| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) |
੧੦. ਚੂਲ਼ਅਸ੍ਸਪੁਰਸੁਤ੍ਤવਣ੍ਣਨਾ
10. Cūḷaassapurasuttavaṇṇanā
੪੩੫. ਪੁਰਿਮਸਦਿਸਮੇવਾਤਿ ‘‘ਅਸ੍ਸਪੁਰવਾਸੀਨਂ ਭਿਕ੍ਖੁਸਙ੍ਘੇ ਗਾਰવਬਹੁਮਾਨਂ ਨਿਪਚ੍ਚਕਾਰਞ੍ਚ ਦਿਸ੍વਾ ਭਿਕ੍ਖੂ ਪਿਣ੍ਡਪਾਤਾਪਚਾਯਨੇ ਨਿਯੋਜੇਨ੍ਤੋ ਇਦਂ ਸੁਤ੍ਤਂ ਅਭਾਸੀ’’ਤਿ ਪੁਰਿਮਸੁਤ੍ਤੇ ਮਹਾਅਸ੍ਸਪੁਰੇ (ਮ॰ ਨਿ॰ ਅਟ੍ਠ॰ ੨.੪੧੫) વੁਤ੍ਤਸਦਿਸਮੇવ। ਸਮਣਾਨਂ ਅਨੁਚ੍ਛવਿਕਾਤਿ ਸਮਣਾਨਂ ਸਮਣਭਾવਸ੍ਸ ਅਨੁਚ੍ਛવਿਕਾ ਪਤਿਰੂਪਾ। ਸਮਣਾਨਂ ਅਨੁਲੋਮਪ੍ਪਟਿਪਦਾਤਿ ਸਮਣਾਨਂ ਸਾਮਞ੍ਞਸਙ੍ਖਾਤਸ੍ਸ ਅਰਿਯਮਗ੍ਗਸ੍ਸ ਅਨੁਕੂਲਪ੍ਪਟਿਪਦਾ।
435.Purimasadisamevāti ‘‘assapuravāsīnaṃ bhikkhusaṅghe gāravabahumānaṃ nipaccakārañca disvā bhikkhū piṇḍapātāpacāyane niyojento idaṃ suttaṃ abhāsī’’ti purimasutte mahāassapure (ma. ni. aṭṭha. 2.415) vuttasadisameva. Samaṇānaṃ anucchavikāti samaṇānaṃ samaṇabhāvassa anucchavikā patirūpā. Samaṇānaṃ anulomappaṭipadāti samaṇānaṃ sāmaññasaṅkhātassa ariyamaggassa anukūlappaṭipadā.
੪੩੬. ਏਤੇ ਧਮ੍ਮਾਤਿ ਏਤੇ ਪਾਲ਼ਿਯਂ ਆਗਤਾ ਅਭਿਜ੍ਝਾਬ੍ਯਾਪਾਦਾਦਯੋ ਪਾਪਧਮ੍ਮਾ। ਉਪ੍ਪਜ੍ਜਮਾਨਾਤਿ ਉਪ੍ਪਜ੍ਜਮਾਨਾ ਏવ, ਪਗੇવ ਸਨ੍ਤਾਨੇ ਭਾવਿਤਾ। ਮਲਿਨੇਤਿ ਮਲવਨ੍ਤੇ ਕਿਲਿਟ੍ਠੇ। ਮਲਗ੍ਗਹਿਤੇਤਿ ਗਹਿਤਮਲੇ ਸਞ੍ਜਾਤਮਲੇ। ਸਮਣਮਲਾਤਿ ਸਮਣਾਨਂ ਸਮਣਭਾવਸ੍ਸ ਮਲਾ। ਦੁਸ੍ਸਨ੍ਤੀਤਿ વਿਪਜ੍ਜਨ੍ਤਿ વਿਨਸ੍ਸਨ੍ਤਿ। ਸਮਣਦੋਸਾਤਿ ਸਮਣਾਨਂ ਸਮਣਭਾવਦੂਸਨਾ। ਕਸਟੇਤਿ ਅਸਾਰੇ। ਨਿਰੋਜੇਤਿ ਨਿਤ੍ਤੇਜੇ। ਅਯਤੋ ਸੁਖਤੋ ਅਪੇਤਾਤਿ ਅਪਾਯਾ, ਨਿਰਯਾਦਯੋ, ਤਂ ਫਲਂ ਅਰਹਨ੍ਤਿ, ਤਂ ਪਯੋਜਨਂ વਾ ਏਤੇਸਨ੍ਤਿ ਆਪਾਯਿਕਾ। ਠਾਨਾਨਿ ਅਭਿਜ੍ਝਾਦਯੋ। ਤੇਨਾਹ ‘‘ਅਪਾਯੇ’’ਤਿਆਦਿ। ਕਾਰਣਭਾવੇਨ ਦੁਗ੍ਗਤਿਪਰਿਯਾਪਨ੍ਨਾਯ વੇਦਨਾਯ ਹਿਤਾਨੀਤਿ ਦੁਗ੍ਗਤਿવੇਦਨਿਯਾਨਿ। ਤੇਨ વੁਤ੍ਤਂ ‘‘ਦੁਗ੍ਗਤਿਯਂ વਿਪਾਕવੇਦਨਾਯ ਪਚ੍ਚਯਾਨ’’ਨ੍ਤਿ। ਤਿਖਿਣਂ ਅਯਨ੍ਤਿ વੇਕਨ੍ਤਕਸਦਿਸਂ ਸਾਰਅਯਂ। ਅਯੇਨਾਤਿ ਅਯੋਘਂਸਕੇਨ। ਕੋਞ੍ਚਸਕੁਣਾਨਂ ਕਿਰ ਕੁਚ੍ਛਿਯਂ ਨਿવੁਤ੍ਥਂ ਯਂ ਕਿਞ੍ਚਿ ਖਰਂ ਤਿਖਿਣਞ੍ਚ ਹੋਤਿ। ਤਥਾ ਹਿ ਤੇਸਂ વਚ੍ਚਂ ਅਟ੍ਠਿਮ੍ਪਿ ਪਾਸਾਣਮ੍ਪਿ વਿਲੀਯਾਪੇਤਿ। ਤੇਨ વੁਤ੍ਤਂ ‘‘ਕੋਞ੍ਚਸਕੁਣੇ ਖਾਦਾਪੇਨ੍ਤੀ’’ਤਿ। ਤਂ ਕਿਰ ਅਯਚੁਣ੍ਣਂ ਅਗ੍ਗਿਨਾਪਿ ਕਿਚ੍ਛੇਨ ਦਯ੍ਹਤਿ, ਭੇਸਜ੍ਜਬਲੇਨ ਪਨ ਸੁਖੇਨ ਦਯ੍ਹੇਯ੍ਯ। ਤੇਨ વੁਤ੍ਤਂ ‘‘ਸੁਸਿਕ੍ਖਿਤਾ ਚ ਨਂ ਅਯਕਾਰਾ ਬਹੁਹਤ੍ਥਕਮ੍ਮਮੂਲਂ ਲਭਿਤ੍વਾ ਕਰੋਨ੍ਤੀ’’ਤਿਆਦਿ। ਅਤਿਤਿਖਿਣਂ ਹੋਤਿ, ਅਞ੍ਞਤਰਂ ਅਯੋਬਨ੍ਧਨਂ ਫੇਗ੍ਗੁਦਣ੍ਡਂ વਿਯ ਸੁਖੇਨੇવ ਛਿਨ੍ਦਨ੍ਤਿ। ਸਸਬਿਲ਼ਾਰਚਮ੍ਮੇਹਿ ਸਙ੍ਘਟਿਤਟ੍ਠੇਨ ਸਙ੍ਘਾਟੀਤਿ વੁਚ੍ਚਤਿ ਆવੁਧਪਰਿਚ੍ਛਦੋਤਿ ਆਹ ‘‘ਸਙ੍ਘਾਟਿਯਾਤਿ ਕੋਸਿਯਾ’’ਤਿ। ਪਰਿਯੋਨਦ੍ਧਨ੍ਤਿ ਪਰਿਤੋ ਓਨਦ੍ਧਂ ਛਾਦਿਤਂ। ਸਮਨ੍ਤਤੋ વੇਠਿਤਨ੍ਤਿ ਸਬ੍ਬਸੋ ਪਿਹਿਤਂ।
436.Ete dhammāti ete pāḷiyaṃ āgatā abhijjhābyāpādādayo pāpadhammā. Uppajjamānāti uppajjamānā eva, pageva santāne bhāvitā. Malineti malavante kiliṭṭhe. Malaggahiteti gahitamale sañjātamale. Samaṇamalāti samaṇānaṃ samaṇabhāvassa malā. Dussantīti vipajjanti vinassanti. Samaṇadosāti samaṇānaṃ samaṇabhāvadūsanā. Kasaṭeti asāre. Nirojeti nitteje. Ayato sukhato apetāti apāyā, nirayādayo, taṃ phalaṃ arahanti, taṃ payojanaṃ vā etesanti āpāyikā. Ṭhānāni abhijjhādayo. Tenāha ‘‘apāye’’tiādi. Kāraṇabhāvena duggatipariyāpannāya vedanāya hitānīti duggativedaniyāni. Tena vuttaṃ ‘‘duggatiyaṃ vipākavedanāya paccayāna’’nti. Tikhiṇaṃ ayanti vekantakasadisaṃ sāraayaṃ. Ayenāti ayoghaṃsakena. Koñcasakuṇānaṃ kira kucchiyaṃ nivutthaṃ yaṃ kiñci kharaṃ tikhiṇañca hoti. Tathā hi tesaṃ vaccaṃ aṭṭhimpi pāsāṇampi vilīyāpeti. Tena vuttaṃ ‘‘koñcasakuṇe khādāpentī’’ti. Taṃ kira ayacuṇṇaṃ aggināpi kicchena dayhati, bhesajjabalena pana sukhena dayheyya. Tena vuttaṃ ‘‘susikkhitā ca naṃ ayakārā bahuhatthakammamūlaṃ labhitvā karontī’’tiādi. Atitikhiṇaṃ hoti, aññataraṃ ayobandhanaṃ pheggudaṇḍaṃ viya sukheneva chindanti. Sasabiḷāracammehi saṅghaṭitaṭṭhena saṅghāṭīti vuccati āvudhaparicchadoti āha ‘‘saṅghāṭiyāti kosiyā’’ti. Pariyonaddhanti parito onaddhaṃ chāditaṃ. Samantato veṭhitanti sabbaso pihitaṃ.
