| Library / Tipiṭaka / திபிடக • Tipiṭaka / மஹானித்³தே³ஸ-அட்ட²கதா² • Mahāniddesa-aṭṭhakathā |
12. சூளப்³யூஹஸுத்தனித்³தே³ஸவண்ணனா
12. Cūḷabyūhasuttaniddesavaṇṇanā
த்³வாத³ஸமே சூளப்³யூஹஸுத்தனித்³தே³ஸே ஸகங்ஸகங்தி³ட்டி²பரிப்³ப³ஸானாதி இத³ம்பி தஸ்மிங்யேவ மஹாஸமயே ‘‘ஸப்³பே³பிமே தி³ட்டி²க³திகா ‘ஸாது⁴ரூபாம்ஹா’தி ப⁴ணந்தி, கிங் நு கோ² ஸாது⁴ரூபாவ இமே அத்தனோ ஏவ தி³ட்டி²யா பதிட்ட²ஹந்தி, உதா³ஹு அஞ்ஞம்பி தி³ட்டி²ங் க³ண்ஹந்தீ’’தி உப்பன்னசித்தானங் ஏகச்சானங் தே³வதானங் தமத்த²ங் பகாஸேதுங் புரிமனயேனேவ நிம்மிதபு³த்³தே⁴ன அத்தானங் புச்சா²பெத்வா வுத்தங்.
Dvādasame cūḷabyūhasuttaniddese sakaṃsakaṃdiṭṭhiparibbasānāti idampi tasmiṃyeva mahāsamaye ‘‘sabbepime diṭṭhigatikā ‘sādhurūpāmhā’ti bhaṇanti, kiṃ nu kho sādhurūpāva ime attano eva diṭṭhiyā patiṭṭhahanti, udāhu aññampi diṭṭhiṃ gaṇhantī’’ti uppannacittānaṃ ekaccānaṃ devatānaṃ tamatthaṃ pakāsetuṃ purimanayeneva nimmitabuddhena attānaṃ pucchāpetvā vuttaṃ.
113. தத்த² ஆதி³தோ த்³வேபி கா³தா² புச்சா²கா³தா²யேவ. தாஸு ஸகங் ஸகங் தி³ட்டி²பரிப்³ப³ஸானாதி அத்தனோ அத்தனோ தி³ட்டி²யா வஸமானா. விக்³க³ய்ஹ நானா குஸலா வத³ந்தீதி தங் தி³ட்டி²ங் ப³லவக்³கா³ஹங் க³ஹெத்வா ‘‘தத்த² குஸலாம்ஹா’’தி படிஜானமானா புது² புது² வத³ந்தி, ஏகங் ந வத³ந்தி. யோ ஏவங் ஜானாதி ஸ வேதி³ த⁴ம்மங், இத³ங் படிக்கோஸமகேவலீ ஸோதி தஞ்ச தி³ட்டி²ங் ஸந்தா⁴ய யோ ஏவங் ஜானாதி, ஸோ த⁴ம்மங் வேதி³யி. இத³ங் பன படிக்கோஸந்தோ ஹீனோ ஹோதீதி ச வத³ந்தி.
113. Tattha ādito dvepi gāthā pucchāgāthāyeva. Tāsu sakaṃ sakaṃ diṭṭhiparibbasānāti attano attano diṭṭhiyā vasamānā. Viggayha nānā kusalā vadantīti taṃ diṭṭhiṃ balavaggāhaṃ gahetvā ‘‘tattha kusalāmhā’’ti paṭijānamānā puthu puthu vadanti, ekaṃ na vadanti. Yo evaṃ jānāti sa vedi dhammaṃ, idaṃ paṭikkosamakevalī soti tañca diṭṭhiṃ sandhāya yo evaṃ jānāti, so dhammaṃ vediyi. Idaṃ pana paṭikkosanto hīno hotīti ca vadanti.
நானா வத³ந்தீதி நானாகாரணங் ப⁴ணந்தி. விவித⁴ங் வத³ந்தீதி நானாவித⁴ங் ப⁴ணந்தி. அஞ்ஞோஞ்ஞங் வத³ந்தீதி ஏகங் அவத்வா அஞ்ஞங் அஞ்ஞங் க³ஹெத்வா வத³ந்தி. அகேவலீ ஸோதி யோ அகுஸலோ அயங். அஸமத்தோதி ந பரிபூரோ. அபரிபுண்ணோதி ந ஸம்புண்ணோ.
