| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
10. жуул̣аассабурасуд̇д̇аван̣н̣анаа
10. Cūḷaassapurasuttavaṇṇanā
435. буримасад̣̇исамзваад̇и ‘‘ассабураваасийнам̣ бхигкусан̇гхз г̇аараваб̣ахумаанам̣ нибажжагааран̃жа д̣̇исваа бхигкуу бин̣д̣абаад̇аабажааяанз нияож̇знд̇о ид̣̇ам̣ суд̇д̇ам̣ абхаасий’’д̇и буримасуд̇д̇з махааассабурз (ма. ни. адта. 2.415) вуд̇д̇асад̣̇исамзва. саман̣аанам̣ анужчавигаад̇и саман̣аанам̣ саман̣абхаавасса анужчавигаа бад̇ируубаа. саман̣аанам̣ ануломаббадибад̣̇аад̇и саман̣аанам̣ сааман̃н̃асан̇каад̇асса арияамаг̇г̇асса анугуулаббадибад̣̇аа.
435.Purimasadisamevāti ‘‘assapuravāsīnaṃ bhikkhusaṅghe gāravabahumānaṃ nipaccakārañca disvā bhikkhū piṇḍapātāpacāyane niyojento idaṃ suttaṃ abhāsī’’ti purimasutte mahāassapure (ma. ni. aṭṭha. 2.415) vuttasadisameva. Samaṇānaṃ anucchavikāti samaṇānaṃ samaṇabhāvassa anucchavikā patirūpā. Samaṇānaṃ anulomappaṭipadāti samaṇānaṃ sāmaññasaṅkhātassa ariyamaggassa anukūlappaṭipadā.
436. зд̇з д̇хаммаад̇и зд̇з баал̣ияам̣ ааг̇ад̇аа абхиж̇жхааб̣яаабаад̣̇аад̣̇аяо баабад̇хаммаа. уббаж̇ж̇амаанаад̇и уббаж̇ж̇амаанаа зва, баг̇зва санд̇аанз бхаавид̇аа. малинзд̇и малаванд̇з гилидтз. малаг̇г̇ахид̇зд̇и г̇ахид̇амалз сан̃ж̇аад̇амалз. саман̣амалаад̇и саман̣аанам̣ саман̣абхаавасса малаа. д̣̇уссанд̇ийд̇и вибаж̇ж̇анд̇и винассанд̇и. саман̣ад̣̇осаад̇и саман̣аанам̣ саман̣абхаавад̣̇уусанаа. гасадзд̇и асаарз. нирож̇зд̇и нид̇д̇зж̇з. аяад̇о сукад̇о абзд̇аад̇и абааяаа, нираяаад̣̇аяо, д̇ам̣ палам̣ араханд̇и, д̇ам̣ баяож̇анам̣ ваа зд̇зсанд̇и аабааяигаа. таанаани абхиж̇жхаад̣̇аяо. д̇знааха ‘‘абааяз’’д̇иаад̣̇и. гааран̣абхаавзна д̣̇уг̇г̇ад̇ибарияаабаннааяа взд̣̇анааяа хид̇аанийд̇и д̣̇уг̇г̇ад̇ивзд̣̇анияаани. д̇зна вуд̇д̇ам̣ ‘‘д̣̇уг̇г̇ад̇ияам̣ вибаагавзд̣̇анааяа бажжаяаана’’нд̇и. д̇икин̣ам̣ аяанд̇и взганд̇агасад̣̇исам̣ саарааяам̣. аязнаад̇и аяогхам̣сагзна. гон̃жасагун̣аанам̣ гира гужчияам̣ нивуд̇т̇ам̣ яам̣ гин̃жи карам̣ д̇икин̣ан̃жа ход̇и. д̇ат̇аа хи д̇зсам̣ важжам̣ адтимби баасаан̣амби вилийяаабзд̇и. д̇зна вуд̇д̇ам̣ ‘‘гон̃жасагун̣з каад̣̇аабзнд̇ий’’д̇и. д̇ам̣ гира аяажун̣н̣ам̣ аг̇г̇инааби гижчзна д̣̇аяхад̇и, бхзсаж̇ж̇аб̣алзна бана сукзна д̣̇аяхзяяа. д̇зна вуд̇д̇ам̣ ‘‘сусигкид̇аа жа нам̣ аяагаараа б̣ахухад̇т̇агаммамуулам̣ лабхид̇ваа гаронд̇ий’’д̇иаад̣̇и. ад̇ид̇икин̣ам̣ ход̇и, ан̃н̃ад̇арам̣ аяоб̣анд̇ханам̣ пзг̇г̇уд̣̇ан̣д̣ам̣ вияа сукзнзва чинд̣̇анд̇и. сасаб̣ил̣ааражаммзхи сан̇гхадид̇адтзна сан̇гхаадийд̇и вужжад̇и аавуд̇хабарижчад̣̇од̇и ааха ‘‘сан̇гхаадияаад̇и госияаа’’д̇и. барияонад̣̇д̇ханд̇и барид̇о онад̣̇д̇хам̣ чаад̣̇ид̇ам̣. саманд̇ад̇о взтид̇анд̇и саб̣б̣асо бихид̇ам̣.
