| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
අපරගාථාසඞ්‌ගණිකං
Aparagāthāsaṅgaṇikaṃ
1. චොදනාදිපුච්‌ඡාවිස්‌සජ්‌ජනා
1. Codanādipucchāvissajjanā
359.
359.
චොදනා කිමත්‌ථාය, සාරණා කිස්‌ස කාරණා;
Codanā kimatthāya, sāraṇā kissa kāraṇā;
සඞ්‌ඝො කිමත්‌ථාය, මතිකම්‌මං පන කිස්‌ස කාරණා.
Saṅgho kimatthāya, matikammaṃ pana kissa kāraṇā.
චොදනා සාරණත්‌ථාය, නිග්‌ගහත්‌ථාය සාරණා;
Codanā sāraṇatthāya, niggahatthāya sāraṇā;
සඞ්‌ඝො පරිග්‌ගහත්‌ථාය, මතිකම්‌මං පන පාටියෙක්‌කං.
Saṅgho pariggahatthāya, matikammaṃ pana pāṭiyekkaṃ.
මා ඛො තුරිතො අභණි, මා ඛො චණ්‌ඩිකතො භණි;
Mā kho turito abhaṇi, mā kho caṇḍikato bhaṇi;
මා ඛො පටිඝං ජනයි, සචෙ අනුවිජ්‌ජකො තුවං.
Mā kho paṭighaṃ janayi, sace anuvijjako tuvaṃ.
මා ඛො සහසා අභණි, කථං විග්‌ගාහිකං අනත්‌ථසංහිතං;
Mā kho sahasā abhaṇi, kathaṃ viggāhikaṃ anatthasaṃhitaṃ;
සුත්‌තෙ විනයෙ අනුලොමෙ, පඤ්‌ඤත්‌තෙ අනුලොමිකෙ.
Sutte vinaye anulome, paññatte anulomike.
අනුයොගවත්‌තං නිසාමය, කුසලෙන බුද්‌ධිමතා කතං;
Anuyogavattaṃ nisāmaya, kusalena buddhimatā kataṃ;
සුවුත්‌තං සික්‌ඛාපදානුලොමිකං, ගතිං න නාසෙන්‌තො සම්‌පරායිකං;
Suvuttaṃ sikkhāpadānulomikaṃ, gatiṃ na nāsento samparāyikaṃ;
හිතෙසී අනුයුඤ්‌ජස්‌සු, කාලෙනත්‌ථූපසංහිතං.
Hitesī anuyuñjassu, kālenatthūpasaṃhitaṃ.
චුදිතස්‌ස ච චොදකස්‌ස ච;
Cuditassa ca codakassa ca;
සහසා වොහාරං මා පධාරෙසි;
Sahasā vohāraṃ mā padhāresi;
චොදකො ආහ ආපන්‌නොති;
Codako āha āpannoti;
චුදිතකො ආහ අනාපන්‌නොති.
Cuditako āha anāpannoti.
උභො අනුක්‌ඛිපන්‌තො, පටිඤ්‌ඤානුසන්‌ධිතෙන කාරයෙ;
Ubho anukkhipanto, paṭiññānusandhitena kāraye;
පටිඤ්‌ඤා ලජ්‌ජීසු කතා, අලජ්‌ජීසු එවං න විජ්‌ජති;
Paṭiññā lajjīsu katā, alajjīsu evaṃ na vijjati;
බහුම්‌පි අලජ්‌ජී භාසෙය්‍ය, වත්‌තානුසන්‌ධිතෙන 1 කාරයෙ.
Bahumpi alajjī bhāseyya, vattānusandhitena 2 kāraye.
අලජ්‌ජී කීදිසො හොති, පටිඤ්‌ඤා යස්‌ස න රූහති;
Alajjī kīdiso hoti, paṭiññā yassa na rūhati;
එතඤ්‌ච 3 තාහං පුච්‌ඡාමි, කීදිසො වුච්‌චති අලජ්‌ජී පුග්‌ගලො.
Etañca 4 tāhaṃ pucchāmi, kīdiso vuccati alajjī puggalo.
සඤ්‌චිච්‌ච ආපත්‌තිං ආපජ්‌ජති, ආපත්‌තිං පරිගූහති;
Sañcicca āpattiṃ āpajjati, āpattiṃ parigūhati;
අගතිගමනඤ්‌ච ගච්‌ඡති, එදිසො වුච්‌චති අලජ්‌ජීපුග්‌ගලො.
Agatigamanañca gacchati, ediso vuccati alajjīpuggalo.
සච්‌චං අහම්‌පි ජානාමි, එදිසො වුච්‌චති අලජ්‌ජීපුග්‌ගලො;
Saccaṃ ahampi jānāmi, ediso vuccati alajjīpuggalo;
අඤ්‌ඤඤ්‌ච තාහං පුච්‌ඡාමි, කීදිසො වුච්‌චති ලජ්‌ජීපුග්‌ගලො.
Aññañca tāhaṃ pucchāmi, kīdiso vuccati lajjīpuggalo.
සඤ්‌චිච්‌ච ආපත්‌තිං නාපජ්‌ජති, ආපත්‌තිං න පරිගූහති;
Sañcicca āpattiṃ nāpajjati, āpattiṃ na parigūhati;
අගතිගමනං න ගච්‌ඡති, එදිසො වුච්‌චති ලජ්‌ජීපුග්‌ගලො.
Agatigamanaṃ na gacchati, ediso vuccati lajjīpuggalo.