Nānā vadantīti nānākāraṇaṃ bhaṇanti. Vividhaṃ vadantīti nānāvidhaṃ bhaṇanti. Aññoññaṃ vadantīti ekaṃ avatvā aññaṃ aññaṃ gahetvā vadanti. Akevalī soti yo akusalo ayaṃ. Asamattoti na paripūro. Aparipuṇṇoti na sampuṇṇo.
114. பா³லோதி ஹீனோ. அக்குஸலோதி அவித்³வா.
114.Bāloti hīno. Akkusaloti avidvā.
115. இதா³னி திஸ்ஸோ விஸ்ஸஜ்ஜனகா³தா² ஹொந்தீதி. தா புரிமட்³டே⁴ன வுத்தமத்த²ங் பச்சி²மட்³டே⁴ன படிப்³யூஹித்வா டி²தா. தேன ப்³யூஹேன உத்தரஸுத்ததோ ச அப்பகத்தா இத³ங் ஸுத்தங் ‘‘சூளப்³யூஹ’’ந்தி நாமங் லபி⁴. தத்த² பட²மகா³தா²யங் தாவ பரஸ்ஸ சே த⁴ம்மந்தி பரஸ்ஸ தி³ட்டி²ங். ஸப்³பே³விமே பா³லாதி ஏவங் ஸந்தே ஸப்³பே³வ இமே பா³லா ஹொந்தீதி அதி⁴ப்பாயோ. கிங்காரணா? ஸப்³பே³விமே தி³ட்டி²பரிப்³ப³ஸானாதி.
115. Idāni tisso vissajjanagāthā hontīti. Tā purimaḍḍhena vuttamatthaṃ pacchimaḍḍhena paṭibyūhitvā ṭhitā. Tena byūhena uttarasuttato ca appakattā idaṃ suttaṃ ‘‘cūḷabyūha’’nti nāmaṃ labhi. Tattha paṭhamagāthāyaṃ tāva parassa ce dhammanti parassa diṭṭhiṃ. Sabbevime bālāti evaṃ sante sabbeva ime bālā hontīti adhippāyo. Kiṃkāraṇā? Sabbevime diṭṭhiparibbasānāti.
116. ஸந்தி³ட்டி²யா சேவ ந வீவதா³தா, ஸங்ஸுத்³த⁴பஞ்ஞா குஸலா முதீமாதி ஸகாய தி³ட்டி²யா அனவீவதா³தா அவோதா³தா ஸங்கிலிட்டா²வ ஸமானா ஸங்ஸுத்³த⁴பஞ்ஞா ச குஸலா ச முதிமந்தோ ச தே ஹொந்தி சே. அத² வா ‘‘ஸந்தி³ட்டி²யா சே வதா³தா’’தி பாடோ², தஸ்ஸத்தோ² – ஸகாய பன தி³ட்டி²யா வோதா³தா ஸங்ஸுத்³த⁴பஞ்ஞா குஸலா முதிமந்தோ ஹொந்தி சே, ந தேஸங் கோசீதி ஏவங் ஸந்தே தேஸங் ஏகோபி நிஹீனபஞ்ஞோ ந ஹோதி, கிங்காரணா? தி³ட்டீ² ஹி தேஸம்பி ததா² ஸமத்தா, யதா² இதரேஸந்தி.
116.Sandiṭṭhiyāceva na vīvadātā, saṃsuddhapaññā kusalā mutīmāti sakāya diṭṭhiyā anavīvadātā avodātā saṃkiliṭṭhāva samānā saṃsuddhapaññā ca kusalā ca mutimanto ca te honti ce. Atha vā ‘‘sandiṭṭhiyā ce vadātā’’ti pāṭho, tassattho – sakāya pana diṭṭhiyā vodātā saṃsuddhapaññā kusalā mutimanto honti ce, na tesaṃ kocīti evaṃ sante tesaṃ ekopi nihīnapañño na hoti, kiṃkāraṇā? Diṭṭhī hi tesampi tathā samattā, yathā itaresanti.
