| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
দুতিযগাথাসঙ্গণিকং
Dutiyagāthāsaṅgaṇikaṃ
চোদনাদিপুচ্ছাৰিস্সজ্জনাৰণ্ণনা
Codanādipucchāvissajjanāvaṇṇanā
৩৫৯. দুতিযগাথাসঙ্গণিযং চোদনাতি ৰত্থুঞ্চ আপত্তিঞ্চ দস্সেত্ৰা চোদনা। সারণাতি দোসসারণা। সঙ্ঘো কিমত্থাযাতি সঙ্ঘসন্নিপাতো কিমত্থায। মতিকম্মং পন কিস্স কারণাতি মতিকম্মং ৰুচ্চতি মন্তগ্গহণং; তং কিস্স কারণাতি অত্থো।
359. Dutiyagāthāsaṅgaṇiyaṃ codanāti vatthuñca āpattiñca dassetvā codanā. Sāraṇāti dosasāraṇā. Saṅgho kimatthāyāti saṅghasannipāto kimatthāya. Matikammaṃ pana kissa kāraṇāti matikammaṃ vuccati mantaggahaṇaṃ; taṃ kissa kāraṇāti attho.
চোদনা সারণত্থাযাতি ৰুত্তপ্পকারা চোদনা, তেন চুদিতকপুগ্গলেন চোদকদোসসারণত্থায। নিগ্গহত্থায সারণাতি দোসসারণা পন তস্স পুগ্গলস্স নিগ্গহত্থায। সঙ্ঘো পরিগ্গহত্থাযাতি তত্থ সন্নিপতিতো সঙ্ঘো ৰিনিচ্ছযপরিগ্গহণত্থায; ধম্মাধম্মং তুলনত্থায সুৰিনিচ্ছিতদুব্বিনিচ্ছিতং জাননত্থাযাতি অত্থো। মতিকম্মং পন পাটিযেক্কন্তি সুত্তন্তিকত্থেরানঞ্চ ৰিনযধরত্থেরানঞ্চ মন্তগ্গহণং পাটেক্কং পাটেক্কং ৰিনিচ্ছযসন্নিট্ঠাপনত্থং।
Codanā sāraṇatthāyāti vuttappakārā codanā, tena cuditakapuggalena codakadosasāraṇatthāya. Niggahatthāya sāraṇāti dosasāraṇā pana tassa puggalassa niggahatthāya. Saṅgho pariggahatthāyāti tattha sannipatito saṅgho vinicchayapariggahaṇatthāya; dhammādhammaṃ tulanatthāya suvinicchitadubbinicchitaṃ jānanatthāyāti attho. Matikammaṃ pana pāṭiyekkanti suttantikattherānañca vinayadharattherānañca mantaggahaṇaṃ pāṭekkaṃ pāṭekkaṃ vinicchayasanniṭṭhāpanatthaṃ.
মা খো পটিঘন্তি চুদিতকে ৰা চোদকে ৰা কোপং মা জনযি। সচে অনুৰিজ্জকো তুৰন্তি সচে ত্ৰং সঙ্ঘমজ্ঝে ওতিণ্ণং অধিকরণং ৰিনিচ্ছিতুং নিসিন্নো ৰিনযধরো।
Mā kho paṭighanti cuditake vā codake vā kopaṃ mā janayi. Sace anuvijjako tuvanti sace tvaṃ saṅghamajjhe otiṇṇaṃ adhikaraṇaṃ vinicchituṃ nisinno vinayadharo.
ৰিগ্গাহিকন্তি ‘‘ন ত্ৰং ইমং ধম্মৰিনযং আজানাসী’’তিআদিনযপ্পৰত্তং। অনত্থসংহিতন্তি যা অনত্থং জনযতি, পরিসং খোভেত্ৰা উট্ঠাপেতি, এৰরূপিং কথং মা অভণি। সুত্তে ৰিনযে ৰাতিআদীসু সুত্তং নাম উভতোৰিভঙ্গো। ৰিনযো নাম খন্ধকো। অনুলোমো নাম পরিৰারো। পঞ্ঞত্তং নাম সকলং ৰিনযপিটকং। অনুলোমিকং নাম চত্তারো মহাপদেসা।
Viggāhikanti ‘‘na tvaṃ imaṃ dhammavinayaṃ ājānāsī’’tiādinayappavattaṃ. Anatthasaṃhitanti yā anatthaṃ janayati, parisaṃ khobhetvā uṭṭhāpeti, evarūpiṃ kathaṃ mā abhaṇi. Sutte vinaye vātiādīsu suttaṃ nāma ubhatovibhaṅgo. Vinayo nāma khandhako. Anulomo nāma parivāro. Paññattaṃ nāma sakalaṃ vinayapiṭakaṃ. Anulomikaṃ nāma cattāro mahāpadesā.
