| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. චොරසුත්‌තං
4. Corasuttaṃ
84. ‘‘අට්‌ඨහි, භික්‌ඛවෙ, අඞ්‌ගෙහි සමන්‌නාගතො මහාචොරො ඛිප්‌පං පරියාපජ්‌ජති, න චිරට්‌ඨිතිකො හොති. කතමෙහි අට්‌ඨහි? අප්‌පහරන්‌තස්‌ස පහරති, අනවසෙසං ආදියති, ඉත්‌ථිං හනති, කුමාරිං දූසෙති, පබ්‌බජිතං විලුම්‌පති, රාජකොසං විලුම්‌පති, අච්‌චාසන්‌නෙ කම්‌මං කරොති, න ච නිධානකුසලො හොති. ඉමෙහි ඛො, භික්‌ඛවෙ, අට්‌ඨහඞ්‌ගෙහි සමන්‌නාගතො මහාචොරො ඛිප්‌පං පරියාපජ්‌ජති, න චිරට්‌ඨිතිකො හොති.
84. ‘‘Aṭṭhahi, bhikkhave, aṅgehi samannāgato mahācoro khippaṃ pariyāpajjati, na ciraṭṭhitiko hoti. Katamehi aṭṭhahi? Appaharantassa paharati, anavasesaṃ ādiyati, itthiṃ hanati, kumāriṃ dūseti, pabbajitaṃ vilumpati, rājakosaṃ vilumpati, accāsanne kammaṃ karoti, na ca nidhānakusalo hoti. Imehi kho, bhikkhave, aṭṭhahaṅgehi samannāgato mahācoro khippaṃ pariyāpajjati, na ciraṭṭhitiko hoti.
‘‘අට්‌ඨහි, භික්‌ඛවෙ, අඞ්‌ගෙහි සමන්‌නාගතො මහාචොරො න ඛිප්‌පං පරියාපජ්‌ජති, චිරට්‌ඨිතිකො හොති. කතමෙහි අට්‌ඨහි? න අප්‌පහරන්‌තස්‌ස පහරති , න අනවසෙසං ආදියති, න ඉත්‌ථිං හනති, න කුමාරිං දූසෙති, න පබ්‌බජිතං විලුම්‌පති, න රාජකොසං විලුම්‌පති, න අච්‌චාසන්‌නෙ කම්‌මං කරොති, නිධානකුසලො ච හොති. ඉමෙහි ඛො, භික්‌ඛවෙ, අට්‌ඨහඞ්‌ගෙහි සමන්‌නාගතො මහාචොරො න ඛිප්‌පං පරියාපජ්‌ජති, චිරට්‌ඨිතිකො හොතී’’ති. චතුත්‌ථං.
‘‘Aṭṭhahi, bhikkhave, aṅgehi samannāgato mahācoro na khippaṃ pariyāpajjati, ciraṭṭhitiko hoti. Katamehi aṭṭhahi? Na appaharantassa paharati , na anavasesaṃ ādiyati, na itthiṃ hanati, na kumāriṃ dūseti, na pabbajitaṃ vilumpati, na rājakosaṃ vilumpati, na accāsanne kammaṃ karoti, nidhānakusalo ca hoti. Imehi kho, bhikkhave, aṭṭhahaṅgehi samannāgato mahācoro na khippaṃ pariyāpajjati, ciraṭṭhitiko hotī’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. චොරසුත්‌තවණ්‌ණනා • 4. Corasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සද්‌ධාසුත්‌තාදිවණ්‌ණනා • 1-10. Saddhāsuttādivaṇṇanā
