| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
து³தியகா³தா²ஸங்க³ணிகங்
Dutiyagāthāsaṅgaṇikaṃ
சோத³னாதி³புச்சா²விஸ்ஸஜ்ஜனாவண்ணனா
Codanādipucchāvissajjanāvaṇṇanā
359. து³தியகா³தா²ஸங்க³ணியங் சோத³னாதி வத்து²ஞ்ச ஆபத்திஞ்ச த³ஸ்ஸெத்வா சோத³னா. ஸாரணாதி தோ³ஸஸாரணா. ஸங்கோ⁴ கிமத்தா²யாதி ஸங்க⁴ஸன்னிபாதோ கிமத்தா²ய. மதிகம்மங் பன கிஸ்ஸ காரணாதி மதிகம்மங் வுச்சதி மந்தக்³க³ஹணங்; தங் கிஸ்ஸ காரணாதி அத்தோ².
359. Dutiyagāthāsaṅgaṇiyaṃ codanāti vatthuñca āpattiñca dassetvā codanā. Sāraṇāti dosasāraṇā. Saṅgho kimatthāyāti saṅghasannipāto kimatthāya. Matikammaṃ pana kissa kāraṇāti matikammaṃ vuccati mantaggahaṇaṃ; taṃ kissa kāraṇāti attho.
சோத³னா ஸாரணத்தா²யாதி வுத்தப்பகாரா சோத³னா, தேன சுதி³தகபுக்³க³லேன சோத³கதோ³ஸஸாரணத்தா²ய. நிக்³க³ஹத்தா²ய ஸாரணாதி தோ³ஸஸாரணா பன தஸ்ஸ புக்³க³லஸ்ஸ நிக்³க³ஹத்தா²ய. ஸங்கோ⁴ பரிக்³க³ஹத்தா²யாதி தத்த² ஸன்னிபதிதோ ஸங்கோ⁴ வினிச்ச²யபரிக்³க³ஹணத்தா²ய; த⁴ம்மாத⁴ம்மங் துலனத்தா²ய ஸுவினிச்சி²தது³ப்³பி³னிச்சி²தங் ஜானநத்தா²யாதி அத்தோ². மதிகம்மங் பன பாடியேக்கந்தி ஸுத்தந்திகத்தே²ரானஞ்ச வினயத⁴ரத்தே²ரானஞ்ச மந்தக்³க³ஹணங் பாடேக்கங் பாடேக்கங் வினிச்ச²யஸன்னிட்டா²பனத்த²ங்.
Codanā sāraṇatthāyāti vuttappakārā codanā, tena cuditakapuggalena codakadosasāraṇatthāya. Niggahatthāya sāraṇāti dosasāraṇā pana tassa puggalassa niggahatthāya. Saṅgho pariggahatthāyāti tattha sannipatito saṅgho vinicchayapariggahaṇatthāya; dhammādhammaṃ tulanatthāya suvinicchitadubbinicchitaṃ jānanatthāyāti attho. Matikammaṃ pana pāṭiyekkanti suttantikattherānañca vinayadharattherānañca mantaggahaṇaṃ pāṭekkaṃ pāṭekkaṃ vinicchayasanniṭṭhāpanatthaṃ.
மா கோ² படிக⁴ந்தி சுதி³தகே வா சோத³கே வா கோபங் மா ஜனயி. ஸசே அனுவிஜ்ஜகோ துவந்தி ஸசே த்வங் ஸங்க⁴மஜ்ஜே² ஓதிண்ணங் அதி⁴கரணங் வினிச்சி²துங் நிஸின்னோ வினயத⁴ரோ.
Mā kho paṭighanti cuditake vā codake vā kopaṃ mā janayi. Sace anuvijjako tuvanti sace tvaṃ saṅghamajjhe otiṇṇaṃ adhikaraṇaṃ vinicchituṃ nisinno vinayadharo.
