| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๘๘๔.
884.
สกํสกํทิฎฺฐิปริพฺพสานา, วิคฺคยฺห นานา กุสลา วทนฺติ;
Sakaṃsakaṃdiṭṭhiparibbasānā, viggayha nānā kusalā vadanti;
โย เอวํ ชานาติ ส เวทิ ธมฺมํ, อิทํ ปฎิโกฺกสมเกวลี โสฯ
Yo evaṃ jānāti sa vedi dhammaṃ, idaṃ paṭikkosamakevalī so.
๘๘๕.
885.
เอวมฺปิ วิคฺคยฺห วิวาทยนฺติ, พาโล ปโร อกฺกุสโลติ 3 จาหุ;
Evampi viggayha vivādayanti, bālo paro akkusaloti 4 cāhu;
สโจฺจ นุ วาโท กตโม อิเมสํ, สเพฺพว หีเม กุสลา วทานาฯ
Sacco nu vādo katamo imesaṃ, sabbeva hīme kusalā vadānā.
๘๘๖.
886.
ปรสฺส เจ ธมฺมมนานุชานํ, พาโลมโก 5 โหติ นิหีนปโญฺญ;
Parassa ce dhammamanānujānaṃ, bālomako 6 hoti nihīnapañño;
สเพฺพว พาลา สุนิหีนปญฺญา, สเพฺพวิเม ทิฎฺฐิปริพฺพสานาฯ
Sabbeva bālā sunihīnapaññā, sabbevime diṭṭhiparibbasānā.
๘๘๗.
887.
สนฺทิฎฺฐิยา เจว น วีวทาตา, สํสุทฺธปญฺญา กุสลา มุตีมา;
Sandiṭṭhiyā ceva na vīvadātā, saṃsuddhapaññā kusalā mutīmā;
น เตสํ โกจิ ปริหีนปโญฺญ 7, ทิฎฺฐี หิ เตสมฺปิ ตถา สมตฺตาฯ
Na tesaṃ koci parihīnapañño 8, diṭṭhī hi tesampi tathā samattā.
๘๘๘.
888.
น วาหเมตํ ตถิยนฺติ 9 พฺรูมิ, ยมาหุ พาลา มิถุ อญฺญมญฺญํ;
Na vāhametaṃ tathiyanti 10 brūmi, yamāhu bālā mithu aññamaññaṃ;
สกํสกํทิฎฺฐิมกํสุ สจฺจํ, ตสฺมา หิ พาโลติ ปรํ ทหนฺติฯ
Sakaṃsakaṃdiṭṭhimakaṃsu saccaṃ, tasmā hi bāloti paraṃ dahanti.
๘๘๙.
889.
ยมาหุ สจฺจํ ตถิยนฺติ เอเก, ตมาหุ อเญฺญ 11 ตุจฺฉํ มุสาติ;
Yamāhu saccaṃ tathiyanti eke, tamāhu aññe 12 tucchaṃ musāti;
เอวมฺปิ วิคยฺห วิวาทยนฺติ, กสฺมา น เอกํ สมณา วทนฺติฯ
Evampi vigayha vivādayanti, kasmā na ekaṃ samaṇā vadanti.
๘๙๐.
890.
เอกญฺหิ สจฺจํ น ทุตียมตฺถิ, ยสฺมิํ ปชา โน วิวเท ปชานํ;
Ekañhi saccaṃ na dutīyamatthi, yasmiṃ pajā no vivade pajānaṃ;
นานา เต 13 สจฺจานิ สยํ ถุนนฺติ, ตสฺมา น เอกํ สมณา วทนฺติฯ
Nānā te 14 saccāni sayaṃ thunanti, tasmā na ekaṃ samaṇā vadanti.
๘๙๑.
891.
กสฺมา นุ สจฺจานิ วทนฺติ นานา, ปวาทิยาเส กุสลา วทานา;
Kasmā nu saccāni vadanti nānā, pavādiyāse kusalā vadānā;
สจฺจานิ สุตานิ พหูนิ นานา, อุทาหุ เต ตกฺกมนุสฺสรนฺติฯ
Saccāni sutāni bahūni nānā, udāhu te takkamanussaranti.
๘๙๒.
892.
น เหว สจฺจานิ พหูนิ นานา, อญฺญตฺร สญฺญาย นิจฺจานิ โลเก;
Na heva saccāni bahūni nānā, aññatra saññāya niccāni loke;
ตกฺกญฺจ ทิฎฺฐีสุ ปกปฺปยิตฺวา, สจฺจํ มุสาติ ทฺวยธมฺมมาหุฯ
Takkañca diṭṭhīsu pakappayitvā, saccaṃ musāti dvayadhammamāhu.
