| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ದುತಿಯಗಾಥಾಸಙ್ಗಣಿಕಂ
Dutiyagāthāsaṅgaṇikaṃ
ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ
Codanādipucchāvissajjanāvaṇṇanā
೩೫೯. ದುತಿಯಗಾಥಾಸಙ್ಗಣಿಕಾಯ ‘‘ಚೋದನಾ ಕಿಮತ್ಥಾಯಾ’’ತಿಆದಿಕಾ ಪುಚ್ಛಾ ಉಪಾಲಿತ್ಥೇರೇನ ಕತಾ। ‘‘ಚೋದನಾ ಸಾರಣತ್ಥಾಯಾ’’ತಿಆದಿವಿಸ್ಸಜ್ಜನಂ ಭಗವತಾ ವುತ್ತಂ। ಉಪಾಲಿತ್ಥೇರೋ ಸಯಮೇವ ಪುಚ್ಛಿತ್ವಾ ವಿಸ್ಸಜ್ಜನಂ ಅಕಾಸೀತಿಪಿ ವದನ್ತಿ।
359. Dutiyagāthāsaṅgaṇikāya ‘‘codanā kimatthāyā’’tiādikā pucchā upālittherena katā. ‘‘Codanā sāraṇatthāyā’’tiādivissajjanaṃ bhagavatā vuttaṃ. Upālitthero sayameva pucchitvā vissajjanaṃ akāsītipi vadanti.
ಮನ್ತಗ್ಗಹಣನ್ತಿ ತೇಸಂ ವಿಚಾರಣಾಗಹಣಂ, ಸುತ್ತನ್ತಿಕತ್ಥೇರಾನಂ, ವಿನಯಧರತ್ಥೇರಾನಞ್ಚ ಅಧಿಪ್ಪಾಯಗಹಣನ್ತಿ ಅತ್ಥೋ। ಪಾಟೇಕ್ಕಂ ವಿನಿಚ್ಛಯಸನ್ನಿಟ್ಠಾಪನತ್ಥನ್ತಿ ತೇಸಂ ಪಚ್ಚೇಕಂ ಅಧಿಪ್ಪಾಯಂ ಞತ್ವಾ ತೇಹಿ ಸಮುಟ್ಠಾಪಿತನಯಮ್ಪಿ ಗಹೇತ್ವಾ ವಿನಿಚ್ಛಯಪರಿಯೋಸಾಪನತ್ಥನ್ತಿ ಅಧಿಪ್ಪಾಯೋ।
Mantaggahaṇanti tesaṃ vicāraṇāgahaṇaṃ, suttantikattherānaṃ, vinayadharattherānañca adhippāyagahaṇanti attho. Pāṭekkaṃ vinicchayasanniṭṭhāpanatthanti tesaṃ paccekaṃ adhippāyaṃ ñatvā tehi samuṭṭhāpitanayampi gahetvā vinicchayapariyosāpanatthanti adhippāyo.
‘‘ಮಾ ಖೋ ತುರಿತೋ ಅಭಣೀ’’ತಿಆದಿನಾ ಅಭಿಮುಖೇ ಠಿತಂ ಕಞ್ಚಿ ಅನುವಿಜ್ಜಕಂ ಓವದನ್ತೇನ ವಿಯ ಥೇರೇನ ಅನುವಿಜ್ಜಕವತ್ತಂ ಕಥಿತಂ।
‘‘Mā kho turito abhaṇī’’tiādinā abhimukhe ṭhitaṃ kañci anuvijjakaṃ ovadantena viya therena anuvijjakavattaṃ kathitaṃ.
ಅನುಯುಞ್ಜನವತ್ತನ್ತಿ ಅನುಯುಜ್ಜನಕ್ಕಮಂ, ತಂ ಪನ ಯಸ್ಮಾ ಸಬ್ಬಸಿಕ್ಖಾಪದವೀತಿಕ್ಕಮವಿಸಯೇಪಿ ತಂತಂಸಿಕ್ಖಾಪದಾನುಲೋಮೇನ ಕತ್ತಬ್ಬಂ, ತಸ್ಮಾ ‘‘ಸಿಕ್ಖಾಪದಾನುಲೋಮಿಕ’’ನ್ತಿ ವುತ್ತಂ। ಅತ್ತನೋ ಗತಿಂ ನಾಸೇತೀತಿ ಅತ್ತನೋ ಸುಗತಿಗಮನಂ ವಿನಾಸೇತಿ।
Anuyuñjanavattanti anuyujjanakkamaṃ, taṃ pana yasmā sabbasikkhāpadavītikkamavisayepi taṃtaṃsikkhāpadānulomena kattabbaṃ, tasmā ‘‘sikkhāpadānulomika’’nti vuttaṃ. Attano gatiṃ nāsetīti attano sugatigamanaṃ vināseti.