117. ந வாஹமேதந்தி கா³தா²ய ஸங்கே²பத்தோ² – யங் தே மிது² த்³வே த்³வே ஜனா அஞ்ஞமஞ்ஞங் ‘‘பா³லோ’’தி ஆஹு, அஹங் ஏதங் ததி²யந்தி தச்ச²ந்தி நேவ ப்³ரூமி. கிங்காரணா? யஸ்மா ஸப்³பே³வ தே ஸகங் ஸகங் தி³ட்டி²ங் ‘‘இத³மேவ ஸச்சங் மோக⁴மஞ்ஞ’’ந்தி அகங்ஸு, தேன ச காரணேன பரங் ‘‘பா³லோ’’தி த³ஹந்தி. எத்த² ச ததி²யங், ததே²வந்தி (ஸு॰ நி॰ அட்ட²॰ 2.889) த்³வேபி பாடா².
117.Na vāhametanti gāthāya saṅkhepattho – yaṃ te mithu dve dve janā aññamaññaṃ ‘‘bālo’’ti āhu, ahaṃ etaṃ tathiyanti tacchanti neva brūmi. Kiṃkāraṇā? Yasmā sabbeva te sakaṃ sakaṃ diṭṭhiṃ ‘‘idameva saccaṃ moghamañña’’nti akaṃsu, tena ca kāraṇena paraṃ ‘‘bālo’’ti dahanti. Ettha ca tathiyaṃ, tathevanti (su. ni. aṭṭha. 2.889) dvepi pāṭhā.
தச்ச²ந்தி அதுச்ச²ங். தத²ந்தி அவிபரீதங், பூ⁴தந்தி ஸந்தங். யாதா²வந்தி ஸங்விஜ்ஜமானங். அவிபரிதந்தி ந விஸங்கேதங்.
Tacchanti atucchaṃ. Tathanti aviparītaṃ, bhūtanti santaṃ. Yāthāvanti saṃvijjamānaṃ. Aviparitanti na visaṅketaṃ.
118. யமாஹூதி புச்சா²கா³தா²ய ‘‘யங் தி³ட்டி²ஸச்சங் ததி²ய’’ந்தி ஏகே ஆஹு.
118.Yamāhūti pucchāgāthāya ‘‘yaṃ diṭṭhisaccaṃ tathiya’’nti eke āhu.
119. ஏகஞ்ஹி ஸச்சந்தி விஸ்ஸஜ்ஜனகா³தா²ய ஏகங் ஸச்சங் நிரோதோ⁴ மக்³கோ³ வா. யஸ்மிங் பஜா நோ விவதே³ பஜானந்தி யம்ஹி ஸச்சே பஜானந்தோ பஜா நோ விவதெ³ய்யுங். ஸயங் து²னந்தீதி அத்தனா வத³ந்தி.
119.Ekañhi saccanti vissajjanagāthāya ekaṃ saccaṃ nirodho maggo vā. Yasmiṃ pajā no vivade pajānanti yamhi sacce pajānanto pajā no vivadeyyuṃ. Sayaṃ thunantīti attanā vadanti.
120. கஸ்மா நூதி புச்சா²கா³தா²ய பவாதி³யாஸேதி வாதி³னோ. உதா³ஹு தே தக்கமனுஸ்ஸரந்தீதி தே வாதி³னோ உதா³ஹு அத்தனோ தக்கமத்தங் அனுக³ச்ச²ந்தி.
120.Kasmā nūti pucchāgāthāya pavādiyāseti vādino. Udāhu te takkamanussarantīti te vādino udāhu attano takkamattaṃ anugacchanti.
தக்கபரியாஹதந்தி விதக்கேன ஸமந்ததோ ஆஹதங். வீமங்ஸானுசரிதந்தி அத்தனோ உபட்டி²தபஞ்ஞாய விசரிதங். ஸயங்படிபா⁴னந்தி அத்தனோ படிபா⁴னங்.
Takkapariyāhatanti vitakkena samantato āhataṃ. Vīmaṃsānucaritanti attano upaṭṭhitapaññāya vicaritaṃ. Sayaṃpaṭibhānanti attano paṭibhānaṃ.
121. ந ஹேவாதி விஸ்ஸஜ்ஜனகா³தா²ய அஞ்ஞத்ர ஸஞ்ஞாய நிச்சானீதி ட²பெத்வா ஸஞ்ஞாமத்தேன நிச்சந்தி க³ஹிதக்³க³ஹணானி. தக்கஞ்ச தி³ட்டீ²ஸு பகப்பயித்வாதி அத்தனோ நிச்சஸங்கப்பமத்தங் தி³ட்டீ²ஸு ஜனெத்வா.
121.Nahevāti vissajjanagāthāya aññatra saññāya niccānīti ṭhapetvā saññāmattena niccanti gahitaggahaṇāni. Takkañca diṭṭhīsu pakappayitvāti attano niccasaṅkappamattaṃ diṭṭhīsu janetvā.
யஸ்மா பன தி³ட்டீ²ஸு விதக்கங் ஜனெந்தா தி³ட்டி²யோ ஸஞ்ஜனெந்தி, தஸ்மா வுத்தங் ‘‘தி³ட்டி²க³தானி ஜனெந்தி ஸஞ்ஜனெந்தீ’’திஆதி³. ஜனெந்தீதி உபரூபரி தி³ட்டி²ங் உப்பாதெ³ந்தா ஜனெந்தி. ஸஞ்ஜனெந்தீதிஆதீ³னி உபஸக்³க³வஸேன பத³ங் வட்³டெ⁴த்வா வுத்தானி. மய்ஹங் ஸச்சந்தி மம வசனங் தச்ச²ங்.
Yasmā pana diṭṭhīsu vitakkaṃ janentā diṭṭhiyo sañjanenti, tasmā vuttaṃ ‘‘diṭṭhigatāni janenti sañjanentī’’tiādi. Janentīti uparūpari diṭṭhiṃ uppādentā janenti. Sañjanentītiādīni upasaggavasena padaṃ vaḍḍhetvā vuttāni. Mayhaṃ saccanti mama vacanaṃ tacchaṃ.
122. இதா³னி ஏவங் நானாஸச்சேஸு அஸந்தேஸு தக்கமத்தங் அனுஸ்ஸரந்தானங் தி³ட்டி²க³திகானங் விப்படிபத்திங் த³ஸ்ஸேதுங் ‘‘தி³ட்டே² ஸுதே’’திஆதி³கா கா³தா²யோ அபா⁴ஸி. தத்த² தி³ட்டே²தி தி³ட்ட²ங், தி³ட்ட²ஸுத்³தி⁴ந்தி அதி⁴ப்பாயோ. ஏஸ நயோ ஸுதாதீ³ஸு. ஏதே ச நிஸ்ஸாய விமானத³ஸ்ஸீதி ஏதே தி³ட்டி²த⁴ம்மே நிஸ்ஸயித்வா ஸுத்³தி⁴பா⁴வஸங்கா²தங் விமானங் அஸம்மானங் பஸ்ஸந்தோபி. வினிச்ச²யே ட²த்வா பஹஸ்ஸமானோ, பா³லோ பரோ அக்குஸலோதி சாஹாதி ஏவங் விமானத³ஸ்ஸீபி தஸ்மிங் தி³ட்டி²வினிச்ச²யே ட²த்வா துட்டி²ஜாதோ ஹாஸஜாதோ ஹுத்வா பரோ ‘‘ஹீனோ ச அவித்³வா சா’’தி ஏவங் வத³தியேவ.
122. Idāni evaṃ nānāsaccesu asantesu takkamattaṃ anussarantānaṃ diṭṭhigatikānaṃ vippaṭipattiṃ dassetuṃ ‘‘diṭṭhe sute’’tiādikā gāthāyo abhāsi. Tattha diṭṭheti diṭṭhaṃ, diṭṭhasuddhinti adhippāyo. Esa nayo sutādīsu. Ete ca nissāya vimānadassīti ete diṭṭhidhamme nissayitvā suddhibhāvasaṅkhātaṃ vimānaṃ asammānaṃ passantopi. Vinicchaye ṭhatvā pahassamāno, bālo paro akkusaloti cāhāti evaṃ vimānadassīpi tasmiṃ diṭṭhivinicchaye ṭhatvā tuṭṭhijāto hāsajāto hutvā paro ‘‘hīno ca avidvā cā’’ti evaṃ vadatiyeva.