๘๙๓.
893.
ทิเฎฺฐ สุเต สีลวเต มุเต วา, เอเต จ นิสฺสาย วิมานทสฺสี;
Diṭṭhe sute sīlavate mute vā, ete ca nissāya vimānadassī;
วินิจฺฉเย ฐตฺวา ปหสฺสมาโน, พาโล ปโร อกฺกุสโลติ จาหฯ
Vinicchaye ṭhatvā pahassamāno, bālo paro akkusaloti cāha.
๘๙๔.
894.
เยเนว พาโลติ ปรํ ทหาติ, เตนาตุมานํ กุสโลติ จาห;
Yeneva bāloti paraṃ dahāti, tenātumānaṃ kusaloti cāha;
สยมตฺตนา โส กุสโล วทาโน, อญฺญํ วิมาเนติ ตเทว ปาวฯ
Sayamattanā so kusalo vadāno, aññaṃ vimāneti tadeva pāva.
๘๙๕.
895.
อติสารทิฎฺฐิยาว โส สมโตฺต, มาเนน มโตฺต ปริปุณฺณมานี;
Atisāradiṭṭhiyāva so samatto, mānena matto paripuṇṇamānī;
สยเมว สามํ มนสาภิสิโตฺต, ทิฎฺฐี หิ สา ตสฺส ตถา สมตฺตาฯ
Sayameva sāmaṃ manasābhisitto, diṭṭhī hi sā tassa tathā samattā.
๘๙๖.
896.
ปรสฺส เจ หิ วจสา นิหีโน, ตุโม สหา โหติ นิหีนปโญฺญ;
Parassa ce hi vacasā nihīno, tumo sahā hoti nihīnapañño;
อถ เจ สยํ เวทคู โหติ ธีโร, น โกจิ พาโล สมเณสุ อตฺถิฯ
Atha ce sayaṃ vedagū hoti dhīro, na koci bālo samaṇesu atthi.
๘๙๗.
897.
อญฺญํ อิโต ยาภิวทนฺติ ธมฺมํ, อปรทฺธา สุทฺธิมเกวลี เต 15;
Aññaṃ ito yābhivadanti dhammaṃ, aparaddhā suddhimakevalī te 16;
เอวมฺปิ ติตฺถฺยา ปุถุโส วทนฺติ, สนฺทิฎฺฐิราเคน หิ เตภิรตฺตา 17ฯ
Evampi titthyā puthuso vadanti, sandiṭṭhirāgena hi tebhirattā 18.
๘๙๘.
898.
อิเธว สุทฺธิ อิติ วาทยนฺติ, นาเญฺญสุ ธเมฺมสุ วิสุทฺธิมาหุ;
Idheva suddhi iti vādayanti, nāññesu dhammesu visuddhimāhu;
เอวมฺปิ ติตฺถฺยา ปุถุโส นิวิฎฺฐา, สกายเน ตตฺถ ทฬฺหํ วทานาฯ
Evampi titthyā puthuso niviṭṭhā, sakāyane tattha daḷhaṃ vadānā.
๘๙๙.
899.
สกายเน วาปิ ทฬฺหํ วทาโน, กเมตฺถ พาโลติ ปรํ ทเหยฺย;
Sakāyane vāpi daḷhaṃ vadāno, kamettha bāloti paraṃ daheyya;
สยเมว โส เมธคมาวเหยฺย 19, ปรํ วทํ พาลมสุทฺธิธมฺมํฯ
Sayameva so medhagamāvaheyya 20, paraṃ vadaṃ bālamasuddhidhammaṃ.
๙๐๐.
900.
วินิจฺฉเย ฐตฺวา สยํ ปมาย, อุทฺธํ ส 21 โลกสฺมิํ วิวาทเมติ;
Vinicchaye ṭhatvā sayaṃ pamāya, uddhaṃ sa 22 lokasmiṃ vivādameti;
หิตฺวาน สพฺพานิ วินิจฺฉยานิ, น เมธคํ กุพฺพติ ชนฺตุ โลเกติฯ
Hitvāna sabbāni vinicchayāni, na medhagaṃ kubbati jantu loketi.
จูฬพฺยูหสุตฺตํ ทฺวาทสมํ นิฎฺฐิตํฯ
Cūḷabyūhasuttaṃ dvādasamaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๑๒. จูฬพฺยูหสุตฺตวณฺณนา • 12. Cūḷabyūhasuttavaṇṇanā
