| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
८८४.
884.
सकंसकंदिट्ठिपरिब्बसाना, विग्गय्ह नाना कुसला वदन्ति।
Sakaṃsakaṃdiṭṭhiparibbasānā, viggayha nānā kusalā vadanti;
यो एवं जानाति स वेदि धम्मं, इदं पटिक्कोसमकेवली सो॥
Yo evaṃ jānāti sa vedi dhammaṃ, idaṃ paṭikkosamakevalī so.
८८५.
885.
एवम्पि विग्गय्ह विवादयन्ति, बालो परो अक्कुसलोति 3 चाहु।
Evampi viggayha vivādayanti, bālo paro akkusaloti 4 cāhu;
सच्चो नु वादो कतमो इमेसं, सब्बेव हीमे कुसला वदाना॥
Sacco nu vādo katamo imesaṃ, sabbeva hīme kusalā vadānā.
८८६.
886.
परस्स चे धम्ममनानुजानं, बालोमको 5 होति निहीनपञ्ञो।
Parassa ce dhammamanānujānaṃ, bālomako 6 hoti nihīnapañño;
सब्बेव बाला सुनिहीनपञ्ञा, सब्बेविमे दिट्ठिपरिब्बसाना॥
Sabbeva bālā sunihīnapaññā, sabbevime diṭṭhiparibbasānā.
८८७.
887.
सन्दिट्ठिया चेव न वीवदाता, संसुद्धपञ्ञा कुसला मुतीमा।
Sandiṭṭhiyā ceva na vīvadātā, saṃsuddhapaññā kusalā mutīmā;
न तेसं कोचि परिहीनपञ्ञो 7, दिट्ठी हि तेसम्पि तथा समत्ता॥
Na tesaṃ koci parihīnapañño 8, diṭṭhī hi tesampi tathā samattā.
८८८.
888.
न वाहमेतं तथियन्ति 9 ब्रूमि, यमाहु बाला मिथु अञ्ञमञ्ञं।
Na vāhametaṃ tathiyanti 10 brūmi, yamāhu bālā mithu aññamaññaṃ;
सकंसकंदिट्ठिमकंसु सच्चं, तस्मा हि बालोति परं दहन्ति॥
Sakaṃsakaṃdiṭṭhimakaṃsu saccaṃ, tasmā hi bāloti paraṃ dahanti.
८८९.
889.
यमाहु सच्चं तथियन्ति एके, तमाहु अञ्ञे 11 तुच्छं मुसाति।
Yamāhu saccaṃ tathiyanti eke, tamāhu aññe 12 tucchaṃ musāti;
एवम्पि विगय्ह विवादयन्ति, कस्मा न एकं समणा वदन्ति॥
Evampi vigayha vivādayanti, kasmā na ekaṃ samaṇā vadanti.
८९०.
890.
एकञ्हि सच्चं न दुतीयमत्थि, यस्मिं पजा नो विवदे पजानं।
Ekañhi saccaṃ na dutīyamatthi, yasmiṃ pajā no vivade pajānaṃ;
नाना ते 13 सच्चानि सयं थुनन्ति, तस्मा न एकं समणा वदन्ति॥
Nānā te 14 saccāni sayaṃ thunanti, tasmā na ekaṃ samaṇā vadanti.
८९१.
891.
कस्मा नु सच्चानि वदन्ति नाना, पवादियासे कुसला वदाना।
Kasmā nu saccāni vadanti nānā, pavādiyāse kusalā vadānā;
सच्चानि सुतानि बहूनि नाना, उदाहु ते तक्कमनुस्सरन्ति॥
Saccāni sutāni bahūni nānā, udāhu te takkamanussaranti.
८९२.
892.
न हेव सच्चानि बहूनि नाना, अञ्ञत्र सञ्ञाय निच्चानि लोके।
Na heva saccāni bahūni nānā, aññatra saññāya niccāni loke;
तक्कञ्च दिट्ठीसु पकप्पयित्वा, सच्चं मुसाति द्वयधम्ममाहु॥
Takkañca diṭṭhīsu pakappayitvā, saccaṃ musāti dvayadhammamāhu.