ந ஸம்மானேதீதிபி விமானத³ஸ்ஸீதி ந ப³ஹுமானங் கரோதீதி ஏவம்பி விமானத³ஸ்ஸீ ந ப³ஹுமானத³ஸ்ஸீ. தோ³மனஸ்ஸங் ஜனேதீதி பட²மங் தி³ட்டி²னிஸ்ஸயங் அல்லீயித்வா தோ³மனஸ்ஸங் பத்வா பச்சா² தி³ட்டி²வினிச்ச²யே டி²தகாலே ஸோமனஸ்ஸங் உப்பாதே³தீதி அத்தோ².
Na sammānetītipi vimānadassīti na bahumānaṃ karotīti evampi vimānadassī na bahumānadassī. Domanassaṃ janetīti paṭhamaṃ diṭṭhinissayaṃ allīyitvā domanassaṃ patvā pacchā diṭṭhivinicchaye ṭhitakāle somanassaṃ uppādetīti attho.
வினிச்ச²யதி³ட்டி²யா ட²த்வாதி ஸன்னிட்டா²னங் கத்வா க³ஹிததி³ட்டி²யா ட²த்வா.
Vinicchayadiṭṭhiyā ṭhatvāti sanniṭṭhānaṃ katvā gahitadiṭṭhiyā ṭhatvā.
123. ஏவங் ஸந்தே யேனேவாதி கா³தா². தத்த² ஸயமத்தனாதி ஸயமேவ அத்தானங். விமானேதீதி க³ரஹதி. ததே³வ பாவாதி ததே³வ வசனங் தி³ட்டி²ங் வத³தி, தங் வா புக்³க³லங்.
123. Evaṃ sante yenevāti gāthā. Tattha sayamattanāti sayameva attānaṃ. Vimānetīti garahati. Tadeva pāvāti tadeva vacanaṃ diṭṭhiṃ vadati, taṃ vā puggalaṃ.
124. அதிஸாரதி³ட்டி²யாதி கா³தா²யத்தோ² – ஸோ ஏவங் தாய லக்க²ணாதிஸாரினியா அதிஸாரதி³ட்டி²யா ஸமத்தோ பரிபுண்ணோ உத்³து⁴மாதோ, தேன ச தி³ட்டி²மானேன மத்தோ ‘‘பரிபுண்ணோ அஹங் கேவலீ’’தி ஏவங் பரிபுண்ணமானீ. ஸயமேவ அத்தானங் மனஸா ‘‘அஹங் பண்டி³தோ’’தி அபி⁴ஸிஞ்சதி. கிங்காரணா? தி³ட்டீ² ஹி ஸா தஸ்ஸ ததா² ஸமத்தாதி.
124.Atisāradiṭṭhiyāti gāthāyattho – so evaṃ tāya lakkhaṇātisāriniyā atisāradiṭṭhiyā samatto paripuṇṇo uddhumāto, tena ca diṭṭhimānena matto ‘‘paripuṇṇo ahaṃ kevalī’’ti evaṃ paripuṇṇamānī. Sayameva attānaṃ manasā ‘‘ahaṃ paṇḍito’’ti abhisiñcati. Kiṃkāraṇā? Diṭṭhī hi sā tassa tathā samattāti.
ஸப்³பா³ தா தி³ட்டி²யோ லக்க²ணாதிக்கந்தாதி தா ஸப்³பா³ த்³வாஸட்டி²தி³ட்டி²யோ லக்க²ணங் அதீதா அதிஸரந்தீதி அதிக்கந்தா. அனோமோதி அனூனோ.
Sabbā tā diṭṭhiyo lakkhaṇātikkantāti tā sabbā dvāsaṭṭhidiṭṭhiyo lakkhaṇaṃ atītā atisarantīti atikkantā. Anomoti anūno.
