| Library / Tipiṭaka / д̇ибидага • Tipiṭaka / маж̇жхиманигааяа • Majjhimanikāya |
10. жуул̣аассабурасуд̇д̇ам̣
10. Cūḷaassapurasuttaṃ
435. звам̣ мз суд̇ам̣ – згам̣ самаяам̣ бхаг̇аваа ан̇г̇зсу вихарад̇и ассабурам̣ наама ан̇г̇аанам̣ ниг̇амо. д̇ад̇ра ко бхаг̇аваа бхигкуу ааманд̇зси – ‘‘бхигкаво’’д̇и. ‘‘бхад̣̇анд̇з’’д̇и д̇з бхигкуу бхаг̇авад̇о бажжассосум̣. бхаг̇аваа зд̇ад̣̇авожа – ‘‘саман̣аа саман̣аад̇и во, бхигкавз, ж̇ано сан̃ж̇аанаад̇и. д̇умхз жа бана ‘гз д̇умхз’д̇и будтаа самаанаа ‘саман̣аамхаа’д̇и бадиж̇аанаат̇а. д̇зсам̣ во, бхигкавз, звам̣саман̃н̃аанам̣ сад̇ам̣ звам̣бадин̃н̃аанам̣ сад̇ам̣ – ‘яаа саман̣асаамийжиббадибад̣̇аа д̇ам̣ бадибаж̇ж̇иссаама; звам̣ но аяам̣ амхаагам̣ саман̃н̃аа жа сажжаа бхависсад̇и бадин̃н̃аа жа бхууд̇аа; язсан̃жа маяам̣ жийварабин̣д̣абаад̇асзнаасанаг̇илаанаббажжаяабхзсаж̇ж̇абаригкаарам̣ барибхун̃ж̇аама, д̇зсам̣ д̇з гаараа амхзсу махабпалаа бхависсанд̇и махаанисам̣саа, амхааган̃жзвааяам̣ баб̣б̣аж̇ж̇аа аван̃жхаа бхависсад̇и сапалаа сауд̣̇раяаа’д̇и. зван̃хи во, бхигкавз, сигкид̇аб̣б̣ам̣.
435. Evaṃ me sutaṃ – ekaṃ samayaṃ bhagavā aṅgesu viharati assapuraṃ nāma aṅgānaṃ nigamo. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘samaṇā samaṇāti vo, bhikkhave, jano sañjānāti. Tumhe ca pana ‘ke tumhe’ti puṭṭhā samānā ‘samaṇāmhā’ti paṭijānātha. Tesaṃ vo, bhikkhave, evaṃsamaññānaṃ sataṃ evaṃpaṭiññānaṃ sataṃ – ‘yā samaṇasāmīcippaṭipadā taṃ paṭipajjissāma; evaṃ no ayaṃ amhākaṃ samaññā ca saccā bhavissati paṭiññā ca bhūtā; yesañca mayaṃ cīvarapiṇḍapātasenāsanagilānappaccayabhesajjaparikkhāraṃ paribhuñjāma, tesaṃ te kārā amhesu mahapphalā bhavissanti mahānisaṃsā, amhākañcevāyaṃ pabbajjā avañjhā bhavissati saphalā saudrayā’ti. Evañhi vo, bhikkhave, sikkhitabbaṃ.
