| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༡༠. ཙཱུལ༹ཨསྶཔུརསུཏྟཝཎྞནཱ
10. Cūḷaassapurasuttavaṇṇanā
༤༣༥. པུརིམསདིསམེཝཱཏི ‘‘ཨསྶཔུརཝཱསཱིནཾ བྷིཀྑུསངྒྷེ གཱརཝབཧུམཱནཾ ནིཔཙྩཀཱརཉྩ དིསྭཱ བྷིཀྑཱུ པིཎྜཔཱཏཱཔཙཱཡནེ ནིཡོཛེནྟོ ཨིདཾ སུཏྟཾ ཨབྷཱསཱི’’ཏི པུརིམསུཏྟེ མཧཱཨསྶཔུརེ (མ॰ ནི॰ ཨཊྛ॰ ༢.༤༡༥) ཝུཏྟསདིསམེཝ། སམཎཱནཾ ཨནུཙྪཝིཀཱཏི སམཎཱནཾ སམཎབྷཱཝསྶ ཨནུཙྪཝིཀཱ པཏིརཱུཔཱ། སམཎཱནཾ ཨནུལོམཔྤཊིཔདཱཏི སམཎཱནཾ སཱམཉྙསངྑཱཏསྶ ཨརིཡམགྒསྶ ཨནུཀཱུལཔྤཊིཔདཱ།
435.Purimasadisamevāti ‘‘assapuravāsīnaṃ bhikkhusaṅghe gāravabahumānaṃ nipaccakārañca disvā bhikkhū piṇḍapātāpacāyane niyojento idaṃ suttaṃ abhāsī’’ti purimasutte mahāassapure (ma. ni. aṭṭha. 2.415) vuttasadisameva. Samaṇānaṃ anucchavikāti samaṇānaṃ samaṇabhāvassa anucchavikā patirūpā. Samaṇānaṃ anulomappaṭipadāti samaṇānaṃ sāmaññasaṅkhātassa ariyamaggassa anukūlappaṭipadā.
༤༣༦. ཨེཏེ དྷམྨཱཏི ཨེཏེ པཱལི༹ཡཾ ཨཱགཏཱ ཨབྷིཛ྄ཛྷཱབྱཱཔཱདཱདཡོ པཱཔདྷམྨཱ། ཨུཔྤཛྫམཱནཱཏི ཨུཔྤཛྫམཱནཱ ཨེཝ, པགེཝ སནྟཱནེ བྷཱཝིཏཱ། མལིནེཏི མལཝནྟེ ཀིལིཊྛེ། མལགྒཧིཏེཏི གཧིཏམལེ སཉྫཱཏམལེ། སམཎམལཱཏི སམཎཱནཾ སམཎབྷཱཝསྶ མལཱ། དུསྶནྟཱིཏི ཝིཔཛྫནྟི ཝིནསྶནྟི། སམཎདོསཱཏི སམཎཱནཾ སམཎབྷཱཝདཱུསནཱ། ཀསཊེཏི ཨསཱརེ། ནིརོཛེཏི ནིཏྟེཛེ། ཨཡཏོ སུཁཏོ ཨཔེཏཱཏི ཨཔཱཡཱ, ནིརཡཱདཡོ, ཏཾ ཕལཾ ཨརཧནྟི, ཏཾ པཡོཛནཾ ཝཱ ཨེཏེསནྟི ཨཱཔཱཡིཀཱ། ཋཱནཱནི ཨབྷིཛ྄ཛྷཱདཡོ། ཏེནཱཧ ‘‘ཨཔཱཡེ’’ཏིཨཱདི། ཀཱརཎབྷཱཝེན དུགྒཏིཔརིཡཱཔནྣཱཡ ཝེདནཱཡ ཧིཏཱནཱིཏི དུགྒཏིཝེདནིཡཱནི། ཏེན ཝུཏྟཾ ‘‘དུགྒཏིཡཾ ཝིཔཱཀཝེདནཱཡ པཙྩཡཱན’’ནྟི། ཏིཁིཎཾ ཨཡནྟི ཝེཀནྟཀསདིསཾ སཱརཨཡཾ། ཨཡེནཱཏི ཨཡོགྷཾསཀེན། ཀོཉྩསཀུཎཱནཾ ཀིར ཀུཙྪིཡཾ ནིཝུཏྠཾ ཡཾ ཀིཉྩི ཁརཾ ཏིཁིཎཉྩ ཧོཏི། ཏཐཱ ཧི ཏེསཾ ཝཙྩཾ ཨཊྛིམྤི པཱསཱཎམྤི ཝིལཱིཡཱཔེཏི། ཏེན ཝུཏྟཾ ‘‘ཀོཉྩསཀུཎེ ཁཱདཱཔེནྟཱི’’ཏི། ཏཾ ཀིར ཨཡཙུཎྞཾ ཨགྒིནཱཔི ཀིཙྪེན དཡ྄ཧཏི, བྷེསཛྫབལེན པན སུཁེན