| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
சோத³கபுச்சா²விஸ்ஸஜ்ஜனாவண்ணனா
Codakapucchāvissajjanāvaṇṇanā
362-363. சோத³னாய கோ ஆதீ³திஆதி³புச்சா²னங் விஸ்ஸஜ்ஜனே ஸச்சே ச அகுப்பே சாதி ஸச்சே பதிட்டா²தப்³ப³ங் அகுப்பே ச. யங் கதங் வா ந கதங் வா, ததே³வ வத்தப்³ப³ங், ந ச சோத³கே வா அனுவிஜ்ஜகே வா ஸங்கே⁴ வா கோபோ உப்பாதே³தப்³போ³. ஓதிண்ணானோதிண்ணங் ஜானிதப்³ப³ந்தி ஓதிண்ணஞ்ச அனோதிண்ணஞ்ச வசனங் ஜானிதப்³ப³ங். தத்ராயங் ஜானநவிதி⁴ – எத்தகா சோத³கஸ்ஸ புப்³ப³கதா², எத்தகா பச்சி²மகதா², எத்தகா சுதி³தகஸ்ஸ புப்³ப³கதா², எத்தகா பச்சி²மகதா²தி ஜானிதப்³பா³ . சோத³கஸ்ஸ பமாணங் க³ண்ஹிதப்³ப³ங், சுதி³தகஸ்ஸ பமாணங் க³ண்ஹிதப்³ப³ங், அனுவிஜ்ஜகஸ்ஸ பமாணங் க³ண்ஹிதப்³ப³ங், அனுவிஜ்ஜகோ அப்பமத்தகம்பி அஹாபெந்தோ ‘‘ஆவுஸோ ஸமன்னாஹரித்வா உஜுங் கத்வா ஆஹரா’’தி வத்தப்³போ³, ஸங்கே⁴ன ஏவங் படிபஜ்ஜிதப்³ப³ங். யேன த⁴ம்மேன யேன வினயேன யேன ஸத்து²ஸாஸனேன தங் அதி⁴கரணங் வூபஸம்மதீதி எத்த² த⁴ம்மோதி பூ⁴தங் வத்து². வினயோதி சோத³னா சேவ ஸாரணா ச. ஸத்து²ஸாஸனந்தி ஞத்திஸம்பதா³ சேவ அனுஸ்ஸாவனஸம்பதா³ ச. ஏதேன ஹி த⁴ம்மேன ச வினயேன ச ஸத்து²ஸாஸனேன ச அதி⁴கரணங் வூபஸமதி, தஸ்மா அனுவிஜ்ஜகேன பூ⁴தேன வத்து²னா சோதெ³த்வா ஆபத்திங் ஸாரெத்வா ஞத்திஸம்பதா³ய சேவ அனுஸ்ஸாவனஸம்பதா³ய ச தங் அதி⁴கரணங் வூபஸமேதப்³ப³ங், அனுவிஜ்ஜகேன ஏவங் படிபஜ்ஜிதப்³ப³ங். ஸேஸமெத்த² உத்தானமேவ.
362-363.Codanāyako ādītiādipucchānaṃ vissajjane sacce ca akuppe cāti sacce patiṭṭhātabbaṃ akuppe ca. Yaṃ kataṃ vā na kataṃ vā, tadeva vattabbaṃ, na ca codake vā anuvijjake vā saṅghe vā kopo uppādetabbo. Otiṇṇānotiṇṇaṃ jānitabbanti otiṇṇañca anotiṇṇañca vacanaṃ jānitabbaṃ. Tatrāyaṃ jānanavidhi – ettakā codakassa pubbakathā, ettakā pacchimakathā, ettakā cuditakassa pubbakathā, ettakā pacchimakathāti jānitabbā . Codakassa pamāṇaṃ gaṇhitabbaṃ, cuditakassa pamāṇaṃ gaṇhitabbaṃ, anuvijjakassa pamāṇaṃ gaṇhitabbaṃ, anuvijjako appamattakampi ahāpento ‘‘āvuso samannāharitvā ujuṃ katvā āharā’’ti vattabbo, saṅghena evaṃ paṭipajjitabbaṃ. Yena dhammena yena vinayena yena satthusāsanena taṃ adhikaraṇaṃ vūpasammatīti ettha dhammoti bhūtaṃ vatthu. Vinayoti codanā ceva sāraṇā ca. Satthusāsananti ñattisampadā ceva anussāvanasampadā ca. Etena hi dhammena ca vinayena ca satthusāsanena ca adhikaraṇaṃ vūpasamati, tasmā anuvijjakena bhūtena vatthunā codetvā āpattiṃ sāretvā ñattisampadāya ceva anussāvanasampadāya ca taṃ adhikaraṇaṃ vūpasametabbaṃ, anuvijjakena evaṃ paṭipajjitabbaṃ. Sesamettha uttānameva.