८९३.
893.
दिट्ठे सुते सीलवते मुते वा, एते च निस्साय विमानदस्सी।
Diṭṭhe sute sīlavate mute vā, ete ca nissāya vimānadassī;
विनिच्छये ठत्वा पहस्समानो, बालो परो अक्कुसलोति चाह॥
Vinicchaye ṭhatvā pahassamāno, bālo paro akkusaloti cāha.
८९४.
894.
येनेव बालोति परं दहाति, तेनातुमानं कुसलोति चाह।
Yeneva bāloti paraṃ dahāti, tenātumānaṃ kusaloti cāha;
सयमत्तना सो कुसलो वदानो, अञ्ञं विमानेति तदेव पाव॥
Sayamattanā so kusalo vadāno, aññaṃ vimāneti tadeva pāva.
८९५.
895.
अतिसारदिट्ठियाव सो समत्तो, मानेन मत्तो परिपुण्णमानी।
Atisāradiṭṭhiyāva so samatto, mānena matto paripuṇṇamānī;
सयमेव सामं मनसाभिसित्तो, दिट्ठी हि सा तस्स तथा समत्ता॥
Sayameva sāmaṃ manasābhisitto, diṭṭhī hi sā tassa tathā samattā.
८९६.
896.
परस्स चे हि वचसा निहीनो, तुमो सहा होति निहीनपञ्ञो।
Parassa ce hi vacasā nihīno, tumo sahā hoti nihīnapañño;
अथ चे सयं वेदगू होति धीरो, न कोचि बालो समणेसु अत्थि॥
Atha ce sayaṃ vedagū hoti dhīro, na koci bālo samaṇesu atthi.
८९७.
897.
अञ्ञं इतो याभिवदन्ति धम्मं, अपरद्धा सुद्धिमकेवली ते 15।
Aññaṃ ito yābhivadanti dhammaṃ, aparaddhā suddhimakevalī te 16;
एवम्पि तित्थ्या पुथुसो वदन्ति, सन्दिट्ठिरागेन हि तेभिरत्ता 17॥
Evampi titthyā puthuso vadanti, sandiṭṭhirāgena hi tebhirattā 18.
८९८.
898.
इधेव सुद्धि इति वादयन्ति, नाञ्ञेसु धम्मेसु विसुद्धिमाहु।
Idheva suddhi iti vādayanti, nāññesu dhammesu visuddhimāhu;
एवम्पि तित्थ्या पुथुसो निविट्ठा, सकायने तत्थ दळ्हं वदाना॥
Evampi titthyā puthuso niviṭṭhā, sakāyane tattha daḷhaṃ vadānā.
८९९.
899.
सकायने वापि दळ्हं वदानो, कमेत्थ बालोति परं दहेय्य।
Sakāyane vāpi daḷhaṃ vadāno, kamettha bāloti paraṃ daheyya;
सयमेव सो मेधगमावहेय्य 19, परं वदं बालमसुद्धिधम्मं॥
Sayameva so medhagamāvaheyya 20, paraṃ vadaṃ bālamasuddhidhammaṃ.
९००.
900.
विनिच्छये ठत्वा सयं पमाय, उद्धं स 21 लोकस्मिं विवादमेति।
Vinicchaye ṭhatvā sayaṃ pamāya, uddhaṃ sa 22 lokasmiṃ vivādameti;
हित्वान सब्बानि विनिच्छयानि, न मेधगं कुब्बति जन्तु लोकेति॥
Hitvāna sabbāni vinicchayāni, na medhagaṃ kubbati jantu loketi.
चूळब्यूहसुत्तं द्वादसमं निट्ठितं।
Cūḷabyūhasuttaṃ dvādasamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / १२. चूळब्यूहसुत्तवण्णना • 12. Cūḷabyūhasuttavaṇṇanā
