| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
28. சோரவத்து²கதா²
28. Coravatthukathā
91. தி³ட்ட²புப்³போ³தி அங்கு³லிமாலோ புப்³பே³ தி³ட்டோ². அயந்தி சோரோ. ஸோதி அங்கு³லிமாலோ. அஞ்ஞேஸங் ஸந்திகா வசனங் ஸுணந்தீதி யோஜனா. தேதி மனுஸ்ஸா. உப்³பி³ஜ்ஜந்திபீதி காயேன உப்³பி³ஜ்ஜந்திபி. உத்தஸந்திபீதி சித்தேன உத்தஸந்திபி. அங்கு³லிமாலோ பி⁴க்கூ²ஹி ந பப்³பா³ஜிதோ, நனு ப⁴க³வதா பன ஸயங் பப்³பா³ஜிதோ, அத² கஸ்மா ‘‘ந பி⁴க்க²வே’’தி வுத்தந்தி ஆஹ ‘‘ப⁴க³வா ஸயங் த⁴ம்மஸ்ஸாமீ’’தி. த⁴ம்மஸ்ஸாமீதி ச த⁴ம்மஸ்ஸ இஸ்ஸரோ, த⁴ம்மேன வா தே³வமனுஸ்ஸானங் இஸ்ஸரோ, அதி⁴பதீதி அத்தோ². பி⁴க்கூ²னங் அகரணத்தா²ய பி⁴க்கூ²னங் ஸிக்கா²பத³ந்தி யோஜனா. தத்தா²தி ‘‘ந பி⁴க்க²வே’’திஆதி³வசனே. ‘‘த⁴ஜங் ப³ந்தி⁴த்வா’’திஆதி³னா த⁴ஜஸ்ஸ ப³ந்த⁴னங் த⁴ஜப³ந்தோ⁴, த⁴ஜப³ந்தோ⁴ வியாதி த⁴ஜப³ந்தோ⁴, த⁴ஜப³ந்தோ⁴ ஹுத்வா சரதீதி த⁴ஜப³ந்தோ⁴தி வசனத்த²ங் த³ஸ்ஸேதி. தஸ்மாதி யஸ்மா த⁴ஜப³ந்தோ⁴, தஸ்மா. யோதி சோரோ. பந்த²து³ஹனங் வாதி பந்தே² து³ஹனங் வா. பஞ்ஞாயதி சாதி எத்த² சஸத்³தோ³ வாக்யஸம்பிண்ட³னத்தோ². ந கேவலஞ்ஹி விசரதியேவ, அத² கோ² பஞ்ஞாயதி சாதி அத்தோ². இத³ந்தி சோரகம்மங். ரஜ்ஜந்தி ராஜபா⁴வங். ஸோதி ராஜபுத்தோ. ஹீதி ஸச்சங், யஸ்மா வா. தஸ்மிந்தி ராஜபுத்தே. புப்³பே³தி புப்³ப³காலே. தந்தி சோரங். ஏவந்தி இமினாகாரேன, ஜானந்தி சேதி யோஜனா. அதி³ஸ்ஸமானாதி அத்தானங் அபஞ்ஞாயமானா. இத³ங் ஸந்தி⁴ச்சே²தா³தி³சோரே ஸந்தா⁴ய வுத்தங், ந அம்ப³லபு³ஜாதி³சோரே. பச்சா²பீதி தெ²ய்யகரணதோ பச்சா²பி. தேபீதி சோரேபி.