དཡ྄ཧེཡྻ། ཏེན ཝུཏྟཾ ‘‘སུསིཀྑིཏཱ ཙ ནཾ ཨཡཀཱརཱ བཧུཧཏྠཀམྨམཱུལཾ ལབྷིཏྭཱ ཀརོནྟཱི’’ཏིཨཱདི། ཨཏིཏིཁིཎཾ ཧོཏི, ཨཉྙཏརཾ ཨཡོབནྡྷནཾ ཕེགྒུདཎྜཾ ཝིཡ སུཁེནེཝ ཚིནྡནྟི། སསབིལཱ༹རཙམྨེཧི སངྒྷཊིཏཊྛེན སངྒྷཱཊཱིཏི ཝུཙྩཏི ཨཱཝུདྷཔརིཙྪདོཏི ཨཱཧ ‘‘སངྒྷཱཊིཡཱཏི ཀོསིཡཱ’’ཏི། པརིཡོནདྡྷནྟི པརིཏོ ཨོནདྡྷཾ ཚཱདིཏཾ། སམནྟཏོ ཝེཋིཏནྟི སབྦསོ པིཧིཏཾ།
436.Ete dhammāti ete pāḷiyaṃ āgatā abhijjhābyāpādādayo pāpadhammā. Uppajjamānāti uppajjamānā eva, pageva santāne bhāvitā. Malineti malavante kiliṭṭhe. Malaggahiteti gahitamale sañjātamale. Samaṇamalāti samaṇānaṃ samaṇabhāvassa malā. Dussantīti vipajjanti vinassanti. Samaṇadosāti samaṇānaṃ samaṇabhāvadūsanā. Kasaṭeti asāre. Nirojeti nitteje. Ayato sukhato apetāti apāyā, nirayādayo, taṃ phalaṃ arahanti, taṃ payojanaṃ vā etesanti āpāyikā. Ṭhānāni abhijjhādayo. Tenāha ‘‘apāye’’tiādi. Kāraṇabhāvena duggatipariyāpannāya vedanāya hitānīti duggativedaniyāni. Tena vuttaṃ ‘‘duggatiyaṃ vipākavedanāya paccayāna’’nti. Tikhiṇaṃ ayanti vekantakasadisaṃ sāraayaṃ. Ayenāti ayoghaṃsakena. Koñcasakuṇānaṃ kira kucchiyaṃ nivutthaṃ yaṃ kiñci kharaṃ tikhiṇañca hoti. Tathā hi tesaṃ vaccaṃ aṭṭhimpi pāsāṇampi vilīyāpeti. Tena vuttaṃ ‘‘koñcasakuṇe khādāpentī’’ti. Taṃ kira ayacuṇṇaṃ aggināpi kicchena dayhati, bhesajjabalena pana sukhena dayheyya. Tena vuttaṃ ‘‘susikkhitā ca naṃ ayakārā bahuhatthakammamūlaṃ labhitvā karontī’’tiādi. Atitikhiṇaṃ hoti, aññataraṃ ayobandhanaṃ pheggudaṇḍaṃ viya sukheneva chindanti. Sasabiḷāracammehi saṅghaṭitaṭṭhena saṅghāṭīti vuccati āvudhaparicchadoti āha ‘‘saṅghāṭiyāti kosiyā’’ti. Pariyonaddhanti parito onaddhaṃ chāditaṃ. Samantato veṭhitanti sabbaso pihitaṃ.
