| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಚೋದಕಪುಚ್ಛಾವಿಸ್ಸಜ್ಜನಾ
Codakapucchāvissajjanā
೩೬೨-೩. ಸಚ್ಚೇ ಚ ಅಕುಪ್ಪೇ ಚಾತಿ ಪಧಾನಂ ಸಮ್ಬನ್ಧಟ್ಠಾನಂ ದಸ್ಸೇನ್ತೋ ಆಹ ‘‘ಪತಿಟ್ಠಾತಬ್ಬ’’ನ್ತಿ। ‘‘ಯ’’ನ್ತಿಆದಿನಾ ಸಚ್ಚೇ ಪತಿಟ್ಠಾತಬ್ಬಭಾವಂ ದಸ್ಸೇತಿ। ಯನ್ತಿ ಕಮ್ಮಂ। ‘‘ನ ಚಾ’’ತಿಆದಿನಾ ಅಕುಪ್ಪೇ ಪತಿಟ್ಠಾತಬ್ಬಭಾವಂ ದಸ್ಸೇತಿ। ಓತಿಣ್ಣಞ್ಚಾತಿ ವಿನಿಚ್ಛಯಂ ಓತಿಣ್ಣಞ್ಚ। ‘‘ವಚನ’’ನ್ತಿ ಇಮಿನಾ ಓತಿಣ್ಣಾನೋತಿಣ್ಣಸರೂಪಂ ದಸ್ಸೇತಿ। ತತ್ರಾತಿ ಪುರಿಮವಚನಾಪೇಕ್ಖಂ। ‘‘ಓತಿಣ್ಣಾನೋತಿಣ್ಣಂ ಜಾನಿತಬ್ಬ’’ನ್ತಿ ವಚನೇತಿ ಹಿ ಅತ್ಥೋ। ಚೋದಕಸ್ಸ ಪಮಾಣನ್ತಿ ‘‘ಧಮ್ಮೋ’’ತಿ ವಾ ‘‘ಅಧಮ್ಮೋ’’ತಿ ವಾ ‘‘ಬಾಲೋ’’ತಿ ವಾ ‘‘ಪಣ್ಡಿತೋ’’ತಿ ವಾ ಚೋದಕಸ್ಸ ಪಮಾಣಂ। ಚುದಿತಕಸ್ಸ ಪಮಾಣನ್ತಿ ಧಮ್ಮಚುದಿತಕೋ ನು ಖೋ, ನೋತಿ ಚುದಿತಕಸ್ಸ ಪಮಾಣಂ। ಅನುವಿಜ್ಜಕಸ್ಸ ಪಮಾಣನ್ತಿ ಸಕ್ಕಾ ನು ಖೋ ವಿನಿಚ್ಛಿತುಂ, ನೋತಿ ಅನುವಿಜ್ಜಕಸ್ಸ ಪಮಾಣಂ। ಅನುವಿಜ್ಜಕೋ ವತ್ತಬ್ಬೋತಿ ಸಮ್ಬನ್ಧೋ। ಯೇನ ಧಮ್ಮೇನಾತಿಆದೀಸು ಧಮ್ಮಾದೀನಂ ಸರೂಪಂ ದಸ್ಸೇನ್ತೋ ಆಹ ‘‘ಧಮ್ಮೋತಿ ಭೂತಂ ವತ್ಥೂ’’ತಿಆದಿ। ಏತೇನ ಧಮ್ಮೇನ ಚ ಏತೇನ ವಿನಯೇನ ಚ ಏತೇನ ಸತ್ಥುಸಾಸನೇನ ಚಾತಿ ಯೋಜನಾ। ತಸ್ಮಾ ಅನುವಿಜ್ಜಕೇನ ವೂಪಸಮೇತಬ್ಬನ್ತಿ ಸಮ್ಬನ್ಧೋ। ಏತ್ಥಾತಿ ಅನುವಿಜ್ಜಕಸ್ಸ ಪಟಿಪಜ್ಜಿತಬ್ಬಟ್ಠಾನೇ।
362-3.Sacce ca akuppe cāti padhānaṃ sambandhaṭṭhānaṃ dassento āha ‘‘patiṭṭhātabba’’nti. ‘‘Ya’’ntiādinā sacce patiṭṭhātabbabhāvaṃ dasseti. Yanti kammaṃ. ‘‘Na cā’’tiādinā akuppe patiṭṭhātabbabhāvaṃ dasseti. Otiṇṇañcāti vinicchayaṃ otiṇṇañca. ‘‘Vacana’’nti iminā otiṇṇānotiṇṇasarūpaṃ dasseti. Tatrāti purimavacanāpekkhaṃ. ‘‘Otiṇṇānotiṇṇaṃ jānitabba’’nti vacaneti hi attho. Codakassa pamāṇanti ‘‘dhammo’’ti vā ‘‘adhammo’’ti vā ‘‘bālo’’ti vā ‘‘paṇḍito’’ti vā codakassa pamāṇaṃ. Cuditakassa pamāṇanti dhammacuditako nu kho, noti cuditakassa pamāṇaṃ. Anuvijjakassa pamāṇanti sakkā