| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
দুতিযগাথাসঙ্গণিকং
Dutiyagāthāsaṅgaṇikaṃ
চোদনাদিপুচ্ছাৰিস্সজ্জনাৰণ্ণনা
Codanādipucchāvissajjanāvaṇṇanā
৩৫৯. দুতিযগাথাসঙ্গণিযং চোদনা নাম কিং দস্সেত্ৰা চোদনাতি আহ ‘‘ৰত্থুঞ্চ আপত্তিঞ্চ দস্সেত্ৰা চোদনা’’তি। দোসং সরাপেতীতি দোসসারণা। সঙ্ঘসন্নিপাতোতি সঙ্ঘস্স সন্নিপতনং। ইমিনা সঙ্ঘোতি এত্থ উত্তরপদলোপং দস্সেতি। মতিকম্মন্তি এত্থ মতিসদ্দো ইচ্ছত্থোতি আহ ‘‘ৰুচ্চতি মন্তগ্গহণ’’ন্তি। তন্তি মতিকম্মং।
359. Dutiyagāthāsaṅgaṇiyaṃ codanā nāma kiṃ dassetvā codanāti āha ‘‘vatthuñca āpattiñca dassetvā codanā’’ti. Dosaṃ sarāpetīti dosasāraṇā. Saṅghasannipātoti saṅghassa sannipatanaṃ. Iminā saṅghoti ettha uttarapadalopaṃ dasseti. Matikammanti ettha matisaddo icchatthoti āha ‘‘vuccati mantaggahaṇa’’nti. Tanti matikammaṃ.
‘‘তেন চুদিতকপুগ্গলেনা’’তি পদং ‘‘সারণত্থাযা’’তি পদে কারিতকম্মং। তস্স পুগ্গলস্সাতি তস্স চুদিতকস্স পুগ্গলস্স, ইমিনা ‘‘নিগ্গহত্থাযা’’তি পদস্স কম্মং দস্সেতি। তত্থাতি তস্মিং অধিকরণৰিনিচ্ছযট্ঠানে। পরিগ্গহণত্থাযাতি পরি ৰীমংসিত্ৰা গহণত্থায। ধম্মা-ধম্মন্তি ভূতাভূতং। ‘‘ৰিনিচ্ছযসন্নিট্ঠাপনত্থ’’ন্তি ইমিনা পাল়িযং পাঠসেসং দস্সেতি।
‘‘Tena cuditakapuggalenā’’ti padaṃ ‘‘sāraṇatthāyā’’ti pade kāritakammaṃ. Tassa puggalassāti tassa cuditakassa puggalassa, iminā ‘‘niggahatthāyā’’ti padassa kammaṃ dasseti. Tatthāti tasmiṃ adhikaraṇavinicchayaṭṭhāne. Pariggahaṇatthāyāti pari vīmaṃsitvā gahaṇatthāya. Dhammā-dhammanti bhūtābhūtaṃ. ‘‘Vinicchayasanniṭṭhāpanattha’’nti iminā pāḷiyaṃ pāṭhasesaṃ dasseti.
মা খো পটিঘন্তি এত্থ পটিঘসদ্দো কোপপরিযাযোতি আহ ‘‘কোপং মা জনযী’’তি। ‘‘চুদিতকে ৰা চোদকে ৰা’’তি ইমিনা ‘‘সঙ্ঘে’’তি আধারং পটিক্খিপতি। সচে অনুৰিজ্জকো তুৰন্তি এত্থ অনুৰিজ্জকসদ্দো ৰিনযধরপরিযাযোতি আহ ‘‘ৰিনযধরো’’তি। ৰিনযধরো হি যস্মা চোদকচুদিতকানং ৰচনং অনুমিনিত্ৰা ৰত্থুআপত্তাদিৰসেন ৰিদতি, তস্মা অনুৰিজ্জকোতি ৰুচ্চতি।
Mā kho paṭighanti ettha paṭighasaddo kopapariyāyoti āha ‘‘kopaṃ mā janayī’’ti. ‘‘Cuditake vā codake vā’’ti iminā ‘‘saṅghe’’ti ādhāraṃ paṭikkhipati. Sace anuvijjako tuvanti ettha anuvijjakasaddo vinayadharapariyāyoti āha ‘‘vinayadharo’’ti. Vinayadharo hi yasmā codakacuditakānaṃ vacanaṃ anuminitvā vatthuāpattādivasena vidati, tasmā anuvijjakoti vuccati.
