| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ • Majjhimanikāya |
੧੦. ਚੂਲ਼ਅਸ੍ਸਪੁਰਸੁਤ੍ਤਂ
10. Cūḷaassapurasuttaṃ
੪੩੫. ਏવਂ ਮੇ ਸੁਤਂ – ਏਕਂ ਸਮਯਂ ਭਗવਾ ਅਙ੍ਗੇਸੁ વਿਹਰਤਿ ਅਸ੍ਸਪੁਰਂ ਨਾਮ ਅਙ੍ਗਾਨਂ ਨਿਗਮੋ। ਤਤ੍ਰ ਖੋ ਭਗવਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖવੋ’’ਤਿ। ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗવਤੋ ਪਚ੍ਚਸ੍ਸੋਸੁਂ। ਭਗવਾ ਏਤਦવੋਚ – ‘‘ਸਮਣਾ ਸਮਣਾਤਿ વੋ, ਭਿਕ੍ਖવੇ, ਜਨੋ ਸਞ੍ਜਾਨਾਤਿ। ਤੁਮ੍ਹੇ ਚ ਪਨ ‘ਕੇ ਤੁਮ੍ਹੇ’ਤਿ ਪੁਟ੍ਠਾ ਸਮਾਨਾ ‘ਸਮਣਾਮ੍ਹਾ’ਤਿ ਪਟਿਜਾਨਾਥ। ਤੇਸਂ વੋ, ਭਿਕ੍ਖવੇ, ਏવਂਸਮਞ੍ਞਾਨਂ ਸਤਂ ਏવਂਪਟਿਞ੍ਞਾਨਂ ਸਤਂ – ‘ਯਾ ਸਮਣਸਾਮੀਚਿਪ੍ਪਟਿਪਦਾ ਤਂ ਪਟਿਪਜ੍ਜਿਸ੍ਸਾਮ; ਏવਂ ਨੋ ਅਯਂ ਅਮ੍ਹਾਕਂ ਸਮਞ੍ਞਾ ਚ ਸਚ੍ਚਾ ਭવਿਸ੍ਸਤਿ ਪਟਿਞ੍ਞਾ ਚ ਭੂਤਾ; ਯੇਸਞ੍ਚ ਮਯਂ ਚੀવਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ ਪਰਿਭੁਞ੍ਜਾਮ, ਤੇਸਂ ਤੇ ਕਾਰਾ ਅਮ੍ਹੇਸੁ ਮਹਪ੍ਫਲਾ ਭવਿਸ੍ਸਨ੍ਤਿ ਮਹਾਨਿਸਂਸਾ, ਅਮ੍ਹਾਕਞ੍ਚੇવਾਯਂ ਪਬ੍ਬਜ੍ਜਾ ਅવਞ੍ਝਾ ਭવਿਸ੍ਸਤਿ ਸਫਲਾ ਸਉਦ੍ਰਯਾ’ਤਿ। ਏવਞ੍ਹਿ વੋ, ਭਿਕ੍ਖવੇ, ਸਿਕ੍ਖਿਤਬ੍ਬਂ।
435. Evaṃ me sutaṃ – ekaṃ samayaṃ bhagavā aṅgesu viharati assapuraṃ nāma aṅgānaṃ nigamo. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘samaṇā samaṇāti vo, bhikkhave, jano sañjānāti. Tumhe ca pana ‘ke tumhe’ti puṭṭhā samānā ‘samaṇāmhā’ti paṭijānātha. Tesaṃ vo, bhikkhave, evaṃsamaññānaṃ sataṃ evaṃpaṭiññānaṃ sataṃ – ‘yā samaṇasāmīcippaṭipadā taṃ paṭipajjissāma; evaṃ no ayaṃ amhākaṃ samaññā ca saccā bhavissati paṭiññā ca bhūtā; yesañca mayaṃ cīvarapiṇḍapātasenāsanagilānappaccayabhesajjaparikkhāraṃ paribhuñjāma, tesaṃ te kārā amhesu mahapphalā bhavissanti mahānisaṃsā, amhākañcevāyaṃ pabbajjā avañjhā bhavissati saphalā saudrayā’ti. Evañhi vo, bhikkhave, sikkhitabbaṃ.
