| Library / Tipiṭaka / තිපිටක • Tipiṭaka / සුත්‌තනිපාතපාළි • Suttanipātapāḷi |
884.
884.
සකංසකංදිට්‌ඨිපරිබ්‌බසානා, විග්‌ගය්‌හ නානා කුසලා වදන්‌ති;
Sakaṃsakaṃdiṭṭhiparibbasānā, viggayha nānā kusalā vadanti;
යො එවං ජානාති ස වෙදි ධම්‌මං, ඉදං පටික්‌කොසමකෙවලී සො.
Yo evaṃ jānāti sa vedi dhammaṃ, idaṃ paṭikkosamakevalī so.
885.
885.
එවම්‌පි විග්‌ගය්‌හ විවාදයන්‌ති, බාලො පරො අක්‌කුසලොති 3 චාහු;
Evampi viggayha vivādayanti, bālo paro akkusaloti 4 cāhu;
සච්‌චො නු වාදො කතමො ඉමෙසං, සබ්‌බෙව හීමෙ කුසලා වදානා.
Sacco nu vādo katamo imesaṃ, sabbeva hīme kusalā vadānā.
886.
886.
පරස්‌ස චෙ ධම්‌මමනානුජානං, බාලොමකො 5 හොති නිහීනපඤ්‌ඤො;
Parassa ce dhammamanānujānaṃ, bālomako 6 hoti nihīnapañño;
සබ්‌බෙව බාලා සුනිහීනපඤ්‌ඤා, සබ්‌බෙවිමෙ දිට්‌ඨිපරිබ්‌බසානා.
Sabbeva bālā sunihīnapaññā, sabbevime diṭṭhiparibbasānā.
887.
887.
සන්‌දිට්‌ඨියා චෙව න වීවදාතා, සංසුද්‌ධපඤ්‌ඤා කුසලා මුතීමා;
Sandiṭṭhiyā ceva na vīvadātā, saṃsuddhapaññā kusalā mutīmā;
න තෙසං කොචි පරිහීනපඤ්‌ඤො 7, දිට්‌ඨී හි තෙසම්‌පි තථා සමත්‌තා.
Na tesaṃ koci parihīnapañño 8, diṭṭhī hi tesampi tathā samattā.
888.
888.
න වාහමෙතං තථියන්‌ති 9 බ්‍රූමි, යමාහු බාලා මිථු අඤ්‌ඤමඤ්‌ඤං;
Na vāhametaṃ tathiyanti 10 brūmi, yamāhu bālā mithu aññamaññaṃ;
සකංසකංදිට්‌ඨිමකංසු සච්‌චං, තස්‌මා හි බාලොති පරං දහන්‌ති.
Sakaṃsakaṃdiṭṭhimakaṃsu saccaṃ, tasmā hi bāloti paraṃ dahanti.
889.
889.
යමාහු සච්‌චං තථියන්‌ති එකෙ, තමාහු අඤ්‌ඤෙ 11 තුච්‌ඡං මුසාති;
Yamāhu saccaṃ tathiyanti eke, tamāhu aññe 12 tucchaṃ musāti;
එවම්‌පි විගය්‌හ විවාදයන්‌ති, කස්‌මා න එකං සමණා වදන්‌ති.
Evampi vigayha vivādayanti, kasmā na ekaṃ samaṇā vadanti.
890.
890.
එකඤ්‌හි සච්‌චං න දුතීයමත්‌ථි, යස්‌මිං පජා නො විවදෙ පජානං;
Ekañhi saccaṃ na dutīyamatthi, yasmiṃ pajā no vivade pajānaṃ;
නානා තෙ 13 සච්‌චානි සයං ථුනන්‌ති, තස්‌මා න එකං සමණා වදන්‌ති.
Nānā te 14 saccāni sayaṃ thunanti, tasmā na ekaṃ samaṇā vadanti.
891.
891.
කස්‌මා නු සච්‌චානි වදන්‌ති නානා, පවාදියාසෙ කුසලා වදානා;
Kasmā nu saccāni vadanti nānā, pavādiyāse kusalā vadānā;
සච්‌චානි සුතානි බහූනි නානා, උදාහු තෙ තක්‌කමනුස්‌සරන්‌ති.
Saccāni sutāni bahūni nānā, udāhu te takkamanussaranti.
892.
892.
න හෙව සච්‌චානි බහූනි නානා, අඤ්‌ඤත්‍ර සඤ්‌ඤාය නිච්‌චානි ලොකෙ;
Na heva saccāni bahūni nānā, aññatra saññāya niccāni loke;
තක්‌කඤ්‌ච දිට්‌ඨීසු පකප්‌පයිත්‌වා, සච්‌චං මුසාති ද්‌වයධම්‌මමාහු.
