| Library / Tipiṭaka / ਤਿਪਿਟਕ • Tipiṭaka / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi |
ਦੁਤਿਯਗਾਥਾਸਙ੍ਗਣਿਕਂ
Dutiyagāthāsaṅgaṇikaṃ
ਚੋਦਨਾਦਿਪੁਚ੍ਛਾવਿਸ੍ਸਜ੍ਜਨਾવਣ੍ਣਨਾ
Codanādipucchāvissajjanāvaṇṇanā
੩੫੯. ਦੁਤਿਯਗਾਥਾਸਙ੍ਗਣਿਯਂ ਚੋਦਨਾ ਨਾਮ ਕਿਂ ਦਸ੍ਸੇਤ੍વਾ ਚੋਦਨਾਤਿ ਆਹ ‘‘વਤ੍ਥੁਞ੍ਚ ਆਪਤ੍ਤਿਞ੍ਚ ਦਸ੍ਸੇਤ੍વਾ ਚੋਦਨਾ’’ਤਿ। ਦੋਸਂ ਸਰਾਪੇਤੀਤਿ ਦੋਸਸਾਰਣਾ। ਸਙ੍ਘਸਨ੍ਨਿਪਾਤੋਤਿ ਸਙ੍ਘਸ੍ਸ ਸਨ੍ਨਿਪਤਨਂ। ਇਮਿਨਾ ਸਙ੍ਘੋਤਿ ਏਤ੍ਥ ਉਤ੍ਤਰਪਦਲੋਪਂ ਦਸ੍ਸੇਤਿ। ਮਤਿਕਮ੍ਮਨ੍ਤਿ ਏਤ੍ਥ ਮਤਿਸਦ੍ਦੋ ਇਚ੍ਛਤ੍ਥੋਤਿ ਆਹ ‘‘વੁਚ੍ਚਤਿ ਮਨ੍ਤਗ੍ਗਹਣ’’ਨ੍ਤਿ। ਤਨ੍ਤਿ ਮਤਿਕਮ੍ਮਂ।
359. Dutiyagāthāsaṅgaṇiyaṃ codanā nāma kiṃ dassetvā codanāti āha ‘‘vatthuñca āpattiñca dassetvā codanā’’ti. Dosaṃ sarāpetīti dosasāraṇā. Saṅghasannipātoti saṅghassa sannipatanaṃ. Iminā saṅghoti ettha uttarapadalopaṃ dasseti. Matikammanti ettha matisaddo icchatthoti āha ‘‘vuccati mantaggahaṇa’’nti. Tanti matikammaṃ.
‘‘ਤੇਨ ਚੁਦਿਤਕਪੁਗ੍ਗਲੇਨਾ’’ਤਿ ਪਦਂ ‘‘ਸਾਰਣਤ੍ਥਾਯਾ’’ਤਿ ਪਦੇ ਕਾਰਿਤਕਮ੍ਮਂ। ਤਸ੍ਸ ਪੁਗ੍ਗਲਸ੍ਸਾਤਿ ਤਸ੍ਸ ਚੁਦਿਤਕਸ੍ਸ ਪੁਗ੍ਗਲਸ੍ਸ, ਇਮਿਨਾ ‘‘ਨਿਗ੍ਗਹਤ੍ਥਾਯਾ’’ਤਿ ਪਦਸ੍ਸ ਕਮ੍ਮਂ ਦਸ੍ਸੇਤਿ। ਤਤ੍ਥਾਤਿ ਤਸ੍ਮਿਂ ਅਧਿਕਰਣવਿਨਿਚ੍ਛਯਟ੍ਠਾਨੇ। ਪਰਿਗ੍ਗਹਣਤ੍ਥਾਯਾਤਿ ਪਰਿ વੀਮਂਸਿਤ੍વਾ ਗਹਣਤ੍ਥਾਯ। ਧਮ੍ਮਾ-ਧਮ੍ਮਨ੍ਤਿ ਭੂਤਾਭੂਤਂ। ‘‘વਿਨਿਚ੍ਛਯਸਨ੍ਨਿਟ੍ਠਾਪਨਤ੍ਥ’’ਨ੍ਤਿ ਇਮਿਨਾ ਪਾਲ਼ਿਯਂ ਪਾਠਸੇਸਂ ਦਸ੍ਸੇਤਿ।
‘‘Tena cuditakapuggalenā’’ti padaṃ ‘‘sāraṇatthāyā’’ti pade kāritakammaṃ. Tassa puggalassāti tassa cuditakassa puggalassa, iminā ‘‘niggahatthāyā’’ti padassa kammaṃ dasseti. Tatthāti tasmiṃ adhikaraṇavinicchayaṭṭhāne. Pariggahaṇatthāyāti pari vīmaṃsitvā gahaṇatthāya. Dhammā-dhammanti bhūtābhūtaṃ. ‘‘Vinicchayasanniṭṭhāpanattha’’nti iminā pāḷiyaṃ pāṭhasesaṃ dasseti.
