| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
১০. চূল়অস্সপুরসুত্তৰণ্ণনা
10. Cūḷaassapurasuttavaṇṇanā
৪৩৫. পুরিমসদিসমেৰাতি ‘‘অস্সপুরৰাসীনং ভিক্খুসঙ্ঘে গারৰবহুমানং নিপচ্চকারঞ্চ দিস্ৰা ভিক্খূ পিণ্ডপাতাপচাযনে নিযোজেন্তো ইদং সুত্তং অভাসী’’তি পুরিমসুত্তে মহাঅস্সপুরে (ম॰ নি॰ অট্ঠ॰ ২.৪১৫) ৰুত্তসদিসমেৰ। সমণানং অনুচ্ছৰিকাতি সমণানং সমণভাৰস্স অনুচ্ছৰিকা পতিরূপা। সমণানং অনুলোমপ্পটিপদাতি সমণানং সামঞ্ঞসঙ্খাতস্স অরিযমগ্গস্স অনুকূলপ্পটিপদা।
435.Purimasadisamevāti ‘‘assapuravāsīnaṃ bhikkhusaṅghe gāravabahumānaṃ nipaccakārañca disvā bhikkhū piṇḍapātāpacāyane niyojento idaṃ suttaṃ abhāsī’’ti purimasutte mahāassapure (ma. ni. aṭṭha. 2.415) vuttasadisameva. Samaṇānaṃ anucchavikāti samaṇānaṃ samaṇabhāvassa anucchavikā patirūpā. Samaṇānaṃ anulomappaṭipadāti samaṇānaṃ sāmaññasaṅkhātassa ariyamaggassa anukūlappaṭipadā.
৪৩৬. এতে ধম্মাতি এতে পাল়িযং আগতা অভিজ্ঝাব্যাপাদাদযো পাপধম্মা। উপ্পজ্জমানাতি উপ্পজ্জমানা এৰ, পগেৰ সন্তানে ভাৰিতা। মলিনেতি মলৰন্তে কিলিট্ঠে। মলগ্গহিতেতি গহিতমলে সঞ্জাতমলে। সমণমলাতি সমণানং সমণভাৰস্স মলা। দুস্সন্তীতি ৰিপজ্জন্তি ৰিনস্সন্তি। সমণদোসাতি সমণানং সমণভাৰদূসনা। কসটেতি অসারে। নিরোজেতি নিত্তেজে। অযতো সুখতো অপেতাতি অপাযা, নিরযাদযো, তং ফলং অরহন্তি, তং পযোজনং ৰা এতেসন্তি আপাযিকা। ঠানানি অভিজ্ঝাদযো। তেনাহ ‘‘অপাযে’’তিআদি। কারণভাৰেন দুগ্গতিপরিযাপন্নায ৰেদনায হিতানীতি দুগ্গতিৰেদনিযানি। তেন ৰুত্তং ‘‘দুগ্গতিযং ৰিপাকৰেদনায পচ্চযান’’ন্তি। তিখিণং অযন্তি ৰেকন্তকসদিসং সারঅযং। অযেনাতি অযোঘংসকেন। কোঞ্চসকুণানং কির কুচ্ছিযং নিৰুত্থং যং কিঞ্চি খরং তিখিণঞ্চ হোতি। তথা হি তেসং ৰচ্চং অট্ঠিম্পি পাসাণম্পি ৰিলীযাপেতি। তেন ৰুত্তং ‘‘কোঞ্চসকুণে খাদাপেন্তী’’তি। তং কির অযচুণ্ণং অগ্গিনাপি কিচ্ছেন দয্হতি, ভেসজ্জবলেন পন সুখেন দয্হেয্য। তেন ৰুত্তং ‘‘সুসিক্খিতা চ নং অযকারা বহুহত্থকম্মমূলং লভিত্ৰা করোন্তী’’তিআদি। অতিতিখিণং হোতি, অঞ্ঞতরং অযোবন্ধনং ফেগ্গুদণ্ডং ৰিয সুখেনেৰ ছিন্দন্তি। সসবিল়ারচম্মেহি সঙ্ঘটিতট্ঠেন সঙ্ঘাটীতি ৰুচ্চতি আৰুধপরিচ্ছদোতি আহ ‘‘সঙ্ঘাটিযাতি কোসিযা’’তি। পরিযোনদ্ধন্তি পরিতো ওনদ্ধং ছাদিতং। সমন্ততো ৰেঠিতন্তি সব্বসো পিহিতং।