436. ‘‘гат̇ан̃жа, бхигкавз, бхигку на саман̣асаамийжиббадибад̣̇ам̣ бадибанно ход̇и? яасса гассажи, бхигкавз, бхигкуно абхиж̇жхаалусса абхиж̇жхаа аббахийнаа ход̇и, б̣яаабаннажид̇д̇асса б̣яаабаад̣̇о аббахийно ход̇и, год̇ханасса год̇хо аббахийно ход̇и, убанаахисса убанаахо аббахийно ход̇и, магкисса магко аббахийно ход̇и, бал̣аасисса бал̣аасо аббахийно ход̇и, иссугисса иссаа аббахийнаа ход̇и, мажчарисса мажчарияам̣ аббахийнам̣ ход̇и , сатасса саатзяяам̣ аббахийнам̣ ход̇и, мааяаависса мааяаа аббахийнаа ход̇и, баабижчасса баабигаа ижчаа аббахийнаа ход̇и, мижчаад̣̇идтигасса мижчаад̣̇идти аббахийнаа ход̇и – имзсам̣ ко ахам̣, бхигкавз, саман̣амалаанам̣ саман̣ад̣̇осаанам̣ саман̣агасадаанам̣ аабааяигаанам̣ таанаанам̣ д̣̇уг̇г̇ад̇ивзд̣̇анияаанам̣ аббахаанаа ‘на саман̣асаамийжиббадибад̣̇ам̣ бадибанно’д̇и вад̣̇аами. сзяяат̇ааби, бхигкавз, мад̇аж̇ам̣ наама аавуд̇хаж̇аад̇ам̣ убхад̇од̇хаарам̣ бийд̇анисид̇ам̣. д̇ад̣̇асса сан̇гхаадияаа самбааруд̇ам̣ самбаливзтид̇ам̣. д̇ат̇уубамаахам̣, бхигкавз, имасса бхигкуно баб̣б̣аж̇ж̇ам̣ вад̣̇аами.
436. ‘‘Kathañca, bhikkhave, bhikkhu na samaṇasāmīcippaṭipadaṃ paṭipanno hoti? Yassa kassaci, bhikkhave, bhikkhuno abhijjhālussa abhijjhā appahīnā hoti, byāpannacittassa byāpādo appahīno hoti, kodhanassa kodho appahīno hoti, upanāhissa upanāho appahīno hoti, makkhissa makkho appahīno hoti, paḷāsissa paḷāso appahīno hoti, issukissa issā appahīnā hoti, maccharissa macchariyaṃ appahīnaṃ hoti , saṭhassa sāṭheyyaṃ appahīnaṃ hoti, māyāvissa māyā appahīnā hoti, pāpicchassa pāpikā icchā appahīnā hoti, micchādiṭṭhikassa micchādiṭṭhi appahīnā hoti – imesaṃ kho ahaṃ, bhikkhave, samaṇamalānaṃ samaṇadosānaṃ samaṇakasaṭānaṃ āpāyikānaṃ ṭhānānaṃ duggativedaniyānaṃ appahānā ‘na samaṇasāmīcippaṭipadaṃ paṭipanno’ti vadāmi. Seyyathāpi, bhikkhave, matajaṃ nāma āvudhajātaṃ ubhatodhāraṃ pītanisitaṃ. Tadassa saṅghāṭiyā sampārutaṃ sampaliveṭhitaṃ. Tathūpamāhaṃ, bhikkhave, imassa bhikkhuno pabbajjaṃ vadāmi.
437. ‘‘наахам̣, бхигкавз, сан̇гхаадигасса сан̇гхаадид̇хааран̣амад̇д̇зна сааман̃н̃ам̣ вад̣̇аами. наахам̣, бхигкавз, ажзлагасса ажзлагамад̇д̇зна сааман̃н̃ам̣ вад̣̇аами. наахам̣, бхигкавз, раж̇ож̇аллигасса раж̇ож̇аллигамад̇д̇зна сааман̃н̃ам̣ вад̣̇аами. наахам̣, бхигкавз , уд̣̇агорохагасса уд̣̇агорохан̣амад̇д̇зна 1 сааман̃н̃ам̣ вад̣̇аами. наахам̣, бхигкавз, ругкамуулигасса ругкамуулигамад̇д̇зна сааман̃н̃ам̣ вад̣̇аами. наахам̣, бхигкавз, аб̣бхогаасигасса аб̣бхогаасигамад̇д̇зна сааман̃н̃ам̣ вад̣̇аами. наахам̣, бхигкавз, уб̣бхадтагасса уб̣бхадтагамад̇д̇зна сааман̃н̃ам̣ вад̣̇аами. наахам̣, бхигкавз, барияааяабхад̇д̇игасса барияааяабхад̇д̇игамад̇д̇зна сааман̃н̃ам̣ вад̣̇аами. наахам̣, бхигкавз, манд̇аж̇жхааяагасса манд̇аж̇жхааяагамад̇д̇зна сааман̃н̃ам̣ вад̣̇аами. наахам̣, бхигкавз, ж̇адилагасса ж̇адаад̇хааран̣амад̇д̇зна сааман̃н̃ам̣ вад̣̇аами.