ਮਾ ਖੋ ਪਟਿਘਨ੍ਤਿ ਏਤ੍ਥ ਪਟਿਘਸਦ੍ਦੋ ਕੋਪਪਰਿਯਾਯੋਤਿ ਆਹ ‘‘ਕੋਪਂ ਮਾ ਜਨਯੀ’’ਤਿ। ‘‘ਚੁਦਿਤਕੇ વਾ ਚੋਦਕੇ વਾ’’ਤਿ ਇਮਿਨਾ ‘‘ਸਙ੍ਘੇ’’ਤਿ ਆਧਾਰਂ ਪਟਿਕ੍ਖਿਪਤਿ। ਸਚੇ ਅਨੁવਿਜ੍ਜਕੋ ਤੁવਨ੍ਤਿ ਏਤ੍ਥ ਅਨੁવਿਜ੍ਜਕਸਦ੍ਦੋ વਿਨਯਧਰਪਰਿਯਾਯੋਤਿ ਆਹ ‘‘વਿਨਯਧਰੋ’’ਤਿ। વਿਨਯਧਰੋ ਹਿ ਯਸ੍ਮਾ ਚੋਦਕਚੁਦਿਤਕਾਨਂ વਚਨਂ ਅਨੁਮਿਨਿਤ੍વਾ વਤ੍ਥੁਆਪਤ੍ਤਾਦਿવਸੇਨ વਿਦਤਿ, ਤਸ੍ਮਾ ਅਨੁવਿਜ੍ਜਕੋਤਿ વੁਚ੍ਚਤਿ।
Mā kho paṭighanti ettha paṭighasaddo kopapariyāyoti āha ‘‘kopaṃ mā janayī’’ti. ‘‘Cuditake vā codake vā’’ti iminā ‘‘saṅghe’’ti ādhāraṃ paṭikkhipati. Sace anuvijjako tuvanti ettha anuvijjakasaddo vinayadharapariyāyoti āha ‘‘vinayadharo’’ti. Vinayadharo hi yasmā codakacuditakānaṃ vacanaṃ anuminitvā vatthuāpattādivasena vidati, tasmā anuvijjakoti vuccati.
વਿਰੁਦ੍ਧਂ ਗਾਹਂ ਸਂવਤ੍ਤੇਤੀਤਿ વਿਗ੍ਗਾਹਿਕਂ। ‘‘ਨ ਤ੍વ’’ਨ੍ਤਿਆਦਿਨਾ ਣਿਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ। ਯਾਯਾਤਿ ਕਥਾਯ। ਸੁਤ੍ਤਾਦੀਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਸੁਤ੍ਤਂ ਨਾਮਾ’’ਤਿਆਦਿ।
Viruddhaṃ gāhaṃ saṃvattetīti viggāhikaṃ. ‘‘Na tva’’ntiādinā ṇikapaccayassa sarūpaṃ dasseti. Yāyāti kathāya. Suttādīnaṃ sarūpaṃ dassento āha ‘‘suttaṃ nāmā’’tiādi.
