| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. சூளது³க்க²க்க²ந்த⁴ஸுத்தவண்ணனா
4. Cūḷadukkhakkhandhasuttavaṇṇanā
175. ஸக்கேஸூதி எத்த² யங் வத்தப்³ப³ங், தங் ஸதிபட்டா²னஸுத்தவண்ணனாயங் வுத்தனயேனேவ வேதி³தப்³ப³ந்தி தங் ஏகதே³ஸேன த³ஸ்ஸெந்தோ ‘‘ஸோ ஹீ’’தி ஆஹ. தத்த² யேன ராஜகுமாரா ஸக்யா நாம ஜாதா, யதோ தேஸங் நிவாஸட்டா²னதாய ஜனபதோ³ ததா² வுச்சதி, தங் வத்தப்³ப³ந்தி ஆஹ ‘‘ஸக்யானங் பன உப்பத்தி அம்ப³ட்ட²ஸுத்தே ஆக³தாவா’’தி. கபிலவத்தூ²தி வுத்தங் புரிமஸஞ்ஞாவஸேன.
175.Sakkesūti ettha yaṃ vattabbaṃ, taṃ satipaṭṭhānasuttavaṇṇanāyaṃ vuttanayeneva veditabbanti taṃ ekadesena dassento ‘‘so hī’’ti āha. Tattha yena rājakumārā sakyā nāma jātā, yato tesaṃ nivāsaṭṭhānatāya janapado tathā vuccati, taṃ vattabbanti āha ‘‘sakyānaṃ pana uppatti ambaṭṭhasutte āgatāvā’’ti. Kapilavatthūti vuttaṃ purimasaññāvasena.
நானப்பகாரகந்தி ‘‘லோப⁴த⁴ம்மா’’தி ப³ஹுவசனஸ்ஸ நிமித்தங் வத³தி. லோபோ⁴ ஹி தேன தேன அவத்தா²விஸேஸேன பவத்திஆகாரபே⁴தே³ன ‘‘ச²ந்தோ³ ராகோ³தண்ஹா ஆஸத்தி அபெக்கா²’’திஆதி³னா அனேகப்பபே⁴தோ³, லுப்³ப⁴னலக்க²ணேன பன ‘‘லோபோ⁴’’த்வேவ வுச்சதி. தேனாஹ ‘‘நானப்பகாரகங் லோப⁴ங்யேவா’’தி. ததா² ‘‘தோ³ஸோ படிகோ⁴ கோதோ⁴ உபனாஹோ விரோதோ⁴’’திஆதி³னா, ‘‘முய்ஹனங் அஸமபெக்க²னங் அபச்சவெக்க²ணா து³ம்மெஜ்ஜ²ங் பா³ல்ய’’ந்திஆதி³னா (த⁴॰ ஸ॰ 390) ச தோ³ஸமோஹானங் நானப்பகாரதங் ஸந்தா⁴யாஹ ‘‘இதரேஸுபி த்³வீஸு ஏஸேவ நயோ’’தி. பரியாதி³யித்வாதி பரிதோ ஸப்³ப³ஸோ ஆதா³ய. க³ஹெத்வாதி அயமெத்த² அத்தோ²தி ஆஹ ‘‘க³ஹணே ஆக³த’’ந்தி. பரியாதி³யதீதி பரிக்கீ²ணோதி. தீ³-ஸத்³த³ஞ்ஹி ஸத்³த³விதூ³ க²யத்த²ங் வத³ந்தி.
Nānappakārakanti ‘‘lobhadhammā’’ti bahuvacanassa nimittaṃ vadati. Lobho hi tena tena avatthāvisesena pavattiākārabhedena ‘‘chando rāgotaṇhā āsatti apekkhā’’tiādinā anekappabhedo, lubbhanalakkhaṇena pana ‘‘lobho’’tveva vuccati. Tenāha ‘‘nānappakārakaṃ lobhaṃyevā’’ti. Tathā ‘‘doso paṭigho kodho upanāho virodho’’tiādinā, ‘‘muyhanaṃ asamapekkhanaṃ apaccavekkhaṇā dummejjhaṃ bālya’’ntiādinā (dha. sa. 390) ca dosamohānaṃ nānappakārataṃ sandhāyāha ‘‘itaresupi dvīsu eseva nayo’’ti. Pariyādiyitvāti parito sabbaso ādāya. Gahetvāti ayamettha atthoti āha ‘‘gahaṇe āgata’’nti. Pariyādiyatīti parikkhīṇoti. Dī-saddañhi saddavidū khayatthaṃ vadanti.
