| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২৮. চোরৰত্থুকথা
28. Coravatthukathā
৯১. দিট্ঠপুব্বোতি অঙ্গুলিমালো পুব্বে দিট্ঠো। অযন্তি চোরো। সোতি অঙ্গুলিমালো। অঞ্ঞেসং সন্তিকা ৰচনং সুণন্তীতি যোজনা। তেতি মনুস্সা। উব্বিজ্জন্তিপীতি কাযেন উব্বিজ্জন্তিপি। উত্তসন্তিপীতি চিত্তেন উত্তসন্তিপি। অঙ্গুলিমালো ভিক্খূহি ন পব্বাজিতো, ননু ভগৰতা পন সযং পব্বাজিতো, অথ কস্মা ‘‘ন ভিক্খৰে’’তি ৰুত্তন্তি আহ ‘‘ভগৰা সযং ধম্মস্সামী’’তি। ধম্মস্সামীতি চ ধম্মস্স ইস্সরো, ধম্মেন ৰা দেৰমনুস্সানং ইস্সরো, অধিপতীতি অত্থো। ভিক্খূনং অকরণত্থায ভিক্খূনং সিক্খাপদন্তি যোজনা। তত্থাতি ‘‘ন ভিক্খৰে’’তিআদিৰচনে। ‘‘ধজং বন্ধিত্ৰা’’তিআদিনা ধজস্স বন্ধনং ধজবন্ধো, ধজবন্ধো ৰিযাতি ধজবন্ধো, ধজবন্ধো হুত্ৰা চরতীতি ধজবন্ধোতি ৰচনত্থং দস্সেতি। তস্মাতি যস্মা ধজবন্ধো, তস্মা। যোতি চোরো। পন্থদুহনং ৰাতি পন্থে দুহনং ৰা। পঞ্ঞাযতি চাতি এত্থ চসদ্দো ৰাক্যসম্পিণ্ডনত্থো। ন কেৰলঞ্হি ৰিচরতিযেৰ, অথ খো পঞ্ঞাযতি চাতি অত্থো। ইদন্তি চোরকম্মং। রজ্জন্তি রাজভাৰং। সোতি রাজপুত্তো। হীতি সচ্চং, যস্মা ৰা। তস্মিন্তি রাজপুত্তে। পুব্বেতি পুব্বকালে। তন্তি চোরং। এৰন্তি ইমিনাকারেন, জানন্তি চেতি যোজনা। অদিস্সমানাতি অত্তানং অপঞ্ঞাযমানা। ইদং সন্ধিচ্ছেদাদিচোরে সন্ধায ৰুত্তং, ন অম্বলবুজাদিচোরে। পচ্ছাপীতি থেয্যকরণতো পচ্ছাপি। তেপীতি চোরেপি।
91.Diṭṭhapubboti aṅgulimālo pubbe diṭṭho. Ayanti coro. Soti aṅgulimālo. Aññesaṃ santikā vacanaṃ suṇantīti yojanā. Teti manussā. Ubbijjantipīti kāyena ubbijjantipi. Uttasantipīti cittena uttasantipi. Aṅgulimālo bhikkhūhi na pabbājito, nanu bhagavatā pana sayaṃ pabbājito, atha kasmā ‘‘na bhikkhave’’ti vuttanti āha ‘‘bhagavā sayaṃ dhammassāmī’’ti. Dhammassāmīti ca dhammassa issaro, dhammena vā devamanussānaṃ issaro, adhipatīti attho. Bhikkhūnaṃ akaraṇatthāya bhikkhūnaṃ sikkhāpadanti yojanā. Tatthāti ‘‘na bhikkhave’’tiādivacane. ‘‘Dhajaṃ bandhitvā’’tiādinā dhajassa bandhanaṃ dhajabandho, dhajabandho viyāti dhajabandho, dhajabandho hutvā caratīti dhajabandhoti vacanatthaṃ dasseti. Tasmāti yasmā dhajabandho, tasmā. Yoti coro. Panthaduhanaṃ vāti panthe duhanaṃ vā. Paññāyati cāti ettha casaddo vākyasampiṇḍanattho. Na kevalañhi vicaratiyeva, atha kho paññāyati cāti attho. Idanti corakammaṃ. Rajjanti rājabhāvaṃ. Soti rājaputto. Hīti saccaṃ, yasmā vā. Tasminti rājaputte. Pubbeti pubbakāle. Tanti coraṃ. Evanti iminākārena, jānanti ceti yojanā. Adissamānāti attānaṃ apaññāyamānā. Idaṃ sandhicchedādicore sandhāya vuttaṃ, na ambalabujādicore. Pacchāpīti theyyakaraṇato pacchāpi. Tepīti corepi.