125. பரஸ்ஸ சேதி கா³தா²ய ஸம்ப³ந்தோ⁴ அத்தோ² ச – கிஞ்ச பி⁴ய்யோ? யோ ஸோ வினிச்ச²யே ட²த்வா பஹஸ்ஸமானோ ‘‘பா³லோ பரோ அக்குஸலோ’’தி சாஹ, தஸ்ஸ பரஸ்ஸ சே ஹி வசஸா ஸோ தேன வுச்சமானோ நிஹீனோ ஹோதி, துமோ ஸஹா ஹோதி நிஹீனபஞ்ஞோ, ஸோபி தேனேவ ஸஹ நிஹீனபஞ்ஞோ ஹோதி. ஸோபி ஹி தங் ‘‘பா³லோ’’தி வத³தி. அத² தஸ்ஸ வசனங் அப்பமாணங், ஸோ பன ஸயமேவ வேத³கூ³ ச தீ⁴ரோ ச ஹோதி. ஏவங் ஸந்தே ந கோசி பா³லோ ஸமணேஸு அத்தி². ஸப்³பே³பி ஹி தே அத்தனோ இச்சா²ய பண்டி³தா.
125.Parassa ceti gāthāya sambandho attho ca – kiñca bhiyyo? Yo so vinicchaye ṭhatvā pahassamāno ‘‘bālo paro akkusalo’’ti cāha, tassa parassa ce hi vacasā so tena vuccamāno nihīno hoti, tumo sahā hoti nihīnapañño, sopi teneva saha nihīnapañño hoti. Sopi hi taṃ ‘‘bālo’’ti vadati. Atha tassa vacanaṃ appamāṇaṃ, so pana sayameva vedagū ca dhīro ca hoti. Evaṃ sante na koci bālo samaṇesu atthi. Sabbepi hi te attano icchāya paṇḍitā.
வாசாயாதி கத²னேன. வசனேனாதி பா⁴ஸிதேன. நிந்தி³தகாரணாதி க³ரஹஹேதுனா. க³ரஹிதகாரணாதி அவஞ்ஞாதஹேதுனா. உபவதி³தகாரணாதி உபவாத³ஹேதுனா.
Vācāyāti kathanena. Vacanenāti bhāsitena. Ninditakāraṇāti garahahetunā. Garahitakāraṇāti avaññātahetunā. Upavaditakāraṇāti upavādahetunā.
126. அஞ்ஞங் இதோதி கா³தா²ய ஸம்ப³ந்தோ⁴ அத்தோ² ச – ‘‘அத² சே ஸயங் வேத³கூ³ ஹோதி தீ⁴ரோ. ந கோசி பா³லோ ஸமணேஸு அத்தீ²’’தி ஏவஞ்ஹி வுத்தேபி ஸியா கஸ்ஸசி ‘‘கஸ்மா’’தி. தத்த² வுச்சதே – யஸ்மா அஞ்ஞங் இதோ யாபி⁴வத³ந்தி த⁴ம்மங், அபரத்³தா⁴ ஸுத்³தி⁴மகேவலீ தே. ஏவம்பி தித்த்²யா புது²ஸோ வத³ந்தி, யே இதோ அஞ்ஞங் தி³ட்டி²ங் அபி⁴வத³ந்தி, தே அபரத்³தா⁴ விரத்³தா⁴ ஸுத்³தி⁴மக்³க³ங், அகேவலினோ ச தேதி ஏவங் புது²தித்தி²யா யஸ்மா வத³ந்தீதி வுத்தங் ஹோதி. கஸ்மா பனேவங் வத³ந்தீதி சே? ஸந்தி³ட்டி²ராகே³ன ஹி தேபி⁴ரத்தா, யஸ்மா ஸகேன தி³ட்டி²ராகே³ன தே அபி⁴ரத்தாதி வுத்தங் ஹோதி.
126.Aññaṃ itoti gāthāya sambandho attho ca – ‘‘atha ce sayaṃ vedagū hoti dhīro. Na koci bālo samaṇesu atthī’’ti evañhi vuttepi siyā kassaci ‘‘kasmā’’ti. Tattha vuccate – yasmā aññaṃ ito yābhivadanti dhammaṃ, aparaddhā suddhimakevalī te. Evampi titthyā puthuso vadanti, ye ito aññaṃ diṭṭhiṃ abhivadanti, te aparaddhā viraddhā suddhimaggaṃ, akevalino ca teti evaṃ puthutitthiyā yasmā vadantīti vuttaṃ hoti. Kasmā panevaṃ vadantīti ce? Sandiṭṭhirāgena hi tebhirattā, yasmā sakena diṭṭhirāgena te abhirattāti vuttaṃ hoti.