436.Ete dhammāti ete pāḷiyaṃ āgatā abhijjhābyāpādādayo pāpadhammā. Uppajjamānāti uppajjamānā eva, pageva santāne bhāvitā. Malineti malavante kiliṭṭhe. Malaggahiteti gahitamale sañjātamale. Samaṇamalāti samaṇānaṃ samaṇabhāvassa malā. Dussantīti vipajjanti vinassanti. Samaṇadosāti samaṇānaṃ samaṇabhāvadūsanā. Kasaṭeti asāre. Nirojeti nitteje. Ayato sukhato apetāti apāyā, nirayādayo, taṃ phalaṃ arahanti, taṃ payojanaṃ vā etesanti āpāyikā. Ṭhānāni abhijjhādayo. Tenāha ‘‘apāye’’tiādi. Kāraṇabhāvena duggatipariyāpannāya vedanāya hitānīti duggativedaniyāni. Tena vuttaṃ ‘‘duggatiyaṃ vipākavedanāya paccayāna’’nti. Tikhiṇaṃ ayanti vekantakasadisaṃ sāraayaṃ. Ayenāti ayoghaṃsakena. Koñcasakuṇānaṃ kira kucchiyaṃ nivutthaṃ yaṃ kiñci kharaṃ tikhiṇañca hoti. Tathā hi tesaṃ vaccaṃ aṭṭhimpi pāsāṇampi vilīyāpeti. Tena vuttaṃ ‘‘koñcasakuṇe khādāpentī’’ti. Taṃ kira ayacuṇṇaṃ aggināpi kicchena dayhati, bhesajjabalena pana sukhena dayheyya. Tena vuttaṃ ‘‘susikkhitā ca naṃ ayakārā bahuhatthakammamūlaṃ labhitvā karontī’’tiādi. Atitikhiṇaṃ hoti, aññataraṃ ayobandhanaṃ pheggudaṇḍaṃ viya sukheneva chindanti. Sasabiḷāracammehi saṅghaṭitaṭṭhena saṅghāṭīti vuccati āvudhaparicchadoti āha ‘‘saṅghāṭiyāti kosiyā’’ti. Pariyonaddhanti parito onaddhaṃ chāditaṃ. Samantato veṭhitanti sabbaso pihitaṃ.
৪৩৭. রজোতি আগন্তুকরজো। জল্লন্তি সরীরে উট্ঠানকলোণাদিমলং। রজোজল্লঞ্চ ৰতসমাদানৰসেন অনপনীতং এতস্স অত্থীতি রজোজল্লিকো, তস্স। তেনাহ ‘‘রজোজল্লধারিনো’’তি। উদকং ওরোহন্তস্সাতিআদীনমত্থো মহাসীহনাদসুত্তৰণ্ণনাযং ৰুত্তোযেৰ। সব্বমেতন্তিআদীসু সব্বসোপি ৰতসমাদানৰসেনাতি অধিপ্পাযো। যস্মা সব্বমেতং বাহিরসমযৰসেনেৰ কথিতং, তস্মা সঙ্ঘাটিকস্সাতি পিলোতিকখণ্ডেহি সঙ্ঘটিতত্তা ‘‘সঙ্ঘাটী’’তি লদ্ধনামৰত্থধারিনোতি অত্থো। তথা হি পাল়িযং ‘‘সঙ্ঘাটিকস্স’’ইচ্চেৰ ৰুত্তং, ন ‘‘ভিক্খুনো’’তি। তেনাহ ‘‘ইমস্মিং হী’’তিআদি। কস্মা পনেত্থ ভগৰতা সঙ্ঘাটিকত্তাদীনিযেৰ ৰতসমাদানানি পটিক্খিত্তানীতি? নযদস্সনমেতং অঞ্ঞেসম্পি পঞ্চাতপমূগৰতাদীনং তপ্পটিক্খেপেনেৰ পসিদ্ধিতো। অপরে পন ভণন্তি – ‘‘নাহং, ভিক্খৰে, সঙ্ঘাটিকস্স সঙ্ঘাটিধারণমত্তেন সামঞ্ঞং ৰদামী’’তি ৰুত্তে তত্থ নিসিন্নো কোচি তিত্থন্তরলদ্ধিকো অচেলকত্তং নু খো কথন্তি চিন্তেসি, অপরে রজোজল্লকত্তং নু খো কথন্তি, এৰং তং তং চিন্তেন্তানং অজ্ঝাসযৰসেন ভগৰা ইমানেৰ ৰতসমাদানানি ইধ পটিক্খিপীতি। সঙ্ঘাটিকন্তি নিৰাসনপারুপনৰসেন সঙ্ঘাটিৰন্তং। তেনাহ ‘‘সঙ্ঘাটিকং ৰত্থ’’ন্তিআদি। অত্তনো রুচিযা মিত্তাদযো সঙ্ঘাটিকং করেয্যুং, পচ্ছা ৰিঞ্ঞুতং পত্তকালে সঙ্ঘাটিকত্তে সমাদপেয্যুং।
437.Rajoti āgantukarajo. Jallanti sarīre uṭṭhānakaloṇādimalaṃ. Rajojallañca vatasamādānavasena anapanītaṃ etassa atthīti rajojalliko, tassa. Tenāha ‘‘rajojalladhārino’’ti. Udakaṃ orohantassātiādīnamattho mahāsīhanādasuttavaṇṇanāyaṃ vuttoyeva. Sabbametantiādīsu sabbasopi vatasamādānavasenāti adhippāyo. Yasmā sabbametaṃ bāhirasamayavaseneva kathitaṃ, tasmā saṅghāṭikassāti pilotikakhaṇḍehi saṅghaṭitattā ‘‘saṅghāṭī’’ti laddhanāmavatthadhārinoti attho. Tathā hi pāḷiyaṃ ‘‘saṅghāṭikassa’’icceva vuttaṃ, na ‘‘bhikkhuno’’ti. Tenāha ‘‘imasmiṃ hī’’tiādi. Kasmā panettha bhagavatā saṅghāṭikattādīniyeva vatasamādānāni paṭikkhittānīti? Nayadassanametaṃ aññesampi pañcātapamūgavatādīnaṃ tappaṭikkhepeneva pasiddhito. Apare pana bhaṇanti – ‘‘nāhaṃ, bhikkhave, saṅghāṭikassa saṅghāṭidhāraṇamattena sāmaññaṃ vadāmī’’ti vutte tattha nisinno koci titthantaraladdhiko acelakattaṃ nu kho kathanti cintesi, apare rajojallakattaṃ nu kho kathanti, evaṃ taṃ taṃ cintentānaṃ ajjhāsayavasena bhagavā imāneva vatasamādānāni idha paṭikkhipīti. Saṅghāṭikanti nivāsanapārupanavasena saṅghāṭivantaṃ. Tenāha ‘‘saṅghāṭikaṃ vattha’’ntiādi. Attano ruciyā mittādayo saṅghāṭikaṃ kareyyuṃ, pacchā viññutaṃ pattakāle saṅghāṭikatte samādapeyyuṃ.