436.Ete dhammāti ete pāḷiyaṃ āgatā abhijjhābyāpādādayo pāpadhammā. Uppajjamānāti uppajjamānā eva, pageva santāne bhāvitā. Malineti malavante kiliṭṭhe. Malaggahiteti gahitamale sañjātamale. Samaṇamalāti samaṇānaṃ samaṇabhāvassa malā. Dussantīti vipajjanti vinassanti. Samaṇadosāti samaṇānaṃ samaṇabhāvadūsanā. Kasaṭeti asāre. Nirojeti nitteje. Ayato sukhato apetāti apāyā, nirayādayo, taṃ phalaṃ arahanti, taṃ payojanaṃ vā etesanti āpāyikā. Ṭhānāni abhijjhādayo. Tenāha ‘‘apāye’’tiādi. Kāraṇabhāvena duggatipariyāpannāya vedanāya hitānīti duggativedaniyāni. Tena vuttaṃ ‘‘duggatiyaṃ vipākavedanāya paccayāna’’nti. Tikhiṇaṃ ayanti vekantakasadisaṃ sāraayaṃ. Ayenāti ayoghaṃsakena. Koñcasakuṇānaṃ kira kucchiyaṃ nivutthaṃ yaṃ kiñci kharaṃ tikhiṇañca hoti. Tathā hi tesaṃ vaccaṃ aṭṭhimpi pāsāṇampi vilīyāpeti. Tena vuttaṃ ‘‘koñcasakuṇe khādāpentī’’ti. Taṃ kira ayacuṇṇaṃ aggināpi kicchena dayhati, bhesajjabalena pana sukhena dayheyya. Tena vuttaṃ ‘‘susikkhitā ca naṃ ayakārā bahuhatthakammamūlaṃ labhitvā karontī’’tiādi. Atitikhiṇaṃ hoti, aññataraṃ ayobandhanaṃ pheggudaṇḍaṃ viya sukheneva chindanti. Sasabiḷāracammehi saṅghaṭitaṭṭhena saṅghāṭīti vuccati āvudhaparicchadoti āha ‘‘saṅghāṭiyāti kosiyā’’ti. Pariyonaddhanti parito onaddhaṃ chāditaṃ. Samantato veṭhitanti sabbaso pihitaṃ.
437. раж̇од̇и ааг̇анд̇угараж̇о. ж̇алланд̇и сарийрз удтаанагалон̣аад̣̇ималам̣. раж̇ож̇аллан̃жа вад̇асамаад̣̇аанавасзна анабанийд̇ам̣ зд̇асса ад̇т̇ийд̇и раж̇ож̇аллиго, д̇асса. д̇знааха ‘‘раж̇ож̇аллад̇хаарино’’д̇и. уд̣̇агам̣ ороханд̇ассаад̇иаад̣̇ийнамад̇т̇о махаасийханаад̣̇асуд̇д̇аван̣н̣анааяам̣ вуд̇д̇оязва. саб̣б̣амзд̇анд̇иаад̣̇ийсу саб̣б̣асоби вад̇асамаад̣̇аанавасзнаад̇и ад̇хиббааяо. яасмаа саб̣б̣амзд̇ам̣ б̣аахирасамаяавасзнзва гат̇ид̇ам̣, д̇асмаа сан̇гхаадигассаад̇и билод̇игакан̣д̣зхи сан̇гхадид̇ад̇д̇аа ‘‘сан̇гхаадий’’д̇и лад̣̇д̇ханаамавад̇т̇ад̇хааринод̇и ад̇т̇о. д̇ат̇аа хи баал̣ияам̣ ‘‘сан̇гхаадигасса’’ижжзва вуд̇д̇ам̣, на ‘‘бхигкуно’’д̇и. д̇знааха ‘‘имасмим̣ хий’’д̇иаад̣̇и. гасмаа банзд̇т̇а бхаг̇авад̇аа сан̇гхаадигад̇д̇аад̣̇ийниязва вад̇асамаад̣̇аанаани бадигкид̇д̇аанийд̇и? наяад̣̇ассанамзд̇ам̣ ан̃н̃зсамби бан̃жаад̇абамууг̇авад̇аад̣̇ийнам̣ д̇аббадигкзбзнзва басид̣̇д̇хид̇о. абарз бана бхан̣анд̇и – ‘‘наахам̣, бхигкавз, сан̇гхаадигасса сан̇гхаадид̇хааран̣амад̇д̇зна сааман̃н̃ам̣ вад̣̇аамий’’д̇и вуд̇д̇з д̇ад̇т̇а нисинно гожи д̇ид̇т̇анд̇аралад̣̇д̇хиго ажзлагад̇д̇ам̣ ну ко гат̇анд̇и жинд̇зси, абарз раж̇ож̇аллагад̇д̇ам̣ ну ко гат̇анд̇и, звам̣ д̇ам̣ д̇ам̣ жинд̇знд̇аанам̣ аж̇жхаасаяавасзна бхаг̇аваа имаанзва вад̇асамаад̣̇аанаани ид̇ха бадигкибийд̇и. сан̇гхаадиганд̇и ниваасанабаарубанавасзна сан̇гхаадиванд̇ам̣. д̇знааха ‘‘сан̇гхаадигам̣ вад̇т̇а’’нд̇иаад̣̇и. ад̇д̇ано ружияаа мид̇д̇аад̣̇аяо сан̇гхаадигам̣ гарзяяум̣, бажчаа вин̃н̃уд̇ам̣ бад̇д̇агаалз сан̇гхаадигад̇д̇з самаад̣̇абзяяум̣.
