| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
10. சூளஅஸ்ஸபுரஸுத்தவண்ணனா
10. Cūḷaassapurasuttavaṇṇanā
435. புரிமஸதி³ஸமேவாதி ‘‘அஸ்ஸபுரவாஸீனங் பி⁴க்கு²ஸங்கே⁴ கா³ரவப³ஹுமானங் நிபச்சகாரஞ்ச தி³ஸ்வா பி⁴க்கூ² பிண்ட³பாதாபசாயனே நியோஜெந்தோ இத³ங் ஸுத்தங் அபா⁴ஸீ’’தி புரிமஸுத்தே மஹாஅஸ்ஸபுரே (ம॰ நி॰ அட்ட²॰ 2.415) வுத்தஸதி³ஸமேவ. ஸமணானங் அனுச்ச²விகாதி ஸமணானங் ஸமணபா⁴வஸ்ஸ அனுச்ச²விகா பதிரூபா. ஸமணானங் அனுலோமப்படிபதா³தி ஸமணானங் ஸாமஞ்ஞஸங்கா²தஸ்ஸ அரியமக்³க³ஸ்ஸ அனுகூலப்படிபதா³.
435.Purimasadisamevāti ‘‘assapuravāsīnaṃ bhikkhusaṅghe gāravabahumānaṃ nipaccakārañca disvā bhikkhū piṇḍapātāpacāyane niyojento idaṃ suttaṃ abhāsī’’ti purimasutte mahāassapure (ma. ni. aṭṭha. 2.415) vuttasadisameva. Samaṇānaṃ anucchavikāti samaṇānaṃ samaṇabhāvassa anucchavikā patirūpā. Samaṇānaṃ anulomappaṭipadāti samaṇānaṃ sāmaññasaṅkhātassa ariyamaggassa anukūlappaṭipadā.
436. ஏதே த⁴ம்மாதி ஏதே பாளியங் ஆக³தா அபி⁴ஜ்ஜா²ப்³யாபாதா³த³யோ பாபத⁴ம்மா. உப்பஜ்ஜமானாதி உப்பஜ்ஜமானா ஏவ, பகே³வ ஸந்தானே பா⁴விதா. மலினேதி மலவந்தே கிலிட்டே². மலக்³க³ஹிதேதி க³ஹிதமலே ஸஞ்ஜாதமலே. ஸமணமலாதி ஸமணானங் ஸமணபா⁴வஸ்ஸ மலா. து³ஸ்ஸந்தீதி விபஜ்ஜந்தி வினஸ்ஸந்தி. ஸமணதோ³ஸாதி ஸமணானங் ஸமணபா⁴வதூ³ஸனா. கஸடேதி அஸாரே. நிரோஜேதி நித்தேஜே. அயதோ ஸுக²தோ அபேதாதி அபாயா, நிரயாத³யோ, தங் ப²லங் அரஹந்தி, தங் பயோஜனங் வா ஏதேஸந்தி ஆபாயிகா. டா²னானி அபி⁴ஜ்ஜா²த³யோ. தேனாஹ ‘‘அபாயே’’திஆதி³. காரணபா⁴வேன து³க்³க³திபரியாபன்னாய வேத³னாய ஹிதானீதி து³க்³க³திவேத³னியானி. தேன வுத்தங் ‘‘து³க்³க³தியங் விபாகவேத³னாய பச்சயான’’ந்தி. திகி²ணங் அயந்தி வேகந்தகஸதி³ஸங் ஸாரஅயங். அயேனாதி அயோக⁴ங்ஸகேன. கோஞ்சஸகுணானங் கிர குச்சி²யங் நிவுத்த²ங் யங் கிஞ்சி க²ரங் திகி²ணஞ்ச ஹோதி. ததா² ஹி தேஸங் வச்சங் அட்டி²ம்பி பாஸாணம்பி விலீயாபேதி. தேன வுத்தங் ‘‘கோஞ்சஸகுணே கா²தா³பெந்தீ’’தி. தங் கிர அயசுண்ணங் அக்³கி³னாபி கிச்சே²ன த³ய்ஹதி, பே⁴ஸஜ்ஜப³லேன பன ஸுகே²ன த³ய்ஹெய்ய. தேன வுத்தங் ‘‘ஸுஸிக்கி²தா ச நங் அயகாரா ப³ஹுஹத்த²கம்மமூலங் லபி⁴த்வா கரொந்தீ’’திஆதி³. அதிதிகி²ணங் ஹோதி, அஞ்ஞதரங் அயோப³ந்த⁴னங் பெ²க்³கு³த³ண்ட³ங் விய ஸுகே²னேவ சி²ந்த³ந்தி. ஸஸபி³ளாரசம்மேஹி ஸங்க⁴டிதட்டே²ன ஸங்கா⁴டீதி வுச்சதி ஆவுத⁴பரிச்ச²தோ³தி ஆஹ ‘‘ஸங்கா⁴டியாதி கோஸியா’’தி. பரியோனத்³த⁴ந்தி பரிதோ ஓனத்³த⁴ங் சா²தி³தங். ஸமந்ததோ வேடி²தந்தி ஸப்³ப³ஸோ பிஹிதங்.