437. ‘‘Nāhaṃ, bhikkhave, saṅghāṭikassa saṅghāṭidhāraṇamattena sāmaññaṃ vadāmi. Nāhaṃ, bhikkhave, acelakassa acelakamattena sāmaññaṃ vadāmi. Nāhaṃ, bhikkhave, rajojallikassa rajojallikamattena sāmaññaṃ vadāmi. Nāhaṃ, bhikkhave , udakorohakassa udakorohaṇamattena 2 sāmaññaṃ vadāmi. Nāhaṃ, bhikkhave, rukkhamūlikassa rukkhamūlikamattena sāmaññaṃ vadāmi. Nāhaṃ, bhikkhave, abbhokāsikassa abbhokāsikamattena sāmaññaṃ vadāmi. Nāhaṃ, bhikkhave, ubbhaṭṭhakassa ubbhaṭṭhakamattena sāmaññaṃ vadāmi. Nāhaṃ, bhikkhave, pariyāyabhattikassa pariyāyabhattikamattena sāmaññaṃ vadāmi. Nāhaṃ, bhikkhave, mantajjhāyakassa mantajjhāyakamattena sāmaññaṃ vadāmi. Nāhaṃ, bhikkhave, jaṭilakassa jaṭādhāraṇamattena sāmaññaṃ vadāmi.
‘‘сан̇гхаадигасса жз, бхигкавз, сан̇гхаадид̇хааран̣амад̇д̇зна абхиж̇жхаалусса абхиж̇жхаа бахийязт̇а, б̣яаабаннажид̇д̇асса б̣яаабаад̣̇о бахийязт̇а, год̇ханасса год̇хо бахийязт̇а, убанаахисса убанаахо бахийязт̇а, магкисса магко бахийязт̇а, бал̣аасисса бал̣аасо бахийязт̇а, иссугисса иссаа бахийязт̇а, мажчарисса мажчарияам̣ бахийязт̇а, сатасса саатзяяам̣ бахийязт̇а, мааяаависса мааяаа бахийязт̇а, баабижчасса баабигаа ижчаа бахийязт̇а, мижчаад̣̇идтигасса мижчаад̣̇идти бахийязт̇а, д̇амзнам̣ мид̇д̇аамажжаа н̃аад̇исаалохид̇аа ж̇аад̇амзва нам̣ сан̇гхаадигам̣ гарзяяум̣, сан̇гхаадигад̇д̇амзва 3 самаад̣̇абзяяум̣ – ‘зхи д̇вам̣, бхад̣̇рамука, сан̇гхаадиго хохи, сан̇гхаадигасса д̇з сад̇о сан̇гхаадид̇хааран̣амад̇д̇зна абхиж̇жхаалусса абхиж̇жхаа бахийяиссад̇и, б̣яаабаннажид̇д̇асса б̣яаабаад̣̇о бахийяиссад̇и, год̇ханасса год̇хо бахийяиссад̇и, убанаахисса убанаахо бахийяиссад̇и, магкисса магко бахийяиссад̇и, бал̣аасисса бал̣аасо бахийяиссад̇и, иссугисса иссаа бахийяиссад̇и, мажчарисса мажчарияам̣ бахийяиссад̇и, сатасса саатзяяам̣ бахийяиссад̇и, мааяаависса мааяаа бахийяиссад̇и, баабижчасса баабигаа ижчаа бахийяиссад̇и, мижчаад̣̇идтигасса мижчаад̣̇идти бахийяиссад̇ий’д̇и. яасмаа жа ко ахам̣, бхигкавз, сан̇гхаадигамби ид̇хзгажжам̣ бассаами абхиж̇жхаалум̣ б̣яаабаннажид̇д̇ам̣ год̇ханам̣ убанаахим̣ магким̣ бал̣аасим̣ иссугим̣ мажчарим̣ сатам̣ мааяаавим̣ баабижчам̣ мижчаад̣̇идтигам̣, д̇асмаа на сан̇гхаадигасса сан̇гхаадид̇хааран̣амад̇д̇зна сааман̃н̃ам̣ вад̣̇аами.