437.Rajoti āgantukarajo. Jallanti sarīre uṭṭhānakaloṇādimalaṃ. Rajojallañca vatasamādānavasena anapanītaṃ etassa atthīti rajojalliko, tassa. Tenāha ‘‘rajojalladhārino’’ti. Udakaṃ orohantassātiādīnamattho mahāsīhanādasuttavaṇṇanāyaṃ vuttoyeva. Sabbametantiādīsu sabbasopi vatasamādānavasenāti adhippāyo. Yasmā sabbametaṃ bāhirasamayavaseneva kathitaṃ, tasmā saṅghāṭikassāti pilotikakhaṇḍehi saṅghaṭitattā ‘‘saṅghāṭī’’ti laddhanāmavatthadhārinoti attho. Tathā hi pāḷiyaṃ ‘‘saṅghāṭikassa’’icceva vuttaṃ, na ‘‘bhikkhuno’’ti. Tenāha ‘‘imasmiṃ hī’’tiādi. Kasmā panettha bhagavatā saṅghāṭikattādīniyeva vatasamādānāni paṭikkhittānīti? Nayadassanametaṃ aññesampi pañcātapamūgavatādīnaṃ tappaṭikkhepeneva pasiddhito. Apare pana bhaṇanti – ‘‘nāhaṃ, bhikkhave, saṅghāṭikassa saṅghāṭidhāraṇamattena sāmaññaṃ vadāmī’’ti vutte tattha nisinno koci titthantaraladdhiko acelakattaṃ nu kho kathanti cintesi, apare rajojallakattaṃ nu kho kathanti, evaṃ taṃ taṃ cintentānaṃ ajjhāsayavasena bhagavā imāneva vatasamādānāni idha paṭikkhipīti. Saṅghāṭikanti nivāsanapārupanavasena saṅghāṭivantaṃ. Tenāha ‘‘saṅghāṭikaṃ vattha’’ntiādi. Attano ruciyā mittādayo saṅghāṭikaṃ kareyyuṃ, pacchā viññutaṃ pattakāle saṅghāṭikatte samādapeyyuṃ.