৪৩৮. অত্তানং ৰিসুজ্ঝন্তং পস্সতি অভিজ্ঝাদীনং সমুদাচারাভাৰতো। মগ্গেন অসমুচ্ছিন্নত্তা ৰিসুদ্ধোতি পন ন ৰত্তব্বো। পামোজ্জন্তি তরুণপীতিমাহ। তস্স হি অত্তনো সম্মাপটিপত্তিযা কিলেসানং ৰিক্খম্ভিতত্তা চিত্তস্স ৰিসুদ্ধতং পস্সন্তস্স পামোজ্জং জাযতি, তং তুট্ঠাকারং। তেনাহ ‘‘তুট্ঠাকারো’’তি। পীতীতি পস্সদ্ধিআৰহা বলৰপীতি। নামকাযো পস্সম্ভতীতি ইমিনা উভযম্পি পস্সদ্ধিং ৰদতি। ৰেদিযতীতি অনুভৰতি ৰিন্দতি। ইদানি তেন নীৰরণেহি চিত্তস্স ৰিসোধনত্তং লদ্ধন্তি আহ ‘‘অপ্পনাপ্পত্তং ৰিয হোতী’’তি। অঞ্ঞত্থ উট্ঠিতা অঞ্ঞং ঠানং উপগতাতি এত্তকেন উপমাভাৰেন উচ্চনীচতাসামঞ্ঞেন হেট্ঠা অসদ্ধম্মানং পটিপক্খৰসেন দেসনায পরিযোসাপিতত্তা ৰুত্তং ‘‘যথানুসন্ধিনা’’তি। মহাসীহনাদসুত্তে মগ্গো পোক্খরণিযা উপমিতো ‘‘সেয্যথাপি, সারিপুত্ত, পোক্খরণী’’তিআদিং (ম॰ নি॰ ১.১৫৪) আরভিত্ৰা উপমাসংসন্দনে ‘‘তথাযং পুগ্গলো পটিপন্নো, তথা চ ইরিযতি, তঞ্চ মগ্গং সমারুল়্হো, যথা আসৰানং খযা’’তি (ম॰ নি॰ ১.১৫৪) ৰুত্তত্তা। যথা হি পুরত্থিমাদিদিসাহি আগতা পুরিসা তং পোক্খরণিং আগম্ম ৰিসুদ্ধরূপকাযা ৰিগতপরিল়াহা চ হোন্তি, এৰং খত্তিযাদিকুলতো আগতা তথাগতপ্পৰেদিতং ধম্মৰিনযং সাসনং আগম্ম ৰিসুদ্ধনামকাযা ৰিগতকিলেসপরিল়াহা চ হোন্তি। তস্মা সব্বকিলেসানং সমিতত্তা পরমত্থসমণো হোতীতি। সেসং সুৰিঞ্ঞেয্যমেৰ।
438.Attānaṃ visujjhantaṃ passati abhijjhādīnaṃ samudācārābhāvato. Maggena asamucchinnattā visuddhoti pana na vattabbo. Pāmojjanti taruṇapītimāha. Tassa hi attano sammāpaṭipattiyā kilesānaṃ vikkhambhitattā cittassa visuddhataṃ passantassa pāmojjaṃ jāyati, taṃ tuṭṭhākāraṃ. Tenāha ‘‘tuṭṭhākāro’’ti. Pītīti passaddhiāvahā balavapīti. Nāmakāyo passambhatīti iminā ubhayampi passaddhiṃ vadati. Vediyatīti anubhavati vindati. Idāni tena nīvaraṇehi cittassa visodhanattaṃ laddhanti āha ‘‘appanāppattaṃ viya hotī’’ti. Aññattha uṭṭhitā aññaṃ ṭhānaṃ upagatāti ettakena upamābhāvena uccanīcatāsāmaññena heṭṭhā asaddhammānaṃ paṭipakkhavasena desanāya pariyosāpitattā vuttaṃ ‘‘yathānusandhinā’’ti. Mahāsīhanādasutte maggo pokkharaṇiyā upamito ‘‘seyyathāpi, sāriputta, pokkharaṇī’’tiādiṃ (ma. ni. 1.154) ārabhitvā upamāsaṃsandane ‘‘tathāyaṃ puggalo paṭipanno, tathā ca iriyati, tañca maggaṃ samāruḷho, yathā āsavānaṃ khayā’’ti (ma. ni. 1.154) vuttattā. Yathā hi puratthimādidisāhi āgatā purisā taṃ pokkharaṇiṃ āgamma visuddharūpakāyā vigatapariḷāhā ca honti, evaṃ khattiyādikulato āgatā tathāgatappaveditaṃ dhammavinayaṃ sāsanaṃ āgamma visuddhanāmakāyā vigatakilesapariḷāhā ca honti. Tasmā sabbakilesānaṃ samitattā paramatthasamaṇo hotīti. Sesaṃ suviññeyyameva.
চূল়অস্সপুরসুত্তৰণ্ণনায লীনত্থপ্পকাসনা সমত্তা।
Cūḷaassapurasuttavaṇṇanāya līnatthappakāsanā samattā.
নিট্ঠিতা চ মহাযমকৰগ্গৰণ্ণনা।
Niṭṭhitā ca mahāyamakavaggavaṇṇanā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১০. চূল়অস্সপুরসুত্তং • 10. Cūḷaassapurasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ১০. চূল়অস্সপুরসুত্তৰণ্ণনা • 10. Cūḷaassapurasuttavaṇṇanā