ਅਨੁਯੁਞ੍ਜਨવਤ੍ਤਨ੍ਤਿ ਅਨੁਯੁਞ੍ਜਨਸ੍ਸ, ਅਨੁਯੁਞ੍ਜਨੇ વਾ વਤ੍ਤਂ। ਕੁਸਲੇਨ ਬੁਦ੍ਧਿਮਤਾਤਿ ਏਤ੍ਥ ਕੁਸਲਸਦ੍ਦੋ ਛੇਕਪਰਿਯਾਯੋ, ਬੁਦ੍ਧਿਮਨ੍ਤੁਸਦ੍ਦੋ ਪਣ੍ਡਿਤਪਰਿਯਾਯੋਤਿ ਆਹ ‘‘ਛੇਕੇਨ ਪਣ੍ਡਿਤੇਨਾ’’ਤਿ। ‘‘ਞਾਣਪਾਰਮਿਪ੍ਪਤ੍ਤੇਨਾ’’ਤਿ ਇਮਿਨਾ ਬੁਦ੍ਧਿਮਤਾਤਿ ਏਤ੍ਥ ਨ ਕੇવਲਂ ਞਾਣਸਾਮਞ੍ਞਂ, ਅਥ ਖੋ ਸਬ੍ਬਞ੍ਞੁਤਞ੍ਞਾਣਨ੍ਤਿ ਦਸ੍ਸੇਤਿ। ਅਯਨ੍ਤਿ ਏਸੋ ਯਥਾવੁਤ੍ਤੋ ਅਤ੍ਥੋ। ਅਯਂ ਪਨਾਤਿ ਏਸੋ વਕ੍ਖਮਾਨੋ ਪਨ। ਏਤ੍ਥਾਤਿ ਇਮਾਸੁ ਗਾਥਾਸੁ। ਸਚੇ ਤ੍વਂ ਅਨੁવਿਜ੍ਜਕੋ ਹੋਸੀਤਿ ਯੋਜਨਾ। ਯਂ ਪਨ ਅਨੁਯੋਗવਤ੍ਤਂ ਕਤਂ ਸੁਪਞ੍ਞਤ੍ਤਂ ਸਬ੍ਬਸਿਕ੍ਖਾਪਦਾਨਂ ਅਨੁਲੋਮਨ੍ਤਿ ਯੋਜਨਾ। ਤਨ੍ਤਿ ਅਨੁਯੋਗવਤ੍ਤਂ। ਇਤੀਤਿ ਅਯਂ ਸਾਧਿਪ੍ਪਾਯਸਙ੍ਖੇਪવਣ੍ਣਨਾ। ਅਤ੍ਤਨੋਤਿ ਅਨੁવਿਜ੍ਜਕਸ੍ਸ। ਸਮ੍ਪਰਾਯੇਤਿ ਪਰਲੋਕੇ। ਯੋਤਿ ਅਨੁવਿਜ੍ਜਕੋ। ਤਨ੍ਤਿ ਅਨੁਯੋਗવਤ੍ਤਂ । ਗਤਿਨ੍ਤਿ ਸੁਗਤਿਂ। ਹਿਤਨ੍ਤਿ ਚੋਦਕਚੁਦਿਤਕਾਨਂ ਹਿਤਂ। ਗવੇਸਨ੍ਤੋਤਿ ਞਾਣੇਨ ਏਸਨ੍ਤੋ। ਇਮਿਨਾ ਹਿਤਂ ਏਸਨ੍ਤੋਤਿ ਹਿਤੇਸੀਤਿ વਚਨਤ੍ਥਂ ਦਸ੍ਸੇਤਿ। ਮੇਤ੍ਤਞ੍ਚਾਤਿ ਅਪ੍ਪਨਾਪਤ੍ਤਂ ਮੇਤ੍ਤਞ੍ਚ। ਮੇਤ੍ਤਾਪੁਬ੍ਬਭਾਗਞ੍ਚਾਤਿ ਅਪ੍ਪਨਾਮੇਤ੍ਤਾਯ ਪੁਬ੍ਬਭਾਗੇ ਪવਤ੍ਤਂ ਪਰਿਕਮ੍ਮਉਪਚਾਰਮੇਤ੍ਤਞ੍ਚ। ਤવ ਭਾਰੇ ਸਙ੍ਘੇਨ ਕਤੇ ਏવਾਤਿ ਯੋਜਨਾ।
Anuyuñjanavattanti anuyuñjanassa, anuyuñjane vā vattaṃ. Kusalena buddhimatāti ettha kusalasaddo chekapariyāyo, buddhimantusaddo paṇḍitapariyāyoti āha ‘‘chekena paṇḍitenā’’ti. ‘‘Ñāṇapāramippattenā’’ti iminā buddhimatāti ettha na kevalaṃ ñāṇasāmaññaṃ, atha kho sabbaññutaññāṇanti dasseti. Ayanti eso yathāvutto attho. Ayaṃ panāti eso vakkhamāno pana. Etthāti imāsu gāthāsu. Sace tvaṃ anuvijjako hosīti yojanā. Yaṃ pana anuyogavattaṃ kataṃ supaññattaṃ sabbasikkhāpadānaṃ anulomanti yojanā. Tanti anuyogavattaṃ. Itīti ayaṃ sādhippāyasaṅkhepavaṇṇanā. Attanoti anuvijjakassa. Samparāyeti paraloke. Yoti anuvijjako. Tanti anuyogavattaṃ . Gatinti sugatiṃ. Hitanti codakacuditakānaṃ hitaṃ. Gavesantoti ñāṇena esanto. Iminā hitaṃ esantoti hitesīti vacanatthaṃ dasseti. Mettañcāti appanāpattaṃ mettañca. Mettāpubbabhāgañcāti appanāmettāya pubbabhāge pavattaṃ parikammaupacāramettañca. Tava bhāre saṅghena kate evāti yojanā.
