| Library / Tipiṭaka / တိပိဋက • Tipiṭaka / ပဉ္စပကရဏ-မူလဋီကာ • Pañcapakaraṇa-mūlaṭīkā |
၁၄. စုဒ္ဒသမနယော ဝိပ္ပယုတ္တေနသင္ဂဟိတာသင္ဂဟိတပဒဝဏ္ဏနာ
14. Cuddasamanayo vippayuttenasaṅgahitāsaṅgahitapadavaṇṇanā
၄၅၆. စုဒ္ဒသမနယေ ဓမ္မာယတနာဒီနံ အနာရမ္မဏမိသ္သကသဗ္ဗစိတ္တုပ္ပာဒဂတဓမ္မဘာဝတော ဝိပ္ပယောဂသ္သ အရုဟဏံ ဒဋ္ဌဗ္ဗံ။ ဇာတိအာဒိတ္တယသ္သ စေတ္ထ ဓမ္မသဘာဝမတ္တတ္တာ န ကထဉ္စိ သမ္ပယောဂော ဝိပ္ပယောဂော စ ရုဟတိ အဇ္ဈတ္တဗဟိဒ္ဓဓမ္မာနံ သဗ္ဗဓမ္မသမောဓာနတ္တာ, အနိဒသ္သနအပ္ပဋိဃာဒီနံ အနာရမ္မဏမိသ္သကသဗ္ဗစိတ္တုပ္ပာဒတ္တာ။ ဒုက္ခသစ္စာဒိဓမ္မာဝ ဣဓ တေဟိ ဝိပ္ပယုတ္တာနံ သင္ဂဟာသင္ဂဟသဗ္ဘာဝာ ဂဟိတာတိ။
456. Cuddasamanaye dhammāyatanādīnaṃ anārammaṇamissakasabbacittuppādagatadhammabhāvato vippayogassa aruhaṇaṃ daṭṭhabbaṃ. Jātiādittayassa cettha dhammasabhāvamattattā na kathañci sampayogo vippayogo ca ruhati ajjhattabahiddhadhammānaṃ sabbadhammasamodhānattā, anidassanaappaṭighādīnaṃ anārammaṇamissakasabbacittuppādattā. Dukkhasaccādidhammāva idha tehi vippayuttānaṃ saṅgahāsaṅgahasabbhāvā gahitāti.
ပာဠိဥဒ္ဒာနဂာထာယံ သမုစ္ဆေဒေ န လဗ္ဘန္တီတိ ပရိယောသာနေ နယေ န လဗ္ဘန္တီတိ အတ္ထော။ မောဃပုစ္ဆကေန စာတိ အလဗ္ဘမာနာ စ တေ မောဃပုစ္ဆကေန ဟေတုနာ န လဗ္ဘန္တိ တေသံ ပုစ္ဆာယ မောဃတ္တာတိ ဝုတ္တံ ဟောတိ။ အထ ဝာ မောဃပုစ္ဆကော အဋ္ဌမော နယော, တေန စ သဟ ဩသာနနယေ ဧတေ ဓမ္မာ ဝိပ္ပယောဂသ္သပိ အဘာဝာ သဗ္ဗထာပိ န လဗ္ဘန္တီတိ အတ္ထော။
Pāḷiuddānagāthāyaṃ samucchede na labbhantīti pariyosāne naye na labbhantīti attho. Moghapucchakena cāti alabbhamānā ca te moghapucchakena hetunā na labbhanti tesaṃ pucchāya moghattāti vuttaṃ hoti. Atha vā moghapucchako aṭṭhamo nayo, tena ca saha osānanaye ete dhammā vippayogassapi abhāvā sabbathāpi na labbhantīti attho.
စုဒ္ဒသမနယဝိပ္ပယုတ္တေနသင္ဂဟိတာသင္ဂဟိတပဒဝဏ္ဏနာ နိဋ္ဌိတာ။
Cuddasamanayavippayuttenasaṅgahitāsaṅgahitapadavaṇṇanā niṭṭhitā.
ဓာတုကထာပကရဏ-မူလဋီကာ သမတ္တာ။
Dhātukathāpakaraṇa-mūlaṭīkā samattā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဓာတုကထာပာဠိ • Dhātukathāpāḷi / ၁၄. ဝိပ္ပယုတ္တေနသင္ဂဟိတာသင္ဂဟိတပဒနိဒ္ဒေသော • 14. Vippayuttenasaṅgahitāsaṅgahitapadaniddeso
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁၄. စုဒ္ဒသမနယော ဝိပ္ပယုတ္တေနသင္ဂဟိတာသင္ဂဟိတပဒဝဏ္ဏနာ • 14. Cuddasamanayo vippayuttenasaṅgahitāsaṅgahitapadavaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁၄. စုဒ္ဒသမနယော ဝိပ္ပယုတ္တေနသင္ဂဟိတာသင္ဂဟိတပဒဝဏ္ဏနာ • 14. Cuddasamanayo vippayuttenasaṅgahitāsaṅgahitapadavaṇṇanā