ಅನುಸನ್ಧಿತ-ಸದ್ದೋ ಭಾವಸಾಧನೋತಿ ಆಹ ‘‘ಅನುಸನ್ಧಿತನ್ತಿ ಕಥಾನುಸನ್ಧೀ’’ತಿ। ವತ್ತಾನುಸನ್ಧಿತೇನಾತಿ ಏತ್ಥಾಪಿ ಏಸೇವ ನಯೋ। ವತ್ತಾನುಸನ್ಧಿತೇನಾತಿ ಆಚಾರಾನುಸನ್ಧಿನಾ, ಆಚಾರೇನ ಸದ್ಧಿಂ ಸಮೇನ್ತಿಯಾ ಪಟಿಞ್ಞಾಯಾತಿ ಅತ್ಥೋ। ತೇನಾಹ ‘‘ಯಾ ಅಸ್ಸ ವತ್ತೇನಾ’’ತಿಆದಿ।
Anusandhita-saddo bhāvasādhanoti āha ‘‘anusandhitanti kathānusandhī’’ti. Vattānusandhitenāti etthāpi eseva nayo. Vattānusandhitenāti ācārānusandhinā, ācārena saddhiṃ samentiyā paṭiññāyāti attho. Tenāha ‘‘yā assa vattenā’’tiādi.
ಪಾಳಿಯಂ ಸಞ್ಚಿಚ್ಚ ಆಪತ್ತಿನ್ತಿಆದಿ ಅಲಜ್ಜಿಲಜ್ಜಿಲಕ್ಖಣಂ ಭಿಕ್ಖುಭಿಕ್ಖುನೀನಂ ವಸೇನ ವುತ್ತಂ ತೇಸಞ್ಞೇವ ಸಬ್ಬಪ್ಪಕಾರತೋ ಸಿಕ್ಖಾಪದಾಧಿಕಾರತ್ತಾ। ಸಾಮಣೇರಾದೀನಮ್ಪಿ ಸಾಧಾರಣವಸೇನ ಪನ ಸಞ್ಚಿಚ್ಚ ಯಥಾಸಕಂ ಸಿಕ್ಖಾಪದವೀತಿಕ್ಕಮನಾದಿಕಂ ಅಲಜ್ಜಿಲಜ್ಜಿಲಕ್ಖಣಂ ವೇದಿತಬ್ಬಂ।
Pāḷiyaṃ sañcicca āpattintiādi alajjilajjilakkhaṇaṃ bhikkhubhikkhunīnaṃ vasena vuttaṃ tesaññeva sabbappakārato sikkhāpadādhikārattā. Sāmaṇerādīnampi sādhāraṇavasena pana sañcicca yathāsakaṃ sikkhāpadavītikkamanādikaṃ alajjilajjilakkhaṇaṃ veditabbaṃ.
ಕಥಾನುಸನ್ಧಿವಚನನ್ತಿ ಚುದಿತಕಅನುವಿಜ್ಜಕಾನಂ ಕಥಾಯ ಅನುಸನ್ಧಿಯುತ್ತಂ ವಚನಂ ನ ಜಾನಾತಿ, ತೇಹಿ ಏಕಸ್ಮಿಂ ಕಾರಣೇ ವುತ್ತೇ ಸಯಂ ತಂ ಅಸಲ್ಲಕ್ಖೇತ್ವಾ ಅತ್ತನೋ ಅಭಿರುಚಿತಮೇವ ಅಸಮ್ಬನ್ಧಿತತ್ಥನ್ತಿ ಅತ್ಥೋ। ವಿನಿಚ್ಛಯಾನುಸನ್ಧಿವಚನಞ್ಚಾತಿ ಅನುವಿಜ್ಜಕೇನ ಕತಸ್ಸ ಆಪತ್ತಾನಾಪತ್ತಿವಿನಿಚ್ಛಯಸ್ಸ ಅನುಗುಣಂ, ಸಮ್ಬನ್ಧವಚನಞ್ಚ।
Kathānusandhivacananti cuditakaanuvijjakānaṃ kathāya anusandhiyuttaṃ vacanaṃ na jānāti, tehi ekasmiṃ kāraṇe vutte sayaṃ taṃ asallakkhetvā attano abhirucitameva asambandhitatthanti attho. Vinicchayānusandhivacanañcāti anuvijjakena katassa āpattānāpattivinicchayassa anuguṇaṃ, sambandhavacanañca.
ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ ನಿಟ್ಠಿತಾ।
Codanādipucchāvissajjanāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೧. ಚೋದನಾದಿಪುಚ್ಛಾವಿಸ್ಸಜ್ಜನಾ • 1. Codanādipucchāvissajjanā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ • Codanādipucchāvissajjanāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ದುತಿಯಗಾಥಾಸಙ್ಗಣಿಕವಣ್ಣನಾ • Dutiyagāthāsaṅgaṇikavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ • Codanādipucchāvissajjanāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ • Codanādipucchāvissajjanāvaṇṇanā