‘‘Saṅghāṭikassa ce, bhikkhave, saṅghāṭidhāraṇamattena abhijjhālussa abhijjhā pahīyetha, byāpannacittassa byāpādo pahīyetha, kodhanassa kodho pahīyetha, upanāhissa upanāho pahīyetha, makkhissa makkho pahīyetha, paḷāsissa paḷāso pahīyetha, issukissa issā pahīyetha, maccharissa macchariyaṃ pahīyetha, saṭhassa sāṭheyyaṃ pahīyetha, māyāvissa māyā pahīyetha, pāpicchassa pāpikā icchā pahīyetha, micchādiṭṭhikassa micchādiṭṭhi pahīyetha, tamenaṃ mittāmaccā ñātisālohitā jātameva naṃ saṅghāṭikaṃ kareyyuṃ, saṅghāṭikattameva 4 samādapeyyuṃ – ‘ehi tvaṃ, bhadramukha, saṅghāṭiko hohi, saṅghāṭikassa te sato saṅghāṭidhāraṇamattena abhijjhālussa abhijjhā pahīyissati, byāpannacittassa byāpādo pahīyissati, kodhanassa kodho pahīyissati, upanāhissa upanāho pahīyissati, makkhissa makkho pahīyissati, paḷāsissa paḷāso pahīyissati, issukissa issā pahīyissati, maccharissa macchariyaṃ pahīyissati, saṭhassa sāṭheyyaṃ pahīyissati, māyāvissa māyā pahīyissati, pāpicchassa pāpikā icchā pahīyissati, micchādiṭṭhikassa micchādiṭṭhi pahīyissatī’ti. Yasmā ca kho ahaṃ, bhikkhave, saṅghāṭikampi idhekaccaṃ passāmi abhijjhāluṃ byāpannacittaṃ kodhanaṃ upanāhiṃ makkhiṃ paḷāsiṃ issukiṃ macchariṃ saṭhaṃ māyāviṃ pāpicchaṃ micchādiṭṭhikaṃ, tasmā na saṅghāṭikassa saṅghāṭidhāraṇamattena sāmaññaṃ vadāmi.
‘‘ажзлагасса жз, бхигкавз…бз… раж̇ож̇аллигасса жз, бхигкавз…бз… уд̣̇агорохагасса жз, бхигкавз…бз… ругкамуулигасса жз, бхигкавз…бз… аб̣бхогаасигасса жз, бхигкавз…бз… уб̣бхадтагасса жз, бхигкавз…бз… барияааяабхад̇д̇игасса жз, бхигкавз…бз… манд̇аж̇жхааяагасса жз, бхигкавз…бз… ж̇адилагасса жз, бхигкавз, ж̇адаад̇хааран̣амад̇д̇зна абхиж̇жхаалусса абхиж̇жхаа бахийязт̇а, б̣яаабаннажид̇д̇асса б̣яаабаад̣̇о бахийязт̇а , год̇ханасса год̇хо бахийязт̇а, убанаахисса убанаахо бахийязт̇а, магкисса магко бахийязт̇а, бал̣аасисса бал̣аасо бахийязт̇а, иссугисса иссаа бахийязт̇а, мажчарисса мажчарияам̣ бахийязт̇а, сатасса саатзяяам̣ бахийязт̇а, мааяаависса мааяаа бахийязт̇а, баабижчасса баабигаа ижчаа бахийязт̇а, мижчаад̣̇идтигасса мижчаад̣̇идти бахийязт̇а, д̇амзнам̣ мид̇д̇аамажжаа н̃аад̇исаалохид̇аа ж̇аад̇амзва нам̣ ж̇адилагам̣ гарзяяум̣, ж̇адилагад̇д̇амзва 5 самаад̣̇абзяяум̣ – ‘зхи д̇вам̣, бхад̣̇рамука, ж̇адилаго хохи, ж̇адилагасса д̇з сад̇о ж̇адаад̇хааран̣амад̇д̇зна абхиж̇жхаалусса абхиж̇жхаа бахийяиссад̇и б̣яаабаннажид̇д̇асса б̣яаабаад̣̇о бахийяиссад̇и, год̇ханасса год̇хо бахийяиссад̇и…бз… баабижчасса баабигаа ижчаа бахийяиссад̇и мижчаад̣̇идтигасса мижчаад̣̇идти бахийяиссад̇ий’д̇и. яасмаа жа ко ахам̣, бхигкавз, ж̇адилагамби ид̇хзгажжам̣ бассаами абхиж̇жхаалум̣ б̣яаабаннажид̇д̇ам̣ год̇ханам̣ убанаахим̣ магким̣ балаасим̣ иссугим̣ мажчарим̣ сатам̣ мааяаавим̣ баабижчам̣ мижчаад̣̇идтим̣, д̇асмаа на ж̇адилагасса ж̇адаад̇хааран̣амад̇д̇зна сааман̃н̃ам̣ вад̣̇аами.