விக்³கா³ஹிகந்தி ‘‘ந த்வங் இமங் த⁴ம்மவினயங் ஆஜானாஸீ’’திஆதி³னயப்பவத்தங். அனத்த²ஸங்ஹிதந்தி யா அனத்த²ங் ஜனயதி, பரிஸங் கோ²பெ⁴த்வா உட்டா²பேதி, ஏவரூபிங் கத²ங் மா அப⁴ணி. ஸுத்தே வினயே வாதிஆதீ³ஸு ஸுத்தங் நாம உப⁴தோவிப⁴ங்கோ³. வினயோ நாம க²ந்த⁴கோ. அனுலோமோ நாம பரிவாரோ. பஞ்ஞத்தங் நாம ஸகலங் வினயபிடகங். அனுலோமிகங் நாம சத்தாரோ மஹாபதே³ஸா.
Viggāhikanti ‘‘na tvaṃ imaṃ dhammavinayaṃ ājānāsī’’tiādinayappavattaṃ. Anatthasaṃhitanti yā anatthaṃ janayati, parisaṃ khobhetvā uṭṭhāpeti, evarūpiṃ kathaṃ mā abhaṇi. Sutte vinaye vātiādīsu suttaṃ nāma ubhatovibhaṅgo. Vinayo nāma khandhako. Anulomo nāma parivāro. Paññattaṃ nāma sakalaṃ vinayapiṭakaṃ. Anulomikaṃ nāma cattāro mahāpadesā.
அனுயோக³வத்தங் நிஸாமயாதி அனுயுஞ்ஜனவத்தங் நிஸாமேஹி. குஸலேன பு³த்³தி⁴மதா கதந்தி சே²கேன பண்டி³தேன ஞாணபாரமிப்பத்தேன ப⁴க³வதா நீஹரித்வா ட²பிதங். ஸுவுத்தந்தி ஸுபஞ்ஞாபிதங். ஸிக்கா²பதா³னுலோமிகந்தி ஸிக்கா²பதா³னங் அனுலோமங். அயங் தாவ பத³த்தோ², அயங் பனெத்த² ஸாதி⁴ப்பாயஸங்கே²பவண்ணனா – ‘‘ஸசே த்வங் அனுவிஜ்ஜகோ, மா ஸஹஸா ப⁴ணி, மா அனத்த²ஸங்ஹிதங் விக்³கா³ஹிககத²ங் ப⁴ணி. யங் பன குஸலேன பு³த்³தி⁴மதா லோகனாதே²ன ஏதேஸு ஸுத்தாதீ³ஸு அனுயோக³வத்தங் கத²ங் ஸுபஞ்ஞத்தங் ஸப்³ப³ஸிக்கா²பதா³னங் அனுலோமங், தங் நிஸாமய தங் உபதா⁴ரேஹீ’’தி. க³திங் ந நாஸெந்தோ ஸம்பராயிகந்தி அத்தனோ ஸம்பராயே ஸுக³தினிப்³ப³த்திங் அனாஸெந்தோ அனுயோக³வத்தங் நிஸாமய. யோ ஹி தங் அனிஸாமெத்வா அனுயுஞ்ஜதி, ஸோ ஸம்பராயிகங் அத்தனோ க³திங் நாஸேதி, தஸ்மா த்வங் அனாஸெந்தோ நிஸாமயாதி அத்தோ². இதா³னி தங் அனுயோக³வத்தங் த³ஸ்ஸேதுங் ஹிதேஸீதிஆதி³மாஹ. தத்த² ஹிதேஸீதி ஹிதங் ஏஸந்தோ க³வேஸந்தோ; மெத்தஞ்ச மெத்தாபுப்³ப³பா⁴க³ஞ்ச உபட்ட²பெத்வாதி அத்தோ². காலேனாதி யுத்தபத்தகாலேன; அஜ்ஜே²ஸிதகாலேயேவ தவ பா⁴ரே கதே அனுயுஞ்ஜாதி அத்தோ².
