| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៤. ចោរសុត្តំ
4. Corasuttaṃ
៨៤. ‘‘អដ្ឋហិ, ភិក្ខវេ, អង្គេហិ សមន្នាគតោ មហាចោរោ ខិប្បំ បរិយាបជ្ជតិ, ន ចិរដ្ឋិតិកោ ហោតិ។ កតមេហិ អដ្ឋហិ? អប្បហរន្តស្ស បហរតិ, អនវសេសំ អាទិយតិ, ឥត្ថិំ ហនតិ, កុមារិំ ទូសេតិ, បព្ពជិតំ វិលុម្បតិ, រាជកោសំ វិលុម្បតិ, អច្ចាសន្នេ កម្មំ ករោតិ, ន ច និធានកុសលោ ហោតិ។ ឥមេហិ ខោ, ភិក្ខវេ, អដ្ឋហង្គេហិ សមន្នាគតោ មហាចោរោ ខិប្បំ បរិយាបជ្ជតិ, ន ចិរដ្ឋិតិកោ ហោតិ។
84. ‘‘Aṭṭhahi, bhikkhave, aṅgehi samannāgato mahācoro khippaṃ pariyāpajjati, na ciraṭṭhitiko hoti. Katamehi aṭṭhahi? Appaharantassa paharati, anavasesaṃ ādiyati, itthiṃ hanati, kumāriṃ dūseti, pabbajitaṃ vilumpati, rājakosaṃ vilumpati, accāsanne kammaṃ karoti, na ca nidhānakusalo hoti. Imehi kho, bhikkhave, aṭṭhahaṅgehi samannāgato mahācoro khippaṃ pariyāpajjati, na ciraṭṭhitiko hoti.
‘‘អដ្ឋហិ, ភិក្ខវេ, អង្គេហិ សមន្នាគតោ មហាចោរោ ន ខិប្បំ បរិយាបជ្ជតិ, ចិរដ្ឋិតិកោ ហោតិ។ កតមេហិ អដ្ឋហិ? ន អប្បហរន្តស្ស បហរតិ , ន អនវសេសំ អាទិយតិ, ន ឥត្ថិំ ហនតិ, ន កុមារិំ ទូសេតិ, ន បព្ពជិតំ វិលុម្បតិ, ន រាជកោសំ វិលុម្បតិ, ន អច្ចាសន្នេ កម្មំ ករោតិ, និធានកុសលោ ច ហោតិ។ ឥមេហិ ខោ, ភិក្ខវេ, អដ្ឋហង្គេហិ សមន្នាគតោ មហាចោរោ ន ខិប្បំ បរិយាបជ្ជតិ, ចិរដ្ឋិតិកោ ហោតី’’តិ។ ចតុត្ថំ។
‘‘Aṭṭhahi, bhikkhave, aṅgehi samannāgato mahācoro na khippaṃ pariyāpajjati, ciraṭṭhitiko hoti. Katamehi aṭṭhahi? Na appaharantassa paharati , na anavasesaṃ ādiyati, na itthiṃ hanati, na kumāriṃ dūseti, na pabbajitaṃ vilumpati, na rājakosaṃ vilumpati, na accāsanne kammaṃ karoti, nidhānakusalo ca hoti. Imehi kho, bhikkhave, aṭṭhahaṅgehi samannāgato mahācoro na khippaṃ pariyāpajjati, ciraṭṭhitiko hotī’’ti. Catutthaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៤. ចោរសុត្តវណ្ណនា • 4. Corasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-១០. សទ្ធាសុត្តាទិវណ្ណនា • 1-10. Saddhāsuttādivaṇṇanā