৯২. ভযেনাতি ভযতো। এতে পনাতি ভিক্খূ পন। লদ্ধাভযত্তাতি রাজতো লদ্ধো অভযো ইমেহীতি লদ্ধাভযা, তেসং ভাৰো লদ্ধাভযত্তং, তস্মা। কারভেদকোতি এত্থ কারসদ্দো রুক্খৰিসেসে =০৯ চ সক্কারে চ বন্ধনালযে চ পৰত্ততি, ইধ পন বন্ধনালযেতি দস্সেন্তো আহ ‘‘কারং ৰুচ্চতি বন্ধনাগার’’ন্তি। বন্ধনাগারঞ্হি করোন্তি তং পৰেসিতে জনে হিংসন্তি এত্থাতি ‘‘কারা’’তি ৰুচ্চতি। ইধাতি ‘‘কারভেদকো’’তিপদে। দীপবন্ধনং ৰা হোতূতি যোজনা। ইমেহি পদেহি ন কেৰলং বন্ধনাগারংযেৰ কারা নাম হোতি, অথ খো অন্দুবন্ধনাদীনিপি কারাযেৰ নামাতি দস্সেতি। যোতি চোরো। এতেসূতি বন্ধনেসু। মুঞ্চিত্ৰা ৰাতি রজ্জুবন্ধনং নিব্বেঠেত্ৰা ৰা। ইমেহি পদেহি ন কেৰলং কারায ভিন্দনতো এৰ কারভেদকো নাম হোতি, অথ খো ছিন্দনমুঞ্চনৰিৰরণেহিপি কারভেদকোযেৰ নামাতি দস্সেতি। দীপন্তরন্তি বন্ধনদীপতো অন্তরং অঞ্ঞং দীপন্তি অত্থো। চক্কৰাল়বন্ধনং ভিন্দিত্ৰা চক্কৰাল়ন্তরং গতো অট্ঠকথাযং ন ৰুত্তো। সোতি নচোরকো। গামনিগমপট্টনাদীনীতি এত্থ পট্টনন্তি নাৰাপট্টনং, সকটপট্টনঞ্চ। কেণিযাতি রঞ্ঞো দাতব্বআযেন। তন্তি কেণিং। নিধানন্তি নিক্খণিত্ৰা ঠপিতং ধনং। উপসংহরিত্ৰাতি রাজাদীনং সন্তিকং হরিত্ৰা। তন্তি কসিকম্মাদীহি সম্পাদেত্ৰা জীৰন্তং। তত্থেৰাতি বন্ধাপিতট্ঠানেযেৰ।
92.Bhayenāti bhayato. Ete panāti bhikkhū pana. Laddhābhayattāti rājato laddho abhayo imehīti laddhābhayā, tesaṃ bhāvo laddhābhayattaṃ, tasmā. Kārabhedakoti ettha kārasaddo rukkhavisese =09 ca sakkāre ca bandhanālaye ca pavattati, idha pana bandhanālayeti dassento āha ‘‘kāraṃ vuccati bandhanāgāra’’nti. Bandhanāgārañhi karonti taṃ pavesite jane hiṃsanti etthāti ‘‘kārā’’ti vuccati. Idhāti ‘‘kārabhedako’’tipade. Dīpabandhanaṃ vā hotūti yojanā. Imehi padehi na kevalaṃ bandhanāgāraṃyeva kārā nāma hoti, atha kho andubandhanādīnipi kārāyeva nāmāti dasseti. Yoti coro. Etesūti bandhanesu. Muñcitvā vāti rajjubandhanaṃ nibbeṭhetvā vā. Imehi padehi na kevalaṃ kārāya bhindanato eva kārabhedako nāma hoti, atha kho chindanamuñcanavivaraṇehipi kārabhedakoyeva nāmāti dasseti. Dīpantaranti bandhanadīpato antaraṃ aññaṃ dīpanti attho. Cakkavāḷabandhanaṃ bhinditvā cakkavāḷantaraṃ gato aṭṭhakathāyaṃ na vutto. Soti nacorako. Gāmanigamapaṭṭanādīnīti ettha paṭṭananti nāvāpaṭṭanaṃ, sakaṭapaṭṭanañca. Keṇiyāti rañño dātabbaāyena. Tanti keṇiṃ. Nidhānanti nikkhaṇitvā ṭhapitaṃ dhanaṃ. Upasaṃharitvāti rājādīnaṃ santikaṃ haritvā. Tanti kasikammādīhi sampādetvā jīvantaṃ. Tatthevāti bandhāpitaṭṭhāneyeva.
