8. சோத³கேன பச்சவெக்கி²தப்³ப³த⁴ம்மகதா²

399. ‘‘அச்சி²த்³தே³ன அப்படிமங்ஸேனா’’திஆதீ³ஸு ஏவமத்தோ² வேதி³தப்³போ³தி யோஜனா. சி²த்³த³ஸப்படிமங்ஸங் பட²மங் த³ஸ்ஸெத்வா விபரீதவஸேன அச்சி²த்³த³அப்படிமங்ஸங் த³ஸ்ஸெந்தோ ஆஹ ‘‘யேனா’’திஆதி³. தத்த² யேன கதானீதி ஸம்ப³ந்தோ⁴. சி²ஜ்ஜதீதி சி²த்³தோ³, படி புனப்புனங் மஸியதி ஆமஸியதீதி படிமங்ஸோ, நிக்³க³ஹிதாக³மோ, பா⁴வப்பதா⁴னோயங் கம்மனித்³தே³ஸோ. ஸஹ படிமங்ஸேனாதி ஸப்படிமங்ஸோ, காயஸமாசாரோ. விபரீதோதி விபரிவத்தவஸேன இதோ பவத்தோ, காயஸமாசாரோதி அத்தோ². அமூலகானுத்³த⁴ங்ஸனாதீ³ஹீதி ஆதி³ஸத்³தே³ன து³ட்டு²ல்லவாசாத³யோ ஸங்க³ண்ஹாதி.

மெத்தங் நு கோ² மே சித்தந்தி எத்த² அப்பனாபா⁴வப்பத்தங் மெத்தசித்தமேவாதி⁴ப்பேதந்தி த³ஸ்ஸெந்தோ ஆஹ ‘‘பலிபோ³தே⁴ சி²ந்தி³த்வா’’திஆதி³. தத்த² பலிபோ³தே⁴தி ஆவாஸபலிபோ³தா⁴தி³கே பலிபோ³தே⁴. ‘‘விக்க²ம்ப⁴னவஸேன விஹதாகா⁴த’’ந்தி இமினா அப்பனாபா⁴வப்பத்தங் மெத்தசித்தமேவ த³ஸ்ஸேதி. இத³ங் பனாவுஸோ கத்த² வுத்தங் ப⁴க³வதாதி எத்த² இத³ங்ஸத்³த³கிங்ஸத்³தா³னங் விஸயங் த³ஸ்ஸெந்தோ ஆஹ ‘‘இத³ங் ஸிக்கா²பத³ங் கதரஸ்மிங் நக³ரே’’தி.