. Anuvijjakena kathaṃ paṭipajjitabbanti? Anuvijjakena yena dhammena yena vinayena yena satthusāsanena taṃ adhikaraṇaṃ vūpasammati tathā taṃ adhikaraṇaṃ vūpasametabbaṃ. Anuvijjakena evaṃ paṭipajjitabbaṃ.
៣៦៤.
364.
ឧបោសថោ កិមត្ថាយ, បវារណា កិស្ស ការណា;
Uposatho kimatthāya, pavāraṇā kissa kāraṇā;
បរិវាសោ កិមត្ថាយ, មូលាយបដិកស្សនា កិស្ស ការណា;
Parivāso kimatthāya, mūlāyapaṭikassanā kissa kāraṇā;
មានត្តំ កិមត្ថាយ, អព្ភានំ កិស្ស ការណា។
Mānattaṃ kimatthāya, abbhānaṃ kissa kāraṇā.
ឧបោសថោ សាមគ្គត្ថាយ, វិសុទ្ធត្ថាយ បវារណា;
Uposatho sāmaggatthāya, visuddhatthāya pavāraṇā;
បរិវាសោ មានត្តត្ថាយ, មូលាយបដិកស្សនា និគ្គហត្ថាយ;
Parivāso mānattatthāya, mūlāyapaṭikassanā niggahatthāya;
មានត្តំ អព្ភានត្ថាយ, វិសុទ្ធត្ថាយ អព្ភានំ។
Mānattaṃ abbhānatthāya, visuddhatthāya abbhānaṃ.
ឆន្ទា ទោសា ភយា មោហា, ថេរេ ច បរិភាសតិ;
Chandā dosā bhayā mohā, there ca paribhāsati;
កាយស្ស ភេទា ទុប្បញ្ញោ, ខតោ ឧបហតិន្ទ្រិយោ;
Kāyassa bhedā duppañño, khato upahatindriyo;
និរយំ គច្ឆតិ ទុម្មេធោ, ន ច សិក្ខាយ គារវោ។
Nirayaṃ gacchati dummedho, na ca sikkhāya gāravo.
ន ច អាមិសំ និស្សាយ;
Na ca āmisaṃ nissāya;
ន ច និស្សាយ បុគ្គលំ;
Na ca nissāya puggalaṃ;
ឧភោ ឯតេ វិវជ្ជេត្វា;
Ubho ete vivajjetvā;
យថាធម្មោ តថា ករេ។
Yathādhammo tathā kare.
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ចោទកបុច្ឆាវិស្សជ្ជនាវណ្ណនា • Codakapucchāvissajjanāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / អនុវិជ្ជកកិច្ចវណ្ណនា • Anuvijjakakiccavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អនុវិជ្ជកកិច្ចវណ្ណនា • Anuvijjakakiccavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ចោទកបុច្ឆាវិស្សជ្ជនា • Codakapucchāvissajjanā