੪੩੬. ‘‘ਕਥਞ੍ਚ, ਭਿਕ੍ਖવੇ, ਭਿਕ੍ਖੁ ਨ ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ ਹੋਤਿ? ਯਸ੍ਸ ਕਸ੍ਸਚਿ, ਭਿਕ੍ਖવੇ, ਭਿਕ੍ਖੁਨੋ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਅਪ੍ਪਹੀਨਾ ਹੋਤਿ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਅਪ੍ਪਹੀਨੋ ਹੋਤਿ, ਕੋਧਨਸ੍ਸ ਕੋਧੋ ਅਪ੍ਪਹੀਨੋ ਹੋਤਿ, ਉਪਨਾਹਿਸ੍ਸ ਉਪਨਾਹੋ ਅਪ੍ਪਹੀਨੋ ਹੋਤਿ, ਮਕ੍ਖਿਸ੍ਸ ਮਕ੍ਖੋ ਅਪ੍ਪਹੀਨੋ ਹੋਤਿ, ਪਲ਼ਾਸਿਸ੍ਸ ਪਲ਼ਾਸੋ ਅਪ੍ਪਹੀਨੋ ਹੋਤਿ, ਇਸ੍ਸੁਕਿਸ੍ਸ ਇਸ੍ਸਾ ਅਪ੍ਪਹੀਨਾ ਹੋਤਿ, ਮਚ੍ਛਰਿਸ੍ਸ ਮਚ੍ਛਰਿਯਂ ਅਪ੍ਪਹੀਨਂ ਹੋਤਿ , ਸਠਸ੍ਸ ਸਾਠੇਯ੍ਯਂ ਅਪ੍ਪਹੀਨਂ ਹੋਤਿ, ਮਾਯਾવਿਸ੍ਸ ਮਾਯਾ ਅਪ੍ਪਹੀਨਾ ਹੋਤਿ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਅਪ੍ਪਹੀਨਾ ਹੋਤਿ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਅਪ੍ਪਹੀਨਾ ਹੋਤਿ – ਇਮੇਸਂ ਖੋ ਅਹਂ, ਭਿਕ੍ਖવੇ, ਸਮਣਮਲਾਨਂ ਸਮਣਦੋਸਾਨਂ ਸਮਣਕਸਟਾਨਂ ਆਪਾਯਿਕਾਨਂ ਠਾਨਾਨਂ ਦੁਗ੍ਗਤਿવੇਦਨਿਯਾਨਂ ਅਪ੍ਪਹਾਨਾ ‘ਨ ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ વਦਾਮਿ। ਸੇਯ੍ਯਥਾਪਿ, ਭਿਕ੍ਖવੇ, ਮਤਜਂ ਨਾਮ ਆવੁਧਜਾਤਂ ਉਭਤੋਧਾਰਂ ਪੀਤਨਿਸਿਤਂ। ਤਦਸ੍ਸ ਸਙ੍ਘਾਟਿਯਾ ਸਮ੍ਪਾਰੁਤਂ ਸਮ੍ਪਲਿવੇਠਿਤਂ। ਤਥੂਪਮਾਹਂ, ਭਿਕ੍ਖવੇ, ਇਮਸ੍ਸ ਭਿਕ੍ਖੁਨੋ ਪਬ੍ਬਜ੍ਜਂ વਦਾਮਿ।
436. ‘‘Kathañca, bhikkhave, bhikkhu na samaṇasāmīcippaṭipadaṃ paṭipanno hoti? Yassa kassaci, bhikkhave, bhikkhuno abhijjhālussa abhijjhā appahīnā hoti, byāpannacittassa byāpādo appahīno hoti, kodhanassa kodho appahīno hoti, upanāhissa upanāho appahīno hoti, makkhissa makkho appahīno hoti, paḷāsissa paḷāso appahīno hoti, issukissa issā appahīnā hoti, maccharissa macchariyaṃ appahīnaṃ hoti , saṭhassa sāṭheyyaṃ appahīnaṃ hoti, māyāvissa māyā appahīnā hoti, pāpicchassa pāpikā icchā appahīnā hoti, micchādiṭṭhikassa micchādiṭṭhi appahīnā hoti – imesaṃ kho ahaṃ, bhikkhave, samaṇamalānaṃ samaṇadosānaṃ samaṇakasaṭānaṃ āpāyikānaṃ ṭhānānaṃ duggativedaniyānaṃ appahānā ‘na samaṇasāmīcippaṭipadaṃ paṭipanno’ti vadāmi. Seyyathāpi, bhikkhave, matajaṃ nāma āvudhajātaṃ ubhatodhāraṃ pītanisitaṃ. Tadassa saṅghāṭiyā sampārutaṃ sampaliveṭhitaṃ. Tathūpamāhaṃ, bhikkhave, imassa bhikkhuno pabbajjaṃ vadāmi.