91.Diṭṭhapubboti aṅgulimālo pubbe diṭṭho. Ayanti coro. Soti aṅgulimālo. Aññesaṃ santikā vacanaṃ suṇantīti yojanā. Teti manussā. Ubbijjantipīti kāyena ubbijjantipi. Uttasantipīti cittena uttasantipi. Aṅgulimālo bhikkhūhi na pabbājito, nanu bhagavatā pana sayaṃ pabbājito, atha kasmā ‘‘na bhikkhave’’ti vuttanti āha ‘‘bhagavā sayaṃ dhammassāmī’’ti. Dhammassāmīti ca dhammassa issaro, dhammena vā devamanussānaṃ issaro, adhipatīti attho. Bhikkhūnaṃ akaraṇatthāya bhikkhūnaṃ sikkhāpadanti yojanā. Tatthāti ‘‘na bhikkhave’’tiādivacane. ‘‘Dhajaṃ bandhitvā’’tiādinā dhajassa bandhanaṃ dhajabandho, dhajabandho viyāti dhajabandho, dhajabandho hutvā caratīti dhajabandhoti vacanatthaṃ dasseti. Tasmāti yasmā dhajabandho, tasmā. Yoti coro. Panthaduhanaṃ vāti panthe duhanaṃ vā. Paññāyati cāti ettha casaddo vākyasampiṇḍanattho. Na kevalañhi vicaratiyeva, atha kho paññāyati cāti attho. Idanti corakammaṃ. Rajjanti rājabhāvaṃ. Soti rājaputto. Hīti saccaṃ, yasmā vā. Tasminti rājaputte. Pubbeti pubbakāle. Tanti coraṃ. Evanti iminākārena, jānanti ceti yojanā. Adissamānāti attānaṃ apaññāyamānā. Idaṃ sandhicchedādicore sandhāya vuttaṃ, na ambalabujādicore. Pacchāpīti theyyakaraṇato pacchāpi. Tepīti corepi.
92. ப⁴யேனாதி ப⁴யதோ. ஏதே பனாதி பி⁴க்கூ² பன. லத்³தா⁴ப⁴யத்தாதி ராஜதோ லத்³தோ⁴ அப⁴யோ இமேஹீதி லத்³தா⁴ப⁴யா, தேஸங் பா⁴வோ லத்³தா⁴ப⁴யத்தங், தஸ்மா. காரபே⁴த³கோதி எத்த² காரஸத்³தோ³ ருக்க²விஸேஸே =09 ச ஸக்காரே ச ப³ந்த⁴னாலயே ச பவத்ததி, இத⁴ பன ப³ந்த⁴னாலயேதி த³ஸ்ஸெந்தோ ஆஹ ‘‘காரங் வுச்சதி ப³ந்த⁴னாகா³ர’’ந்தி. ப³ந்த⁴னாகா³ரஞ்ஹி கரொந்தி தங் பவேஸிதே ஜனே ஹிங்ஸந்தி எத்தா²தி ‘‘காரா’’தி வுச்சதி. இதா⁴தி ‘‘காரபே⁴த³கோ’’திபதே³. தீ³பப³ந்த⁴னங் வா ஹோதூதி யோஜனா. இமேஹி பதே³ஹி ந கேவலங் ப³ந்த⁴னாகா³ரங்யேவ காரா நாம ஹோதி, அத² கோ² அந்து³ப³ந்த⁴னாதீ³னிபி காராயேவ நாமாதி த³ஸ்ஸேதி. யோதி சோரோ. ஏதேஸூதி ப³ந்த⁴னேஸு. முஞ்சித்வா வாதி ரஜ்ஜுப³ந்த⁴னங் நிப்³பே³டெ²த்வா வா. இமேஹி பதே³ஹி ந கேவலங் காராய பி⁴ந்த³னதோ ஏவ காரபே⁴த³கோ நாம ஹோதி, அத² கோ² சி²ந்த³னமுஞ்சனவிவரணேஹிபி காரபே⁴த³கோயேவ நாமாதி த³ஸ்ஸேதி. தீ³பந்தரந்தி ப³ந்த⁴னதீ³பதோ அந்தரங் அஞ்ஞங் தீ³பந்தி அத்தோ². சக்கவாளப³ந்த⁴னங் பி⁴ந்தி³த்வா சக்கவாளந்தரங் க³தோ அட்ட²கதா²யங் ந வுத்தோ. ஸோதி நசோரகோ. கா³மனிக³மபட்டனாதீ³னீதி எத்த² பட்டனந்தி நாவாபட்டனங், ஸகடபட்டனஞ்ச. கேணியாதி ரஞ்ஞோ தா³தப்³ப³ஆயேன. தந்தி கேணிங். நிதா⁴னந்தி நிக்க²ணித்வா ட²பிதங் த⁴னங். உபஸங்ஹரித்வாதி ராஜாதீ³னங் ஸந்திகங் ஹரித்வா. தந்தி கஸிகம்மாதீ³ஹி ஸம்பாதெ³த்வா ஜீவந்தங். தத்தே²வாதி ப³ந்தா⁴பிதட்டா²னேயேவ.