ৰিরুদ্ধং গাহং সংৰত্তেতীতি ৰিগ্গাহিকং। ‘‘ন ত্ৰ’’ন্তিআদিনা ণিকপচ্চযস্স সরূপং দস্সেতি। যাযাতি কথায। সুত্তাদীনং সরূপং দস্সেন্তো আহ ‘‘সুত্তং নামা’’তিআদি।
Viruddhaṃ gāhaṃ saṃvattetīti viggāhikaṃ. ‘‘Na tva’’ntiādinā ṇikapaccayassa sarūpaṃ dasseti. Yāyāti kathāya. Suttādīnaṃ sarūpaṃ dassento āha ‘‘suttaṃ nāmā’’tiādi.
অনুযুঞ্জনৰত্তন্তি অনুযুঞ্জনস্স, অনুযুঞ্জনে ৰা ৰত্তং। কুসলেন বুদ্ধিমতাতি এত্থ কুসলসদ্দো ছেকপরিযাযো, বুদ্ধিমন্তুসদ্দো পণ্ডিতপরিযাযোতি আহ ‘‘ছেকেন পণ্ডিতেনা’’তি। ‘‘ঞাণপারমিপ্পত্তেনা’’তি ইমিনা বুদ্ধিমতাতি এত্থ ন কেৰলং ঞাণসামঞ্ঞং, অথ খো সব্বঞ্ঞুতঞ্ঞাণন্তি দস্সেতি। অযন্তি এসো যথাৰুত্তো অত্থো। অযং পনাতি এসো ৰক্খমানো পন। এত্থাতি ইমাসু গাথাসু। সচে ত্ৰং অনুৰিজ্জকো হোসীতি যোজনা। যং পন অনুযোগৰত্তং কতং সুপঞ্ঞত্তং সব্বসিক্খাপদানং অনুলোমন্তি যোজনা। তন্তি অনুযোগৰত্তং। ইতীতি অযং সাধিপ্পাযসঙ্খেপৰণ্ণনা। অত্তনোতি অনুৰিজ্জকস্স। সম্পরাযেতি পরলোকে। যোতি অনুৰিজ্জকো। তন্তি অনুযোগৰত্তং । গতিন্তি সুগতিং। হিতন্তি চোদকচুদিতকানং হিতং। গৰেসন্তোতি ঞাণেন এসন্তো। ইমিনা হিতং এসন্তোতি হিতেসীতি ৰচনত্থং দস্সেতি। মেত্তঞ্চাতি অপ্পনাপত্তং মেত্তঞ্চ। মেত্তাপুব্বভাগঞ্চাতি অপ্পনামেত্তায পুব্বভাগে পৰত্তং পরিকম্মউপচারমেত্তঞ্চ। তৰ ভারে সঙ্ঘেন কতে এৰাতি যোজনা।
Anuyuñjanavattanti anuyuñjanassa, anuyuñjane vā vattaṃ. Kusalena buddhimatāti ettha kusalasaddo chekapariyāyo, buddhimantusaddo paṇḍitapariyāyoti āha ‘‘chekena paṇḍitenā’’ti. ‘‘Ñāṇapāramippattenā’’ti iminā buddhimatāti ettha na kevalaṃ ñāṇasāmaññaṃ, atha kho sabbaññutaññāṇanti dasseti. Ayanti eso yathāvutto attho. Ayaṃ panāti eso vakkhamāno pana. Etthāti imāsu gāthāsu. Sace tvaṃ anuvijjako hosīti yojanā. Yaṃ pana anuyogavattaṃ kataṃ supaññattaṃ sabbasikkhāpadānaṃ anulomanti yojanā. Tanti anuyogavattaṃ. Itīti ayaṃ sādhippāyasaṅkhepavaṇṇanā. Attanoti anuvijjakassa. Samparāyeti paraloke. Yoti anuvijjako. Tanti anuyogavattaṃ . Gatinti sugatiṃ. Hitanti codakacuditakānaṃ hitaṃ. Gavesantoti ñāṇena esanto. Iminā hitaṃ esantoti hitesīti vacanatthaṃ dasseti. Mettañcāti appanāpattaṃ mettañca. Mettāpubbabhāgañcāti appanāmettāya pubbabhāge pavattaṃ parikammaupacāramettañca. Tava bhāre saṅghena kate evāti yojanā.