nu kho vinicchituṃ, noti anuvijjakassa pamāṇaṃ. Anuvijjako vattabboti sambandho. Yena dhammenātiādīsu dhammādīnaṃ sarūpaṃ dassento āha ‘‘dhammoti bhūtaṃ vatthū’’tiādi. Etena dhammena ca etena vinayena ca etena satthusāsanena cāti yojanā. Tasmā anuvijjakena vūpasametabbanti sambandho. Etthāti anuvijjakassa paṭipajjitabbaṭṭhāne.
ಅವಞ್ಞನ್ತಿ ಅವಜಾನನಂ। ಇಮೇತಿ ಥೇರಾ। ‘‘ಖತತ್ತಾ’’ತಿ ಇಮಿನಾ ಅತ್ತನಾವ ಅತ್ತಾ ಖಞ್ಞತೀತಿ ಖತೋತಿ ವಚನತ್ಥಂ ದಸ್ಸೇತಿ। ಉಪಹನಿಯನ್ತೀತಿ ಉಪಹತಾನಿ, ಉಪಹತಾನಿ ಇನ್ದ್ರಿಯಾನಿ ಅನೇನಾತಿ ಉಪಹತಿನ್ದ್ರಿಯೋ। ‘‘ಪಞ್ಞಾಯ ಅಭಾವತೋ’’ತಿ ಇಮಿನಾ ದುಮ್ಮೇಧೋತಿ ಏತ್ಥ ದುಸದ್ದೋ ಅಭಾವತ್ಥೋ, ಮೇಧಾಸದ್ದೋ ಪಞ್ಞಾಪರಿಯಾಯೋತಿ ದಸ್ಸೇತಿ। ನತ್ಥಿ ಮೇಧಾ ಏತಸ್ಸಾತಿ ದುಮ್ಮೇಧೋತಿ ನಿಬ್ಬಚನಂ ಕಾತಬ್ಬಂ। ಖತೋ…ಪೇ॰… ದುಮ್ಮೇಧೋ ಸೋ ಅನುವಿಜ್ಜಕೋ ಉಪಗಚ್ಛತೀತಿ ಯೋಜನಾ। ತಸ್ಮಾತಿ ಯಸ್ಮಾ ಉಪಗಚ್ಛತಿ, ತಸ್ಮಾ ವುತ್ತನ್ತಿ ಸಮ್ಬನ್ಧೋ। ತಸ್ಸಾತಿ ಪಾಠಸ್ಸ, ಗಾಥಾಯ ವಾ। ವಿತ್ಥಾರಂ ದಸ್ಸೇನ್ತೋ ಆಹ ‘‘ಚುದಿತಕಚೋದಕೇಸು ಹೀ’’ತಿಆದಿ। ಉಭೋಪೇತೇತಿ ಉಭೋಪಿ ಏತೇ ಆಮಿಸಪುಗ್ಗಲನಿಸ್ಸಯೇ। ಧಮ್ಮೋತಿ ಸಾಸನಧಮ್ಮೋ। ಇತೀತಿ ಅಯಮತ್ಥೋ।
Avaññanti avajānanaṃ. Imeti therā. ‘‘Khatattā’’ti iminā attanāva attā khaññatīti khatoti vacanatthaṃ dasseti. Upahaniyantīti upahatāni, upahatāni indriyāni anenāti upahatindriyo. ‘‘Paññāya abhāvato’’ti iminā dummedhoti ettha dusaddo abhāvattho, medhāsaddo paññāpariyāyoti dasseti. Natthi medhā etassāti dummedhoti nibbacanaṃ kātabbaṃ. Khato…pe… dummedho so anuvijjako upagacchatīti yojanā. Tasmāti yasmā upagacchati, tasmā vuttanti sambandho. Tassāti pāṭhassa, gāthāya vā. Vitthāraṃ dassento āha ‘‘cuditakacodakesu hī’’tiādi. Ubhopeteti ubhopi ete āmisapuggalanissaye. Dhammoti sāsanadhammo. Itīti ayamattho.
