| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
ទុតិយគាថាសង្គណិកំ
Dutiyagāthāsaṅgaṇikaṃ
ចោទនាទិបុច្ឆាវិស្សជ្ជនាវណ្ណនា
Codanādipucchāvissajjanāvaṇṇanā
៣៥៩. ទុតិយគាថាសង្គណិកាយ ‘‘ចោទនា កិមត្ថាយា’’តិអាទិកា បុច្ឆា ឧបាលិត្ថេរេន កតា។ ‘‘ចោទនា សារណត្ថាយា’’តិអាទិវិស្សជ្ជនំ ភគវតា វុត្តំ។ ឧបាលិត្ថេរោ សយមេវ បុច្ឆិត្វា វិស្សជ្ជនំ អកាសីតិបិ វទន្តិ។
359. Dutiyagāthāsaṅgaṇikāya ‘‘codanā kimatthāyā’’tiādikā pucchā upālittherena katā. ‘‘Codanā sāraṇatthāyā’’tiādivissajjanaṃ bhagavatā vuttaṃ. Upālitthero sayameva pucchitvā vissajjanaṃ akāsītipi vadanti.
មន្តគ្គហណន្តិ តេសំ វិចារណាគហណំ, សុត្តន្តិកត្ថេរានំ, វិនយធរត្ថេរានញ្ច អធិប្បាយគហណន្តិ អត្ថោ។ បាដេក្កំ វិនិច្ឆយសន្និដ្ឋាបនត្ថន្តិ តេសំ បច្ចេកំ អធិប្បាយំ ញត្វា តេហិ សមុដ្ឋាបិតនយម្បិ គហេត្វា វិនិច្ឆយបរិយោសាបនត្ថន្តិ អធិប្បាយោ។
Mantaggahaṇanti tesaṃ vicāraṇāgahaṇaṃ, suttantikattherānaṃ, vinayadharattherānañca adhippāyagahaṇanti attho. Pāṭekkaṃ vinicchayasanniṭṭhāpanatthanti tesaṃ paccekaṃ adhippāyaṃ ñatvā tehi samuṭṭhāpitanayampi gahetvā vinicchayapariyosāpanatthanti adhippāyo.
‘‘មា ខោ តុរិតោ អភណី’’តិអាទិនា អភិមុខេ ឋិតំ កញ្ចិ អនុវិជ្ជកំ ឱវទន្តេន វិយ ថេរេន អនុវិជ្ជកវត្តំ កថិតំ។
‘‘Mā kho turito abhaṇī’’tiādinā abhimukhe ṭhitaṃ kañci anuvijjakaṃ ovadantena viya therena anuvijjakavattaṃ kathitaṃ.
អនុយុញ្ជនវត្តន្តិ អនុយុជ្ជនក្កមំ, តំ បន យស្មា សព្ពសិក្ខាបទវីតិក្កមវិសយេបិ តំតំសិក្ខាបទានុលោមេន កត្តព្ពំ, តស្មា ‘‘សិក្ខាបទានុលោមិក’’ន្តិ វុត្តំ។ អត្តនោ គតិំ នាសេតីតិ អត្តនោ សុគតិគមនំ វិនាសេតិ។
Anuyuñjanavattanti anuyujjanakkamaṃ, taṃ pana yasmā sabbasikkhāpadavītikkamavisayepi taṃtaṃsikkhāpadānulomena kattabbaṃ, tasmā ‘‘sikkhāpadānulomika’’nti vuttaṃ. Attano gatiṃ nāsetīti attano sugatigamanaṃ vināseti.
អនុសន្ធិត-សទ្ទោ ភាវសាធនោតិ អាហ ‘‘អនុសន្ធិតន្តិ កថានុសន្ធី’’តិ។ វត្តានុសន្ធិតេនាតិ ឯត្ថាបិ ឯសេវ នយោ។ វត្តានុសន្ធិតេនាតិ អាចារានុសន្ធិនា, អាចារេន សទ្ធិំ សមេន្តិយា បដិញ្ញាយាតិ អត្ថោ។ តេនាហ ‘‘យា អស្ស វត្តេនា’’តិអាទិ។
Anusandhita-saddo bhāvasādhanoti āha ‘‘anusandhitanti kathānusandhī’’ti. Vattānusandhitenāti etthāpi eseva nayo. Vattānusandhitenāti ācārānusandhinā, ācārena saddhiṃ samentiyā paṭiññāyāti attho. Tenāha ‘‘yā assa vattenā’’tiādi.
បាឡិយំ សញ្ចិច្ច អាបត្តិន្តិអាទិ អលជ្ជិលជ្ជិលក្ខណំ ភិក្ខុភិក្ខុនីនំ វសេន វុត្តំ តេសញ្ញេវ សព្ពប្បការតោ សិក្ខាបទាធិការត្តា។ សាមណេរាទីនម្បិ សាធារណវសេន បន សញ្ចិច្ច យថាសកំ សិក្ខាបទវីតិក្កមនាទិកំ អលជ្ជិលជ្ជិលក្ខណំ វេទិតព្ពំ។
Pāḷiyaṃ sañcicca āpattintiādi alajjilajjilakkhaṇaṃ bhikkhubhikkhunīnaṃ vasena vuttaṃ tesaññeva sabbappakārato sikkhāpadādhikārattā. Sāmaṇerādīnampi sādhāraṇavasena pana sañcicca yathāsakaṃ sikkhāpadavītikkamanādikaṃ alajjilajjilakkhaṇaṃ veditabbaṃ.
កថានុសន្ធិវចនន្តិ ចុទិតកអនុវិជ្ជកានំ កថាយ អនុសន្ធិយុត្តំ វចនំ ន ជានាតិ, តេហិ ឯកស្មិំ ការណេ វុត្តេ សយំ តំ អសល្លក្ខេត្វា អត្តនោ អភិរុចិតមេវ អសម្ពន្ធិតត្ថន្តិ អត្ថោ។ វិនិច្ឆយានុសន្ធិវចនញ្ចាតិ អនុវិជ្ជកេន កតស្ស អាបត្តានាបត្តិវិនិច្ឆយស្ស អនុគុណំ, សម្ពន្ធវចនញ្ច។
Kathānusandhivacananti cuditakaanuvijjakānaṃ kathāya anusandhiyuttaṃ vacanaṃ na jānāti, tehi ekasmiṃ kāraṇe vutte sayaṃ taṃ asallakkhetvā attano abhirucitameva asambandhitatthanti attho. Vinicchayānusandhivacanañcāti anuvijjakena katassa āpattānāpattivinicchayassa anuguṇaṃ, sambandhavacanañca.
ចោទនាទិបុច្ឆាវិស្សជ្ជនាវណ្ណនា និដ្ឋិតា។
Codanādipucchāvissajjanāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ១. ចោទនាទិបុច្ឆាវិស្សជ្ជនា • 1. Codanādipucchāvissajjanā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ចោទនាទិបុច្ឆាវិស្សជ្ជនាវណ្ណនា • Codanādipucchāvissajjanāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ទុតិយគាថាសង្គណិកវណ្ណនា • Dutiyagāthāsaṅgaṇikavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ចោទនាទិបុច្ឆាវិស្សជ្ជនាវណ្ណនា • Codanādipucchāvissajjanāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ចោទនាទិបុច្ឆាវិស្សជ្ជនាវណ្ណនា • Codanādipucchāvissajjanāvaṇṇanā