যোতি অনুৰিজ্জকো। এতেসন্তি চোদকচুদিতকানং। ‘‘ভাসিত’’ন্তি ইমিনা ৰোহারসদ্দো ভাসিতপরিযাযোতি দস্সেতি। তন্তি সহসা ৰোহারং।
Yoti anuvijjako. Etesanti codakacuditakānaṃ. ‘‘Bhāsita’’nti iminā vohārasaddo bhāsitapariyāyoti dasseti. Tanti sahasā vohāraṃ.
অনুসন্ধিতন্তি এত্থ ৰিনিচ্ছযানুসন্ধিং পটিক্খিপন্তো আহ ‘‘কথানুসন্ধি ৰুচ্চতী’’তি। কথায অনুরূপং সন্দহনং কথানুসন্ধি। পটিঞ্ঞানুসন্ধিতেনাতি এত্থ পটিঞ্ঞাসদ্দঅনুসন্ধিসদ্দানং তুল্যাধিকরণতো অঞ্ঞং ভিন্নাধিকরণং দস্সেন্তো আহ ‘‘অথৰা’’তিআদি। লজ্জিং পুগ্গলন্তি সম্বন্ধো। তত্থাতি গাথাযং। ৰত্তানুসন্ধিনাতি আচারসঙ্খাতেন ৰত্তেন অনুসন্ধিনা অস্স অলজ্জীস্স ৰত্তেন সদ্ধিং যা পটিঞ্ঞা সন্ধিযতীতি যোজনা।
Anusandhitanti ettha vinicchayānusandhiṃ paṭikkhipanto āha ‘‘kathānusandhi vuccatī’’ti. Kathāya anurūpaṃ sandahanaṃ kathānusandhi. Paṭiññānusandhitenāti ettha paṭiññāsaddaanusandhisaddānaṃ tulyādhikaraṇato aññaṃ bhinnādhikaraṇaṃ dassento āha ‘‘athavā’’tiādi. Lajjiṃ puggalanti sambandho. Tatthāti gāthāyaṃ. Vattānusandhināti ācārasaṅkhātena vattena anusandhinā assa alajjīssa vattena saddhiṃ yā paṭiññā sandhiyatīti yojanā.
জানন্তো আপজ্জতীতি জানন্তো হুত্ৰা আপজ্জতি। ইমিনা সঞ্চিচ্চাতি পদস্স সঞ্চেতেত্ৰাতি অত্থং দস্সেতি। ৰীতিক্কমচেতনায সদ্ধিং চেতেত্ৰাতি অত্থো। ‘‘ন দেসেতি ন ৰুট্ঠাতী’’তি ইমিনা পরিগূহতীতি এত্থ পরিগূহনং নাম অত্থতো ন দেসনং ন ৰুট্ঠানন্তি দস্সেতি।
Jānanto āpajjatīti jānanto hutvā āpajjati. Iminā sañciccāti padassa sañcetetvāti atthaṃ dasseti. Vītikkamacetanāya saddhiṃ cetetvāti attho. ‘‘Na deseti na vuṭṭhātī’’ti iminā parigūhatīti ettha parigūhanaṃ nāma atthato na desanaṃ na vuṭṭhānanti dasseti.