தே ஸுத்³தி⁴மக்³க³ந்தி தே அஞ்ஞதித்தி²யா அகிலிட்ட²மக்³க³ங். விஸுத்³தி⁴மக்³க³ந்தி நித்³தோ³ஸமக்³க³ங். பரிஸுத்³தி⁴மக்³க³ந்தி ஸுக்கமக்³க³ங். வோதா³தமக்³க³ந்தி பண்ட³ரமக்³க³ங். பரியோதா³தமக்³க³ந்தி பபா⁴வந்தமக்³க³ங். விரத்³தா⁴தி வுத்தவிதி⁴னா மக்³கே³ன விரஜ்ஜி²த்வா டி²தா. அபரத்³தா⁴தி அபரஜ்ஜி²த்வா டி²தா. க²லிதாதி பரிஹீனா. க³லிதாதி ததோ ப⁴ட்டா². அஞ்ஞாயாதி அஞ்ஞாணேன. அபரத்³தா⁴தி பராஜயமாபன்னா. அத² வா ‘‘ஞாயாபரத்³தா⁴’’திபி பாடோ². ஞாயேன மக்³கே³ன விரத்³தா⁴தி அத்தோ².
Te suddhimagganti te aññatitthiyā akiliṭṭhamaggaṃ. Visuddhimagganti niddosamaggaṃ. Parisuddhimagganti sukkamaggaṃ. Vodātamagganti paṇḍaramaggaṃ. Pariyodātamagganti pabhāvantamaggaṃ. Viraddhāti vuttavidhinā maggena virajjhitvā ṭhitā. Aparaddhāti aparajjhitvā ṭhitā. Khalitāti parihīnā. Galitāti tato bhaṭṭhā. Aññāyāti aññāṇena. Aparaddhāti parājayamāpannā. Atha vā ‘‘ñāyāparaddhā’’tipi pāṭho. Ñāyena maggena viraddhāti attho.
127. ஏவங் அபி⁴ரத்தா ச – இதே⁴வ ஸுத்³தி⁴ந்தி கா³தா². தத்த² ஸகாயனேதி ஸகமக்³கே³. த³ள்ஹங் வதா³னாதி த³ள்ஹவாதா³.
127. Evaṃ abhirattā ca – idheva suddhinti gāthā. Tattha sakāyaneti sakamagge. Daḷhaṃ vadānāti daḷhavādā.
தி²ரவாதா³தி ஸன்னிட்டா²னவாதா³. ப³லிகவாதா³தி ப³லவந்தவாதா³. அவட்டி²தவாதா³தி பதிட்ட²ஹித்வா கதி²தவாதா³.
Thiravādāti sanniṭṭhānavādā. Balikavādāti balavantavādā. Avaṭṭhitavādāti patiṭṭhahitvā kathitavādā.
128. யே ஏவஞ்ச த³ள்ஹவாதா³, தேஸு யோ கோசி தித்தி²யோ ஸகாயனே வாபி த³ள்ஹங் வதா³னோ கமெத்த² பா³லோதி பரங் த³ஹெய்ய, ஸங்கே²பதோ தத்த² ஸஸ்ஸதுச்சே²த³ஸங்கா²தே வித்தா²ரதோ நத்தி²கஇஸ்ஸரகாரகனியதிஆதி³பே⁴தே³ ஸகே அயனே ‘‘இத³மேவ ஸச்ச’’ந்தி த³ள்ஹங் வதா³னோ கங் பரங் எத்த² தி³ட்டி²க³தே ‘‘பா³லோ’’தி ஸஹ த⁴ம்மேன பஸ்ஸெய்ய, நனு ஸப்³போ³பி தஸ்ஸ மதேன பண்டி³தோ ஏவ ஸுப்படிபன்னோ ஏவ ச. ஏவங் ஸந்தே ஸயமேவ ஸோ மேத⁴க³மாவஹெய்ய, பரங் வத³ங் பா³லமஸுத்³தி⁴த⁴ம்மங். ஸோபி பரங் ‘‘பா³லோ ச அஸுத்³தி⁴த⁴ம்மோ ச அய’’ந்தி வத³ந்தோ அத்தனாவ கலஹங் ஆவஹெய்ய. கஸ்மா? யஸ்மா ஸப்³போ³பி தஸ்ஸ மதேன பண்டி³தோயேவ ஸுப்படிபன்னோயேவ ச.
