| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၇. စောဒနာသုတ္တဝဏ္ဏနာ
7. Codanāsuttavaṇṇanā
၁၆၇. သတ္တမေ စောဒကေနာတိ ဝတ္ထုသန္ဒသ္သနာ အာပတ္တိသန္ဒသ္သနာ သံဝာသပ္ပဋိက္ခေပော သာမီစိပ္ပဋိက္ခေပောတိ စတူဟိ စောဒနာဝတ္ထူဟိ စောဒယမာနေန။ ကာလေန ဝက္ခာမိ နော အကာလေနာတိ ဧတ္ထ စုဒိတကသ္သ ကာလော ကထိတော, န စောဒကသ္သ။ ပရံ စောဒေန္တေန ဟိ ပရိသမဇ္ဈေ ဝာ ဥပောသထပဝာရဏဂ္ဂေ ဝာ အာသနသာလာဘောဇနသာလာဒီသု ဝာ န စောဒေတဗ္ဗော, ဒိဝာဋ္ဌာနေ နိသိန္နကာလေ ‘‘ကရောတာယသ္မာ ဩကာသံ, အဟံ အာယသ္မန္တံ ဝတ္တုကာမော’’တိ ဧဝံ ဩကာသံ ကာရေတ္ဝာ စောဒေတဗ္ဗော။ ပုဂ္ဂလံ ပန ဥပပရိက္ခိတ္ဝာ ယော လောလပုဂ္ဂလော အဘူတံ ဝတ္ဝာ ဘိက္ခူနံ အယသံ အာရောပေတိ, သော ဩကာသကမ္မံ ဝိနာပိ စောဒေတဗ္ဗော။ ဘူတေနာတိ တစ္ဆေန သဘာဝေန။ သဏ္ဟေနာတိ မဋ္ဌေန မုဒုကေန။ အတ္ထသံဟိတေနာတိ အတ္ထကာမတာယ ဟိတကာမတာယ ဥပေတေန။ အဝိပ္ပဋိသာရော ဥပဒဟာတဗ္ဗောတိ အမင္ကုဘာဝော ဥပနေတဗ္ဗော။ အလံ တေ အဝိပ္ပဋိသာရာယာတိ ယုတ္တံ တေ အမင္ကုဘာဝာယ။ သေသမေတ္ထ ဥတ္တာနမေဝာတိ။ အဋ္ဌမံ ဟေဋ္ဌာ ဝုတ္တနယတ္တာ ပာကဋမေဝ။
167. Sattame codakenāti vatthusandassanā āpattisandassanā saṃvāsappaṭikkhepo sāmīcippaṭikkhepoti catūhi codanāvatthūhi codayamānena. Kālena vakkhāmi no akālenāti ettha cuditakassa kālo kathito, na codakassa. Paraṃ codentena hi parisamajjhe vā uposathapavāraṇagge vā āsanasālābhojanasālādīsu vā na codetabbo, divāṭṭhāne nisinnakāle ‘‘karotāyasmā okāsaṃ, ahaṃ āyasmantaṃ vattukāmo’’ti evaṃ okāsaṃ kāretvā codetabbo. Puggalaṃ pana upaparikkhitvā yo lolapuggalo abhūtaṃ vatvā bhikkhūnaṃ ayasaṃ āropeti, so okāsakammaṃ vināpi codetabbo. Bhūtenāti tacchena sabhāvena. Saṇhenāti maṭṭhena mudukena. Atthasaṃhitenāti atthakāmatāya hitakāmatāya upetena. Avippaṭisāro upadahātabboti amaṅkubhāvo upanetabbo. Alaṃte avippaṭisārāyāti yuttaṃ te amaṅkubhāvāya. Sesamettha uttānamevāti. Aṭṭhamaṃ heṭṭhā vuttanayattā pākaṭameva.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၇. စောဒနာသုတ္တံ • 7. Codanāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇-၉. စောဒနာသုတ္တာဒိဝဏ္ဏနာ • 7-9. Codanāsuttādivaṇṇanā