ਯੋਤਿ ਅਨੁવਿਜ੍ਜਕੋ। ਏਤੇਸਨ੍ਤਿ ਚੋਦਕਚੁਦਿਤਕਾਨਂ। ‘‘ਭਾਸਿਤ’’ਨ੍ਤਿ ਇਮਿਨਾ વੋਹਾਰਸਦ੍ਦੋ ਭਾਸਿਤਪਰਿਯਾਯੋਤਿ ਦਸ੍ਸੇਤਿ। ਤਨ੍ਤਿ ਸਹਸਾ વੋਹਾਰਂ।
Yoti anuvijjako. Etesanti codakacuditakānaṃ. ‘‘Bhāsita’’nti iminā vohārasaddo bhāsitapariyāyoti dasseti. Tanti sahasā vohāraṃ.
ਅਨੁਸਨ੍ਧਿਤਨ੍ਤਿ ਏਤ੍ਥ વਿਨਿਚ੍ਛਯਾਨੁਸਨ੍ਧਿਂ ਪਟਿਕ੍ਖਿਪਨ੍ਤੋ ਆਹ ‘‘ਕਥਾਨੁਸਨ੍ਧਿ વੁਚ੍ਚਤੀ’’ਤਿ। ਕਥਾਯ ਅਨੁਰੂਪਂ ਸਨ੍ਦਹਨਂ ਕਥਾਨੁਸਨ੍ਧਿ। ਪਟਿਞ੍ਞਾਨੁਸਨ੍ਧਿਤੇਨਾਤਿ ਏਤ੍ਥ ਪਟਿਞ੍ਞਾਸਦ੍ਦਅਨੁਸਨ੍ਧਿਸਦ੍ਦਾਨਂ ਤੁਲ੍ਯਾਧਿਕਰਣਤੋ ਅਞ੍ਞਂ ਭਿਨ੍ਨਾਧਿਕਰਣਂ ਦਸ੍ਸੇਨ੍ਤੋ ਆਹ ‘‘ਅਥવਾ’’ਤਿਆਦਿ। ਲਜ੍ਜਿਂ ਪੁਗ੍ਗਲਨ੍ਤਿ ਸਮ੍ਬਨ੍ਧੋ। ਤਤ੍ਥਾਤਿ ਗਾਥਾਯਂ। વਤ੍ਤਾਨੁਸਨ੍ਧਿਨਾਤਿ ਆਚਾਰਸਙ੍ਖਾਤੇਨ વਤ੍ਤੇਨ ਅਨੁਸਨ੍ਧਿਨਾ ਅਸ੍ਸ ਅਲਜ੍ਜੀਸ੍ਸ વਤ੍ਤੇਨ ਸਦ੍ਧਿਂ ਯਾ ਪਟਿਞ੍ਞਾ ਸਨ੍ਧਿਯਤੀਤਿ ਯੋਜਨਾ।
Anusandhitanti ettha vinicchayānusandhiṃ paṭikkhipanto āha ‘‘kathānusandhi vuccatī’’ti. Kathāya anurūpaṃ sandahanaṃ kathānusandhi. Paṭiññānusandhitenāti ettha paṭiññāsaddaanusandhisaddānaṃ tulyādhikaraṇato aññaṃ bhinnādhikaraṇaṃ dassento āha ‘‘athavā’’tiādi. Lajjiṃ puggalanti sambandho. Tatthāti gāthāyaṃ. Vattānusandhināti ācārasaṅkhātena vattena anusandhinā assa alajjīssa vattena saddhiṃ yā paṭiññā sandhiyatīti yojanā.
