| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
4. චොරසුත්‌තවණ්‌ණනා
4. Corasuttavaṇṇanā
84. චතුත්‌ථෙ මහාචොරොති රජ්‌ජන්‌තරෙ දුබ්‌භිතුං සමත්‌ථො මහාචොරො. පරියාපජ්‌ජතීති පරියාදානං ගච්‌ඡති. න චිරට්‌ඨිතිකො හොතීති අද්‌ධානං පාලෙන්‌තො ඨාතුං න සක්‌කොති. අප්‌පහරන්‌තස්‌ස පහරතීති අත්‌තනො අවෙරිනෙ අප්‌පහරන්‌තෙ ගුණසම්‌පන්‌නෙ ච මහල්‌ලකෙ ච තරුණදාරකෙ ච අප්‌පහරිතබ්‌බයුත්‌තකෙ පහරති. අනවසෙසං ආදියතීති නිස්‌සෙසං ගණ්‌හාති. බ්‍යත්‌තචොරානඤ්‌හි ඉදං වත්‌තං – පරස්‌ස ද්‌වීසු සාටකෙසු එකො ගහෙතබ්‌බො, එකස්‌මිං සන්‌තෙ දුබ්‌බලං දත්‌වා ථිරො ගහෙතබ්‌බො. පුටභත්‌තතණ්‌ඩුලාදීසු එකං කොට්‌ඨාසං දත්‌වා එකො ගහෙතබ්‌බොති. අච්‌චාසන්‌නෙ කම්‌මං කරොතීති ගාමනිගමරාජධානීනං ආසන්‌නට්‌ඨානෙ චොරිකකම්‌මං කරොති. න ච නිධානකුසලො හොතීති යං ලද්‌ධං, තං දක්‌ඛිණෙය්‍යෙ නිදහිතුං ඡෙකො න හොති, පරලොකමග්‌ගං න සොධෙති.
84. Catutthe mahācoroti rajjantare dubbhituṃ samattho mahācoro. Pariyāpajjatīti pariyādānaṃ gacchati. Na ciraṭṭhitiko hotīti addhānaṃ pālento ṭhātuṃ na sakkoti. Appaharantassa paharatīti attano averine appaharante guṇasampanne ca mahallake ca taruṇadārake ca appaharitabbayuttake paharati. Anavasesaṃ ādiyatīti nissesaṃ gaṇhāti. Byattacorānañhi idaṃ vattaṃ – parassa dvīsu sāṭakesu eko gahetabbo, ekasmiṃ sante dubbalaṃ datvā thiro gahetabbo. Puṭabhattataṇḍulādīsu ekaṃ koṭṭhāsaṃ datvā eko gahetabboti. Accāsanne kammaṃ karotīti gāmanigamarājadhānīnaṃ āsannaṭṭhāne corikakammaṃ karoti. Na ca nidhānakusalo hotīti yaṃ laddhaṃ, taṃ dakkhiṇeyye nidahituṃ cheko na hoti, paralokamaggaṃ na sodheti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 4. චොරසුත්‌තං • 4. Corasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සද්‌ධාසුත්‌තාදිවණ්‌ණනා • 1-10. Saddhāsuttādivaṇṇanā