੪੩੭. ਰਜੋਤਿ ਆਗਨ੍ਤੁਕਰਜੋ। ਜਲ੍ਲਨ੍ਤਿ ਸਰੀਰੇ ਉਟ੍ਠਾਨਕਲੋਣਾਦਿਮਲਂ। ਰਜੋਜਲ੍ਲਞ੍ਚ વਤਸਮਾਦਾਨવਸੇਨ ਅਨਪਨੀਤਂ ਏਤਸ੍ਸ ਅਤ੍ਥੀਤਿ ਰਜੋਜਲ੍ਲਿਕੋ, ਤਸ੍ਸ। ਤੇਨਾਹ ‘‘ਰਜੋਜਲ੍ਲਧਾਰਿਨੋ’’ਤਿ। ਉਦਕਂ ਓਰੋਹਨ੍ਤਸ੍ਸਾਤਿਆਦੀਨਮਤ੍ਥੋ ਮਹਾਸੀਹਨਾਦਸੁਤ੍ਤવਣ੍ਣਨਾਯਂ વੁਤ੍ਤੋਯੇવ। ਸਬ੍ਬਮੇਤਨ੍ਤਿਆਦੀਸੁ ਸਬ੍ਬਸੋਪਿ વਤਸਮਾਦਾਨવਸੇਨਾਤਿ ਅਧਿਪ੍ਪਾਯੋ। ਯਸ੍ਮਾ ਸਬ੍ਬਮੇਤਂ ਬਾਹਿਰਸਮਯવਸੇਨੇવ ਕਥਿਤਂ, ਤਸ੍ਮਾ ਸਙ੍ਘਾਟਿਕਸ੍ਸਾਤਿ ਪਿਲੋਤਿਕਖਣ੍ਡੇਹਿ ਸਙ੍ਘਟਿਤਤ੍ਤਾ ‘‘ਸਙ੍ਘਾਟੀ’’ਤਿ ਲਦ੍ਧਨਾਮવਤ੍ਥਧਾਰਿਨੋਤਿ ਅਤ੍ਥੋ। ਤਥਾ ਹਿ ਪਾਲ਼ਿਯਂ ‘‘ਸਙ੍ਘਾਟਿਕਸ੍ਸ’’ਇਚ੍ਚੇવ વੁਤ੍ਤਂ, ਨ ‘‘ਭਿਕ੍ਖੁਨੋ’’ਤਿ। ਤੇਨਾਹ ‘‘ਇਮਸ੍ਮਿਂ ਹੀ’’ਤਿਆਦਿ। ਕਸ੍ਮਾ ਪਨੇਤ੍ਥ ਭਗવਤਾ ਸਙ੍ਘਾਟਿਕਤ੍ਤਾਦੀਨਿਯੇવ વਤਸਮਾਦਾਨਾਨਿ ਪਟਿਕ੍ਖਿਤ੍ਤਾਨੀਤਿ? ਨਯਦਸ੍ਸਨਮੇਤਂ ਅਞ੍ਞੇਸਮ੍ਪਿ ਪਞ੍ਚਾਤਪਮੂਗવਤਾਦੀਨਂ ਤਪ੍ਪਟਿਕ੍ਖੇਪੇਨੇવ ਪਸਿਦ੍ਧਿਤੋ। ਅਪਰੇ ਪਨ ਭਣਨ੍ਤਿ – ‘‘ਨਾਹਂ, ਭਿਕ੍ਖવੇ, ਸਙ੍ਘਾਟਿਕਸ੍ਸ ਸਙ੍ਘਾਟਿਧਾਰਣਮਤ੍ਤੇਨ ਸਾਮਞ੍ਞਂ વਦਾਮੀ’’ਤਿ વੁਤ੍ਤੇ ਤਤ੍ਥ ਨਿਸਿਨ੍ਨੋ ਕੋਚਿ ਤਿਤ੍ਥਨ੍ਤਰਲਦ੍ਧਿਕੋ ਅਚੇਲਕਤ੍ਤਂ ਨੁ ਖੋ ਕਥਨ੍ਤਿ ਚਿਨ੍ਤੇਸਿ, ਅਪਰੇ ਰਜੋਜਲ੍ਲਕਤ੍ਤਂ ਨੁ ਖੋ ਕਥਨ੍ਤਿ, ਏવਂ ਤਂ ਤਂ ਚਿਨ੍ਤੇਨ੍ਤਾਨਂ ਅਜ੍ਝਾਸਯવਸੇਨ ਭਗવਾ ਇਮਾਨੇવ વਤਸਮਾਦਾਨਾਨਿ ਇਧ ਪਟਿਕ੍ਖਿਪੀਤਿ। ਸਙ੍ਘਾਟਿਕਨ੍ਤਿ ਨਿવਾਸਨਪਾਰੁਪਨવਸੇਨ ਸਙ੍ਘਾਟਿવਨ੍ਤਂ। ਤੇਨਾਹ ‘‘ਸਙ੍ਘਾਟਿਕਂ વਤ੍ਥ’’ਨ੍ਤਿਆਦਿ। ਅਤ੍ਤਨੋ ਰੁਚਿਯਾ ਮਿਤ੍ਤਾਦਯੋ ਸਙ੍ਘਾਟਿਕਂ ਕਰੇਯ੍ਯੁਂ, ਪਚ੍ਛਾ વਿਞ੍ਞੁਤਂ ਪਤ੍ਤਕਾਲੇ ਸਙ੍ਘਾਟਿਕਤ੍ਤੇ ਸਮਾਦਪੇਯ੍ਯੁਂ।
