| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៨. ចោទកេន បច្ចវេក្ខិតព្ពធម្មកថា
8. Codakena paccavekkhitabbadhammakathā
៣៩៩. ‘‘អច្ឆិទ្ទេន អប្បដិមំសេនា’’តិអាទីសុ ឯវមត្ថោ វេទិតព្ពោតិ យោជនា។ ឆិទ្ទសប្បដិមំសំ បឋមំ ទស្សេត្វា វិបរីតវសេន អច្ឆិទ្ទអប្បដិមំសំ ទស្សេន្តោ អាហ ‘‘យេនា’’តិអាទិ។ តត្ថ យេន កតានីតិ សម្ពន្ធោ។ ឆិជ្ជតីតិ ឆិទ្ទោ, បដិ បុនប្បុនំ មសិយតិ អាមសិយតីតិ បដិមំសោ, និគ្គហិតាគមោ, ភាវប្បធានោយំ កម្មនិទ្ទេសោ។ សហ បដិមំសេនាតិ សប្បដិមំសោ, កាយសមាចារោ។ វិបរីតោតិ វិបរិវត្តវសេន ឥតោ បវត្តោ, កាយសមាចារោតិ អត្ថោ។ អមូលកានុទ្ធំសនាទីហីតិ អាទិសទ្ទេន ទុដ្ឋុល្លវាចាទយោ សង្គណ្ហាតិ។
399. ‘‘Acchiddena appaṭimaṃsenā’’tiādīsu evamattho veditabboti yojanā. Chiddasappaṭimaṃsaṃ paṭhamaṃ dassetvā viparītavasena acchiddaappaṭimaṃsaṃ dassento āha ‘‘yenā’’tiādi. Tattha yena katānīti sambandho. Chijjatīti chiddo, paṭi punappunaṃ masiyati āmasiyatīti paṭimaṃso, niggahitāgamo, bhāvappadhānoyaṃ kammaniddeso. Saha paṭimaṃsenāti sappaṭimaṃso, kāyasamācāro. Viparītoti viparivattavasena ito pavatto, kāyasamācāroti attho. Amūlakānuddhaṃsanādīhīti ādisaddena duṭṭhullavācādayo saṅgaṇhāti.
មេត្តំ នុ ខោ មេ ចិត្តន្តិ ឯត្ថ អប្បនាភាវប្បត្តំ មេត្តចិត្តមេវាធិប្បេតន្តិ ទស្សេន្តោ អាហ ‘‘បលិពោធេ ឆិន្ទិត្វា’’តិអាទិ។ តត្ថ បលិពោធេតិ អាវាសបលិពោធាទិកេ បលិពោធេ។ ‘‘វិក្ខម្ភនវសេន វិហតាឃាត’’ន្តិ ឥមិនា អប្បនាភាវប្បត្តំ មេត្តចិត្តមេវ ទស្សេតិ។ ឥទំ បនាវុសោ កត្ថ វុត្តំ ភគវតាតិ ឯត្ថ ឥទំសទ្ទកិំសទ្ទានំ វិសយំ ទស្សេន្តោ អាហ ‘‘ឥទំ សិក្ខាបទំ កតរស្មិំ នគរេ’’តិ។
Mettaṃ nu kho me cittanti ettha appanābhāvappattaṃ mettacittamevādhippetanti dassento āha ‘‘palibodhe chinditvā’’tiādi. Tattha palibodheti āvāsapalibodhādike palibodhe. ‘‘Vikkhambhanavasena vihatāghāta’’nti iminā appanābhāvappattaṃ mettacittameva dasseti. Idaṃ panāvuso kattha vuttaṃ bhagavatāti ettha idaṃsaddakiṃsaddānaṃ visayaṃ dassento āha ‘‘idaṃ sikkhāpadaṃ katarasmiṃ nagare’’ti.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi / ៨. ចោទកេនបច្ចវេក្ខិតព្ពធម្មា • 8. Codakenapaccavekkhitabbadhammā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / ចោទកេនបច្ចវេក្ខិតព្ពធម្មកថា • Codakenapaccavekkhitabbadhammakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ចោទកេន បច្ចវេក្ខិតព្ពធម្មកថាវណ្ណនា • Codakena paccavekkhitabbadhammakathāvaṇṇanā