Takkañca diṭṭhīsu pakappayitvā, saccaṃ musāti dvayadhammamāhu.
893.
893.
දිට්‌ඨෙ සුතෙ සීලවතෙ මුතෙ වා, එතෙ ච නිස්‌සාය විමානදස්‌සී;
Diṭṭhe sute sīlavate mute vā, ete ca nissāya vimānadassī;
විනිච්‌ඡයෙ ඨත්‌වා පහස්‌සමානො, බාලො පරො අක්‌කුසලොති චාහ.
Vinicchaye ṭhatvā pahassamāno, bālo paro akkusaloti cāha.
894.
894.
යෙනෙව බාලොති පරං දහාති, තෙනාතුමානං කුසලොති චාහ;
Yeneva bāloti paraṃ dahāti, tenātumānaṃ kusaloti cāha;
සයමත්‌තනා සො කුසලො වදානො, අඤ්‌ඤං විමානෙති තදෙව පාව.
Sayamattanā so kusalo vadāno, aññaṃ vimāneti tadeva pāva.
895.
895.
අතිසාරදිට්‌ඨියාව සො සමත්‌තො, මානෙන මත්‌තො පරිපුණ්‌ණමානී;
Atisāradiṭṭhiyāva so samatto, mānena matto paripuṇṇamānī;
සයමෙව සාමං මනසාභිසිත්‌තො, දිට්‌ඨී හි සා තස්‌ස තථා සමත්‌තා.
Sayameva sāmaṃ manasābhisitto, diṭṭhī hi sā tassa tathā samattā.
896.
896.
පරස්‌ස චෙ හි වචසා නිහීනො, තුමො සහා හොති නිහීනපඤ්‌ඤො;
Parassa ce hi vacasā nihīno, tumo sahā hoti nihīnapañño;
අථ චෙ සයං වෙදගූ හොති ධීරො, න කොචි බාලො සමණෙසු අත්‌ථි.
Atha ce sayaṃ vedagū hoti dhīro, na koci bālo samaṇesu atthi.
897.
897.
අඤ්‌ඤං ඉතො යාභිවදන්‌ති ධම්‌මං, අපරද්‌ධා සුද්‌ධිමකෙවලී තෙ 15;
Aññaṃ ito yābhivadanti dhammaṃ, aparaddhā suddhimakevalī te 16;
එවම්‌පි තිත්‌ථ්‍යා පුථුසො වදන්‌ති, සන්‌දිට්‌ඨිරාගෙන හි තෙභිරත්‌තා 17.
Evampi titthyā puthuso vadanti, sandiṭṭhirāgena hi tebhirattā 18.
898.
898.
ඉධෙව සුද්‌ධි ඉති වාදයන්‌ති, නාඤ්‌ඤෙසු ධම්‌මෙසු විසුද්‌ධිමාහු;
Idheva suddhi iti vādayanti, nāññesu dhammesu visuddhimāhu;
එවම්‌පි තිත්‌ථ්‍යා පුථුසො නිවිට්‌ඨා, සකායනෙ තත්‌ථ දළ්‌හං වදානා.
Evampi titthyā puthuso niviṭṭhā, sakāyane tattha daḷhaṃ vadānā.
899.
899.
සකායනෙ වාපි දළ්‌හං වදානො, කමෙත්‌ථ බාලොති පරං දහෙය්‍ය;
Sakāyane vāpi daḷhaṃ vadāno, kamettha bāloti paraṃ daheyya;
සයමෙව සො මෙධගමාවහෙය්‍ය 19, පරං වදං බාලමසුද්‌ධිධම්‌මං.
Sayameva so medhagamāvaheyya 20, paraṃ vadaṃ bālamasuddhidhammaṃ.
900.
900.
විනිච්‌ඡයෙ ඨත්‌වා සයං පමාය, උද්‌ධං ස 21 ලොකස්‌මිං විවාදමෙති;
Vinicchaye ṭhatvā sayaṃ pamāya, uddhaṃ sa 22 lokasmiṃ vivādameti;
හිත්‌වාන සබ්‌බානි විනිච්‌ඡයානි, න මෙධගං කුබ්‌බති ජන්‌තු ලොකෙති.
Hitvāna sabbāni vinicchayāni, na medhagaṃ kubbati jantu loketi.
චූළබ්‍යූහසුත්‌තං ද්‌වාදසමං නිට්‌ඨිතං.
Cūḷabyūhasuttaṃ dvādasamaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / සුත්‌තනිපාත-අට්‌ඨකථා • Suttanipāta-aṭṭhakathā / 12. චූළබ්‍යූහසුත්‌තවණ්‌ණනා • 12. Cūḷabyūhasuttavaṇṇanā