364. உபோஸதோ² கிமத்தா²யாதிஆதி³புச்சா²விஸ்ஸஜ்ஜனம்பி உத்தானமேவ. அவஸானகா³தா²ஸு தே²ரே ச பரிபா⁴ஸதீதி அவமஞ்ஞங் கரொந்தோ ‘‘கிங் இமே ஜானந்தீ’’தி பரிபா⁴ஸதி. க²தோ உபஹதிந்த்³ரியோதி தாய ச²ந்தா³தி³கா³மிதாய தேன ச பரிபா⁴ஸனேன அத்தனா அத்தனோ க²தத்தா க²தோ. ஸத்³தா⁴தீ³னஞ்ச இந்த்³ரியானங் உபஹதத்தா உபஹதிந்த்³ரியோ. நிரயங் க³ச்ச²தி து³ம்மேதோ⁴, ந ச ஸிக்கா²ய கா³ரவோதி ஸோ க²தோ உபஹதிந்த்³ரியோ பஞ்ஞாய அபா⁴வதோ து³ம்மேதோ⁴ தீஸு ஸிக்கா²ஸு அஸிக்க²னதோ ந ச ஸிக்கா²ய கா³ரவோ காயஸ்ஸ பே⁴தா³ நிரயமேவ உபக³ச்ச²தி, தஸ்மா ந ச ஆமிஸங் நிஸ்ஸாய…பே॰… யதா² த⁴ம்மோ ததா² கரேதி. தஸ்ஸத்தோ² ந ச ஆமிஸங் நிஸ்ஸாய கரே, சுதி³தகசோத³கேஸு ஹி அஞ்ஞதரேன தி³ன்னங் சீவராதி³ஆமிஸங் க³ண்ஹந்தோ ஆமிஸங் நிஸ்ஸாய கரோதி, ஏவங் ந கரெய்ய. ந ச நிஸ்ஸாய புக்³க³லந்தி ‘‘அயங் மே உபஜ்ஜா²யோ வா ஆசரியோ வா’’திஆதி³னா நயேன ச²ந்தா³தீ³ஹி க³ச்ச²ந்தோ புக்³க³லங் நிஸ்ஸாய கரோதி, ஏவங் ந கரெய்ய. அத² கோ² உபோ⁴பேதே விவஜ்ஜெத்வா யதா² த⁴ம்மோ டி²தோ, ததே²வ கரெய்யாதி.
364.Uposatho kimatthāyātiādipucchāvissajjanampi uttānameva. Avasānagāthāsu there ca paribhāsatīti avamaññaṃ karonto ‘‘kiṃ ime jānantī’’ti paribhāsati. Khato upahatindriyoti tāya chandādigāmitāya tena ca paribhāsanena attanā attano khatattā khato. Saddhādīnañca indriyānaṃ upahatattā upahatindriyo. Nirayaṃ gacchati dummedho, na ca sikkhāya gāravoti so khato upahatindriyo paññāya abhāvato dummedho tīsu sikkhāsu asikkhanato na ca sikkhāya gāravo kāyassa bhedā nirayameva upagacchati, tasmā na ca āmisaṃ nissāya…pe… yathā dhammo tathā kareti. Tassattho na ca āmisaṃ nissāya kare, cuditakacodakesu hi aññatarena dinnaṃ cīvarādiāmisaṃ gaṇhanto āmisaṃ nissāya karoti, evaṃ na kareyya. Na ca nissāya puggalanti ‘‘ayaṃ me upajjhāyo vā ācariyo vā’’tiādinā nayena chandādīhi gacchanto puggalaṃ nissāya karoti, evaṃ na kareyya. Atha kho ubhopete vivajjetvā yathā dhammo ṭhito, tatheva kareyyāti.
உபகண்ணகங் ஜப்பதீதி ‘‘ஏவங் கதே²ஹி, மா ஏவங் கத²யித்தா²’’தி கண்ணமூலே மந்தேதி. ஜிம்ஹங் பெக்க²தீதி தோ³ஸமேவ க³வேஸதி. வீதிஹரதீதி வினிச்ச²யங் ஹாபேதி. கும்மக்³க³ங் படிஸேவதீதி ஆபத்திங் தீ³பேதி.
Upakaṇṇakaṃ jappatīti ‘‘evaṃ kathehi, mā evaṃ kathayitthā’’ti kaṇṇamūle manteti. Jimhaṃ pekkhatīti dosameva gavesati. Vītiharatīti vinicchayaṃ hāpeti. Kummaggaṃ paṭisevatīti āpattiṃ dīpeti.
அகாலேன ச சோதே³தீதி அனோகாஸே அனஜ்ஜி²ட்டோ²வ சோதே³தி. புப்³பா³பரங் ந ஜானாதீதி புரிமகத²ஞ்ச பச்சி²மகத²ஞ்ச ந ஜானாதி.
Akālena ca codetīti anokāse anajjhiṭṭhova codeti. Pubbāparaṃ na jānātīti purimakathañca pacchimakathañca na jānāti.
அனுஸந்தி⁴வசனபத²ங் ந ஜானாதீதி கதா²னுஸந்தி⁴வினிச்ச²யானுஸந்தி⁴வஸேன வசனங் ந ஜானாதி. ஸேஸங் ஸப்³ப³த்த² உத்தானமேவாதி.
Anusandhivacanapathaṃna jānātīti kathānusandhivinicchayānusandhivasena vacanaṃ na jānāti. Sesaṃ sabbattha uttānamevāti.
சோத³னாகண்ட³வண்ணனா நிட்டி²தா.
Codanākaṇḍavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
1. அனுவிஜ்ஜகஅனுயோகோ³ • 1. Anuvijjakaanuyogo
2. சோத³காதி³படிபத்தி • 2. Codakādipaṭipatti
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுவிஜ்ஜககிச்சவண்ணனா • Anuvijjakakiccavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அனுவிஜ்ஜககிச்சவண்ணனா • Anuvijjakakiccavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / சோத³கபுச்சா²விஸ்ஸஜ்ஜனா • Codakapucchāvissajjanā