যন্তি ‘‘সঞ্চিচ্চ আপত্তিং আপজ্জতী’’তি ৰচনং। তুম্হেহীতি পরিহারকারকেহি। সচ্চন্তি তথং অৰিতথং। অহম্পীতি চোদকোপি। পিসদ্দেন পরিহারকং সম্পিণ্ডেতি। নন্তি ‘‘সঞ্চিচ্চা’’তিআদিৰচনং। তন্তি তুৰং, ত্ৰং ৰা।
Yanti ‘‘sañcicca āpattiṃ āpajjatī’’ti vacanaṃ. Tumhehīti parihārakārakehi. Saccanti tathaṃ avitathaṃ. Ahampīti codakopi. Pisaddena parihārakaṃ sampiṇḍeti. Nanti ‘‘sañciccā’’tiādivacanaṃ. Tanti tuvaṃ, tvaṃ vā.
পুব্বাপরন্তি এত্থ পুব্বে কথেতব্বং পুব্বং, অপরম্হি কথেতব্বং অপরং, পুব্বঞ্চ অপরঞ্চ পুব্বাপরন্তি দস্সেন্তো আহ ‘‘পুরে’’তিআদি। ‘‘তস্মিং পুব্বাপরে’’তি ইমিনা পাল়িযং পুব্বপরস্সাতি এত্থ ভুম্মত্থে সামিৰচনন্তি দস্সেতি।
Pubbāparanti ettha pubbe kathetabbaṃ pubbaṃ, aparamhi kathetabbaṃ aparaṃ, pubbañca aparañca pubbāparanti dassento āha ‘‘pure’’tiādi. ‘‘Tasmiṃ pubbāpare’’ti iminā pāḷiyaṃ pubbaparassāti ettha bhummatthe sāmivacananti dasseti.
দ্ৰীহীতি পারাজিকসঙ্ঘাদিসেসৰসেন দ্ৰীহি। পঞ্চহীতি থুল্লচ্চযাদিৰসেন পঞ্চহি। মিচ্ছাদিট্ঠিযাতি ‘‘নত্থি দিন্ন’’ন্তিআদিনা (ধ॰ স॰ ১২২১) দসৰত্থুকায মিচ্ছাদিট্ঠিযা। অন্তগ্গাহিকদিট্ঠিযাতি ‘‘সস্সতো লোকো’’তিআদিনা (দী॰ নি॰ ১.৩১; ম॰ নি॰ ১.২৬৯) দসৰত্থুকায অন্তগ্গাহিকদিট্ঠিযা। সব্বত্থাতি সব্বেসু দুতিযগাথাসঙ্গণিকেসু।
Dvīhīti pārājikasaṅghādisesavasena dvīhi. Pañcahīti thullaccayādivasena pañcahi. Micchādiṭṭhiyāti ‘‘natthi dinna’’ntiādinā (dha. sa. 1221) dasavatthukāya micchādiṭṭhiyā. Antaggāhikadiṭṭhiyāti ‘‘sassato loko’’tiādinā (dī. ni. 1.31; ma. ni. 1.269) dasavatthukāya antaggāhikadiṭṭhiyā. Sabbatthāti sabbesu dutiyagāthāsaṅgaṇikesu.
ইতি দুতিযগাথাসঙ্গণিকৰণ্ণনায যোজনা সমত্তা।
Iti dutiyagāthāsaṅgaṇikavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. চোদনাদিপুচ্ছাৰিস্সজ্জনা • 1. Codanādipucchāvissajjanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দুতিযগাথাসঙ্গণিকৰণ্ণনা • Dutiyagāthāsaṅgaṇikavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