ஏகதா³தி ஆமேடி³தலோபேன நித்³தே³ஸோதி ஆஹ ‘‘ஏகேகஸ்மிங் காலே’’தி. லோப⁴தோ³ஸமோஹாதி பட²மமக்³கே³ன பஹீனாவஸேஸா லோப⁴தோ³ஸமோஹா. நிரவஸேஸா பஹீயந்தி, அஞ்ஞதா² து³தியமக்³கே³ன கிங் கதங் ஸியாதி அதி⁴ப்பாயோ. ஸமுதா³சாரப்பத்தங் பன தி³ஸ்வா ‘‘அப்பஹீனங் மே அத்தீ²’’திபி ஜானாதி. ஏவங் கத²ங் நிரவஸேஸப்பஹானஸஞ்ஞாதி ஆஹ ‘‘அப்பஹீனகங்…பே॰… ஸஞ்ஞீ ஹோதீ’’தி. ஏவங் பட²மமக்³கே³னேவ ஸமுச்சி²ன்னஸங்ஸயஸ்ஸ ‘‘கோ ஸு நாம மே த⁴ம்மோ அஜ்ஜ²த்தங் அப்பஹீனோதி ஏவங் ஸந்தே⁴ஹோ கத²ங் உப்பஜ்ஜதீ’’தி வத்வா ‘‘பண்ணத்தியா அகோவித³த்தா’’தி காரணமாஹ. வினயகுக்குச்சங் விய ஹி பண்ணத்தியங் அகுஸலதாய அரியானம்பி கத்த²சி விமதிமத்தங் உப்பஜ்ஜதி யதா² தங் ஸப்³ப³ஸோ அப்பஹீனஸம்மோஹானந்தி. அத்தனோ அவிஸயே அனபி⁴ஜானநங் பண்ணத்திகோஸல்லேன கிமெத்த² பயோஜனங், பச்சவெக்க²ணாமத்தேன அயமத்தோ² ஸிஜ்ஜ²தீதி த³ஸ்ஸெந்தோ ‘‘கிங் தஸ்ஸ பச்சவெக்க²ணா நத்தீ²’’தி ஆஹ. இதரோ ‘‘நத்தீ²’’தி ந ஸக்கா வத்துந்தி கத்வா ‘‘அத்தீ²’’தி வத்வா தத்த² லப்³ப⁴மானவிபா⁴க³ங் த³ஸ்ஸெந்தோ ‘‘ஸா பனா’’திஆதி³மாஹ. தத்த² ஸாதி பச்சவெக்க²ணா. ஸப்³பே³ஸந்தி ஸப்³பே³ஸங் அரியானங். யதா² பரிபுண்ணா ந ஹோதி, ந ஏவங் ஸப்³ப³ஸோ ந ஹோதீதி ஆஹ ‘‘இமாஸு பனா’’திஆதி³.
Ekadāti āmeḍitalopena niddesoti āha ‘‘ekekasmiṃ kāle’’ti. Lobhadosamohāti paṭhamamaggena pahīnāvasesā lobhadosamohā. Niravasesā pahīyanti, aññathā dutiyamaggena kiṃ kataṃ siyāti adhippāyo. Samudācārappattaṃ pana disvā ‘‘appahīnaṃ me atthī’’tipi jānāti. Evaṃ kathaṃ niravasesappahānasaññāti āha ‘‘appahīnakaṃ…pe… saññī hotī’’ti. Evaṃ paṭhamamaggeneva samucchinnasaṃsayassa ‘‘ko su nāma me dhammo ajjhattaṃ appahīnoti evaṃ sandheho kathaṃ uppajjatī’’ti vatvā ‘‘paṇṇattiyā akovidattā’’ti kāraṇamāha. Vinayakukkuccaṃ viya hi paṇṇattiyaṃ akusalatāya ariyānampi katthaci vimatimattaṃ uppajjati yathā taṃ sabbaso appahīnasammohānanti. Attano avisaye anabhijānanaṃ paṇṇattikosallena kimettha payojanaṃ, paccavekkhaṇāmattena ayamattho sijjhatīti dassento ‘‘kiṃ tassa paccavekkhaṇā natthī’’ti āha. Itaro ‘‘natthī’’ti na sakkā vattunti katvā ‘‘atthī’’ti vatvā tattha labbhamānavibhāgaṃ dassento ‘‘sā panā’’tiādimāha. Tattha sāti paccavekkhaṇā. Sabbesanti sabbesaṃ ariyānaṃ. Yathā paripuṇṇā na hoti, na evaṃ sabbaso na hotīti āha ‘‘imāsu panā’’tiādi.
176. அஜ்ஜ²த்தந்தி நியகஜ்ஜ²த்தங் அதி⁴ப்பேதந்தி ஆஹ ‘‘தவ ஸந்தானே’’தி. அப்பஹீனோதி அனவஸேஸதோ அப்பஹீனோ. து³விதே⁴தி வத்து²காமகிலேஸகாமே. கிலேஸகாமோபி ஹி யத³க்³கே³ன அஸ்ஸாதீ³யதி, தத³க்³கே³ன பரிபு⁴ஞ்ஜீயதி.