436.Ete dhammāti ete pāḷiyaṃ āgatā abhijjhābyāpādādayo pāpadhammā. Uppajjamānāti uppajjamānā eva, pageva santāne bhāvitā. Malineti malavante kiliṭṭhe. Malaggahiteti gahitamale sañjātamale. Samaṇamalāti samaṇānaṃ samaṇabhāvassa malā. Dussantīti vipajjanti vinassanti. Samaṇadosāti samaṇānaṃ samaṇabhāvadūsanā. Kasaṭeti asāre. Nirojeti nitteje. Ayato sukhato apetāti apāyā, nirayādayo, taṃ phalaṃ arahanti, taṃ payojanaṃ vā etesanti āpāyikā. Ṭhānāni abhijjhādayo. Tenāha ‘‘apāye’’tiādi. Kāraṇabhāvena duggatipariyāpannāya vedanāya hitānīti duggativedaniyāni. Tena vuttaṃ ‘‘duggatiyaṃ vipākavedanāya paccayāna’’nti. Tikhiṇaṃ ayanti vekantakasadisaṃ sāraayaṃ. Ayenāti ayoghaṃsakena. Koñcasakuṇānaṃ kira kucchiyaṃ nivutthaṃ yaṃ kiñci kharaṃ tikhiṇañca hoti. Tathā hi tesaṃ vaccaṃ aṭṭhimpi pāsāṇampi vilīyāpeti. Tena vuttaṃ ‘‘koñcasakuṇe khādāpentī’’ti. Taṃ kira ayacuṇṇaṃ aggināpi kicchena dayhati, bhesajjabalena pana sukhena dayheyya. Tena vuttaṃ ‘‘susikkhitā ca naṃ ayakārā bahuhatthakammamūlaṃ labhitvā karontī’’tiādi. Atitikhiṇaṃ hoti, aññataraṃ ayobandhanaṃ pheggudaṇḍaṃ viya sukheneva chindanti. Sasabiḷāracammehi saṅghaṭitaṭṭhena saṅghāṭīti vuccati āvudhaparicchadoti āha ‘‘saṅghāṭiyāti kosiyā’’ti. Pariyonaddhanti parito onaddhaṃ chāditaṃ. Samantato veṭhitanti sabbaso pihitaṃ.
437. ரஜோதி ஆக³ந்துகரஜோ. ஜல்லந்தி ஸரீரே உட்டா²னகலோணாதி³மலங். ரஜோஜல்லஞ்ச வதஸமாதா³னவஸேன அனபனீதங் ஏதஸ்ஸ அத்தீ²தி ரஜோஜல்லிகோ, தஸ்ஸ. தேனாஹ ‘‘ரஜோஜல்லதா⁴ரினோ’’தி. உத³கங் ஓரோஹந்தஸ்ஸாதிஆதீ³னமத்தோ² மஹாஸீஹனாத³ஸுத்தவண்ணனாயங் வுத்தோயேவ. ஸப்³ப³மேதந்திஆதீ³ஸு ஸப்³ப³ஸோபி வதஸமாதா³னவஸேனாதி அதி⁴ப்பாயோ. யஸ்மா ஸப்³ப³மேதங் பா³ஹிரஸமயவஸேனேவ கதி²தங், தஸ்மா ஸங்கா⁴டிகஸ்ஸாதி பிலோதிகக²ண்டே³ஹி ஸங்க⁴டிதத்தா ‘‘ஸங்கா⁴டீ’’தி லத்³த⁴னாமவத்த²தா⁴ரினோதி அத்தோ². ததா² ஹி பாளியங் ‘‘ஸங்கா⁴டிகஸ்ஸ’’இச்சேவ வுத்தங், ந ‘‘பி⁴க்கு²னோ’’தி. தேனாஹ ‘‘இமஸ்மிங் ஹீ’’திஆதி³. கஸ்மா பனெத்த² ப⁴க³வதா ஸங்கா⁴டிகத்தாதீ³னியேவ வதஸமாதா³னானி படிக்கி²த்தானீதி? நயத³ஸ்ஸனமேதங் அஞ்ஞேஸம்பி பஞ்சாதபமூக³வதாதீ³னங் தப்படிக்கே²பேனேவ பஸித்³தி⁴தோ. அபரே பன ப⁴ணந்தி – ‘‘நாஹங், பி⁴க்க²வே, ஸங்கா⁴டிகஸ்ஸ ஸங்கா⁴டிதா⁴ரணமத்தேன ஸாமஞ்ஞங் வதா³மீ’’தி வுத்தே தத்த² நிஸின்னோ கோசி தித்த²ந்தரலத்³தி⁴கோ அசேலகத்தங் நு கோ² கத²ந்தி சிந்தேஸி, அபரே ரஜோஜல்லகத்தங் நு கோ² கத²ந்தி, ஏவங் தங் தங் சிந்தெந்தானங் அஜ்ஜா²ஸயவஸேன ப⁴க³வா இமானேவ வதஸமாதா³னானி இத⁴ படிக்கி²பீதி. ஸங்கா⁴டிகந்தி நிவாஸனபாருபனவஸேன ஸங்கா⁴டிவந்தங். தேனாஹ ‘‘ஸங்கா⁴டிகங் வத்த²’’ந்திஆதி³. அத்தனோ ருசியா மித்தாத³யோ ஸங்கா⁴டிகங் கரெய்யுங், பச்சா² விஞ்ஞுதங் பத்தகாலே ஸங்கா⁴டிகத்தே ஸமாத³பெய்யுங்.