ਜਾਨਨ੍ਤੋ ਆਪਜ੍ਜਤੀਤਿ ਜਾਨਨ੍ਤੋ ਹੁਤ੍વਾ ਆਪਜ੍ਜਤਿ। ਇਮਿਨਾ ਸਞ੍ਚਿਚ੍ਚਾਤਿ ਪਦਸ੍ਸ ਸਞ੍ਚੇਤੇਤ੍વਾਤਿ ਅਤ੍ਥਂ ਦਸ੍ਸੇਤਿ। વੀਤਿਕ੍ਕਮਚੇਤਨਾਯ ਸਦ੍ਧਿਂ ਚੇਤੇਤ੍વਾਤਿ ਅਤ੍ਥੋ। ‘‘ਨ ਦੇਸੇਤਿ ਨ વੁਟ੍ਠਾਤੀ’’ਤਿ ਇਮਿਨਾ ਪਰਿਗੂਹਤੀਤਿ ਏਤ੍ਥ ਪਰਿਗੂਹਨਂ ਨਾਮ ਅਤ੍ਥਤੋ ਨ ਦੇਸਨਂ ਨ વੁਟ੍ਠਾਨਨ੍ਤਿ ਦਸ੍ਸੇਤਿ।
Jānanto āpajjatīti jānanto hutvā āpajjati. Iminā sañciccāti padassa sañcetetvāti atthaṃ dasseti. Vītikkamacetanāya saddhiṃ cetetvāti attho. ‘‘Na deseti na vuṭṭhātī’’ti iminā parigūhatīti ettha parigūhanaṃ nāma atthato na desanaṃ na vuṭṭhānanti dasseti.
ਯਨ੍ਤਿ ‘‘ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤੀ’’ਤਿ વਚਨਂ। ਤੁਮ੍ਹੇਹੀਤਿ ਪਰਿਹਾਰਕਾਰਕੇਹਿ। ਸਚ੍ਚਨ੍ਤਿ ਤਥਂ ਅવਿਤਥਂ। ਅਹਮ੍ਪੀਤਿ ਚੋਦਕੋਪਿ। ਪਿਸਦ੍ਦੇਨ ਪਰਿਹਾਰਕਂ ਸਮ੍ਪਿਣ੍ਡੇਤਿ। ਨਨ੍ਤਿ ‘‘ਸਞ੍ਚਿਚ੍ਚਾ’’ਤਿਆਦਿવਚਨਂ। ਤਨ੍ਤਿ ਤੁવਂ, ਤ੍વਂ વਾ।
Yanti ‘‘sañcicca āpattiṃ āpajjatī’’ti vacanaṃ. Tumhehīti parihārakārakehi. Saccanti tathaṃ avitathaṃ. Ahampīti codakopi. Pisaddena parihārakaṃ sampiṇḍeti. Nanti ‘‘sañciccā’’tiādivacanaṃ. Tanti tuvaṃ, tvaṃ vā.