92.Bhayenāti bhayato. Ete panāti bhikkhū pana. Laddhābhayattāti rājato laddho abhayo imehīti laddhābhayā, tesaṃ bhāvo laddhābhayattaṃ, tasmā. Kārabhedakoti ettha kārasaddo rukkhavisese =09 ca sakkāre ca bandhanālaye ca pavattati, idha pana bandhanālayeti dassento āha ‘‘kāraṃ vuccati bandhanāgāra’’nti. Bandhanāgārañhi karonti taṃ pavesite jane hiṃsanti etthāti ‘‘kārā’’ti vuccati. Idhāti ‘‘kārabhedako’’tipade. Dīpabandhanaṃ vā hotūti yojanā. Imehi padehi na kevalaṃ bandhanāgāraṃyeva kārā nāma hoti, atha kho andubandhanādīnipi kārāyeva nāmāti dasseti. Yoti coro. Etesūti bandhanesu. Muñcitvā vāti rajjubandhanaṃ nibbeṭhetvā vā. Imehi padehi na kevalaṃ kārāya bhindanato eva kārabhedako nāma hoti, atha kho chindanamuñcanavivaraṇehipi kārabhedakoyeva nāmāti dasseti. Dīpantaranti bandhanadīpato antaraṃ aññaṃ dīpanti attho. Cakkavāḷabandhanaṃ bhinditvā cakkavāḷantaraṃ gato aṭṭhakathāyaṃ na vutto. Soti nacorako. Gāmanigamapaṭṭanādīnīti ettha paṭṭananti nāvāpaṭṭanaṃ, sakaṭapaṭṭanañca. Keṇiyāti rañño dātabbaāyena. Tanti keṇiṃ. Nidhānanti nikkhaṇitvā ṭhapitaṃ dhanaṃ. Upasaṃharitvāti rājādīnaṃ santikaṃ haritvā. Tanti kasikammādīhi sampādetvā jīvantaṃ. Tatthevāti bandhāpitaṭṭhāneyeva.
93. யத்தா²தி யஸ்மிங் டா²னே. யோ கோசி பலாதோதி ஸம்ப³ந்தோ⁴. நந்தி யங் கிஞ்சி ஜனங், லிகா²பேதீதி யோஜனா. பண்ணே வாதி குஸே வா. அஸ்ஸாதி ஜனஸ்ஸ. த³ண்ட³ந்தி த⁴னத³ண்ட³ங். லிகி²தகோதி லிகி²தப்³போ³தி லிகி²தோ, ஸோயேவ லிகி²தகோ.
93.Yatthāti yasmiṃ ṭhāne. Yo koci palātoti sambandho. Nanti yaṃ kiñci janaṃ, likhāpetīti yojanā. Paṇṇe vāti kuse vā. Assāti janassa. Daṇḍanti dhanadaṇḍaṃ. Likhitakoti likhitabboti likhito, soyeva likhitako.
94. யோ பன கஸாஹி ஹஞ்ஞதீதி ஸம்ப³ந்தோ⁴. இமினா அஞ்ஞேஹி கஸாஹி ஹஞ்ஞதீதி கஸாஹதோதி வசனத்த²ங் த³ஸ்ஸேதி. ‘‘அயமேவ தே த³ண்டோ³ ஹோதூ’’தி இமினா கதங் த³ண்ட³கம்மங் இமஸ்ஸாதி கதத³ண்ட³கம்மோதி வசனத்த²ங் த³ஸ்ஸேதி. அல்லவணோதி திந்தவணோ. கா⁴தெத்வாதி ஹனித்வா பஹரித்வாதி அத்தோ². க³ண்டி³க³ண்டி³யோதி போ²டபோ²டா. ஸன்னிஸின்னாஸூதி க³ண்டீ³ஸு பகதிஸரீரேன ஸமங் நிஸின்னாஸு.