438. ад̇д̇аанам̣ висуж̇жханд̇ам̣ бассад̇и абхиж̇жхаад̣̇ийнам̣ самуд̣̇аажаараабхаавад̇о. маг̇г̇зна асамужчиннад̇д̇аа висуд̣̇д̇ход̇и бана на вад̇д̇аб̣б̣о. баамож̇ж̇анд̇и д̇арун̣абийд̇имааха. д̇асса хи ад̇д̇ано саммаабадибад̇д̇ияаа гилзсаанам̣ вигкамбхид̇ад̇д̇аа жид̇д̇асса висуд̣̇д̇хад̇ам̣ бассанд̇асса баамож̇ж̇ам̣ ж̇ааяад̇и, д̇ам̣ д̇удтаагаарам̣. д̇знааха ‘‘д̇удтаагааро’’д̇и. бийд̇ийд̇и бассад̣̇д̇хиаавахаа б̣алавабийд̇и. наамагааяо бассамбхад̇ийд̇и иминаа убхаяамби бассад̣̇д̇хим̣ вад̣̇ад̇и. взд̣̇ияад̇ийд̇и анубхавад̇и винд̣̇ад̇и. ид̣̇аани д̇зна нийваран̣зхи жид̇д̇асса висод̇ханад̇д̇ам̣ лад̣̇д̇ханд̇и ааха ‘‘аббанааббад̇д̇ам̣ вияа ход̇ий’’д̇и. ан̃н̃ад̇т̇а удтид̇аа ан̃н̃ам̣ таанам̣ убаг̇ад̇аад̇и зд̇д̇агзна убамаабхаавзна ужжанийжад̇аасааман̃н̃зна хздтаа асад̣̇д̇хаммаанам̣ бадибагкавасзна д̣̇зсанааяа барияосаабид̇ад̇д̇аа вуд̇д̇ам̣ ‘‘яат̇аанусанд̇хинаа’’д̇и. махаасийханаад̣̇асуд̇д̇з маг̇г̇о богкаран̣ияаа убамид̇о ‘‘сзяяат̇ааби, саарибуд̇д̇а, богкаран̣ий’’д̇иаад̣̇им̣ (ма. ни. 1.154) аарабхид̇ваа убамаасам̣санд̣̇анз ‘‘д̇ат̇ааяам̣ буг̇г̇ало бадибанно, д̇ат̇аа жа ирияад̇и, д̇ан̃жа маг̇г̇ам̣ самаарул̣хо, яат̇аа аасаваанам̣ каяаа’’д̇и (ма. ни. 1.154) вуд̇д̇ад̇д̇аа. яат̇аа хи бурад̇т̇имаад̣̇ид̣̇исаахи ааг̇ад̇аа бурисаа д̇ам̣ богкаран̣им̣ ааг̇амма висуд̣̇д̇харуубагааяаа виг̇ад̇абарил̣аахаа жа хонд̇и, звам̣ кад̇д̇ияаад̣̇игулад̇о ааг̇ад̇аа д̇ат̇ааг̇ад̇аббавзд̣̇ид̇ам̣ д̇хаммавинаяам̣ саасанам̣ ааг̇амма висуд̣̇д̇ханаамагааяаа виг̇ад̇агилзсабарил̣аахаа жа хонд̇и. д̇асмаа саб̣б̣агилзсаанам̣ самид̇ад̇д̇аа барамад̇т̇асаман̣о ход̇ийд̇и. сзсам̣ сувин̃н̃зяяамзва.
438.Attānaṃ visujjhantaṃ passati abhijjhādīnaṃ samudācārābhāvato. Maggena asamucchinnattā visuddhoti pana na vattabbo. Pāmojjanti taruṇapītimāha. Tassa hi attano sammāpaṭipattiyā kilesānaṃ vikkhambhitattā cittassa visuddhataṃ passantassa pāmojjaṃ jāyati, taṃ tuṭṭhākāraṃ. Tenāha ‘‘tuṭṭhākāro’’ti. Pītīti passaddhiāvahā balavapīti. Nāmakāyo passambhatīti iminā ubhayampi passaddhiṃ vadati. Vediyatīti anubhavati vindati. Idāni tena nīvaraṇehi cittassa visodhanattaṃ laddhanti āha ‘‘appanāppattaṃ viya hotī’’ti. Aññattha uṭṭhitā aññaṃ ṭhānaṃ upagatāti ettakena upamābhāvena uccanīcatāsāmaññena heṭṭhā asaddhammānaṃ paṭipakkhavasena desanāya pariyosāpitattā vuttaṃ ‘‘yathānusandhinā’’ti. Mahāsīhanādasutte maggo pokkharaṇiyā upamito ‘‘seyyathāpi, sāriputta, pokkharaṇī’’tiādiṃ (ma. ni. 1.154) ārabhitvā upamāsaṃsandane ‘‘tathāyaṃ puggalo paṭipanno, tathā ca iriyati, tañca maggaṃ samāruḷho, yathā āsavānaṃ khayā’’ti (ma. ni. 1.154) vuttattā. Yathā hi puratthimādidisāhi āgatā purisā taṃ pokkharaṇiṃ āgamma visuddharūpakāyā vigatapariḷāhā ca honti, evaṃ khattiyādikulato āgatā tathāgatappaveditaṃ dhammavinayaṃ sāsanaṃ āgamma visuddhanāmakāyā vigatakilesapariḷāhā ca honti. Tasmā sabbakilesānaṃ samitattā paramatthasamaṇo hotīti. Sesaṃ suviññeyyameva.
жуул̣аассабурасуд̇д̇аван̣н̣анааяа лийнад̇т̇аббагаасанаа самад̇д̇аа.
Cūḷaassapurasuttavaṇṇanāya līnatthappakāsanā samattā.
нидтид̇аа жа махааяамагаваг̇г̇аван̣н̣анаа.
Niṭṭhitā ca mahāyamakavaggavaṇṇanā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 10. жуул̣аассабурасуд̇д̇ам̣ • 10. Cūḷaassapurasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 10. жуул̣аассабурасуд̇д̇аван̣н̣анаа • 10. Cūḷaassapurasuttavaṇṇanā
