| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
චොදකපුච්‌ඡාවිස්‌සජ්‌ජනාවණ්‌ණනා
Codakapucchāvissajjanāvaṇṇanā
362-363. චොදනාය කො ආදීතිආදිපුච්‌ඡානං විස්‌සජ්‌ජනෙ සච්‌චෙ ච අකුප්‌පෙ චාති සච්‌චෙ පතිට්‌ඨාතබ්‌බං අකුප්‌පෙ ච. යං කතං වා න කතං වා, තදෙව වත්‌තබ්‌බං, න ච චොදකෙ වා අනුවිජ්‌ජකෙ වා සඞ්‌ඝෙ වා කොපො උප්‌පාදෙතබ්‌බො. ඔතිණ්‌ණානොතිණ්‌ණං ජානිතබ්‌බන්‌ති ඔතිණ්‌ණඤ්‌ච අනොතිණ්‌ණඤ්‌ච වචනං ජානිතබ්‌බං. තත්‍රායං ජානනවිධි – එත්‌තකා චොදකස්‌ස පුබ්‌බකථා, එත්‌තකා පච්‌ඡිමකථා, එත්‌තකා චුදිතකස්‌ස පුබ්‌බකථා, එත්‌තකා පච්‌ඡිමකථාති ජානිතබ්‌බා . චොදකස්‌ස පමාණං ගණ්‌හිතබ්‌බං, චුදිතකස්‌ස පමාණං ගණ්‌හිතබ්‌බං, අනුවිජ්‌ජකස්‌ස පමාණං ගණ්‌හිතබ්‌බං, අනුවිජ්‌ජකො අප්‌පමත්‌තකම්‌පි අහාපෙන්‌තො ‘‘ආවුසො සමන්‌නාහරිත්‌වා උජුං කත්‌වා ආහරා’’ති වත්‌තබ්‌බො, සඞ්‌ඝෙන එවං පටිපජ්‌ජිතබ්‌බං. යෙන ධම්‌මෙන යෙන විනයෙන යෙන සත්‌ථුසාසනෙන තං අධිකරණං වූපසම්‌මතීති එත්‌ථ ධම්‌මොති භූතං වත්‌ථු. විනයොති චොදනා චෙව සාරණා ච. සත්‌ථුසාසනන්‌ති ඤත්‌තිසම්‌පදා චෙව අනුස්‌සාවනසම්‌පදා ච. එතෙන හි ධම්‌මෙන ච විනයෙන ච සත්‌ථුසාසනෙන ච අධිකරණං වූපසමති, තස්‌මා අනුවිජ්‌ජකෙන භූතෙන වත්‌ථුනා චොදෙත්‌වා ආපත්‌තිං සාරෙත්‌වා ඤත්‌තිසම්‌පදාය චෙව අනුස්‌සාවනසම්‌පදාය ච තං අධිකරණං වූපසමෙතබ්‌බං, අනුවිජ්‌ජකෙන එවං පටිපජ්‌ජිතබ්‌බං. සෙසමෙත්‌ථ උත්‌තානමෙව.
362-363.Codanāyako ādītiādipucchānaṃ vissajjane sacce ca akuppe cāti sacce patiṭṭhātabbaṃ akuppe ca. Yaṃ kataṃ vā na kataṃ vā, tadeva vattabbaṃ, na ca codake vā anuvijjake vā saṅghe vā kopo uppādetabbo. Otiṇṇānotiṇṇaṃ jānitabbanti otiṇṇañca anotiṇṇañca vacanaṃ jānitabbaṃ. Tatrāyaṃ jānanavidhi – ettakā codakassa pubbakathā, ettakā pacchimakathā, ettakā cuditakassa pubbakathā, ettakā pacchimakathāti jānitabbā . Codakassa pamāṇaṃ gaṇhitabbaṃ, cuditakassa pamāṇaṃ gaṇhitabbaṃ, anuvijjakassa pamāṇaṃ gaṇhitabbaṃ, anuvijjako appamattakampi ahāpento ‘‘āvuso samannāharitvā ujuṃ katvā āharā’’ti vattabbo, saṅghena evaṃ paṭipajjitabbaṃ. Yena dhammena yena vinayena yena satthusāsanena taṃ adhikaraṇaṃ vūpasammatīti ettha dhammoti bhūtaṃ vatthu. Vinayoti codanā ceva sāraṇā ca. Satthusāsananti ñattisampadā ceva anussāvanasampadā ca. Etena hi dhammena ca vinayena ca satthusāsanena ca adhikaraṇaṃ vūpasamati, tasmā anuvijjakena bhūtena vatthunā codetvā āpattiṃ sāretvā ñattisampadāya ceva anussāvanasampadāya ca taṃ adhikaraṇaṃ vūpasametabbaṃ, anuvijjakena evaṃ paṭipajjitabbaṃ. Sesamettha uttānameva.