176.Ajjhattanti niyakajjhattaṃ adhippetanti āha ‘‘tava santāne’’ti. Appahīnoti anavasesato appahīno. Duvidheti vatthukāmakilesakāme. Kilesakāmopi hi yadaggena assādīyati, tadaggena paribhuñjīyati.
177. அஸ்ஸாதீ³யதீதி அஸ்ஸாதோ³, ஸுக²ங். அப்போ அப்பமத்தகோ அஸ்ஸாதோ³ ஏதேஸூதி அப்பஸ்ஸாதா³. தேனாஹ ‘‘பரித்தஸுகா²’’தி. பரியேஸனது³க்கா²தி³ஹேதுகங் தி³ட்ட²த⁴ம்மிகங் தத்த² து³ச்சரிதசரணேன ஸம்பராயிகஞ்ச து³க்க²மெத்த² காமேஸு ப³ஹுகந்தி ப³ஹுது³க்கா². ப³ஹுபாயாஸாதி ப³ஹுபரிக்கிலேஸா. தே பன பரிக்கிலேஸா வக்க²மானநயேன ப³ஹூயேவெத்த² தி³ட்ட²த⁴ம்மிகாபீதி ஆஹ ‘‘தி³ட்ட²த⁴ம்மிக…பே॰… ப³ஹூ’’தி. தே ச பரிக்கிலேஸா யஸ்மா தங்ஸமங்கி³னோ ஹிதபடிபத்தியா அந்தராயகரா இத⁴ சேவ பரலோகே ச ஆதீ³னவகாரணஞ்ச பவத்தந்தி, தஸ்மா வுத்தங் ‘‘தி³ட்ட²த⁴ம்மிக…பே॰… ப³ஹூ’’தி. ஏவங் சேபீதி ஏவங் ‘‘அப்பஸ்ஸாதா³ காமா’’திஆதி³னா ஆகாரேன. நயேனாதி த⁴ம்மேன. காரணேனாதி யுத்தியா. ஸுட்டு² தி³ட்ட²ங் ஹோதீதி ஸம்ப³ந்தோ⁴. விபஸ்ஸனாபஞ்ஞாயாதி அரியமக்³க³பஞ்ஞாய. ஸா சத்தாரிபி ஸச்சானி விஸேஸதோ பஸ்ஸதீதி விபஸ்ஸனாதி அதி⁴ப்பேதா. தேனாஹ ‘‘ஹெட்டா²மக்³க³த்³வயஞாணேனாதி அத்தோ²’’தி. பீதிஸுக²ந்தி பீதிஸுக²வந்தங் ஜா²னத்³வயங். த்³வே மக்³கே³தி ஹெட்டா²மக்³கே³. ஆவட்டனஸீலோ ஆபு⁴ஜனஸீலோ ந ஹோதீதி அனாவட்டீ நேவ ஹோதி ஸப்³ப³ஸோ அப்பஹீனகாமராக³ச²ந்தோ³. தேனாஹ ‘‘கஸ்மா’’திஆதி³. ஓரோத⁴னாடகா பஜஹனபஞ்ஞாதி ஆதீ³னவானுபஸ்ஸனாஞாணமாஹ.
177. Assādīyatīti assādo, sukhaṃ. Appo appamattako assādo etesūti appassādā. Tenāha ‘‘parittasukhā’’ti. Pariyesanadukkhādihetukaṃ diṭṭhadhammikaṃ tattha duccaritacaraṇena samparāyikañca dukkhamettha kāmesu bahukanti bahudukkhā. Bahupāyāsāti bahuparikkilesā. Te pana parikkilesā vakkhamānanayena bahūyevettha diṭṭhadhammikāpīti āha ‘‘diṭṭhadhammika…pe… bahū’’ti. Te ca parikkilesā yasmā taṃsamaṅgino hitapaṭipattiyā antarāyakarā idha ceva paraloke ca ādīnavakāraṇañca pavattanti, tasmā vuttaṃ ‘‘diṭṭhadhammika…pe… bahū’’ti. Evaṃ cepīti evaṃ ‘‘appassādā kāmā’’tiādinā ākārena. Nayenāti dhammena. Kāraṇenāti yuttiyā. Suṭṭhu diṭṭhaṃ hotīti sambandho. Vipassanāpaññāyāti ariyamaggapaññāya. Sā cattāripi saccāni visesato passatīti vipassanāti adhippetā. Tenāha ‘‘heṭṭhāmaggadvayañāṇenāti attho’’ti. Pītisukhanti pītisukhavantaṃ jhānadvayaṃ. Dve maggeti heṭṭhāmagge. Āvaṭṭanasīlo ābhujanasīlo na hotīti anāvaṭṭī neva hoti sabbaso appahīnakāmarāgachando. Tenāha ