| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
២. ចោរិវុដ្ឋាបិកាសិក្ខាបទវណ្ណនា
2. Corivuṭṭhāpikāsikkhāpadavaṇṇanā
មល្លគណភដិបុត្តគណាទិកន្តិអាទីសុ (សារត្ថ. ដី. បាចិត្តិយ ៣.៦៨៣) មល្លគណោ នាម នារាយនភត្តិកោ តត្ថ តត្ថ បានីយដ្ឋបនបោក្ខរណិខណនាទិបុញ្ញកម្មការកោ គណោ។ ភដិបុត្តគណោ នាម កុមារភត្តិកគណោ។ ធម្មគណោតិ សាសនភត្តិកោ អនេកប្បការបុញ្ញកម្មការកោ គណោ។ គន្ធិកសេណីតិ អនេកប្បការសុគន្ធិវិកតិការកោ គណោ។ ទុស្សិកសេណីតិ ទុស្សវាណិជសមូហោ, បេសការគណោតិ អត្ថោ។
Mallagaṇabhaṭiputtagaṇādikantiādīsu (sārattha. ṭī. pācittiya 3.683) mallagaṇo nāma nārāyanabhattiko tattha tattha pānīyaṭṭhapanapokkharaṇikhaṇanādipuññakammakārako gaṇo. Bhaṭiputtagaṇo nāma kumārabhattikagaṇo. Dhammagaṇoti sāsanabhattiko anekappakārapuññakammakārako gaṇo. Gandhikaseṇīti anekappakārasugandhivikatikārako gaṇo. Dussikaseṇīti dussavāṇijasamūho, pesakāragaṇoti attho.
វុដ្ឋាបេន្តិយាតិ ឧបសម្បាទេន្តិយា។ កេនចិ ករណីយេន បក្កន្តាសុ ភិក្ខុនីសុ អគន្ត្វា ខណ្ឌសីមំ យថានិសិន្នដ្ឋានេយេវ អត្តនោ និស្សិតកបរិសាយ សទ្ធិំ វុដ្ឋាបេន្តិយា វាចាចិត្តតោ សមុដ្ឋាតិ (បាចិ. អដ្ឋ. ៦៨៣), អញ្ញំ សីមំ វា នទិំ វា គន្ត្វា វុដ្ឋាបេន្តិយា កាយវាចាចិត្តតោ សមុដ្ឋាតីតិ អាហ ‘‘ចោរិវុដ្ឋាបនសមុដ្ឋាន’’ន្តិ។ អនាបុច្ឆា វុដ្ឋាបនវសេន កិរិយាកិរិយំ។ បញ្ញត្តិំ អជានន្តា អរិយាបិ វុដ្ឋាបេន្តីតិ វា កម្មវាចាបរិយោសានេ អាបត្តិក្ខណេ វិបាកាព្យាកតសមង្គិតាវសេន វា តិចិត្តំ។
Vuṭṭhāpentiyāti upasampādentiyā. Kenaci karaṇīyena pakkantāsu bhikkhunīsu agantvā khaṇḍasīmaṃ yathānisinnaṭṭhāneyeva attano nissitakaparisāya saddhiṃ vuṭṭhāpentiyā vācācittato samuṭṭhāti (pāci. aṭṭha. 683), aññaṃ sīmaṃ vā nadiṃ vā gantvā vuṭṭhāpentiyā kāyavācācittato samuṭṭhātīti āha ‘‘corivuṭṭhāpanasamuṭṭhāna’’nti. Anāpucchā vuṭṭhāpanavasena kiriyākiriyaṃ. Paññattiṃ ajānantā ariyāpi vuṭṭhāpentīti vā kammavācāpariyosāne āpattikkhaṇe vipākābyākatasamaṅgitāvasena vā ticittaṃ.
ចោរិវុដ្ឋាបិកាសិក្ខាបទវណ្ណនា និដ្ឋិតា។
Corivuṭṭhāpikāsikkhāpadavaṇṇanā niṭṭhitā.