‘‘Acelakassa ce, bhikkhave…pe… rajojallikassa ce, bhikkhave…pe… udakorohakassa ce, bhikkhave…pe… rukkhamūlikassa ce, bhikkhave…pe… abbhokāsikassa ce, bhikkhave…pe… ubbhaṭṭhakassa ce, bhikkhave…pe… pariyāyabhattikassa ce, bhikkhave…pe… mantajjhāyakassa ce, bhikkhave…pe… jaṭilakassa ce, bhikkhave, jaṭādhāraṇamattena abhijjhālussa abhijjhā pahīyetha, byāpannacittassa byāpādo pahīyetha , kodhanassa kodho pahīyetha, upanāhissa upanāho pahīyetha, makkhissa makkho pahīyetha, paḷāsissa paḷāso pahīyetha, issukissa issā pahīyetha, maccharissa macchariyaṃ pahīyetha, saṭhassa sāṭheyyaṃ pahīyetha, māyāvissa māyā pahīyetha, pāpicchassa pāpikā icchā pahīyetha, micchādiṭṭhikassa micchādiṭṭhi pahīyetha, tamenaṃ mittāmaccā ñātisālohitā jātameva naṃ jaṭilakaṃ kareyyuṃ, jaṭilakattameva 6 samādapeyyuṃ – ‘ehi tvaṃ, bhadramukha, jaṭilako hohi, jaṭilakassa te sato jaṭādhāraṇamattena abhijjhālussa abhijjhā pahīyissati byāpannacittassa byāpādo pahīyissati, kodhanassa kodho pahīyissati…pe… pāpicchassa pāpikā icchā pahīyissati micchādiṭṭhikassa micchādiṭṭhi pahīyissatī’ti. Yasmā ca kho ahaṃ, bhikkhave, jaṭilakampi idhekaccaṃ passāmi abhijjhāluṃ byāpannacittaṃ kodhanaṃ upanāhiṃ makkhiṃ palāsiṃ issukiṃ macchariṃ saṭhaṃ māyāviṃ pāpicchaṃ micchādiṭṭhiṃ, tasmā na jaṭilakassa jaṭādhāraṇamattena sāmaññaṃ vadāmi.
