| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
8. චොදකෙන පච්‌චවෙක්‌ඛිතබ්‌බධම්‌මකථා
8. Codakena paccavekkhitabbadhammakathā
399. ‘‘අච්‌ඡිද්‌දෙන අප්‌පටිමංසෙනා’’තිආදීසු එවමත්‌ථො වෙදිතබ්‌බොති යොජනා. ඡිද්‌දසප්‌පටිමංසං පඨමං දස්‌සෙත්‌වා විපරීතවසෙන අච්‌ඡිද්‌දඅප්‌පටිමංසං දස්‌සෙන්‌තො ආහ ‘‘යෙනා’’තිආදි. තත්‌ථ යෙන කතානීති සම්‌බන්‌ධො. ඡිජ්‌ජතීති ඡිද්‌දො, පටි පුනප්‌පුනං මසියති ආමසියතීති පටිමංසො, නිග්‌ගහිතාගමො, භාවප්‌පධානොයං කම්‌මනිද්‌දෙසො. සහ පටිමංසෙනාති සප්‌පටිමංසො, කායසමාචාරො. විපරීතොති විපරිවත්‌තවසෙන ඉතො පවත්‌තො, කායසමාචාරොති අත්‌ථො. අමූලකානුද්‌ධංසනාදීහීති ආදිසද්‌දෙන දුට්‌ඨුල්‌ලවාචාදයො සඞ්‌ගණ්‌හාති.
399. ‘‘Acchiddena appaṭimaṃsenā’’tiādīsu evamattho veditabboti yojanā. Chiddasappaṭimaṃsaṃ paṭhamaṃ dassetvā viparītavasena acchiddaappaṭimaṃsaṃ dassento āha ‘‘yenā’’tiādi. Tattha yena katānīti sambandho. Chijjatīti chiddo, paṭi punappunaṃ masiyati āmasiyatīti paṭimaṃso, niggahitāgamo, bhāvappadhānoyaṃ kammaniddeso. Saha paṭimaṃsenāti sappaṭimaṃso, kāyasamācāro. Viparītoti viparivattavasena ito pavatto, kāyasamācāroti attho. Amūlakānuddhaṃsanādīhīti ādisaddena duṭṭhullavācādayo saṅgaṇhāti.
මෙත්‌තං නු ඛො මෙ චිත්‌තන්‌ති එත්‌ථ අප්‌පනාභාවප්‌පත්‌තං මෙත්‌තචිත්‌තමෙවාධිප්‌පෙතන්‌ති දස්‌සෙන්‌තො ආහ ‘‘පලිබොධෙ ඡින්‌දිත්‌වා’’තිආදි. තත්‌ථ පලිබොධෙති ආවාසපලිබොධාදිකෙ පලිබොධෙ. ‘‘වික්‌ඛම්‌භනවසෙන විහතාඝාත’’න්‌ති ඉමිනා අප්‌පනාභාවප්‌පත්‌තං මෙත්‌තචිත්‌තමෙව දස්‌සෙති. ඉදං පනාවුසො කත්‌ථ වුත්‌තං භගවතාති එත්‌ථ ඉදංසද්‌දකිංසද්‌දානං විසයං දස්‌සෙන්‌තො ආහ ‘‘ඉදං සික්‌ඛාපදං කතරස්‌මිං නගරෙ’’ති.
Mettaṃ nu kho me cittanti ettha appanābhāvappattaṃ mettacittamevādhippetanti dassento āha ‘‘palibodhe chinditvā’’tiādi. Tattha palibodheti āvāsapalibodhādike palibodhe. ‘‘Vikkhambhanavasena vihatāghāta’’nti iminā appanābhāvappattaṃ mettacittameva dasseti. Idaṃ panāvuso kattha vuttaṃ bhagavatāti ettha idaṃsaddakiṃsaddānaṃ visayaṃ dassento āha ‘‘idaṃ sikkhāpadaṃ katarasmiṃ nagare’’ti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / 8. චොදකෙනපච්‌චවෙක්‌ඛිතබ්‌බධම්‌මා • 8. Codakenapaccavekkhitabbadhammā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / චොදකෙනපච්‌චවෙක්‌ඛිතබ්‌බධම්‌මකථා • Codakenapaccavekkhitabbadhammakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / චොදකෙන පච්‌චවෙක්‌ඛිතබ්‌බධම්‌මකථාවණ්‌ණනා • Codakena paccavekkhitabbadhammakathāvaṇṇanā