੪੩੭. ‘‘ਨਾਹਂ, ਭਿਕ੍ਖવੇ, ਸਙ੍ਘਾਟਿਕਸ੍ਸ ਸਙ੍ਘਾਟਿਧਾਰਣਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਅਚੇਲਕਸ੍ਸ ਅਚੇਲਕਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਰਜੋਜਲ੍ਲਿਕਸ੍ਸ ਰਜੋਜਲ੍ਲਿਕਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ , ਉਦਕੋਰੋਹਕਸ੍ਸ ਉਦਕੋਰੋਹਣਮਤ੍ਤੇਨ 1 ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਰੁਕ੍ਖਮੂਲਿਕਸ੍ਸ ਰੁਕ੍ਖਮੂਲਿਕਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਅਬ੍ਭੋਕਾਸਿਕਸ੍ਸ ਅਬ੍ਭੋਕਾਸਿਕਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਉਬ੍ਭਟ੍ਠਕਸ੍ਸ ਉਬ੍ਭਟ੍ਠਕਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਪਰਿਯਾਯਭਤ੍ਤਿਕਸ੍ਸ ਪਰਿਯਾਯਭਤ੍ਤਿਕਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਮਨ੍ਤਜ੍ਝਾਯਕਸ੍ਸ ਮਨ੍ਤਜ੍ਝਾਯਕਮਤ੍ਤੇਨ ਸਾਮਞ੍ਞਂ વਦਾਮਿ। ਨਾਹਂ, ਭਿਕ੍ਖવੇ, ਜਟਿਲਕਸ੍ਸ ਜਟਾਧਾਰਣਮਤ੍ਤੇਨ ਸਾਮਞ੍ਞਂ વਦਾਮਿ।
437. ‘‘Nāhaṃ, bhikkhave, saṅghāṭikassa saṅghāṭidhāraṇamattena sāmaññaṃ vadāmi. Nāhaṃ, bhikkhave, acelakassa acelakamattena sāmaññaṃ vadāmi. Nāhaṃ, bhikkhave, rajojallikassa rajojallikamattena sāmaññaṃ vadāmi. Nāhaṃ, bhikkhave , udakorohakassa udakorohaṇamattena 2 sāmaññaṃ vadāmi. Nāhaṃ, bhikkhave, rukkhamūlikassa rukkhamūlikamattena sāmaññaṃ vadāmi. Nāhaṃ, bhikkhave, abbhokāsikassa abbhokāsikamattena sāmaññaṃ vadāmi. Nāhaṃ, bhikkhave, ubbhaṭṭhakassa ubbhaṭṭhakamattena sāmaññaṃ vadāmi. Nāhaṃ, bhikkhave, pariyāyabhattikassa pariyāyabhattikamattena sāmaññaṃ vadāmi. Nāhaṃ, bhikkhave, mantajjhāyakassa mantajjhāyakamattena sāmaññaṃ vadāmi. Nāhaṃ, bhikkhave, jaṭilakassa jaṭādhāraṇamattena sāmaññaṃ vadāmi.
‘‘ਸਙ੍ਘਾਟਿਕਸ੍ਸ ਚੇ, ਭਿਕ੍ਖવੇ, ਸਙ੍ਘਾਟਿਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯੇਥ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯੇਥ, ਕੋਧਨਸ੍ਸ ਕੋਧੋ ਪਹੀਯੇਥ, ਉਪਨਾਹਿਸ੍ਸ ਉਪਨਾਹੋ ਪਹੀਯੇਥ, ਮਕ੍ਖਿਸ੍ਸ ਮਕ੍ਖੋ ਪਹੀਯੇਥ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਯੇਥ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਯੇਥ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਯੇਥ, ਸਠਸ੍ਸ ਸਾਠੇਯ੍ਯਂ ਪਹੀਯੇਥ, ਮਾਯਾવਿਸ੍ਸ ਮਾਯਾ ਪਹੀਯੇਥ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯੇਥ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯੇਥ, ਤਮੇਨਂ ਮਿਤ੍ਤਾਮਚ੍ਚਾ ਞਾਤਿਸਾਲੋਹਿਤਾ ਜਾਤਮੇવ ਨਂ ਸਙ੍ਘਾਟਿਕਂ ਕਰੇਯ੍ਯੁਂ, ਸਙ੍ਘਾਟਿਕਤ੍ਤਮੇવ 3 ਸਮਾਦਪੇਯ੍ਯੁਂ – ‘ਏਹਿ ਤ੍વਂ, ਭਦ੍ਰਮੁਖ, ਸਙ੍ਘਾਟਿਕੋ ਹੋਹਿ, ਸਙ੍ਘਾਟਿਕਸ੍ਸ ਤੇ ਸਤੋ ਸਙ੍ਘਾਟਿਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯਿਸ੍ਸਤਿ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯਿਸ੍ਸਤਿ, ਕੋਧਨਸ੍ਸ ਕੋਧੋ ਪਹੀਯਿਸ੍ਸਤਿ, ਉਪਨਾਹਿਸ੍ਸ ਉਪਨਾਹੋ ਪਹੀਯਿਸ੍ਸਤਿ, ਮਕ੍ਖਿਸ੍ਸ ਮਕ੍ਖੋ ਪਹੀਯਿਸ੍ਸਤਿ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਯਿਸ੍ਸਤਿ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਯਿਸ੍ਸਤਿ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਯਿਸ੍ਸਤਿ, ਸਠਸ੍ਸ ਸਾਠੇਯ੍ਯਂ ਪਹੀਯਿਸ੍ਸਤਿ, ਮਾਯਾવਿਸ੍ਸ ਮਾਯਾ ਪਹੀਯਿਸ੍ਸਤਿ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯਿਸ੍ਸਤਿ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯਿਸ੍ਸਤੀ’ਤਿ। ਯਸ੍ਮਾ ਚ ਖੋ ਅਹਂ, ਭਿਕ੍ਖવੇ, ਸਙ੍ਘਾਟਿਕਮ੍ਪਿ ਇਧੇਕਚ੍ਚਂ ਪਸ੍ਸਾਮਿ ਅਭਿਜ੍ਝਾਲੁਂ ਬ੍ਯਾਪਨ੍ਨਚਿਤ੍ਤਂ ਕੋਧਨਂ ਉਪਨਾਹਿਂ ਮਕ੍ਖਿਂ ਪਲ਼ਾਸਿਂ ਇਸ੍ਸੁਕਿਂ ਮਚ੍ਛਰਿਂ ਸਠਂ ਮਾਯਾવਿਂ ਪਾਪਿਚ੍ਛਂ ਮਿਚ੍ਛਾਦਿਟ੍ਠਿਕਂ, ਤਸ੍ਮਾ ਨ ਸਙ੍ਘਾਟਿਕਸ੍ਸ ਸਙ੍ਘਾਟਿਧਾਰਣਮਤ੍ਤੇਨ ਸਾਮਞ੍ਞਂ વਦਾਮਿ।
‘‘Saṅghāṭikassa ce, bhikkhave, saṅghāṭidhāraṇamattena abhijjhālussa abhijjhā pahīyetha, byāpannacittassa byāpādo pahīyetha, kodhanassa kodho pahīyetha, upanāhissa upanāho pahīyetha, makkhissa makkho pahīyetha, paḷāsissa paḷāso pahīyetha, issukissa issā pahīyetha, maccharissa macchariyaṃ pahīyetha, saṭhassa sāṭheyyaṃ pahīyetha, māyāvissa māyā pahīyetha, pāpicchassa pāpikā icchā pahīyetha, micchādiṭṭhikassa micchādiṭṭhi pahīyetha, tamenaṃ mittāmaccā ñātisālohitā jātameva naṃ saṅghāṭikaṃ kareyyuṃ, saṅghāṭikattameva 4 samādapeyyuṃ – ‘ehi tvaṃ, bhadramukha, saṅghāṭiko hohi, saṅghāṭikassa te sato saṅghāṭidhāraṇamattena abhijjhālussa abhijjhā pahīyissati, byāpannacittassa byāpādo pahīyissati, kodhanassa kodho pahīyissati, upanāhissa upanāho pahīyissati, makkhissa makkho pahīyissati, paḷāsissa paḷāso pahīyissati, issukissa issā pahīyissati, maccharissa macchariyaṃ pahīyissati, saṭhassa sāṭheyyaṃ pahīyissati, māyāvissa māyā pahīyissati, pāpicchassa pāpikā icchā pahīyissati, micchādiṭṭhikassa micchādiṭṭhi pahīyissatī’ti. Yasmā ca kho ahaṃ, bhikkhave, saṅghāṭikampi idhekaccaṃ passāmi abhijjhāluṃ byāpannacittaṃ kodhanaṃ upanāhiṃ makkhiṃ paḷāsiṃ issukiṃ macchariṃ saṭhaṃ māyāviṃ pāpicchaṃ micchādiṭṭhikaṃ, tasmā na saṅghāṭikassa saṅghāṭidhāraṇamattena sāmaññaṃ vadāmi.