Anuyogavattaṃnisāmayāti anuyuñjanavattaṃ nisāmehi. Kusalena buddhimatā katanti chekena paṇḍitena ñāṇapāramippattena bhagavatā nīharitvā ṭhapitaṃ. Suvuttanti supaññāpitaṃ. Sikkhāpadānulomikanti sikkhāpadānaṃ anulomaṃ. Ayaṃ tāva padattho, ayaṃ panettha sādhippāyasaṅkhepavaṇṇanā – ‘‘sace tvaṃ anuvijjako, mā sahasā bhaṇi, mā anatthasaṃhitaṃ viggāhikakathaṃ bhaṇi. Yaṃ pana kusalena buddhimatā lokanāthena etesu suttādīsu anuyogavattaṃ kathaṃ supaññattaṃ sabbasikkhāpadānaṃ anulomaṃ, taṃ nisāmaya taṃ upadhārehī’’ti. Gatiṃ na nāsento samparāyikanti attano samparāye sugatinibbattiṃ anāsento anuyogavattaṃ nisāmaya. Yo hi taṃ anisāmetvā anuyuñjati, so samparāyikaṃ attano gatiṃ nāseti, tasmā tvaṃ anāsento nisāmayāti attho. Idāni taṃ anuyogavattaṃ dassetuṃ hitesītiādimāha. Tattha hitesīti hitaṃ esanto gavesanto; mettañca mettāpubbabhāgañca upaṭṭhapetvāti attho. Kālenāti yuttapattakālena; ajjhesitakāleyeva tava bhāre kate anuyuñjāti attho.
ஸஹஸா வோஹாரங் மா பதா⁴ரேஸீதி யோ ஏதேஸங் ஸஹஸா வோஹாரோ ஹோதி, ஸஹஸா பா⁴ஸிதங், தங் மா பதா⁴ரேஸி, மா க³ண்ஹித்த².
Sahasā vohāraṃ mā padhāresīti yo etesaṃ sahasā vohāro hoti, sahasā bhāsitaṃ, taṃ mā padhāresi, mā gaṇhittha.
படிஞ்ஞானுஸந்தி⁴தேன காரயேதி எத்த² அனுஸந்தி⁴தந்தி கதா²னுஸந்தி⁴ வுச்சதி, தஸ்மா படிஞ்ஞானுஸந்தி⁴னா காரயே; கதா²னுஸந்தி⁴ங் ஸல்லக்கெ²த்வா படிஞ்ஞாய காரயேதி அத்தோ². அத² வா படிஞ்ஞாய ச அனுஸந்தி⁴தேன ச காரயே, லஜ்ஜிங் படிஞ்ஞாய காரயே; அலஜ்ஜிங் வத்தானுஸந்தி⁴னாதி அத்தோ². தஸ்மா ஏவ படிஞ்ஞா லஜ்ஜீஸூதி கா³த²மாஹ. தத்த² வத்தானுஸந்தி⁴தேன காரயேதி வத்தானுஸந்தி⁴னா காரயே, யா அஸ்ஸ வத்தேன ஸத்³தி⁴ங் படிஞ்ஞா ஸந்தி⁴யதி, தாய படிஞ்ஞாய காரயேதி அத்தோ².
Paṭiññānusandhitena kārayeti ettha anusandhitanti kathānusandhi vuccati, tasmā paṭiññānusandhinā kāraye; kathānusandhiṃ sallakkhetvā paṭiññāya kārayeti attho. Atha vā paṭiññāya ca anusandhitena ca kāraye, lajjiṃ paṭiññāya kāraye; alajjiṃ vattānusandhināti attho. Tasmā eva paṭiññā lajjīsūti gāthamāha. Tattha vattānusandhitena kārayeti vattānusandhinā kāraye, yā assa vattena saddhiṃ paṭiññā sandhiyati, tāya paṭiññāya kārayeti attho.
