| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
চোদকপুচ্ছাৰিস্সজ্জনা
Codakapucchāvissajjanā
৩৬২-৩. সচ্চে চ অকুপ্পে চাতি পধানং সম্বন্ধট্ঠানং দস্সেন্তো আহ ‘‘পতিট্ঠাতব্ব’’ন্তি। ‘‘য’’ন্তিআদিনা সচ্চে পতিট্ঠাতব্বভাৰং দস্সেতি। যন্তি কম্মং। ‘‘ন চা’’তিআদিনা অকুপ্পে পতিট্ঠাতব্বভাৰং দস্সেতি। ওতিণ্ণঞ্চাতি ৰিনিচ্ছযং ওতিণ্ণঞ্চ। ‘‘ৰচন’’ন্তি ইমিনা ওতিণ্ণানোতিণ্ণসরূপং দস্সেতি। তত্রাতি পুরিমৰচনাপেক্খং। ‘‘ওতিণ্ণানোতিণ্ণং জানিতব্ব’’ন্তি ৰচনেতি হি অত্থো। চোদকস্স পমাণন্তি ‘‘ধম্মো’’তি ৰা ‘‘অধম্মো’’তি ৰা ‘‘বালো’’তি ৰা ‘‘পণ্ডিতো’’তি ৰা চোদকস্স পমাণং। চুদিতকস্স পমাণন্তি ধম্মচুদিতকো নু খো, নোতি চুদিতকস্স পমাণং। অনুৰিজ্জকস্স পমাণন্তি সক্কা নু খো ৰিনিচ্ছিতুং, নোতি অনুৰিজ্জকস্স পমাণং। অনুৰিজ্জকো ৰত্তব্বোতি সম্বন্ধো। যেন ধম্মেনাতিআদীসু ধম্মাদীনং সরূপং দস্সেন্তো আহ ‘‘ধম্মোতি ভূতং ৰত্থূ’’তিআদি। এতেন ধম্মেন চ এতেন ৰিনযেন চ এতেন সত্থুসাসনেন চাতি যোজনা। তস্মা অনুৰিজ্জকেন ৰূপসমেতব্বন্তি সম্বন্ধো। এত্থাতি অনুৰিজ্জকস্স পটিপজ্জিতব্বট্ঠানে।
362-3.Sacce ca akuppe cāti padhānaṃ sambandhaṭṭhānaṃ dassento āha ‘‘patiṭṭhātabba’’nti. ‘‘Ya’’ntiādinā sacce patiṭṭhātabbabhāvaṃ dasseti. Yanti kammaṃ. ‘‘Na cā’’tiādinā akuppe patiṭṭhātabbabhāvaṃ dasseti. Otiṇṇañcāti vinicchayaṃ otiṇṇañca. ‘‘Vacana’’nti iminā otiṇṇānotiṇṇasarūpaṃ dasseti. Tatrāti purimavacanāpekkhaṃ. ‘‘Otiṇṇānotiṇṇaṃ jānitabba’’nti vacaneti hi attho. Codakassa pamāṇanti ‘‘dhammo’’ti vā ‘‘adhammo’’ti vā ‘‘bālo’’ti vā ‘‘paṇḍito’’ti vā codakassa pamāṇaṃ. Cuditakassa pamāṇanti dhammacuditako nu kho, noti cuditakassa pamāṇaṃ. Anuvijjakassa pamāṇanti sakkā nu kho vinicchituṃ, noti anuvijjakassa pamāṇaṃ. Anuvijjako vattabboti sambandho. Yena dhammenātiādīsu dhammādīnaṃ sarūpaṃ dassento āha ‘‘dhammoti bhūtaṃ vatthū’’tiādi. Etena dhammena ca etena vinayena ca etena satthusāsanena cāti yojanā. Tasmā anuvijjakena vūpasametabbanti sambandho. Etthāti anuvijjakassa paṭipajjitabbaṭṭhāne.