සච්‌චං අහම්‌පි ජානාමි, එදිසො වුච්‌චති ලජ්‌ජීපුග්‌ගලො;
Saccaṃ ahampi jānāmi, ediso vuccati lajjīpuggalo;
අඤ්‌ඤඤ්‌ච තාහං පුච්‌ඡාමි, කීදිසො වුච්‌චති අධම්‌මචොදකො.
Aññañca tāhaṃ pucchāmi, kīdiso vuccati adhammacodako.
අකාලෙ චොදෙති අභූතෙන;
Akāle codeti abhūtena;
ඵරුසෙන අනත්‌ථසංහිතෙන;
Pharusena anatthasaṃhitena;
දොසන්‌තරො චොදෙති නො මෙත්‌තාචිත්‌තො;
Dosantaro codeti no mettācitto;
එදිසො වුච්‌චති අධම්‌මචොදකො.
Ediso vuccati adhammacodako.
සච්‌චං අහම්‌පි ජානාමි, එදිසො වුච්‌චති අධම්‌මචොදකො;
Saccaṃ ahampi jānāmi, ediso vuccati adhammacodako;
අඤ්‌ඤඤ්‌ච තාහං පුච්‌ඡාමි, කීදිසො වුච්‌චති ධම්‌මචොදකො.
Aññañca tāhaṃ pucchāmi, kīdiso vuccati dhammacodako.
කාලෙන චොදෙති භූතෙන, සණ්‌හෙන අත්‌ථසංහිතෙන;
Kālena codeti bhūtena, saṇhena atthasaṃhitena;
මෙත්‌තාචිත්‌තො චොදෙති නො දොසන්‌තරො;
Mettācitto codeti no dosantaro;
එදිසො වුච්‌චති ධම්‌මචොදකො.
Ediso vuccati dhammacodako.
සච්‌චං අහම්‌පි ජානාමි, එදිසො වුච්‌චති ධම්‌මචොදකො;
Saccaṃ ahampi jānāmi, ediso vuccati dhammacodako;
අඤ්‌ඤඤ්‌ච තාහං පුච්‌ඡාමි, කීදිසො වුච්‌චති බාලචොදකො.
Aññañca tāhaṃ pucchāmi, kīdiso vuccati bālacodako.
පුබ්‌බාපරං න ජානාති, පුබ්‌බාපරස්‌ස අකොවිදො;
Pubbāparaṃ na jānāti, pubbāparassa akovido;
අනුසන්‌ධිවචනපථං න ජානාති;
Anusandhivacanapathaṃ na jānāti;
අනුසන්‌ධිවචනපථස්‌ස අකොවිදො;
Anusandhivacanapathassa akovido;
එදිසො වුච්‌චති බාලචොදකො.
Ediso vuccati bālacodako.
සච්‌චං අහම්‌පි ජානාමි, එදිසො වුච්‌චති බාලචොදකො;
Saccaṃ ahampi jānāmi, ediso vuccati bālacodako;
අඤ්‌ඤඤ්‌ච තාහං පුච්‌ඡාමි, කීදිසො වුච්‌චති පණ්‌ඩිතචොදකො.
Aññañca tāhaṃ pucchāmi, kīdiso vuccati paṇḍitacodako.
පුබ්‌බාපරම්‌පි ජානාති, පුබ්‌බාපරස්‌ස කොවිදො;
Pubbāparampi jānāti, pubbāparassa kovido;
අනුසන්‌ධිවචනපථං ජානාති, අනුසන්‌ධිවචනපථස්‌ස කොවිදො;
Anusandhivacanapathaṃ jānāti, anusandhivacanapathassa kovido;
එදිසො වුච්‌චති පණ්‌ඩිතචොදකො.
Ediso vuccati paṇḍitacodako.
සච්‌චං අහම්‌පි ජානාමි, එදිසො වුච්‌චති පණ්‌ඩිතචොදකො;
Saccaṃ ahampi jānāmi, ediso vuccati paṇḍitacodako;
අඤ්‌ඤඤ්‌ච තාහං පුච්‌ඡාමි, චොදනා කින්‌ති වුච්‌චති.
Aññañca tāhaṃ pucchāmi, codanā kinti vuccati.
සීලවිපත්‌තියා චොදෙති, අථො ආචාරදිට්‌ඨියා;
Sīlavipattiyā codeti, atho ācāradiṭṭhiyā;
ආජීවෙනපි චොදෙති, චොදනා තෙන වුච්‌චතීති.
Ājīvenapi codeti, codanā tena vuccatīti.
අපරං ගාථාසඞ්‌ගණිකං නිට්‌ඨිතං.
Aparaṃ gāthāsaṅgaṇikaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / චොදනාදිපුච්‌ඡාවිස්‌සජ්‌ජනාවණ්‌ණනා • Codanādipucchāvissajjanāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / දුතියගාථාසඞ්‌ගණිකවණ්‌ණනා • Dutiyagāthāsaṅgaṇikavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / චොදනාදිපුච්‌ඡාවිස්‌සජ්‌ජනාවණ්‌ණනා • Codanādipucchāvissajjanāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / චොදනාදිපුච්‌ඡාවිස්‌සජ්‌ජනාවණ්‌ණනා • Codanādipucchāvissajjanāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / චොදනාදිපුච්‌ඡාවිස්‌සජ්‌ජනාවණ්‌ණනා • Codanādipucchāvissajjanāvaṇṇanā