438. ‘‘гат̇ан̃жа, бхигкавз, бхигку саман̣асаамийжиббадибад̣̇ам̣ бадибанно ход̇и? яасса гассажи, бхигкавз, бхигкуно абхиж̇жхаалусса абхиж̇жхаа бахийнаа ход̇и, б̣яаабаннажид̇д̇асса б̣яаабаад̣̇о бахийно ход̇и, год̇ханасса год̇хо бахийно ход̇и, убанаахисса убанаахо бахийно ход̇и, магкисса магко бахийно ход̇и, бал̣аасисса бал̣аасо бахийно ход̇и, иссугисса иссаа бахийнаа ход̇и, мажчарисса мажчарияам̣ бахийнам̣ ход̇и, сатасса саатзяяам̣ бахийнам̣ ход̇и, мааяаависса мааяаа бахийнаа ход̇и, баабижчасса баабигаа ижчаа бахийнаа ход̇и, мижчаад̣̇идтигасса мижчаад̣̇идти бахийнаа ход̇и – имзсам̣ ко ахам̣, бхигкавз, саман̣амалаанам̣ саман̣ад̣̇осаанам̣ саман̣агасадаанам̣ аабааяигаанам̣ таанаанам̣ д̣̇уг̇г̇ад̇ивзд̣̇анияаанам̣ бахаанаа ‘саман̣асаамийжиббадибад̣̇ам̣ бадибанно’д̇и вад̣̇аами. со саб̣б̣зхи имзхи баабагзхи агусалзхи д̇хаммзхи висуд̣̇д̇хамад̇д̇аанам̣ саманубассад̇и ( ) 7. д̇асса саб̣б̣зхи имзхи баабагзхи агусалзхи д̇хаммзхи висуд̣̇д̇хамад̇д̇аанам̣ саманубассад̇о ( ) 8 баамож̇ж̇ам̣ ж̇ааяад̇и, бамуд̣̇ид̇асса бийд̇и ж̇ааяад̇и, бийд̇иманасса гааяо бассамбхад̇и, бассад̣̇д̇хагааяо сукам̣ взд̣̇зд̇и, сукино жид̇д̇ам̣ самаад̇хияад̇и.
438. ‘‘Kathañca, bhikkhave, bhikkhu samaṇasāmīcippaṭipadaṃ paṭipanno hoti? Yassa kassaci, bhikkhave, bhikkhuno abhijjhālussa abhijjhā pahīnā hoti, byāpannacittassa byāpādo pahīno hoti, kodhanassa kodho pahīno hoti, upanāhissa upanāho pahīno hoti, makkhissa makkho pahīno hoti, paḷāsissa paḷāso pahīno hoti, issukissa issā pahīnā hoti, maccharissa macchariyaṃ pahīnaṃ hoti, saṭhassa sāṭheyyaṃ pahīnaṃ hoti, māyāvissa māyā pahīnā hoti, pāpicchassa pāpikā icchā pahīnā hoti, micchādiṭṭhikassa micchādiṭṭhi pahīnā hoti – imesaṃ kho ahaṃ, bhikkhave, samaṇamalānaṃ samaṇadosānaṃ samaṇakasaṭānaṃ āpāyikānaṃ ṭhānānaṃ duggativedaniyānaṃ pahānā ‘samaṇasāmīcippaṭipadaṃ paṭipanno’ti vadāmi. So sabbehi imehi pāpakehi akusalehi dhammehi visuddhamattānaṃ samanupassati ( ) 9. Tassa sabbehi imehi pāpakehi akusalehi dhammehi visuddhamattānaṃ samanupassato ( ) 10 pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati.