অৰঞ্ঞন্তি অৰজাননং। ইমেতি থেরা। ‘‘খতত্তা’’তি ইমিনা অত্তনাৰ অত্তা খঞ্ঞতীতি খতোতি ৰচনত্থং দস্সেতি। উপহনিযন্তীতি উপহতানি, উপহতানি ইন্দ্রিযানি অনেনাতি উপহতিন্দ্রিযো। ‘‘পঞ্ঞায অভাৰতো’’তি ইমিনা দুম্মেধোতি এত্থ দুসদ্দো অভাৰত্থো, মেধাসদ্দো পঞ্ঞাপরিযাযোতি দস্সেতি। নত্থি মেধা এতস্সাতি দুম্মেধোতি নিব্বচনং কাতব্বং। খতো…পে॰… দুম্মেধো সো অনুৰিজ্জকো উপগচ্ছতীতি যোজনা। তস্মাতি যস্মা উপগচ্ছতি, তস্মা ৰুত্তন্তি সম্বন্ধো। তস্সাতি পাঠস্স, গাথায ৰা। ৰিত্থারং দস্সেন্তো আহ ‘‘চুদিতকচোদকেসু হী’’তিআদি। উভোপেতেতি উভোপি এতে আমিসপুগ্গলনিস্সযে। ধম্মোতি সাসনধম্মো। ইতীতি অযমত্থো।
Avaññanti avajānanaṃ. Imeti therā. ‘‘Khatattā’’ti iminā attanāva attā khaññatīti khatoti vacanatthaṃ dasseti. Upahaniyantīti upahatāni, upahatāni indriyāni anenāti upahatindriyo. ‘‘Paññāya abhāvato’’ti iminā dummedhoti ettha dusaddo abhāvattho, medhāsaddo paññāpariyāyoti dasseti. Natthi medhā etassāti dummedhoti nibbacanaṃ kātabbaṃ. Khato…pe… dummedho so anuvijjako upagacchatīti yojanā. Tasmāti yasmā upagacchati, tasmā vuttanti sambandho. Tassāti pāṭhassa, gāthāya vā. Vitthāraṃ dassento āha ‘‘cuditakacodakesu hī’’tiādi. Ubhopeteti ubhopi ete āmisapuggalanissaye. Dhammoti sāsanadhammo. Itīti ayamattho.
উপকণ্ণকং জপ্পতীতি এত্থ কণ্ণস্স সমীপং উপকণ্ণং, তদেৰ উপকণ্ণকন্তি দস্সেন্তো আহ ‘‘এৰং কথেহী’’তিআদি। ‘‘কণ্ণমূলে’’তি ইমিনা উপকণ্ণকন্তি এত্থ উপসদ্দস্স সমীপত্থং দস্সেতি। মন্তেতীতি কথেতি। ইমিনা জপ্পধাতুযা কথনত্থং দস্সেতি। জিম্হং পেক্খতীতি এত্থ জিম্হসদ্দো কুটিলৰাচকো, কুটিলং নাম অত্থতো ইধ দোসোতি আহ ‘‘দোসমেৰা’’তি।
Upakaṇṇakaṃ jappatīti ettha kaṇṇassa samīpaṃ upakaṇṇaṃ, tadeva upakaṇṇakanti dassento āha ‘‘evaṃ kathehī’’tiādi. ‘‘Kaṇṇamūle’’ti iminā upakaṇṇakanti ettha upasaddassa samīpatthaṃ dasseti. Mantetīti katheti. Iminā jappadhātuyā kathanatthaṃ dasseti. Jimhaṃ pekkhatīti ettha jimhasaddo kuṭilavācako, kuṭilaṃ nāma atthato idha dosoti āha ‘‘dosamevā’’ti.
কথানুসন্ধীতি চুদিতকঅনুৰিজ্জকানং কথায অনুসন্ধি। ৰিনিচ্ছযানুসন্ধীতি অনুৰিজ্জকেন কতস্স আপত্তানাপত্তিৰিনিচ্ছযস্স অনুসন্ধি। সব্বত্থাতি চোদনাকণ্ডে।
Kathānusandhīti cuditakaanuvijjakānaṃ kathāya anusandhi. Vinicchayānusandhīti anuvijjakena katassa āpattānāpattivinicchayassa anusandhi. Sabbatthāti codanākaṇḍe.
ইতি চোদনাকণ্ডৰণ্ণনায যোজনা সমত্তা।
Iti codanākaṇḍavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
১. অনুৰিজ্জকঅনুযোগো • 1. Anuvijjakaanuyogo
২. চোদকাদিপটিপত্তি • 2. Codakādipaṭipatti
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / চোদকপুচ্ছাৰিস্সজ্জনাৰণ্ণনা • Codakapucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অনুৰিজ্জককিচ্চৰণ্ণনা • Anuvijjakakiccavaṇṇanā
