| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
দুতিযগাথাসঙ্গণিকং
Dutiyagāthāsaṅgaṇikaṃ
চোদনাদিপুচ্ছাৰিস্সজ্জনাৰণ্ণনা
Codanādipucchāvissajjanāvaṇṇanā
৩৫৯. দুতিযগাথাসঙ্গণিকায ‘‘চোদনা কিমত্থাযা’’তিআদিকা পুচ্ছা উপালিত্থেরেন কতা। ‘‘চোদনা সারণত্থাযা’’তিআদিৰিস্সজ্জনং ভগৰতা ৰুত্তং। উপালিত্থেরো সযমেৰ পুচ্ছিত্ৰা ৰিস্সজ্জনং অকাসীতিপি ৰদন্তি।
359. Dutiyagāthāsaṅgaṇikāya ‘‘codanā kimatthāyā’’tiādikā pucchā upālittherena katā. ‘‘Codanā sāraṇatthāyā’’tiādivissajjanaṃ bhagavatā vuttaṃ. Upālitthero sayameva pucchitvā vissajjanaṃ akāsītipi vadanti.
মন্তগ্গহণন্তি তেসং ৰিচারণাগহণং, সুত্তন্তিকত্থেরানং, ৰিনযধরত্থেরানঞ্চ অধিপ্পাযগহণন্তি অত্থো। পাটেক্কং ৰিনিচ্ছযসন্নিট্ঠাপনত্থন্তি তেসং পচ্চেকং অধিপ্পাযং ঞত্ৰা তেহি সমুট্ঠাপিতনযম্পি গহেত্ৰা ৰিনিচ্ছযপরিযোসাপনত্থন্তি অধিপ্পাযো।
Mantaggahaṇanti tesaṃ vicāraṇāgahaṇaṃ, suttantikattherānaṃ, vinayadharattherānañca adhippāyagahaṇanti attho. Pāṭekkaṃ vinicchayasanniṭṭhāpanatthanti tesaṃ paccekaṃ adhippāyaṃ ñatvā tehi samuṭṭhāpitanayampi gahetvā vinicchayapariyosāpanatthanti adhippāyo.
‘‘মা খো তুরিতো অভণী’’তিআদিনা অভিমুখে ঠিতং কঞ্চি অনুৰিজ্জকং ওৰদন্তেন ৰিয থেরেন অনুৰিজ্জকৰত্তং কথিতং।
‘‘Mā kho turito abhaṇī’’tiādinā abhimukhe ṭhitaṃ kañci anuvijjakaṃ ovadantena viya therena anuvijjakavattaṃ kathitaṃ.
অনুযুঞ্জনৰত্তন্তি অনুযুজ্জনক্কমং, তং পন যস্মা সব্বসিক্খাপদৰীতিক্কমৰিসযেপি তংতংসিক্খাপদানুলোমেন কত্তব্বং, তস্মা ‘‘সিক্খাপদানুলোমিক’’ন্তি ৰুত্তং। অত্তনো গতিং নাসেতীতি অত্তনো সুগতিগমনং ৰিনাসেতি।
Anuyuñjanavattanti anuyujjanakkamaṃ, taṃ pana yasmā sabbasikkhāpadavītikkamavisayepi taṃtaṃsikkhāpadānulomena kattabbaṃ, tasmā ‘‘sikkhāpadānulomika’’nti vuttaṃ. Attano gatiṃ nāsetīti attano sugatigamanaṃ vināseti.
অনুসন্ধিত-সদ্দো ভাৰসাধনোতি আহ ‘‘অনুসন্ধিতন্তি কথানুসন্ধী’’তি। ৰত্তানুসন্ধিতেনাতি এত্থাপি এসেৰ নযো। ৰত্তানুসন্ধিতেনাতি আচারানুসন্ধিনা, আচারেন সদ্ধিং সমেন্তিযা পটিঞ্ঞাযাতি অত্থো। তেনাহ ‘‘যা অস্স ৰত্তেনা’’তিআদি।
Anusandhita-saddo bhāvasādhanoti āha ‘‘anusandhitanti kathānusandhī’’ti. Vattānusandhitenāti etthāpi eseva nayo. Vattānusandhitenāti ācārānusandhinā, ācārena saddhiṃ samentiyā paṭiññāyāti attho. Tenāha ‘‘yā assa vattenā’’tiādi.
পাল়িযং সঞ্চিচ্চ আপত্তিন্তিআদি অলজ্জিলজ্জিলক্খণং ভিক্খুভিক্খুনীনং ৰসেন ৰুত্তং তেসঞ্ঞেৰ সব্বপ্পকারতো সিক্খাপদাধিকারত্তা। সামণেরাদীনম্পি সাধারণৰসেন পন সঞ্চিচ্চ যথাসকং সিক্খাপদৰীতিক্কমনাদিকং অলজ্জিলজ্জিলক্খণং ৰেদিতব্বং।
Pāḷiyaṃ sañcicca āpattintiādi alajjilajjilakkhaṇaṃ bhikkhubhikkhunīnaṃ vasena vuttaṃ tesaññeva sabbappakārato sikkhāpadādhikārattā. Sāmaṇerādīnampi sādhāraṇavasena pana sañcicca yathāsakaṃ sikkhāpadavītikkamanādikaṃ alajjilajjilakkhaṇaṃ veditabbaṃ.
কথানুসন্ধিৰচনন্তি চুদিতকঅনুৰিজ্জকানং কথায অনুসন্ধিযুত্তং ৰচনং ন জানাতি, তেহি একস্মিং কারণে ৰুত্তে সযং তং অসল্লক্খেত্ৰা অত্তনো অভিরুচিতমেৰ অসম্বন্ধিতত্থন্তি অত্থো। ৰিনিচ্ছযানুসন্ধিৰচনঞ্চাতি অনুৰিজ্জকেন কতস্স আপত্তানাপত্তিৰিনিচ্ছযস্স অনুগুণং, সম্বন্ধৰচনঞ্চ।
Kathānusandhivacananti cuditakaanuvijjakānaṃ kathāya anusandhiyuttaṃ vacanaṃ na jānāti, tehi ekasmiṃ kāraṇe vutte sayaṃ taṃ asallakkhetvā attano abhirucitameva asambandhitatthanti attho. Vinicchayānusandhivacanañcāti anuvijjakena katassa āpattānāpattivinicchayassa anuguṇaṃ, sambandhavacanañca.
চোদনাদিপুচ্ছাৰিস্সজ্জনাৰণ্ণনা নিট্ঠিতা।
Codanādipucchāvissajjanāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. চোদনাদিপুচ্ছাৰিস্সজ্জনা • 1. Codanādipucchāvissajjanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দুতিযগাথাসঙ্গণিকৰণ্ণনা • Dutiyagāthāsaṅgaṇikavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / চোদনাদিপুচ্ছাৰিস্সজ্জনাৰণ্ণনা • Codanādipucchāvissajjanāvaṇṇanā