‘‘со мзд̇д̇аасахаг̇ад̇зна жзд̇асаа згам̣ д̣̇исам̣ парид̇ваа вихарад̇и, д̇ат̇аа д̣̇уд̇ияам̣, д̇ат̇аа д̇ад̇ияам̣, д̇ат̇аа жад̇уд̇т̇ам̣. ид̇и уд̣̇д̇хамад̇хо д̇ирияам̣ саб̣б̣ад̇хи саб̣б̣ад̇д̇ад̇ааяа саб̣б̣ааванд̇ам̣ логам̣ мзд̇д̇аасахаг̇ад̇зна жзд̇асаа вибулзна махаг̇г̇ад̇зна аббамаан̣зна авзрзна аб̣яааб̣аж̇жхзна парид̇ваа вихарад̇и. гарун̣аасахаг̇ад̇зна жзд̇асаа…бз… муд̣̇ид̇аасахаг̇ад̇зна жзд̇асаа…бз… убзгкаасахаг̇ад̇зна жзд̇асаа згам̣ д̣̇исам̣ парид̇ваа вихарад̇и, д̇ат̇аа д̣̇уд̇ияам̣, д̇ат̇аа д̇ад̇ияам̣, д̇ат̇аа жад̇уд̇т̇ам̣. ид̇и уд̣̇д̇хамад̇хо д̇ирияам̣ саб̣б̣ад̇хи саб̣б̣ад̇д̇ад̇ааяа саб̣б̣ааванд̇ам̣ логам̣ убзгкаасахаг̇ад̇зна жзд̇асаа вибулзна махаг̇г̇ад̇зна аббамаан̣зна авзрзна аб̣яааб̣аж̇жхзна парид̇ваа вихарад̇и. сзяяат̇ааби, бхигкавз, богкаран̣ий ажчод̣̇агаа саад̇од̣̇агаа сийд̇од̣̇агаа сзд̇агаа субад̇ид̇т̇аа раман̣ийяаа. бурад̇т̇имааяа жзби д̣̇исааяа бурисо ааг̇ажчзяяа гхаммаабхид̇ад̇д̇о гхаммабарзд̇о гиланд̇о д̇асид̇о бибаасид̇о. со д̇ам̣ богкаран̣им̣ ааг̇амма винзяяа уд̣̇агабибаасам̣ винзяяа гхаммабарил̣аахам̣…бз… бажчимааяа жзби д̣̇исааяа бурисо ааг̇ажчзяяа…бз… уд̇д̇арааяа жзби д̣̇исааяа бурисо ааг̇ажчзяяа…бз… д̣̇агкин̣ааяа жзби д̣̇исааяа бурисо ааг̇ажчзяяа. яад̇о гуд̇о жзби нам̣ бурисо ааг̇ажчзяяа гхаммаабхид̇ад̇д̇о гхаммабарзд̇о, гиланд̇о д̇асид̇о бибаасид̇о. со д̇ам̣ богкаран̣им̣ ааг̇амма винзяяа уд̣̇агабибаасам̣, винзяяа гхаммабарил̣аахам̣. звамзва ко, бхигкавз, кад̇д̇ияагулаа жзби аг̇аарасмаа анаг̇аарияам̣ баб̣б̣аж̇ид̇о ход̇и, со жа д̇ат̇ааг̇ад̇аббавзд̣̇ид̇ам̣ д̇хаммавинаяам̣ ааг̇амма, звам̣ мзд̇д̇ам̣ гарун̣ам̣ муд̣̇ид̇ам̣ убзгкам̣ бхаавзд̇ваа лабхад̇и аж̇жхад̇д̇ам̣ 11 вуубасамам̣ 12. аж̇жхад̇д̇ам̣ вуубасамаа ‘саман̣асаамийжиббадибад̣̇ам̣ бадибанно’д̇и вад̣̇аами. б̣раахман̣агулаа жзби…бз… взссагулаа жзби…бз… суд̣̇д̣̇агулаа жзби…бз… яасмаа гасмаа жзби гулаа аг̇аарасмаа анаг̇аарияам̣ баб̣б̣аж̇ид̇о ход̇и , со жа д̇ат̇ааг̇ад̇аббавзд̣̇ид̇ам̣ д̇хаммавинаяам̣ ааг̇амма, звам̣ мзд̇д̇ам̣ гарун̣ам̣ муд̣̇ид̇ам̣ убзгкам̣ бхаавзд̇ваа лабхад̇и аж̇жхад̇д̇ам̣ вуубасамам̣. аж̇жхад̇д̇ам̣ вуубасамаа ‘саман̣асаамийжиббадибад̣̇ам̣ бадибанно’д̇и вад̣̇аами.
