| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๒. โจริวุฎฺฐาปิกาสิกฺขาปทวณฺณนา
2. Corivuṭṭhāpikāsikkhāpadavaṇṇanā
มลฺลคณภฎิปุตฺตคณาทิกนฺติอาทีสุ (สารตฺถ. ฎี. ปาจิตฺติย ๓.๖๘๓) มลฺลคโณ นาม นารายนภตฺติโก ตตฺถ ตตฺถ ปานียฎฺฐปนโปกฺขรณิขณนาทิปุญฺญกมฺมการโก คโณฯ ภฎิปุตฺตคโณ นาม กุมารภตฺติกคโณฯ ธมฺมคโณติ สาสนภตฺติโก อเนกปฺปการปุญฺญกมฺมการโก คโณฯ คนฺธิกเสณีติ อเนกปฺปการสุคนฺธิวิกติการโก คโณฯ ทุสฺสิกเสณีติ ทุสฺสวาณิชสมูโห, เปสการคโณติ อโตฺถฯ
Mallagaṇabhaṭiputtagaṇādikantiādīsu (sārattha. ṭī. pācittiya 3.683) mallagaṇo nāma nārāyanabhattiko tattha tattha pānīyaṭṭhapanapokkharaṇikhaṇanādipuññakammakārako gaṇo. Bhaṭiputtagaṇo nāma kumārabhattikagaṇo. Dhammagaṇoti sāsanabhattiko anekappakārapuññakammakārako gaṇo. Gandhikaseṇīti anekappakārasugandhivikatikārako gaṇo. Dussikaseṇīti dussavāṇijasamūho, pesakāragaṇoti attho.
วุฎฺฐาเปนฺติยาติ อุปสมฺปาเทนฺติยาฯ เกนจิ กรณีเยน ปกฺกนฺตาสุ ภิกฺขุนีสุ อคนฺตฺวา ขณฺฑสีมํ ยถานิสินฺนฎฺฐาเนเยว อตฺตโน นิสฺสิตกปริสาย สทฺธิํ วุฎฺฐาเปนฺติยา วาจาจิตฺตโต สมุฎฺฐาติ (ปาจิ. อฎฺฐ. ๖๘๓), อญฺญํ สีมํ วา นทิํ วา คนฺตฺวา วุฎฺฐาเปนฺติยา กายวาจาจิตฺตโต สมุฎฺฐาตีติ อาห ‘‘โจริวุฎฺฐาปนสมุฎฺฐาน’’นฺติฯ อนาปุจฺฉา วุฎฺฐาปนวเสน กิริยากิริยํฯ ปญฺญตฺติํ อชานนฺตา อริยาปิ วุฎฺฐาเปนฺตีติ วา กมฺมวาจาปริโยสาเน อาปตฺติกฺขเณ วิปากาพฺยากตสมงฺคิตาวเสน วา ติจิตฺตํฯ
Vuṭṭhāpentiyāti upasampādentiyā. Kenaci karaṇīyena pakkantāsu bhikkhunīsu agantvā khaṇḍasīmaṃ yathānisinnaṭṭhāneyeva attano nissitakaparisāya saddhiṃ vuṭṭhāpentiyā vācācittato samuṭṭhāti (pāci. aṭṭha. 683), aññaṃ sīmaṃ vā nadiṃ vā gantvā vuṭṭhāpentiyā kāyavācācittato samuṭṭhātīti āha ‘‘corivuṭṭhāpanasamuṭṭhāna’’nti. Anāpucchā vuṭṭhāpanavasena kiriyākiriyaṃ. Paññattiṃ ajānantā ariyāpi vuṭṭhāpentīti vā kammavācāpariyosāne āpattikkhaṇe vipākābyākatasamaṅgitāvasena vā ticittaṃ.
โจริวุฎฺฐาปิกาสิกฺขาปทวณฺณนา นิฎฺฐิตาฯ
Corivuṭṭhāpikāsikkhāpadavaṇṇanā niṭṭhitā.