অনুযোগৰত্তং নিসামযাতি অনুযুঞ্জনৰত্তং নিসামেহি। কুসলেন বুদ্ধিমতা কতন্তি ছেকেন পণ্ডিতেন ঞাণপারমিপ্পত্তেন ভগৰতা নীহরিত্ৰা ঠপিতং। সুৰুত্তন্তি সুপঞ্ঞাপিতং। সিক্খাপদানুলোমিকন্তি সিক্খাপদানং অনুলোমং। অযং তাৰ পদত্থো, অযং পনেত্থ সাধিপ্পাযসঙ্খেপৰণ্ণনা – ‘‘সচে ত্ৰং অনুৰিজ্জকো, মা সহসা ভণি, মা অনত্থসংহিতং ৰিগ্গাহিককথং ভণি। যং পন কুসলেন বুদ্ধিমতা লোকনাথেন এতেসু সুত্তাদীসু অনুযোগৰত্তং কথং সুপঞ্ঞত্তং সব্বসিক্খাপদানং অনুলোমং, তং নিসাময তং উপধারেহী’’তি। গতিং ন নাসেন্তো সম্পরাযিকন্তি অত্তনো সম্পরাযে সুগতিনিব্বত্তিং অনাসেন্তো অনুযোগৰত্তং নিসাময। যো হি তং অনিসামেত্ৰা অনুযুঞ্জতি, সো সম্পরাযিকং অত্তনো গতিং নাসেতি, তস্মা ত্ৰং অনাসেন্তো নিসামযাতি অত্থো। ইদানি তং অনুযোগৰত্তং দস্সেতুং হিতেসীতিআদিমাহ। তত্থ হিতেসীতি হিতং এসন্তো গৰেসন্তো; মেত্তঞ্চ মেত্তাপুব্বভাগঞ্চ উপট্ঠপেত্ৰাতি অত্থো। কালেনাতি যুত্তপত্তকালেন; অজ্ঝেসিতকালেযেৰ তৰ ভারে কতে অনুযুঞ্জাতি অত্থো।
Anuyogavattaṃnisāmayāti anuyuñjanavattaṃ nisāmehi. Kusalena buddhimatā katanti chekena paṇḍitena ñāṇapāramippattena bhagavatā nīharitvā ṭhapitaṃ. Suvuttanti supaññāpitaṃ. Sikkhāpadānulomikanti sikkhāpadānaṃ anulomaṃ. Ayaṃ tāva padattho, ayaṃ panettha sādhippāyasaṅkhepavaṇṇanā – ‘‘sace tvaṃ anuvijjako, mā sahasā bhaṇi, mā anatthasaṃhitaṃ viggāhikakathaṃ bhaṇi. Yaṃ pana kusalena buddhimatā lokanāthena etesu suttādīsu anuyogavattaṃ kathaṃ supaññattaṃ sabbasikkhāpadānaṃ anulomaṃ, taṃ nisāmaya taṃ upadhārehī’’ti. Gatiṃ na nāsento samparāyikanti attano samparāye sugatinibbattiṃ anāsento anuyogavattaṃ nisāmaya. Yo hi taṃ anisāmetvā anuyuñjati, so samparāyikaṃ attano gatiṃ nāseti, tasmā tvaṃ anāsento nisāmayāti attho. Idāni taṃ anuyogavattaṃ dassetuṃ hitesītiādimāha. Tattha hitesīti hitaṃ esanto gavesanto; mettañca mettāpubbabhāgañca upaṭṭhapetvāti attho. Kālenāti yuttapattakālena; ajjhesitakāleyeva tava bhāre kate anuyuñjāti attho.
সহসা ৰোহারং মা পধারেসীতি যো এতেসং সহসা ৰোহারো হোতি, সহসা ভাসিতং, তং মা পধারেসি, মা গণ্হিত্থ।
Sahasā vohāraṃ mā padhāresīti yo etesaṃ sahasā vohāro hoti, sahasā bhāsitaṃ, taṃ mā padhāresi, mā gaṇhittha.