‘‘ਅਚੇਲਕਸ੍ਸ ਚੇ, ਭਿਕ੍ਖવੇ…ਪੇ॰… ਰਜੋਜਲ੍ਲਿਕਸ੍ਸ ਚੇ, ਭਿਕ੍ਖવੇ…ਪੇ॰… ਉਦਕੋਰੋਹਕਸ੍ਸ ਚੇ, ਭਿਕ੍ਖવੇ…ਪੇ॰… ਰੁਕ੍ਖਮੂਲਿਕਸ੍ਸ ਚੇ, ਭਿਕ੍ਖવੇ…ਪੇ॰… ਅਬ੍ਭੋਕਾਸਿਕਸ੍ਸ ਚੇ, ਭਿਕ੍ਖવੇ…ਪੇ॰… ਉਬ੍ਭਟ੍ਠਕਸ੍ਸ ਚੇ, ਭਿਕ੍ਖવੇ…ਪੇ॰… ਪਰਿਯਾਯਭਤ੍ਤਿਕਸ੍ਸ ਚੇ, ਭਿਕ੍ਖવੇ…ਪੇ॰… ਮਨ੍ਤਜ੍ਝਾਯਕਸ੍ਸ ਚੇ, ਭਿਕ੍ਖવੇ…ਪੇ॰… ਜਟਿਲਕਸ੍ਸ ਚੇ, ਭਿਕ੍ਖવੇ, ਜਟਾਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯੇਥ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯੇਥ , ਕੋਧਨਸ੍ਸ ਕੋਧੋ ਪਹੀਯੇਥ, ਉਪਨਾਹਿਸ੍ਸ ਉਪਨਾਹੋ ਪਹੀਯੇਥ, ਮਕ੍ਖਿਸ੍ਸ ਮਕ੍ਖੋ ਪਹੀਯੇਥ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਯੇਥ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਯੇਥ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਯੇਥ, ਸਠਸ੍ਸ ਸਾਠੇਯ੍ਯਂ ਪਹੀਯੇਥ, ਮਾਯਾવਿਸ੍ਸ ਮਾਯਾ ਪਹੀਯੇਥ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯੇਥ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯੇਥ, ਤਮੇਨਂ ਮਿਤ੍ਤਾਮਚ੍ਚਾ ਞਾਤਿਸਾਲੋਹਿਤਾ ਜਾਤਮੇવ ਨਂ ਜਟਿਲਕਂ ਕਰੇਯ੍ਯੁਂ, ਜਟਿਲਕਤ੍ਤਮੇવ 5 ਸਮਾਦਪੇਯ੍ਯੁਂ – ‘ਏਹਿ ਤ੍વਂ, ਭਦ੍ਰਮੁਖ, ਜਟਿਲਕੋ ਹੋਹਿ, ਜਟਿਲਕਸ੍ਸ ਤੇ ਸਤੋ ਜਟਾਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯਿਸ੍ਸਤਿ ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯਿਸ੍ਸਤਿ, ਕੋਧਨਸ੍ਸ ਕੋਧੋ ਪਹੀਯਿਸ੍ਸਤਿ…ਪੇ॰… ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯਿਸ੍ਸਤਿ ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯਿਸ੍ਸਤੀ’ਤਿ। ਯਸ੍ਮਾ ਚ ਖੋ ਅਹਂ, ਭਿਕ੍ਖવੇ, ਜਟਿਲਕਮ੍ਪਿ ਇਧੇਕਚ੍ਚਂ ਪਸ੍ਸਾਮਿ ਅਭਿਜ੍ਝਾਲੁਂ ਬ੍ਯਾਪਨ੍ਨਚਿਤ੍ਤਂ ਕੋਧਨਂ ਉਪਨਾਹਿਂ ਮਕ੍ਖਿਂ ਪਲਾਸਿਂ ਇਸ੍ਸੁਕਿਂ ਮਚ੍ਛਰਿਂ ਸਠਂ ਮਾਯਾવਿਂ ਪਾਪਿਚ੍ਛਂ ਮਿਚ੍ਛਾਦਿਟ੍ਠਿਂ, ਤਸ੍ਮਾ ਨ ਜਟਿਲਕਸ੍ਸ ਜਟਾਧਾਰਣਮਤ੍ਤੇਨ ਸਾਮਞ੍ਞਂ વਦਾਮਿ।
‘‘Acelakassa ce, bhikkhave…pe… rajojallikassa ce, bhikkhave…pe… udakorohakassa ce, bhikkhave…pe… rukkhamūlikassa ce, bhikkhave…pe… abbhokāsikassa ce, bhikkhave…pe… ubbhaṭṭhakassa ce, bhikkhave…pe… pariyāyabhattikassa ce, bhikkhave…pe… mantajjhāyakassa ce, bhikkhave…pe… jaṭilakassa ce, bhikkhave, jaṭādhāraṇamattena abhijjhālussa abhijjhā pahīyetha, byāpannacittassa byāpādo pahīyetha , kodhanassa kodho pahīyetha, upanāhissa upanāho pahīyetha, makkhissa makkho pahīyetha, paḷāsissa paḷāso pahīyetha, issukissa issā pahīyetha, maccharissa macchariyaṃ pahīyetha, saṭhassa sāṭheyyaṃ pahīyetha, māyāvissa māyā pahīyetha, pāpicchassa pāpikā icchā pahīyetha, micchādiṭṭhikassa micchādiṭṭhi pahīyetha, tamenaṃ mittāmaccā ñātisālohitā jātameva naṃ jaṭilakaṃ kareyyuṃ, jaṭilakattameva 6 samādapeyyuṃ – ‘ehi tvaṃ, bhadramukha, jaṭilako hohi, jaṭilakassa te sato jaṭādhāraṇamattena abhijjhālussa abhijjhā pahīyissati byāpannacittassa byāpādo pahīyissati, kodhanassa kodho pahīyissati…pe… pāpicchassa pāpikā icchā pahīyissati micchādiṭṭhikassa micchādiṭṭhi pahīyissatī’ti. Yasmā ca kho ahaṃ, bhikkhave, jaṭilakampi idhekaccaṃ passāmi abhijjhāluṃ byāpannacittaṃ kodhanaṃ upanāhiṃ makkhiṃ palāsiṃ issukiṃ macchariṃ saṭhaṃ māyāviṃ pāpicchaṃ micchādiṭṭhiṃ, tasmā na jaṭilakassa jaṭādhāraṇamattena sāmaññaṃ vadāmi.