364. උපොසථො කිමත්‌ථායාතිආදිපුච්‌ඡාවිස්‌සජ්‌ජනම්‌පි උත්‌තානමෙව. අවසානගාථාසු ථෙරෙ ච පරිභාසතීති අවමඤ්‌ඤං කරොන්‌තො ‘‘කිං ඉමෙ ජානන්‌තී’’ති පරිභාසති. ඛතො උපහතින්‌ද්‍රියොති තාය ඡන්‌දාදිගාමිතාය තෙන ච පරිභාසනෙන අත්‌තනා අත්‌තනො ඛතත්‌තා ඛතො. සද්‌ධාදීනඤ්‌ච ඉන්‌ද්‍රියානං උපහතත්‌තා උපහතින්‌ද්‍රියො. නිරයං ගච්‌ඡති දුම්‌මෙධො, න ච සික්‌ඛාය ගාරවොති සො ඛතො උපහතින්‌ද්‍රියො පඤ්‌ඤාය අභාවතො දුම්‌මෙධො තීසු සික්‌ඛාසු අසික්‌ඛනතො න ච සික්‌ඛාය ගාරවො කායස්‌ස භෙදා නිරයමෙව උපගච්‌ඡති, තස්‌මා න ච ආමිසං නිස්‌සාය…පෙ.… යථා ධම්‌මො තථා කරෙති. තස්‌සත්‌ථො න ච ආමිසං නිස්‌සාය කරෙ, චුදිතකචොදකෙසු හි අඤ්‌ඤතරෙන දින්‌නං චීවරාදිආමිසං ගණ්‌හන්‌තො ආමිසං නිස්‌සාය කරොති, එවං න කරෙය්‍ය. න ච නිස්‌සාය පුග්‌ගලන්‌ති ‘‘අයං මෙ උපජ්‌ඣායො වා ආචරියො වා’’තිආදිනා නයෙන ඡන්‌දාදීහි ගච්‌ඡන්‌තො පුග්‌ගලං නිස්‌සාය කරොති, එවං න කරෙය්‍ය. අථ ඛො උභොපෙතෙ විවජ්‌ජෙත්‌වා යථා ධම්‌මො ඨිතො, තථෙව කරෙය්‍යාති.
364.Uposatho kimatthāyātiādipucchāvissajjanampi uttānameva. Avasānagāthāsu there ca paribhāsatīti avamaññaṃ karonto ‘‘kiṃ ime jānantī’’ti paribhāsati. Khato upahatindriyoti tāya chandādigāmitāya tena ca paribhāsanena attanā attano khatattā khato. Saddhādīnañca indriyānaṃ upahatattā upahatindriyo. Nirayaṃ gacchati dummedho, na ca sikkhāya gāravoti so khato upahatindriyo paññāya abhāvato dummedho tīsu sikkhāsu asikkhanato na ca sikkhāya gāravo kāyassa bhedā nirayameva upagacchati, tasmā na ca āmisaṃ nissāya…pe… yathā dhammo tathā kareti. Tassattho na ca āmisaṃ nissāya kare, cuditakacodakesu hi aññatarena dinnaṃ cīvarādiāmisaṃ gaṇhanto āmisaṃ nissāya karoti, evaṃ na kareyya. Na ca nissāya puggalanti ‘‘ayaṃ me upajjhāyo vā ācariyo vā’’tiādinā nayena chandādīhi gacchanto puggalaṃ nissāya karoti, evaṃ na kareyya. Atha kho ubhopete vivajjetvā yathā dhammo ṭhito, tatheva kareyyāti.
උපකණ්‌ණකං ජප්‌පතීති ‘‘එවං කථෙහි, මා එවං කථයිත්‌ථා’’ති කණ්‌ණමූලෙ මන්‌තෙති. ජිම්‌හං පෙක්‌ඛතීති දොසමෙව ගවෙසති. වීතිහරතීති විනිච්‌ඡයං හාපෙති. කුම්‌මග්‌ගං පටිසෙවතීති ආපත්‌තිං දීපෙති.
Upakaṇṇakaṃ jappatīti ‘‘evaṃ kathehi, mā evaṃ kathayitthā’’ti kaṇṇamūle manteti. Jimhaṃ pekkhatīti dosameva gavesati. Vītiharatīti vinicchayaṃ hāpeti. Kummaggaṃ paṭisevatīti āpattiṃ dīpeti.
අකාලෙන ච චොදෙතීති අනොකාසෙ අනජ්‌ඣිට්‌ඨොව චොදෙති. පුබ්‌බාපරං න ජානාතීති පුරිමකථඤ්‌ච පච්‌ඡිමකථඤ්‌ච න ජානාති.
Akālena ca codetīti anokāse anajjhiṭṭhova codeti. Pubbāparaṃ na jānātīti purimakathañca pacchimakathañca na jānāti.
අනුසන්‌ධිවචනපථං න ජානාතීති කථානුසන්‌ධිවිනිච්‌ඡයානුසන්‌ධිවසෙන වචනං න ජානාති. සෙසං සබ්‌බත්‌ථ උත්‌තානමෙවාති.
Anusandhivacanapathaṃna jānātīti kathānusandhivinicchayānusandhivasena vacanaṃ na jānāti. Sesaṃ sabbattha uttānamevāti.
චොදනාකණ්‌ඩවණ්‌ණනා නිට්‌ඨිතා.
Codanākaṇḍavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi
1. අනුවිජ්‌ජකඅනුයොගො • 1. Anuvijjakaanuyogo
2. චොදකාදිපටිපත්‌ති • 2. Codakādipaṭipatti
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අනුවිජ්‌ජකකිච්‌චවණ්‌ණනා • Anuvijjakakiccavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අනුවිජ්‌ජකකිච්‌චවණ්‌ණනා • Anuvijjakakiccavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / චොදකපුච්‌ඡාවිස්‌සජ්‌ජනා • Codakapucchāvissajjanā