94. Yo pana kasāhi haññatīti sambandho. Iminā aññehi kasāhi haññatīti kasāhatoti vacanatthaṃ dasseti. ‘‘Ayameva te daṇḍo hotū’’ti iminā kataṃ daṇḍakammaṃ imassāti katadaṇḍakammoti vacanatthaṃ dasseti. Allavaṇoti tintavaṇo. Ghātetvāti hanitvā paharitvāti attho. Gaṇḍigaṇḍiyoti phoṭaphoṭā. Sannisinnāsūti gaṇḍīsu pakatisarīrena samaṃ nisinnāsu.
95. கதத³ண்ட³கம்மபா⁴வோ தாவ புரிமனயேனேவ வேதி³தப்³போ³ ஹோது, கத²ங் பன லக்க²ணாஹதபா⁴வோ வேதி³தப்³போ³தி ஆஹ ‘‘யஸ்ஸ பனா’’திஆதி³. தத்த² தத்தேனாதி தாபேன. லக்க²ணந்தி ஸஞ்ஞாணங். ஸோதி ஜனோ. பு⁴ஜிஸ்ஸோதி பு⁴ஜோ ஏதஸ்ஸத்தீ²தி பு⁴ஜிஸ்ஸோ (ம॰ நி॰ டீ॰ 2.426). பரேஹி அபாலிதோ ச அனஜ்ஜோ²ஹராபிதோ ச ஹுத்வா ஸயமேவ அத்தானங் பாலனேன ச போ⁴ஜனங் அஜ்ஜோ²ஹரணேன ச ஸமன்னாக³தோதி வுத்தங் ஹோதி. அஸ்ஸாதி லக்க²ணாஹதஸ்ஸ. வணாதி அரூனி. தானி ஹி யஸ்மா வணந்தி க³த்தானி விசுண்ணானி கரொந்தி, தஸ்மா வணாதி வுச்சந்தி. ரூள்ஹாதி தருணமங்ஸேன ருஹா. திமண்ட³லவத்த²ஸ்ஸ லக்க²ணாஹதஸ்ஸ ஜனஸ்ஸாதி ஸம்ப³ந்தோ⁴.
95. Katadaṇḍakammabhāvo tāva purimanayeneva veditabbo hotu, kathaṃ pana lakkhaṇāhatabhāvo veditabboti āha ‘‘yassa panā’’tiādi. Tattha tattenāti tāpena. Lakkhaṇanti saññāṇaṃ. Soti jano. Bhujissoti bhujo etassatthīti bhujisso (ma. ni. ṭī. 2.426). Parehi apālito ca anajjhoharāpito ca hutvā sayameva attānaṃ pālanena ca bhojanaṃ ajjhoharaṇena ca samannāgatoti vuttaṃ hoti. Assāti lakkhaṇāhatassa. Vaṇāti arūni. Tāni hi yasmā vaṇanti gattāni vicuṇṇāni karonti, tasmā vaṇāti vuccanti. Rūḷhāti taruṇamaṃsena ruhā. Timaṇḍalavatthassa lakkhaṇāhatassa janassāti sambandho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
28. அங்கு³லிமாலசோரவத்து² • 28. Aṅgulimālacoravatthu
29. காரபே⁴த³கசோரவத்து² • 29. Kārabhedakacoravatthu
30. லிகி²தகசோரவத்து² • 30. Likhitakacoravatthu
31. கஸாஹதவத்து² • 31. Kasāhatavatthu
32. லக்க²ணாஹதவத்து² • 32. Lakkhaṇāhatavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / சோரவத்து²கதா² • Coravatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஜப⁴டாதி³வத்து²கதா²வண்ணனா • Rājabhaṭādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சோரவத்து²கதா²வண்ணனா • Coravatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சோரவத்து²கதா²வண்ணனா • Coravatthukathāvaṇṇanā