ಉಪಕಣ್ಣಕಂ ಜಪ್ಪತೀತಿ ಏತ್ಥ ಕಣ್ಣಸ್ಸ ಸಮೀಪಂ ಉಪಕಣ್ಣಂ, ತದೇವ ಉಪಕಣ್ಣಕನ್ತಿ ದಸ್ಸೇನ್ತೋ ಆಹ ‘‘ಏವಂ ಕಥೇಹೀ’’ತಿಆದಿ। ‘‘ಕಣ್ಣಮೂಲೇ’’ತಿ ಇಮಿನಾ ಉಪಕಣ್ಣಕನ್ತಿ ಏತ್ಥ ಉಪಸದ್ದಸ್ಸ ಸಮೀಪತ್ಥಂ ದಸ್ಸೇತಿ। ಮನ್ತೇತೀತಿ ಕಥೇತಿ। ಇಮಿನಾ ಜಪ್ಪಧಾತುಯಾ ಕಥನತ್ಥಂ ದಸ್ಸೇತಿ। ಜಿಮ್ಹಂ ಪೇಕ್ಖತೀತಿ ಏತ್ಥ ಜಿಮ್ಹಸದ್ದೋ ಕುಟಿಲವಾಚಕೋ, ಕುಟಿಲಂ ನಾಮ ಅತ್ಥತೋ ಇಧ ದೋಸೋತಿ ಆಹ ‘‘ದೋಸಮೇವಾ’’ತಿ।
Upakaṇṇakaṃ jappatīti ettha kaṇṇassa samīpaṃ upakaṇṇaṃ, tadeva upakaṇṇakanti dassento āha ‘‘evaṃ kathehī’’tiādi. ‘‘Kaṇṇamūle’’ti iminā upakaṇṇakanti ettha upasaddassa samīpatthaṃ dasseti. Mantetīti katheti. Iminā jappadhātuyā kathanatthaṃ dasseti. Jimhaṃ pekkhatīti ettha jimhasaddo kuṭilavācako, kuṭilaṃ nāma atthato idha dosoti āha ‘‘dosamevā’’ti.
ಕಥಾನುಸನ್ಧೀತಿ ಚುದಿತಕಅನುವಿಜ್ಜಕಾನಂ ಕಥಾಯ ಅನುಸನ್ಧಿ। ವಿನಿಚ್ಛಯಾನುಸನ್ಧೀತಿ ಅನುವಿಜ್ಜಕೇನ ಕತಸ್ಸ ಆಪತ್ತಾನಾಪತ್ತಿವಿನಿಚ್ಛಯಸ್ಸ ಅನುಸನ್ಧಿ। ಸಬ್ಬತ್ಥಾತಿ ಚೋದನಾಕಣ್ಡೇ।
Kathānusandhīti cuditakaanuvijjakānaṃ kathāya anusandhi. Vinicchayānusandhīti anuvijjakena katassa āpattānāpattivinicchayassa anusandhi. Sabbatthāti codanākaṇḍe.
ಇತಿ ಚೋದನಾಕಣ್ಡವಣ್ಣನಾಯ ಯೋಜನಾ ಸಮತ್ತಾ।
Iti codanākaṇḍavaṇṇanāya yojanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi
೧. ಅನುವಿಜ್ಜಕಅನುಯೋಗೋ • 1. Anuvijjakaanuyogo
೨. ಚೋದಕಾದಿಪಟಿಪತ್ತಿ • 2. Codakādipaṭipatti
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಚೋದಕಪುಚ್ಛಾವಿಸ್ಸಜ್ಜನಾವಣ್ಣನಾ • Codakapucchāvissajjanāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅನುವಿಜ್ಜಕಕಿಚ್ಚವಣ್ಣನಾ • Anuvijjakakiccavaṇṇanā