ਪੁਬ੍ਬਾਪਰਨ੍ਤਿ ਏਤ੍ਥ ਪੁਬ੍ਬੇ ਕਥੇਤਬ੍ਬਂ ਪੁਬ੍ਬਂ, ਅਪਰਮ੍ਹਿ ਕਥੇਤਬ੍ਬਂ ਅਪਰਂ, ਪੁਬ੍ਬਞ੍ਚ ਅਪਰਞ੍ਚ ਪੁਬ੍ਬਾਪਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਪੁਰੇ’’ਤਿਆਦਿ। ‘‘ਤਸ੍ਮਿਂ ਪੁਬ੍ਬਾਪਰੇ’’ਤਿ ਇਮਿਨਾ ਪਾਲ਼ਿਯਂ ਪੁਬ੍ਬਪਰਸ੍ਸਾਤਿ ਏਤ੍ਥ ਭੁਮ੍ਮਤ੍ਥੇ ਸਾਮਿવਚਨਨ੍ਤਿ ਦਸ੍ਸੇਤਿ।
Pubbāparanti ettha pubbe kathetabbaṃ pubbaṃ, aparamhi kathetabbaṃ aparaṃ, pubbañca aparañca pubbāparanti dassento āha ‘‘pure’’tiādi. ‘‘Tasmiṃ pubbāpare’’ti iminā pāḷiyaṃ pubbaparassāti ettha bhummatthe sāmivacananti dasseti.
ਦ੍વੀਹੀਤਿ ਪਾਰਾਜਿਕਸਙ੍ਘਾਦਿਸੇਸવਸੇਨ ਦ੍વੀਹਿ। ਪਞ੍ਚਹੀਤਿ ਥੁਲ੍ਲਚ੍ਚਯਾਦਿવਸੇਨ ਪਞ੍ਚਹਿ। ਮਿਚ੍ਛਾਦਿਟ੍ਠਿਯਾਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ (ਧ॰ ਸ॰ ੧੨੨੧) ਦਸવਤ੍ਥੁਕਾਯ ਮਿਚ੍ਛਾਦਿਟ੍ਠਿਯਾ। ਅਨ੍ਤਗ੍ਗਾਹਿਕਦਿਟ੍ਠਿਯਾਤਿ ‘‘ਸਸ੍ਸਤੋ ਲੋਕੋ’’ਤਿਆਦਿਨਾ (ਦੀ॰ ਨਿ॰ ੧.੩੧; ਮ॰ ਨਿ॰ ੧.੨੬੯) ਦਸવਤ੍ਥੁਕਾਯ ਅਨ੍ਤਗ੍ਗਾਹਿਕਦਿਟ੍ਠਿਯਾ। ਸਬ੍ਬਤ੍ਥਾਤਿ ਸਬ੍ਬੇਸੁ ਦੁਤਿਯਗਾਥਾਸਙ੍ਗਣਿਕੇਸੁ।
Dvīhīti pārājikasaṅghādisesavasena dvīhi. Pañcahīti thullaccayādivasena pañcahi. Micchādiṭṭhiyāti ‘‘natthi dinna’’ntiādinā (dha. sa. 1221) dasavatthukāya micchādiṭṭhiyā. Antaggāhikadiṭṭhiyāti ‘‘sassato loko’’tiādinā (dī. ni. 1.31; ma. ni. 1.269) dasavatthukāya antaggāhikadiṭṭhiyā. Sabbatthāti sabbesu dutiyagāthāsaṅgaṇikesu.
ਇਤਿ ਦੁਤਿਯਗਾਥਾਸਙ੍ਗਣਿਕવਣ੍ਣਨਾਯ ਯੋਜਨਾ ਸਮਤ੍ਤਾ।
Iti dutiyagāthāsaṅgaṇikavaṇṇanāya yojanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੧. ਚੋਦਨਾਦਿਪੁਚ੍ਛਾવਿਸ੍ਸਜ੍ਜਨਾ • 1. Codanādipucchāvissajjanā
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਪਰਿવਾਰ-ਅਟ੍ਠਕਥਾ • Parivāra-aṭṭhakathā / ਚੋਦਨਾਦਿਪੁਚ੍ਛਾવਿਸ੍ਸਜ੍ਜਨਾવਣ੍ਣਨਾ • Codanādipucchāvissajjanāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਦੁਤਿਯਗਾਥਾਸਙ੍ਗਣਿਕવਣ੍ਣਨਾ • Dutiyagāthāsaṅgaṇikavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਚੋਦਨਾਦਿਪੁਚ੍ਛਾવਿਸ੍ਸਜ੍ਜਨਾવਣ੍ਣਨਾ • Codanādipucchāvissajjanāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਚੋਦਨਾਦਿਪੁਚ੍ਛਾવਿਸ੍ਸਜ੍ਜਨਾવਣ੍ਣਨਾ • Codanādipucchāvissajjanāvaṇṇanā