੪੩੮. ‘‘ਕਥਞ੍ਚ, ਭਿਕ੍ਖવੇ, ਭਿਕ੍ਖੁ ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ ਹੋਤਿ? ਯਸ੍ਸ ਕਸ੍ਸਚਿ, ਭਿਕ੍ਖવੇ, ਭਿਕ੍ਖੁਨੋ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਨਾ ਹੋਤਿ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਨੋ ਹੋਤਿ, ਕੋਧਨਸ੍ਸ ਕੋਧੋ ਪਹੀਨੋ ਹੋਤਿ, ਉਪਨਾਹਿਸ੍ਸ ਉਪਨਾਹੋ ਪਹੀਨੋ ਹੋਤਿ, ਮਕ੍ਖਿਸ੍ਸ ਮਕ੍ਖੋ ਪਹੀਨੋ ਹੋਤਿ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਨੋ ਹੋਤਿ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਨਾ ਹੋਤਿ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਨਂ ਹੋਤਿ, ਸਠਸ੍ਸ ਸਾਠੇਯ੍ਯਂ ਪਹੀਨਂ ਹੋਤਿ, ਮਾਯਾવਿਸ੍ਸ ਮਾਯਾ ਪਹੀਨਾ ਹੋਤਿ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਨਾ ਹੋਤਿ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਨਾ ਹੋਤਿ – ਇਮੇਸਂ ਖੋ ਅਹਂ, ਭਿਕ੍ਖવੇ, ਸਮਣਮਲਾਨਂ ਸਮਣਦੋਸਾਨਂ ਸਮਣਕਸਟਾਨਂ ਆਪਾਯਿਕਾਨਂ ਠਾਨਾਨਂ ਦੁਗ੍ਗਤਿવੇਦਨਿਯਾਨਂ ਪਹਾਨਾ ‘ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ વਦਾਮਿ। ਸੋ ਸਬ੍ਬੇਹਿ ਇਮੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ વਿਸੁਦ੍ਧਮਤ੍ਤਾਨਂ ਸਮਨੁਪਸ੍ਸਤਿ ( ) 7। ਤਸ੍ਸ ਸਬ੍ਬੇਹਿ ਇਮੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ વਿਸੁਦ੍ਧਮਤ੍ਤਾਨਂ ਸਮਨੁਪਸ੍ਸਤੋ ( ) 8 ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ વੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ।
438. ‘‘Kathañca, bhikkhave, bhikkhu samaṇasāmīcippaṭipadaṃ paṭipanno hoti? Yassa kassaci, bhikkhave, bhikkhuno abhijjhālussa abhijjhā pahīnā hoti, byāpannacittassa byāpādo pahīno hoti, kodhanassa kodho pahīno hoti, upanāhissa upanāho pahīno hoti, makkhissa makkho pahīno hoti, paḷāsissa paḷāso pahīno hoti, issukissa issā pahīnā hoti, maccharissa macchariyaṃ pahīnaṃ hoti, saṭhassa sāṭheyyaṃ pahīnaṃ hoti, māyāvissa māyā pahīnā hoti, pāpicchassa pāpikā icchā pahīnā hoti, micchādiṭṭhikassa micchādiṭṭhi pahīnā hoti – imesaṃ kho ahaṃ, bhikkhave, samaṇamalānaṃ samaṇadosānaṃ samaṇakasaṭānaṃ āpāyikānaṃ ṭhānānaṃ duggativedaniyānaṃ pahānā ‘samaṇasāmīcippaṭipadaṃ paṭipanno’ti vadāmi. So sabbehi imehi pāpakehi akusalehi dhammehi visuddhamattānaṃ samanupassati ( ) 9. Tassa sabbehi imehi pāpakehi akusalehi dhammehi visuddhamattānaṃ samanupassato ( ) 10 pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati.