༤༣༧. རཛོཏི ཨཱགནྟུཀརཛོ། ཛལླནྟི སརཱིརེ ཨུཊྛཱནཀལོཎཱདིམལཾ། རཛོཛལླཉྩ ཝཏསམཱདཱནཝསེན ཨནཔནཱིཏཾ ཨེཏསྶ ཨཏྠཱིཏི རཛོཛལླིཀོ, ཏསྶ། ཏེནཱཧ ‘‘རཛོཛལླདྷཱརིནོ’’ཏི། ཨུདཀཾ ཨོརོཧནྟསྶཱཏིཨཱདཱིནམཏྠོ མཧཱསཱིཧནཱདསུཏྟཝཎྞནཱཡཾ ཝུཏྟོཡེཝ། སབྦམེཏནྟིཨཱདཱིསུ སབྦསོཔི ཝཏསམཱདཱནཝསེནཱཏི ཨདྷིཔྤཱཡོ། ཡསྨཱ སབྦམེཏཾ བཱཧིརསམཡཝསེནེཝ ཀཐིཏཾ, ཏསྨཱ སངྒྷཱཊིཀསྶཱཏི པིལོཏིཀཁཎྜེཧི སངྒྷཊིཏཏྟཱ ‘‘སངྒྷཱཊཱི’’ཏི ལདྡྷནཱམཝཏྠདྷཱརིནོཏི ཨཏྠོ། ཏཐཱ ཧི པཱལི༹ཡཾ ‘‘སངྒྷཱཊིཀསྶ’’ཨིཙྩེཝ ཝུཏྟཾ, ན ‘‘བྷིཀྑུནོ’’ཏི། ཏེནཱཧ ‘‘ཨིམསྨིཾ ཧཱི’’ཏིཨཱདི། ཀསྨཱ པནེཏྠ བྷགཝཏཱ སངྒྷཱཊིཀཏྟཱདཱིནིཡེཝ ཝཏསམཱདཱནཱནི པཊིཀྑིཏྟཱནཱིཏི? ནཡདསྶནམེཏཾ ཨཉྙེསམྤི པཉྩཱཏཔམཱུགཝཏཱདཱིནཾ ཏཔྤཊིཀྑེཔེནེཝ པསིདྡྷིཏོ། ཨཔརེ པན བྷཎནྟི – ‘‘ནཱཧཾ, བྷིཀྑཝེ, སངྒྷཱཊིཀསྶ སངྒྷཱཊིདྷཱརཎམཏྟེན སཱམཉྙཾ ཝདཱམཱི’’ཏི ཝུཏྟེ ཏཏྠ ནིསིནྣོ ཀོཙི ཏིཏྠནྟརལདྡྷིཀོ ཨཙེལཀཏྟཾ ནུ ཁོ ཀཐནྟི ཙིནྟེསི, ཨཔརེ རཛོཛལླཀཏྟཾ ནུ ཁོ ཀཐནྟི, ཨེཝཾ ཏཾ ཏཾ ཙིནྟེནྟཱནཾ ཨཛ྄ཛྷཱསཡཝསེན བྷགཝཱ ཨིམཱནེཝ ཝཏསམཱདཱནཱནི ཨིདྷ པཊིཀྑིཔཱིཏི། སངྒྷཱཊིཀནྟི ནིཝཱསནཔཱརུཔནཝསེན སངྒྷཱཊིཝནྟཾ། ཏེནཱཧ ‘‘སངྒྷཱཊིཀཾ ཝཏྠ’’ནྟིཨཱདི། ཨཏྟནོ རུཙིཡཱ མིཏྟཱདཡོ སངྒྷཱཊིཀཾ ཀརེཡྻུཾ, པཙྪཱ ཝིཉྙུཏཾ པཏྟཀཱལེ སངྒྷཱཊིཀཏྟེ སམཱདཔེཡྻུཾ།
437.Rajoti āgantukarajo. Jallanti sarīre uṭṭhānakaloṇādimalaṃ. Rajojallañca vatasamādānavasena anapanītaṃ etassa atthīti rajojalliko, tassa. Tenāha ‘‘rajojalladhārino’’ti. Udakaṃ orohantassātiādīnamattho mahāsīhanādasuttavaṇṇanāyaṃ vuttoyeva. Sabbametantiādīsu sabbasopi vatasamādānavasenāti adhippāyo. Yasmā sabbametaṃ bāhirasamayavaseneva kathitaṃ, tasmā saṅghāṭikassāti pilotikakhaṇḍehi saṅghaṭitattā ‘‘saṅghāṭī’’ti laddhanāmavatthadhārinoti attho. Tathā hi pāḷiyaṃ ‘‘saṅghāṭikassa’’icceva vuttaṃ, na ‘‘bhikkhuno’’ti. Tenāha ‘‘imasmiṃ hī’’tiādi. Kasmā panettha bhagavatā saṅghāṭikattādīniyeva vatasamādānāni