৯৩. যত্থাতি যস্মিং ঠানে। যো কোচি পলাতোতি সম্বন্ধো। নন্তি যং কিঞ্চি জনং, লিখাপেতীতি যোজনা। পণ্ণে ৰাতি কুসে ৰা। অস্সাতি জনস্স। দণ্ডন্তি ধনদণ্ডং। লিখিতকোতি লিখিতব্বোতি লিখিতো, সোযেৰ লিখিতকো।
93.Yatthāti yasmiṃ ṭhāne. Yo koci palātoti sambandho. Nanti yaṃ kiñci janaṃ, likhāpetīti yojanā. Paṇṇe vāti kuse vā. Assāti janassa. Daṇḍanti dhanadaṇḍaṃ. Likhitakoti likhitabboti likhito, soyeva likhitako.
৯৪. যো পন কসাহি হঞ্ঞতীতি সম্বন্ধো। ইমিনা অঞ্ঞেহি কসাহি হঞ্ঞতীতি কসাহতোতি ৰচনত্থং দস্সেতি। ‘‘অযমেৰ তে দণ্ডো হোতূ’’তি ইমিনা কতং দণ্ডকম্মং ইমস্সাতি কতদণ্ডকম্মোতি ৰচনত্থং দস্সেতি। অল্লৰণোতি তিন্তৰণো। ঘাতেত্ৰাতি হনিত্ৰা পহরিত্ৰাতি অত্থো। গণ্ডিগণ্ডিযোতি ফোটফোটা। সন্নিসিন্নাসূতি গণ্ডীসু পকতিসরীরেন সমং নিসিন্নাসু।
94. Yo pana kasāhi haññatīti sambandho. Iminā aññehi kasāhi haññatīti kasāhatoti vacanatthaṃ dasseti. ‘‘Ayameva te daṇḍo hotū’’ti iminā kataṃ daṇḍakammaṃ imassāti katadaṇḍakammoti vacanatthaṃ dasseti. Allavaṇoti tintavaṇo. Ghātetvāti hanitvā paharitvāti attho. Gaṇḍigaṇḍiyoti phoṭaphoṭā. Sannisinnāsūti gaṇḍīsu pakatisarīrena samaṃ nisinnāsu.
৯৫. কতদণ্ডকম্মভাৰো তাৰ পুরিমনযেনেৰ ৰেদিতব্বো হোতু, কথং পন লক্খণাহতভাৰো ৰেদিতব্বোতি আহ ‘‘যস্স পনা’’তিআদি। তত্থ তত্তেনাতি তাপেন। লক্খণন্তি সঞ্ঞাণং। সোতি জনো। ভুজিস্সোতি ভুজো এতস্সত্থীতি ভুজিস্সো (ম॰ নি॰ টী॰ ২.৪২৬)। পরেহি অপালিতো চ অনজ্ঝোহরাপিতো চ হুত্ৰা সযমেৰ অত্তানং পালনেন চ ভোজনং অজ্ঝোহরণেন চ সমন্নাগতোতি ৰুত্তং হোতি। অস্সাতি লক্খণাহতস্স। ৰণাতি অরূনি। তানি হি যস্মা ৰণন্তি গত্তানি ৰিচুণ্ণানি করোন্তি, তস্মা ৰণাতি ৰুচ্চন্তি। রূল়্হাতি তরুণমংসেন রুহা। তিমণ্ডলৰত্থস্স লক্খণাহতস্স জনস্সাতি সম্বন্ধো।
95. Katadaṇḍakammabhāvo tāva purimanayeneva veditabbo hotu, kathaṃ pana lakkhaṇāhatabhāvo veditabboti āha ‘‘yassa panā’’tiādi. Tattha tattenāti tāpena. Lakkhaṇanti saññāṇaṃ. Soti jano. Bhujissoti bhujo etassatthīti bhujisso (ma. ni. ṭī. 2.426). Parehi apālito ca anajjhoharāpito ca hutvā sayameva attānaṃ pālanena ca bhojanaṃ ajjhoharaṇena ca samannāgatoti vuttaṃ hoti. Assāti lakkhaṇāhatassa. Vaṇāti arūni. Tāni hi yasmā vaṇanti gattāni vicuṇṇāni karonti, tasmā vaṇāti vuccanti. Rūḷhāti taruṇamaṃsena ruhā. Timaṇḍalavatthassa lakkhaṇāhatassa janassāti sambandho.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
২৮. অঙ্গুলিমালচোরৰত্থু • 28. Aṅgulimālacoravatthu
২৯. কারভেদকচোরৰত্থু • 29. Kārabhedakacoravatthu
৩০. লিখিতকচোরৰত্থু • 30. Likhitakacoravatthu
৩১. কসাহতৰত্থু • 31. Kasāhatavatthu
৩২. লক্খণাহতৰত্থু • 32. Lakkhaṇāhatavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / চোরৰত্থুকথা • Coravatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাজভটাদিৰত্থুকথাৰণ্ণনা • Rājabhaṭādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / চোরৰত্থুকথাৰণ্ণনা • Coravatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / চোরৰত্থুকথাৰণ্ণনা • Coravatthukathāvaṇṇanā