‘‘ਸੋ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍વਾ વਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ। ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾવਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ વਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅવੇਰੇਨ ਅਬ੍ਯਾਬਜ੍ਝੇਨ ਫਰਿਤ੍વਾ વਿਹਰਤਿ। ਕਰੁਣਾਸਹਗਤੇਨ ਚੇਤਸਾ…ਪੇ॰… ਮੁਦਿਤਾਸਹਗਤੇਨ ਚੇਤਸਾ…ਪੇ॰… ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍વਾ વਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ। ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾવਨ੍ਤਂ ਲੋਕਂ ਉਪੇਕ੍ਖਾਸਹਗਤੇਨ ਚੇਤਸਾ વਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅવੇਰੇਨ ਅਬ੍ਯਾਬਜ੍ਝੇਨ ਫਰਿਤ੍વਾ વਿਹਰਤਿ। ਸੇਯ੍ਯਥਾਪਿ, ਭਿਕ੍ਖવੇ, ਪੋਕ੍ਖਰਣੀ ਅਚ੍ਛੋਦਕਾ ਸਾਤੋਦਕਾ ਸੀਤੋਦਕਾ ਸੇਤਕਾ ਸੁਪਤਿਤ੍ਥਾ ਰਮਣੀਯਾ। ਪੁਰਤ੍ਥਿਮਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ ਘਮ੍ਮਾਭਿਤਤ੍ਤੋ ਘਮ੍ਮਪਰੇਤੋ ਕਿਲਨ੍ਤੋ ਤਸਿਤੋ ਪਿਪਾਸਿਤੋ। ਸੋ ਤਂ ਪੋਕ੍ਖਰਣਿਂ ਆਗਮ੍ਮ વਿਨੇਯ੍ਯ ਉਦਕਪਿਪਾਸਂ વਿਨੇਯ੍ਯ ਘਮ੍ਮਪਰਿਲ਼ਾਹਂ…ਪੇ॰… ਪਚ੍ਛਿਮਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ…ਪੇ॰… ਉਤ੍ਤਰਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ…ਪੇ॰… ਦਕ੍ਖਿਣਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ। ਯਤੋ ਕੁਤੋ ਚੇਪਿ ਨਂ ਪੁਰਿਸੋ ਆਗਚ੍ਛੇਯ੍ਯ ਘਮ੍ਮਾਭਿਤਤ੍ਤੋ ਘਮ੍ਮਪਰੇਤੋ, ਕਿਲਨ੍ਤੋ ਤਸਿਤੋ ਪਿਪਾਸਿਤੋ। ਸੋ ਤਂ ਪੋਕ੍ਖਰਣਿਂ ਆਗਮ੍ਮ વਿਨੇਯ੍ਯ ਉਦਕਪਿਪਾਸਂ, વਿਨੇਯ੍ਯ ਘਮ੍ਮਪਰਿਲ਼ਾਹਂ। ਏવਮੇવ ਖੋ, ਭਿਕ੍ਖવੇ, ਖਤ੍ਤਿਯਕੁਲਾ ਚੇਪਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪવੇਦਿਤਂ ਧਮ੍ਮવਿਨਯਂ ਆਗਮ੍ਮ, ਏવਂ ਮੇਤ੍ਤਂ ਕਰੁਣਂ ਮੁਦਿਤਂ ਉਪੇਕ੍ਖਂ ਭਾવੇਤ੍વਾ ਲਭਤਿ ਅਜ੍ਝਤ੍ਤਂ 11 વੂਪਸਮਂ 12। ਅਜ੍ਝਤ੍ਤਂ વੂਪਸਮਾ ‘ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ વਦਾਮਿ। ਬ੍ਰਾਹ੍ਮਣਕੁਲਾ ਚੇਪਿ…ਪੇ॰… વੇਸ੍ਸਕੁਲਾ ਚੇਪਿ…ਪੇ॰… ਸੁਦ੍ਦਕੁਲਾ ਚੇਪਿ…ਪੇ॰… ਯਸ੍ਮਾ ਕਸ੍ਮਾ ਚੇਪਿ ਕੁਲਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ , ਸੋ ਚ ਤਥਾਗਤਪ੍ਪવੇਦਿਤਂ ਧਮ੍ਮવਿਨਯਂ ਆਗਮ੍ਮ, ਏવਂ ਮੇਤ੍ਤਂ ਕਰੁਣਂ ਮੁਦਿਤਂ ਉਪੇਕ੍ਖਂ ਭਾવੇਤ੍વਾ ਲਭਤਿ ਅਜ੍ਝਤ੍ਤਂ વੂਪਸਮਂ। ਅਜ੍ਝਤ੍ਤਂ વੂਪਸਮਾ ‘ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ વਦਾਮਿ।
‘‘So mettāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā viharati. Karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvā viharati. Seyyathāpi, bhikkhave, pokkharaṇī acchodakā sātodakā sītodakā setakā supatitthā ramaṇīyā. Puratthimāya cepi disāya puriso āgaccheyya ghammābhitatto ghammapareto kilanto tasito pipāsito. So taṃ pokkharaṇiṃ āgamma vineyya udakapipāsaṃ vineyya ghammapariḷāhaṃ…pe… pacchimāya cepi disāya puriso āgaccheyya…pe… uttarāya cepi disāya puriso āgaccheyya…pe… dakkhiṇāya cepi disāya puriso āgaccheyya. Yato kuto cepi naṃ puriso āgaccheyya ghammābhitatto ghammapareto, kilanto tasito pipāsito. So taṃ pokkharaṇiṃ āgamma vineyya udakapipāsaṃ, vineyya ghammapariḷāhaṃ. Evameva kho, bhikkhave, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma, evaṃ mettaṃ karuṇaṃ muditaṃ upekkhaṃ bhāvetvā labhati ajjhattaṃ 13 vūpasamaṃ 14. Ajjhattaṃ vūpasamā ‘samaṇasāmīcippaṭipadaṃ paṭipanno’ti vadāmi. Brāhmaṇakulā cepi…pe… vessakulā cepi…pe… suddakulā cepi…pe… yasmā kasmā cepi kulā agārasmā anagāriyaṃ pabbajito hoti , so ca tathāgatappaveditaṃ dhammavinayaṃ āgamma, evaṃ mettaṃ karuṇaṃ muditaṃ upekkhaṃ bhāvetvā labhati ajjhattaṃ vūpasamaṃ. Ajjhattaṃ vūpasamā ‘samaṇasāmīcippaṭipadaṃ paṭipanno’ti vadāmi.