437.Rajoti āgantukarajo. Jallanti sarīre uṭṭhānakaloṇādimalaṃ. Rajojallañca vatasamādānavasena anapanītaṃ etassa atthīti rajojalliko, tassa. Tenāha ‘‘rajojalladhārino’’ti. Udakaṃ orohantassātiādīnamattho mahāsīhanādasuttavaṇṇanāyaṃ vuttoyeva. Sabbametantiādīsu sabbasopi vatasamādānavasenāti adhippāyo. Yasmā sabbametaṃ bāhirasamayavaseneva kathitaṃ, tasmā saṅghāṭikassāti pilotikakhaṇḍehi saṅghaṭitattā ‘‘saṅghāṭī’’ti laddhanāmavatthadhārinoti attho. Tathā hi pāḷiyaṃ ‘‘saṅghāṭikassa’’icceva vuttaṃ, na ‘‘bhikkhuno’’ti. Tenāha ‘‘imasmiṃ hī’’tiādi. Kasmā panettha bhagavatā saṅghāṭikattādīniyeva vatasamādānāni paṭikkhittānīti? Nayadassanametaṃ aññesampi pañcātapamūgavatādīnaṃ tappaṭikkhepeneva pasiddhito. Apare pana bhaṇanti – ‘‘nāhaṃ, bhikkhave, saṅghāṭikassa saṅghāṭidhāraṇamattena sāmaññaṃ vadāmī’’ti vutte tattha nisinno koci titthantaraladdhiko acelakattaṃ nu kho kathanti cintesi, apare rajojallakattaṃ nu kho kathanti, evaṃ taṃ taṃ cintentānaṃ ajjhāsayavasena bhagavā imāneva vatasamādānāni idha paṭikkhipīti. Saṅghāṭikanti nivāsanapārupanavasena saṅghāṭivantaṃ. Tenāha ‘‘saṅghāṭikaṃ vattha’’ntiādi. Attano ruciyā mittādayo saṅghāṭikaṃ kareyyuṃ, pacchā viññutaṃ pattakāle saṅghāṭikatte samādapeyyuṃ.