437.Rajoti āgantukarajo. Jallanti sarīre uṭṭhānakaloṇādimalaṃ. Rajojallañca vatasamādānavasena anapanītaṃ etassa atthīti rajojalliko, tassa. Tenāha ‘‘rajojalladhārino’’ti. Udakaṃ orohantassātiādīnamattho mahāsīhanādasuttavaṇṇanāyaṃ vuttoyeva. Sabbametantiādīsu sabbasopi vatasamādānavasenāti adhippāyo. Yasmā sabbametaṃ bāhirasamayavaseneva kathitaṃ, tasmā saṅghāṭikassāti pilotikakhaṇḍehi saṅghaṭitattā ‘‘saṅghāṭī’’ti laddhanāmavatthadhārinoti attho. Tathā hi pāḷiyaṃ ‘‘saṅghāṭikassa’’icceva vuttaṃ, na ‘‘bhikkhuno’’ti. Tenāha ‘‘imasmiṃ hī’’tiādi. Kasmā panettha bhagavatā saṅghāṭikattādīniyeva vatasamādānāni paṭikkhittānīti? Nayadassanametaṃ aññesampi pañcātapamūgavatādīnaṃ tappaṭikkhepeneva pasiddhito. Apare pana bhaṇanti – ‘‘nāhaṃ, bhikkhave, saṅghāṭikassa saṅghāṭidhāraṇamattena sāmaññaṃ vadāmī’’ti vutte tattha nisinno koci titthantaraladdhiko acelakattaṃ nu kho kathanti cintesi, apare rajojallakattaṃ nu kho kathanti, evaṃ taṃ taṃ cintentānaṃ ajjhāsayavasena bhagavā imāneva vatasamādānāni idha paṭikkhipīti. Saṅghāṭikanti nivāsanapārupanavasena saṅghāṭivantaṃ. Tenāha ‘‘saṅghāṭikaṃ vattha’’ntiādi. Attano ruciyā mittādayo saṅghāṭikaṃ kareyyuṃ, pacchā viññutaṃ pattakāle saṅghāṭikatte samādapeyyuṃ.