128. Ye evañca daḷhavādā, tesu yo koci titthiyo sakāyane vāpi daḷhaṃ vadāno kamettha bāloti paraṃ daheyya, saṅkhepato tattha sassatucchedasaṅkhāte vitthārato natthikaissarakārakaniyatiādibhede sake ayane ‘‘idameva sacca’’nti daḷhaṃ vadāno kaṃ paraṃ ettha diṭṭhigate ‘‘bālo’’ti saha dhammena passeyya, nanu sabbopi tassa matena paṇḍito eva suppaṭipanno eva ca. Evaṃ sante sayameva so medhagamāvaheyya, paraṃ vadaṃ bālamasuddhidhammaṃ. Sopi paraṃ ‘‘bālo ca asuddhidhammo ca aya’’nti vadanto attanāva kalahaṃ āvaheyya. Kasmā? Yasmā sabbopi tassa matena paṇḍitoyeva suppaṭipannoyeva ca.
129. ஏவங் ஸப்³ப³தா²பி வினிச்ச²யே ட²த்வா ஸயங் பமாய, உத்³த⁴ங் ஸ லோகஸ்மிங் விவாத³மேதீதி தி³ட்டி²யா ட²த்வா ஸயஞ்ச ஸத்தா²ராதி³ங் மினித்வா ஸோ பி⁴ய்யோ விவாத³மேதீதி. ஏவங் பன வினிச்ச²யேஸு ஆதீ³னவங் ஞத்வா அரியமக்³கே³ன ஹித்வான ஸப்³பா³னி வினிச்ச²யானி, ந மேத⁴க³ங் குப்³ப³தி ஜந்து லோகேதி அரஹத்தனிகூடேன தே³ஸனங் நிட்டா²பேஸி.
129. Evaṃ sabbathāpi vinicchaye ṭhatvā sayaṃ pamāya, uddhaṃ sa lokasmiṃ vivādametīti diṭṭhiyā ṭhatvā sayañca satthārādiṃ minitvā so bhiyyo vivādametīti. Evaṃ pana vinicchayesu ādīnavaṃ ñatvā ariyamaggena hitvāna sabbāni vinicchayāni, na medhagaṃ kubbati jantu loketi arahattanikūṭena desanaṃ niṭṭhāpesi.
ஸயங் பமாயாதி அத்தனா மினித்வா. பமினித்வாதி பமாணங் கத்வா. ‘‘பவினெத்வா’’திபி பாடோ², தங் ந ஸுந்த³ரங். உத்³த⁴ங் வாதே³ன ஸத்³தி⁴ந்தி அத்தனோ உபரி கதெ²ந்தேன ஸஹ. தே³ஸனாபரியோஸானே புராபே⁴த³ஸுத்தே (மஹானி॰ 83) வுத்தஸதி³ஸோ ஏவ அபி⁴ஸமயோ அஹோஸீதி.
Sayaṃ pamāyāti attanā minitvā. Paminitvāti pamāṇaṃ katvā. ‘‘Pavinetvā’’tipi pāṭho, taṃ na sundaraṃ. Uddhaṃ vādena saddhinti attano upari kathentena saha. Desanāpariyosāne purābhedasutte (mahāni. 83) vuttasadiso eva abhisamayo ahosīti.
ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய
Saddhammappajjotikāya mahāniddesaṭṭhakathāya
சூளப்³யூஹஸுத்தனித்³தே³ஸவண்ணனா நிட்டி²தா.
Cūḷabyūhasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / மஹானித்³தே³ஸபாளி • Mahāniddesapāḷi / 12. சூளவியூஹஸுத்தனித்³தே³ஸோ • 12. Cūḷaviyūhasuttaniddeso