পটিঞ্ঞানুসন্ধিতেন কারযেতি এত্থ অনুসন্ধিতন্তি কথানুসন্ধি ৰুচ্চতি, তস্মা পটিঞ্ঞানুসন্ধিনা কারযে; কথানুসন্ধিং সল্লক্খেত্ৰা পটিঞ্ঞায কারযেতি অত্থো। অথ ৰা পটিঞ্ঞায চ অনুসন্ধিতেন চ কারযে, লজ্জিং পটিঞ্ঞায কারযে; অলজ্জিং ৰত্তানুসন্ধিনাতি অত্থো। তস্মা এৰ পটিঞ্ঞা লজ্জীসূতি গাথমাহ। তত্থ ৰত্তানুসন্ধিতেন কারযেতি ৰত্তানুসন্ধিনা কারযে, যা অস্স ৰত্তেন সদ্ধিং পটিঞ্ঞা সন্ধিযতি, তায পটিঞ্ঞায কারযেতি অত্থো।
Paṭiññānusandhitena kārayeti ettha anusandhitanti kathānusandhi vuccati, tasmā paṭiññānusandhinā kāraye; kathānusandhiṃ sallakkhetvā paṭiññāya kārayeti attho. Atha vā paṭiññāya ca anusandhitena ca kāraye, lajjiṃ paṭiññāya kāraye; alajjiṃ vattānusandhināti attho. Tasmā eva paṭiññā lajjīsūti gāthamāha. Tattha vattānusandhitena kārayeti vattānusandhinā kāraye, yā assa vattena saddhiṃ paṭiññā sandhiyati, tāya paṭiññāya kārayeti attho.
সঞ্চিচ্চাতি জানন্তো আপজ্জতি। পরিগূহতীতি নিগূহতি ন দেসেতি ন ৰুট্ঠাতি।
Sañciccāti jānanto āpajjati. Parigūhatīti nigūhati na deseti na vuṭṭhāti.
সা অহম্পি জানামীতি যং তুম্হেহি ৰুত্তং, তং সচ্চং, অহম্পি নং এৰমেৰ জানামি। অঞ্ঞঞ্চ তাহন্তি অঞ্ঞঞ্চ তং অহং পুচ্ছামি।
Sā ahampi jānāmīti yaṃ tumhehi vuttaṃ, taṃ saccaṃ, ahampi naṃ evameva jānāmi. Aññañca tāhanti aññañca taṃ ahaṃ pucchāmi.
পুব্বাপরং ন জানাতীতি পুরেকথিতঞ্চ পচ্ছাকথিতঞ্চ ন জানাতি। অকোৰিদোতি তস্মিং পুব্বাপরে অকুসলো। অনুসন্ধিৰচনপথং ন জানাতীতি কথানুসন্ধিৰচনং ৰিনিচ্ছযানুসন্ধিৰচনঞ্চ ন জানাতি।
Pubbāparaṃna jānātīti purekathitañca pacchākathitañca na jānāti. Akovidoti tasmiṃ pubbāpare akusalo. Anusandhivacanapathaṃ na jānātīti kathānusandhivacanaṃ vinicchayānusandhivacanañca na jānāti.
সীলৰিপত্তিযা চোদেতীতি দ্ৰীহি আপত্তিক্খন্ধেহি চোদেতি। আচারদিট্ঠিযাতি আচারৰিপত্তিযা চেৰ দিট্ঠিৰিপত্তিযা চ। আচারৰিপত্তিযা চোদেন্তো পঞ্চহাপত্তিক্খন্ধেহি চোদেতি, দিট্ঠিৰিপত্তিযা চোদেন্তো মিচ্ছাদিট্ঠিযা চেৰ অন্তগ্গাহিকদিট্ঠিযা চ চোদেতি। আজীৰেনপি চোদেতীতি আজীৰহেতুপঞ্ঞত্তেহি ছহি সিক্খাপদেহি চোদেতি। সেসং সব্বত্থ উত্তানমেৰাতি।
Sīlavipattiyā codetīti dvīhi āpattikkhandhehi codeti. Ācāradiṭṭhiyāti ācāravipattiyā ceva diṭṭhivipattiyā ca. Ācāravipattiyā codento pañcahāpattikkhandhehi codeti, diṭṭhivipattiyā codento micchādiṭṭhiyā ceva antaggāhikadiṭṭhiyā ca codeti. Ājīvenapi codetīti ājīvahetupaññattehi chahi sikkhāpadehi codeti. Sesaṃ sabbattha uttānamevāti.
দুতিযগাথাসঙ্গণিকৰণ্ণনা নিট্ঠিতা।
Dutiyagāthāsaṅgaṇikavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. চোদনাদিপুচ্ছাৰিস্সজ্জনা • 1. Codanādipucchāvissajjanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দুতিযগাথাসঙ্গণিকৰণ্ণনা • Dutiyagāthāsaṅgaṇikavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