੪੩੮. ਅਤ੍ਤਾਨਂ વਿਸੁਜ੍ਝਨ੍ਤਂ ਪਸ੍ਸਤਿ ਅਭਿਜ੍ਝਾਦੀਨਂ ਸਮੁਦਾਚਾਰਾਭਾવਤੋ। ਮਗ੍ਗੇਨ ਅਸਮੁਚ੍ਛਿਨ੍ਨਤ੍ਤਾ વਿਸੁਦ੍ਧੋਤਿ ਪਨ ਨ વਤ੍ਤਬ੍ਬੋ। ਪਾਮੋਜ੍ਜਨ੍ਤਿ ਤਰੁਣਪੀਤਿਮਾਹ। ਤਸ੍ਸ ਹਿ ਅਤ੍ਤਨੋ ਸਮ੍ਮਾਪਟਿਪਤ੍ਤਿਯਾ ਕਿਲੇਸਾਨਂ વਿਕ੍ਖਮ੍ਭਿਤਤ੍ਤਾ ਚਿਤ੍ਤਸ੍ਸ વਿਸੁਦ੍ਧਤਂ ਪਸ੍ਸਨ੍ਤਸ੍ਸ ਪਾਮੋਜ੍ਜਂ ਜਾਯਤਿ, ਤਂ ਤੁਟ੍ਠਾਕਾਰਂ। ਤੇਨਾਹ ‘‘ਤੁਟ੍ਠਾਕਾਰੋ’’ਤਿ। ਪੀਤੀਤਿ ਪਸ੍ਸਦ੍ਧਿਆવਹਾ ਬਲવਪੀਤਿ। ਨਾਮਕਾਯੋ ਪਸ੍ਸਮ੍ਭਤੀਤਿ ਇਮਿਨਾ ਉਭਯਮ੍ਪਿ ਪਸ੍ਸਦ੍ਧਿਂ વਦਤਿ। વੇਦਿਯਤੀਤਿ ਅਨੁਭવਤਿ વਿਨ੍ਦਤਿ। ਇਦਾਨਿ ਤੇਨ ਨੀવਰਣੇਹਿ ਚਿਤ੍ਤਸ੍ਸ વਿਸੋਧਨਤ੍ਤਂ ਲਦ੍ਧਨ੍ਤਿ ਆਹ ‘‘ਅਪ੍ਪਨਾਪ੍ਪਤ੍ਤਂ વਿਯ ਹੋਤੀ’’ਤਿ। ਅਞ੍ਞਤ੍ਥ ਉਟ੍ਠਿਤਾ ਅਞ੍ਞਂ ਠਾਨਂ ਉਪਗਤਾਤਿ ਏਤ੍ਤਕੇਨ ਉਪਮਾਭਾવੇਨ ਉਚ੍ਚਨੀਚਤਾਸਾਮਞ੍ਞੇਨ ਹੇਟ੍ਠਾ ਅਸਦ੍ਧਮ੍ਮਾਨਂ ਪਟਿਪਕ੍ਖવਸੇਨ ਦੇਸਨਾਯ ਪਰਿਯੋਸਾਪਿਤਤ੍ਤਾ વੁਤ੍ਤਂ ‘‘ਯਥਾਨੁਸਨ੍ਧਿਨਾ’’ਤਿ। ਮਹਾਸੀਹਨਾਦਸੁਤ੍ਤੇ ਮਗ੍ਗੋ ਪੋਕ੍ਖਰਣਿਯਾ ਉਪਮਿਤੋ ‘‘ਸੇਯ੍ਯਥਾਪਿ, ਸਾਰਿਪੁਤ੍ਤ, ਪੋਕ੍ਖਰਣੀ’’ਤਿਆਦਿਂ (ਮ॰ ਨਿ॰ ੧.੧੫੪) ਆਰਭਿਤ੍વਾ ਉਪਮਾਸਂਸਨ੍ਦਨੇ ‘‘ਤਥਾਯਂ ਪੁਗ੍ਗਲੋ ਪਟਿਪਨ੍ਨੋ, ਤਥਾ ਚ ਇਰਿਯਤਿ, ਤਞ੍ਚ ਮਗ੍ਗਂ ਸਮਾਰੁਲ਼੍ਹੋ, ਯਥਾ ਆਸવਾਨਂ ਖਯਾ’’ਤਿ (ਮ॰ ਨਿ॰ ੧.੧੫੪) વੁਤ੍ਤਤ੍ਤਾ। ਯਥਾ ਹਿ ਪੁਰਤ੍ਥਿਮਾਦਿਦਿਸਾਹਿ ਆਗਤਾ ਪੁਰਿਸਾ ਤਂ ਪੋਕ੍ਖਰਣਿਂ ਆਗਮ੍ਮ વਿਸੁਦ੍ਧਰੂਪਕਾਯਾ વਿਗਤਪਰਿਲ਼ਾਹਾ ਚ ਹੋਨ੍ਤਿ, ਏવਂ ਖਤ੍ਤਿਯਾਦਿਕੁਲਤੋ ਆਗਤਾ ਤਥਾਗਤਪ੍ਪવੇਦਿਤਂ ਧਮ੍ਮવਿਨਯਂ ਸਾਸਨਂ ਆਗਮ੍ਮ વਿਸੁਦ੍ਧਨਾਮਕਾਯਾ વਿਗਤਕਿਲੇਸਪਰਿਲ਼ਾਹਾ ਚ ਹੋਨ੍ਤਿ। ਤਸ੍ਮਾ ਸਬ੍ਬਕਿਲੇਸਾਨਂ ਸਮਿਤਤ੍ਤਾ ਪਰਮਤ੍ਥਸਮਣੋ ਹੋਤੀਤਿ। ਸੇਸਂ ਸੁવਿਞ੍ਞੇਯ੍ਯਮੇવ।
438.Attānaṃ visujjhantaṃ passati abhijjhādīnaṃ samudācārābhāvato. Maggena asamucchinnattā visuddhoti pana na vattabbo. Pāmojjanti taruṇapītimāha. Tassa hi attano sammāpaṭipattiyā kilesānaṃ vikkhambhitattā cittassa visuddhataṃ passantassa pāmojjaṃ jāyati, taṃ tuṭṭhākāraṃ. Tenāha ‘‘tuṭṭhākāro’’ti. Pītīti passaddhiāvahā balavapīti. Nāmakāyo passambhatīti iminā ubhayampi passaddhiṃ vadati. Vediyatīti anubhavati vindati. Idāni tena nīvaraṇehi cittassa visodhanattaṃ laddhanti āha ‘‘appanāppattaṃ viya hotī’’ti. Aññattha uṭṭhitā aññaṃ ṭhānaṃ upagatāti ettakena upamābhāvena uccanīcatāsāmaññena heṭṭhā asaddhammānaṃ paṭipakkhavasena desanāya pariyosāpitattā vuttaṃ ‘‘yathānusandhinā’’ti. Mahāsīhanādasutte maggo pokkharaṇiyā upamito ‘‘seyyathāpi, sāriputta, pokkharaṇī’’tiādiṃ (ma. ni. 1.154) ārabhitvā upamāsaṃsandane ‘‘tathāyaṃ puggalo paṭipanno, tathā ca iriyati, tañca maggaṃ samāruḷho, yathā āsavānaṃ khayā’’ti (ma. ni. 1.154) vuttattā. Yathā hi puratthimādidisāhi āgatā purisā taṃ pokkharaṇiṃ āgamma visuddharūpakāyā vigatapariḷāhā ca honti, evaṃ khattiyādikulato āgatā tathāgatappaveditaṃ dhammavinayaṃ sāsanaṃ āgamma visuddhanāmakāyā vigatakilesapariḷāhā ca honti. Tasmā sabbakilesānaṃ samitattā paramatthasamaṇo hotīti. Sesaṃ suviññeyyameva.
ਚੂਲ਼ਅਸ੍ਸਪੁਰਸੁਤ੍ਤવਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ।
Cūḷaassapurasuttavaṇṇanāya līnatthappakāsanā samattā.
ਨਿਟ੍ਠਿਤਾ ਚ ਮਹਾਯਮਕવਗ੍ਗવਣ੍ਣਨਾ।
Niṭṭhitā ca mahāyamakavaggavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੧੦. ਚੂਲ਼ਅਸ੍ਸਪੁਰਸੁਤ੍ਤਂ • 10. Cūḷaassapurasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੧੦. ਚੂਲ਼ਅਸ੍ਸਪੁਰਸੁਤ੍ਤવਣ੍ਣਨਾ • 10. Cūḷaassapurasuttavaṇṇanā
