| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. චොදකාදිපටිපත්‌ති
2. Codakādipaṭipatti
363. චොදකෙන කථං පටිපජ්‌ජිතබ්‌බං? චුදිතකෙන කථං පටිපජ්‌ජිතබ්‌බං? සඞ්‌ඝෙන කථං පටිපජ්‌ජිතබ්‌බං? අනුවිජ්‌ජකෙන කථං පටිපජ්‌ජිතබ්‌බං? චොදකෙන කථං පටිපජ්‌ජිතබ්‌බන්‌ති? චොදකෙන පඤ්‌චසු ධම්‌මෙසු පතිට්‌ඨාය පරො චොදෙතබ්‌බො. කාලෙන වක්‌ඛාමි නො අකාලෙන, භූතෙන වක්‌ඛාමි නො අභූතෙන, සණ්‌හෙන වක්‌ඛාමි නො ඵරුසෙන, අත්‌ථසංහිතෙන වක්‌ඛාමි නො අනත්‌ථසංහිතෙන, මෙත්‌තාචිත්‌තො වක්‌ඛාමි නො දොසන්‌තරොති – චොදකෙන එවං පටිපජ්‌ජිතබ්‌බං. චුදිතකෙන කථං පටිපජ්‌ජිතබ්‌බන්‌ති? චුදිතකෙන ද්‌වීසු ධම්‌මෙසු පටිපජ්‌ජිතබ්‌බං. සච්‌චෙ ච අකුප්‌පෙ ච – චුදිතකෙන එවං පටිපජ්‌ජිතබ්‌බං. සඞ්‌ඝෙන කථං පටිපජ්‌ජිතබ්‌බන්‌ති? සඞ්‌ඝෙන ඔතිණ්‌ණානොතිණ්‌ණං ජානිතබ්‌බං. සඞ්‌ඝෙන එවං පටිපජ්‌ජිතබ්‌බං. අනුවිජ්‌ජකෙන කථං පටිපජ්‌ජිතබ්‌බන්‌ති? අනුවිජ්‌ජකෙන යෙන ධම්‌මෙන යෙන විනයෙන යෙන සත්‌ථුසාසනෙන තං අධිකරණං වූපසම්‌මති තථා තං අධිකරණං වූපසමෙතබ්‌බං. අනුවිජ්‌ජකෙන එවං පටිපජ්‌ජිතබ්‌බං.
363. Codakena kathaṃ paṭipajjitabbaṃ? Cuditakena kathaṃ paṭipajjitabbaṃ? Saṅghena kathaṃ paṭipajjitabbaṃ? Anuvijjakena kathaṃ paṭipajjitabbaṃ? Codakena kathaṃ paṭipajjitabbanti? Codakena pañcasu dhammesu patiṭṭhāya paro codetabbo. Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṃhitena vakkhāmi no anatthasaṃhitena, mettācitto vakkhāmi no dosantaroti – codakena evaṃ paṭipajjitabbaṃ. Cuditakena kathaṃ paṭipajjitabbanti? Cuditakena dvīsu dhammesu paṭipajjitabbaṃ. Sacce ca akuppe ca – cuditakena evaṃ paṭipajjitabbaṃ. Saṅghena kathaṃ paṭipajjitabbanti? Saṅghena otiṇṇānotiṇṇaṃ jānitabbaṃ. Saṅghena evaṃ paṭipajjitabbaṃ. Anuvijjakena kathaṃ paṭipajjitabbanti? Anuvijjakena yena dhammena yena vinayena yena satthusāsanena taṃ adhikaraṇaṃ vūpasammati tathā taṃ adhikaraṇaṃ vūpasametabbaṃ. Anuvijjakena evaṃ paṭipajjitabbaṃ.
364.
364.
උපොසථො කිමත්‌ථාය, පවාරණා කිස්‌ස කාරණා;
Uposatho kimatthāya, pavāraṇā kissa kāraṇā;
පරිවාසො කිමත්‌ථාය, මූලායපටිකස්‌සනා කිස්‌ස කාරණා;
Parivāso kimatthāya, mūlāyapaṭikassanā kissa kāraṇā;
මානත්‌තං කිමත්‌ථාය, අබ්‌භානං කිස්‌ස කාරණා.
Mānattaṃ kimatthāya, abbhānaṃ kissa kāraṇā.
උපොසථො සාමග්‌ගත්‌ථාය, විසුද්‌ධත්‌ථාය පවාරණා;
Uposatho sāmaggatthāya, visuddhatthāya pavāraṇā;
පරිවාසො මානත්‌තත්‌ථාය, මූලායපටිකස්‌සනා නිග්‌ගහත්‌ථාය;
Parivāso mānattatthāya, mūlāyapaṭikassanā niggahatthāya;
මානත්‌තං අබ්‌භානත්‌ථාය, විසුද්‌ධත්‌ථාය අබ්‌භානං.
Mānattaṃ abbhānatthāya, visuddhatthāya abbhānaṃ.
ඡන්‌දා දොසා භයා මොහා, ථෙරෙ ච පරිභාසති;
Chandā dosā bhayā mohā, there ca paribhāsati;
කායස්‌ස භෙදා දුප්‌පඤ්‌ඤො, ඛතො උපහතින්‌ද්‍රියො;
Kāyassa bhedā duppañño, khato upahatindriyo;
නිරයං ගච්‌ඡති දුම්‌මෙධො, න ච සික්‌ඛාය ගාරවො.
Nirayaṃ gacchati dummedho, na ca sikkhāya gāravo.
න ච ආමිසං නිස්‌සාය;
Na ca āmisaṃ nissāya;
න ච නිස්‌සාය පුග්‌ගලං;
Na ca nissāya puggalaṃ;
උභො එතෙ විවජ්‌ජෙත්‌වා;
Ubho ete vivajjetvā;
යථාධම්‌මො තථා කරෙ.
Yathādhammo tathā kare.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / චොදකපුච්‌ඡාවිස්‌සජ්‌ජනාවණ්‌ණනා • Codakapucchāvissajjanāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අනුවිජ්‌ජකකිච්‌චවණ්‌ණනා • Anuvijjakakiccavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අනුවිජ්‌ජකකිච්‌චවණ්‌ණනා • Anuvijjakakiccavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / චොදකපුච්‌ඡාවිස්‌සජ්‌ජනා • Codakapucchāvissajjanā