‘‘ਖਤ੍ਤਿਯਕੁਲਾ ਚੇਪਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ। ਸੋ ਚ ਆਸવਾਨਂ ਖਯਾ ਅਨਾਸવਂ ਚੇਤੋવਿਮੁਤ੍ਤਿਂ ਪਞ੍ਞਾવਿਮੁਤ੍ਤਿਂ ਦਿਟ੍ਠੇવ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍વਾ ਉਪਸਮ੍ਪਜ੍ਜ વਿਹਰਤਿ। ਆਸવਾਨਂ ਖਯਾ ਸਮਣੋ ਹੋਤਿ। ਬ੍ਰਾਹ੍ਮਣਕੁਲਾ ਚੇਪਿ…ਪੇ॰… વੇਸ੍ਸਕੁਲਾ ਚੇਪਿ… ਸੁਦ੍ਦਕੁਲਾ ਚੇਪਿ… ਯਸ੍ਮਾ ਕਸ੍ਮਾ ਚੇਪਿ ਕੁਲਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਆਸવਾਨਂ ਖਯਾ ਅਨਾਸવਂ ਚੇਤੋવਿਮੁਤ੍ਤਿਂ ਪਞ੍ਞਾવਿਮੁਤ੍ਤਿਂ ਦਿਟ੍ਠੇવ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍વਾ ਉਪਸਮ੍ਪਜ੍ਜ વਿਹਰਤਿ। ਆਸવਾਨਂ ਖਯਾ ਸਮਣੋ ਹੋਤੀ’’ਤਿ।
‘‘Khattiyakulā cepi agārasmā anagāriyaṃ pabbajito hoti. So ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Āsavānaṃ khayā samaṇo hoti. Brāhmaṇakulā cepi…pe… vessakulā cepi… suddakulā cepi… yasmā kasmā cepi kulā agārasmā anagāriyaṃ pabbajito hoti, so ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Āsavānaṃ khayā samaṇo hotī’’ti.
ਇਦਮવੋਚ ਭਗવਾ। ਅਤ੍ਤਮਨਾ ਤੇ ਭਿਕ੍ਖੂ ਭਗવਤੋ ਭਾਸਿਤਂ ਅਭਿਨਨ੍ਦੁਨ੍ਤਿ।
Idamavoca bhagavā. Attamanā te bhikkhū bhagavato bhāsitaṃ abhinandunti.
ਚੂਲ਼ਅਸ੍ਸਪੁਰਸੁਤ੍ਤਂ ਨਿਟ੍ਠਿਤਂ ਦਸਮਂ।
Cūḷaassapurasuttaṃ niṭṭhitaṃ dasamaṃ.
ਮਹਾਯਮਕવਗ੍ਗੋ ਨਿਟ੍ਠਿਤੋ ਚਤੁਤ੍ਥੋ।
Mahāyamakavaggo niṭṭhito catuttho.
ਤਸ੍ਸੁਦ੍ਦਾਨਂ –
Tassuddānaṃ –
ਗਿਞ੍ਜਕਸਾਲવਨਂ ਪਰਿਹਰਿਤੁਂ, ਪਞ੍ਞવਤੋ ਪੁਨ ਸਚ੍ਚਕਨਿਸੇਧੋ।
Giñjakasālavanaṃ pariharituṃ, paññavato puna saccakanisedho;
ਮੁਖવਣ੍ਣਪਸੀਦਨਤਾਪਿਨ੍ਦੋ, ਕੇવਟ੍ਟਅਸ੍ਸਪੁਰਜਟਿਲੇਨ॥
Mukhavaṇṇapasīdanatāpindo, kevaṭṭaassapurajaṭilena.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੧੦. ਚੂਲ਼ਅਸ੍ਸਪੁਰਸੁਤ੍ਤવਣ੍ਣਨਾ • 10. Cūḷaassapurasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੧੦. ਚੂਲ਼ਅਸ੍ਸਪੁਰਸੁਤ੍ਤવਣ੍ਣਨਾ • 10. Cūḷaassapurasuttavaṇṇanā