paṭikkhittānīti? Nayadassanametaṃ aññesampi pañcātapamūgavatādīnaṃ tappaṭikkhepeneva pasiddhito. Apare pana bhaṇanti – ‘‘nāhaṃ, bhikkhave, saṅghāṭikassa saṅghāṭidhāraṇamattena sāmaññaṃ vadāmī’’ti vutte tattha nisinno koci titthantaraladdhiko acelakattaṃ nu kho kathanti cintesi, apare rajojallakattaṃ nu kho kathanti, evaṃ taṃ taṃ cintentānaṃ ajjhāsayavasena bhagavā imāneva vatasamādānāni idha paṭikkhipīti. Saṅghāṭikanti nivāsanapārupanavasena saṅghāṭivantaṃ. Tenāha ‘‘saṅghāṭikaṃ vattha’’ntiādi. Attano ruciyā mittādayo saṅghāṭikaṃ kareyyuṃ, pacchā viññutaṃ pattakāle saṅghāṭikatte samādapeyyuṃ.
༤༣༨. ཨཏྟཱནཾ ཝིསུཛ྄ཛྷནྟཾ པསྶཏི ཨབྷིཛ྄ཛྷཱདཱིནཾ སམུདཱཙཱརཱབྷཱཝཏོ། མགྒེན ཨསམུཙྪིནྣཏྟཱ ཝིསུདྡྷོཏི པན ན ཝཏྟབྦོ། པཱམོཛྫནྟི ཏརུཎཔཱིཏིམཱཧ། ཏསྶ ཧི ཨཏྟནོ སམྨཱཔཊིཔཏྟིཡཱ ཀིལེསཱནཾ ཝིཀྑམྦྷིཏཏྟཱ ཙིཏྟསྶ ཝིསུདྡྷཏཾ པསྶནྟསྶ པཱམོཛྫཾ ཛཱཡཏི, ཏཾ ཏུཊྛཱཀཱརཾ། ཏེནཱཧ ‘‘ཏུཊྛཱཀཱརོ’’ཏི། པཱིཏཱིཏི པསྶདྡྷིཨཱཝཧཱ བལཝཔཱིཏི། ནཱམཀཱཡོ པསྶམྦྷཏཱིཏི ཨིམིནཱ ཨུབྷཡམྤི པསྶདྡྷིཾ ཝདཏི། ཝེདིཡཏཱིཏི ཨནུབྷཝཏི ཝིནྡཏི། ཨིདཱནི ཏེན ནཱིཝརཎེཧི ཙིཏྟསྶ ཝིསོདྷནཏྟཾ ལདྡྷནྟི ཨཱཧ ‘‘ཨཔྤནཱཔྤཏྟཾ ཝིཡ ཧོཏཱི’’ཏི། ཨཉྙཏྠ ཨུཊྛིཏཱ ཨཉྙཾ ཋཱནཾ ཨུཔགཏཱཏི ཨེཏྟཀེན ཨུཔམཱབྷཱཝེན ཨུཙྩནཱིཙཏཱསཱམཉྙེན ཧེཊྛཱ ཨསདྡྷམྨཱནཾ པཊིཔཀྑཝསེན དེསནཱཡ པརིཡོསཱཔིཏཏྟཱ ཝུཏྟཾ ‘‘ཡཐཱནུསནྡྷིནཱ’’ཏི། མཧཱསཱིཧནཱདསུཏྟེ མགྒོ པོཀྑརཎིཡཱ ཨུཔམིཏོ ‘‘སེཡྻཐཱཔི, སཱརིཔུཏྟ, པོཀྑརཎཱི’’ཏིཨཱདིཾ (མ॰ ནི॰ ༡.༡༥༤) ཨཱརབྷིཏྭཱ ཨུཔམཱསཾསནྡནེ ‘‘ཏཐཱཡཾ པུགྒལོ པཊིཔནྣོ, ཏཐཱ ཙ ཨིརིཡཏི, ཏཉྩ མགྒཾ སམཱརུལ༹ྷོ, ཡཐཱ ཨཱསཝཱནཾ ཁཡཱ’’ཏི (མ॰ ནི॰ ༡.༡༥༤) ཝུཏྟཏྟཱ། ཡཐཱ ཧི པུརཏྠིམཱདིདིསཱཧི ཨཱགཏཱ པུརིསཱ ཏཾ པོཀྑརཎིཾ ཨཱགམྨ ཝིསུདྡྷརཱུཔཀཱཡཱ ཝིགཏཔརིལཱ༹ཧཱ ཙ ཧོནྟི, ཨེཝཾ ཁཏྟིཡཱདིཀུལཏོ ཨཱགཏཱ ཏཐཱགཏཔྤཝེདིཏཾ དྷམྨཝིནཡཾ སཱསནཾ ཨཱགམྨ ཝིསུདྡྷནཱམཀཱཡཱ ཝིགཏཀིལེསཔརིལཱ༹ཧཱ ཙ ཧོནྟི། ཏསྨཱ སབྦཀིལེསཱནཾ སམིཏཏྟཱ པརམཏྠསམཎོ ཧོཏཱིཏི། སེསཾ སུཝིཉྙེཡྻམེཝ།