438. அத்தானங் விஸுஜ்ஜ²ந்தங் பஸ்ஸதி அபி⁴ஜ்ஜா²தீ³னங் ஸமுதா³சாராபா⁴வதோ. மக்³கே³ன அஸமுச்சி²ன்னத்தா விஸுத்³தோ⁴தி பன ந வத்தப்³போ³. பாமோஜ்ஜந்தி தருணபீதிமாஹ. தஸ்ஸ ஹி அத்தனோ ஸம்மாபடிபத்தியா கிலேஸானங் விக்க²ம்பி⁴தத்தா சித்தஸ்ஸ விஸுத்³த⁴தங் பஸ்ஸந்தஸ்ஸ பாமோஜ்ஜங் ஜாயதி, தங் துட்டா²காரங். தேனாஹ ‘‘துட்டா²காரோ’’தி. பீதீதி பஸ்ஸத்³தி⁴ஆவஹா ப³லவபீதி. நாமகாயோ பஸ்ஸம்ப⁴தீதி இமினா உப⁴யம்பி பஸ்ஸத்³தி⁴ங் வத³தி. வேதி³யதீதி அனுப⁴வதி விந்த³தி. இதா³னி தேன நீவரணேஹி சித்தஸ்ஸ விஸோத⁴னத்தங் லத்³த⁴ந்தி ஆஹ ‘‘அப்பனாப்பத்தங் விய ஹோதீ’’தி. அஞ்ஞத்த² உட்டி²தா அஞ்ஞங் டா²னங் உபக³தாதி எத்தகேன உபமாபா⁴வேன உச்சனீசதாஸாமஞ்ஞேன ஹெட்டா² அஸத்³த⁴ம்மானங் படிபக்க²வஸேன தே³ஸனாய பரியோஸாபிதத்தா வுத்தங் ‘‘யதா²னுஸந்தி⁴னா’’தி. மஹாஸீஹனாத³ஸுத்தே மக்³கோ³ பொக்க²ரணியா உபமிதோ ‘‘ஸெய்யதா²பி, ஸாரிபுத்த, பொக்க²ரணீ’’திஆதி³ங் (ம॰ நி॰ 1.154) ஆரபி⁴த்வா உபமாஸங்ஸந்த³னே ‘‘ததா²யங் புக்³க³லோ படிபன்னோ, ததா² ச இரியதி, தஞ்ச மக்³க³ங் ஸமாருள்ஹோ, யதா² ஆஸவானங் க²யா’’தி (ம॰ நி॰ 1.154) வுத்தத்தா. யதா² ஹி புரத்தி²மாதி³தி³ஸாஹி ஆக³தா புரிஸா தங் பொக்க²ரணிங் ஆக³ம்ம விஸுத்³த⁴ரூபகாயா விக³தபரிளாஹா ச ஹொந்தி, ஏவங் க²த்தியாதி³குலதோ ஆக³தா ததா²க³தப்பவேதி³தங் த⁴ம்மவினயங் ஸாஸனங் ஆக³ம்ம விஸுத்³த⁴னாமகாயா விக³தகிலேஸபரிளாஹா ச ஹொந்தி. தஸ்மா ஸப்³ப³கிலேஸானங் ஸமிதத்தா பரமத்த²ஸமணோ ஹோதீதி. ஸேஸங் ஸுவிஞ்ஞெய்யமேவ.
438.Attānaṃ visujjhantaṃ passati abhijjhādīnaṃ samudācārābhāvato. Maggena asamucchinnattā visuddhoti pana na vattabbo. Pāmojjanti taruṇapītimāha. Tassa hi attano sammāpaṭipattiyā kilesānaṃ vikkhambhitattā cittassa visuddhataṃ passantassa pāmojjaṃ jāyati, taṃ tuṭṭhākāraṃ. Tenāha ‘‘tuṭṭhākāro’’ti. Pītīti passaddhiāvahā balavapīti. Nāmakāyo passambhatīti iminā ubhayampi passaddhiṃ vadati. Vediyatīti anubhavati vindati. Idāni tena nīvaraṇehi cittassa visodhanattaṃ laddhanti āha ‘‘appanāppattaṃ viya hotī’’ti. Aññattha uṭṭhitā aññaṃ ṭhānaṃ upagatāti ettakena upamābhāvena uccanīcatāsāmaññena heṭṭhā asaddhammānaṃ paṭipakkhavasena desanāya pariyosāpitattā vuttaṃ ‘‘yathānusandhinā’’ti. Mahāsīhanādasutte maggo pokkharaṇiyā upamito ‘‘seyyathāpi, sāriputta, pokkharaṇī’’tiādiṃ (ma. ni. 1.154) ārabhitvā upamāsaṃsandane ‘‘tathāyaṃ puggalo paṭipanno, tathā ca iriyati, tañca maggaṃ samāruḷho, yathā āsavānaṃ khayā’’ti (ma. ni. 1.154) vuttattā. Yathā hi puratthimādidisāhi āgatā purisā taṃ pokkharaṇiṃ āgamma visuddharūpakāyā vigatapariḷāhā ca honti, evaṃ khattiyādikulato āgatā tathāgatappaveditaṃ dhammavinayaṃ sāsanaṃ āgamma visuddhanāmakāyā vigatakilesapariḷāhā ca honti. Tasmā sabbakilesānaṃ samitattā paramatthasamaṇo hotīti. Sesaṃ suviññeyyameva.
சூளஅஸ்ஸபுரஸுத்தவண்ணனாய லீனத்த²ப்பகாஸனா ஸமத்தா.
Cūḷaassapurasuttavaṇṇanāya līnatthappakāsanā samattā.
நிட்டி²தா ச மஹாயமகவக்³க³வண்ணனா.
Niṭṭhitā ca mahāyamakavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. சூளஅஸ்ஸபுரஸுத்தங் • 10. Cūḷaassapurasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. சூளஅஸ்ஸபுரஸுத்தவண்ணனா • 10. Cūḷaassapurasuttavaṇṇanā