ஸஞ்சிச்சாதி ஜானந்தோ ஆபஜ்ஜதி. பரிகூ³ஹதீதி நிகூ³ஹதி ந தே³ஸேதி ந வுட்டா²தி.
Sañciccāti jānanto āpajjati. Parigūhatīti nigūhati na deseti na vuṭṭhāti.
ஸா அஹம்பி ஜானாமீதி யங் தும்ஹேஹி வுத்தங், தங் ஸச்சங், அஹம்பி நங் ஏவமேவ ஜானாமி. அஞ்ஞஞ்ச தாஹந்தி அஞ்ஞஞ்ச தங் அஹங் புச்சா²மி.
Sā ahampi jānāmīti yaṃ tumhehi vuttaṃ, taṃ saccaṃ, ahampi naṃ evameva jānāmi. Aññañca tāhanti aññañca taṃ ahaṃ pucchāmi.
புப்³பா³பரங் ந ஜானாதீதி புரேகதி²தஞ்ச பச்சா²கதி²தஞ்ச ந ஜானாதி. அகோவிதோ³தி தஸ்மிங் புப்³பா³பரே அகுஸலோ. அனுஸந்தி⁴வசனபத²ங் ந ஜானாதீதி கதா²னுஸந்தி⁴வசனங் வினிச்ச²யானுஸந்தி⁴வசனஞ்ச ந ஜானாதி.
Pubbāparaṃna jānātīti purekathitañca pacchākathitañca na jānāti. Akovidoti tasmiṃ pubbāpare akusalo. Anusandhivacanapathaṃ na jānātīti kathānusandhivacanaṃ vinicchayānusandhivacanañca na jānāti.
ஸீலவிபத்தியா சோதே³தீதி த்³வீஹி ஆபத்திக்க²ந்தே⁴ஹி சோதே³தி. ஆசாரதி³ட்டி²யாதி ஆசாரவிபத்தியா சேவ தி³ட்டி²விபத்தியா ச. ஆசாரவிபத்தியா சோதெ³ந்தோ பஞ்சஹாபத்திக்க²ந்தே⁴ஹி சோதே³தி, தி³ட்டி²விபத்தியா சோதெ³ந்தோ மிச்சா²தி³ட்டி²யா சேவ அந்தக்³கா³ஹிகதி³ட்டி²யா ச சோதே³தி. ஆஜீவேனபி சோதே³தீதி ஆஜீவஹேதுபஞ்ஞத்தேஹி ச²ஹி ஸிக்கா²பதே³ஹி சோதே³தி. ஸேஸங் ஸப்³ப³த்த² உத்தானமேவாதி.
Sīlavipattiyā codetīti dvīhi āpattikkhandhehi codeti. Ācāradiṭṭhiyāti ācāravipattiyā ceva diṭṭhivipattiyā ca. Ācāravipattiyā codento pañcahāpattikkhandhehi codeti, diṭṭhivipattiyā codento micchādiṭṭhiyā ceva antaggāhikadiṭṭhiyā ca codeti. Ājīvenapi codetīti ājīvahetupaññattehi chahi sikkhāpadehi codeti. Sesaṃ sabbattha uttānamevāti.
து³தியகா³தா²ஸங்க³ணிகவண்ணனா நிட்டி²தா.
Dutiyagāthāsaṅgaṇikavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. சோத³னாதி³புச்சா²விஸ்ஸஜ்ஜனா • 1. Codanādipucchāvissajjanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / து³தியகா³தா²ஸங்க³ணிகவண்ணனா • Dutiyagāthāsaṅgaṇikavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சோத³னாதி³புச்சா²விஸ்ஸஜ்ஜனாவண்ணனா • Codanādipucchāvissajjanāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சோத³னாதி³புச்சா²விஸ்ஸஜ்ஜனாவண்ணனா • Codanādipucchāvissajjanāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / சோத³னாதி³புச்சா²விஸ்ஸஜ்ஜனாவண்ணனா • Codanādipucchāvissajjanāvaṇṇanā