438.Attānaṃ visujjhantaṃ passati abhijjhādīnaṃ samudācārābhāvato. Maggena asamucchinnattā visuddhoti pana na vattabbo. Pāmojjanti taruṇapītimāha. Tassa hi attano sammāpaṭipattiyā kilesānaṃ vikkhambhitattā cittassa visuddhataṃ passantassa pāmojjaṃ jāyati, taṃ tuṭṭhākāraṃ. Tenāha ‘‘tuṭṭhākāro’’ti. Pītīti passaddhiāvahā balavapīti. Nāmakāyo passambhatīti iminā ubhayampi passaddhiṃ vadati. Vediyatīti anubhavati vindati. Idāni tena nīvaraṇehi cittassa visodhanattaṃ laddhanti āha ‘‘appanāppattaṃ viya hotī’’ti. Aññattha uṭṭhitā aññaṃ ṭhānaṃ upagatāti ettakena upamābhāvena uccanīcatāsāmaññena heṭṭhā asaddhammānaṃ paṭipakkhavasena desanāya pariyosāpitattā vuttaṃ ‘‘yathānusandhinā’’ti. Mahāsīhanādasutte maggo pokkharaṇiyā upamito ‘‘seyyathāpi, sāriputta, pokkharaṇī’’tiādiṃ (ma. ni. 1.154) ārabhitvā upamāsaṃsandane ‘‘tathāyaṃ puggalo paṭipanno, tathā ca iriyati, tañca maggaṃ samāruḷho, yathā āsavānaṃ khayā’’ti (ma. ni. 1.154) vuttattā. Yathā hi puratthimādidisāhi āgatā purisā taṃ pokkharaṇiṃ āgamma visuddharūpakāyā vigatapariḷāhā ca honti, evaṃ khattiyādikulato āgatā tathāgatappaveditaṃ dhammavinayaṃ sāsanaṃ āgamma visuddhanāmakāyā vigatakilesapariḷāhā ca honti. Tasmā sabbakilesānaṃ samitattā paramatthasamaṇo hotīti. Sesaṃ suviññeyyameva.
ཙཱུལ༹ཨསྶཔུརསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Cūḷaassapurasuttavaṇṇanāya līnatthappakāsanā samattā.
ནིཊྛིཏཱ ཙ མཧཱཡམཀཝགྒཝཎྞནཱ།
Niṭṭhitā ca mahāyamakavaggavaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༡༠. ཙཱུལ༹ཨསྶཔུརསུཏྟཾ • 10. Cūḷaassapurasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༡༠. ཙཱུལ༹ཨསྶཔུརསུཏྟཝཎྞནཱ • 10. Cūḷaassapurasuttavaṇṇanā