‘‘So mettāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā viharati. Karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvā viharati. Seyyathāpi, bhikkhave, pokkharaṇī acchodakā sātodakā sītodakā setakā supatitthā ramaṇīyā. Puratthimāya cepi disāya puriso āgaccheyya ghammābhitatto ghammapareto kilanto tasito pipāsito. So taṃ pokkharaṇiṃ āgamma vineyya udakapipāsaṃ vineyya ghammapariḷāhaṃ…pe… pacchimāya cepi disāya puriso āgaccheyya…pe… uttarāya cepi disāya puriso āgaccheyya…pe… dakkhiṇāya cepi disāya puriso āgaccheyya. Yato kuto cepi naṃ puriso āgaccheyya ghammābhitatto ghammapareto, kilanto tasito pipāsito. So taṃ pokkharaṇiṃ āgamma vineyya udakapipāsaṃ, vineyya ghammapariḷāhaṃ. Evameva kho, bhikkhave, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma, evaṃ mettaṃ karuṇaṃ muditaṃ upekkhaṃ bhāvetvā labhati ajjhattaṃ 13 vūpasamaṃ 14. Ajjhattaṃ vūpasamā ‘samaṇasāmīcippaṭipadaṃ paṭipanno’ti vadāmi. Brāhmaṇakulā cepi…pe… vessakulā cepi…pe… suddakulā cepi…pe… yasmā kasmā cepi kulā agārasmā anagāriyaṃ pabbajito hoti , so ca tathāgatappaveditaṃ dhammavinayaṃ āgamma, evaṃ mettaṃ karuṇaṃ muditaṃ upekkhaṃ bhāvetvā labhati ajjhattaṃ vūpasamaṃ. Ajjhattaṃ vūpasamā ‘samaṇasāmīcippaṭipadaṃ paṭipanno’ti vadāmi.
‘‘кад̇д̇ияагулаа жзби аг̇аарасмаа анаг̇аарияам̣ баб̣б̣аж̇ид̇о ход̇и. со жа аасаваанам̣ каяаа анаасавам̣ жзд̇овимуд̇д̇им̣ бан̃н̃аавимуд̇д̇им̣ д̣̇идтзва д̇хаммз саяам̣ абхин̃н̃аа сажчигад̇ваа убасамбаж̇ж̇а вихарад̇и. аасаваанам̣ каяаа саман̣о ход̇и. б̣раахман̣агулаа жзби…бз… взссагулаа жзби… суд̣̇д̣̇агулаа жзби… яасмаа гасмаа жзби гулаа аг̇аарасмаа анаг̇аарияам̣ баб̣б̣аж̇ид̇о ход̇и, со жа аасаваанам̣ каяаа анаасавам̣ жзд̇овимуд̇д̇им̣ бан̃н̃аавимуд̇д̇им̣ д̣̇идтзва д̇хаммз саяам̣ абхин̃н̃аа сажчигад̇ваа убасамбаж̇ж̇а вихарад̇и. аасаваанам̣ каяаа саман̣о ход̇ий’’д̇и.
‘‘Khattiyakulā cepi agārasmā anagāriyaṃ pabbajito hoti. So ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Āsavānaṃ khayā samaṇo hoti. Brāhmaṇakulā cepi…pe… vessakulā cepi… suddakulā cepi… yasmā kasmā cepi kulā agārasmā anagāriyaṃ pabbajito hoti, so ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Āsavānaṃ khayā samaṇo hotī’’ti.
ид̣̇амавожа бхаг̇аваа. ад̇д̇аманаа д̇з бхигкуу бхаг̇авад̇о бхаасид̇ам̣ абхинанд̣̇унд̇и.
Idamavoca bhagavā. Attamanā te bhikkhū bhagavato bhāsitaṃ abhinandunti.
жуул̣аассабурасуд̇д̇ам̣ нидтид̇ам̣ д̣̇асамам̣.
Cūḷaassapurasuttaṃ niṭṭhitaṃ dasamaṃ.
махааяамагаваг̇г̇о нидтид̇о жад̇уд̇т̇о.
Mahāyamakavaggo niṭṭhito catuttho.
д̇ассуд̣̇д̣̇аанам̣ –
Tassuddānaṃ –
г̇ин̃ж̇агасаалаванам̣ барихарид̇ум̣, бан̃н̃авад̇о буна сажжаганисзд̇хо;
Giñjakasālavanaṃ pariharituṃ, paññavato puna saccakanisedho;
мукаван̣н̣абасийд̣̇анад̇аабинд̣̇о, гзваддаассабураж̇адилзна.
Mukhavaṇṇapasīdanatāpindo, kevaṭṭaassapurajaṭilena.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 10. жуул̣аассабурасуд̇д̇аван̣н̣анаа • 10. Cūḷaassapurasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 10. жуул̣аассабурасуд̇д̇аван̣н̣анаа • 10. Cūḷaassapurasuttavaṇṇanā
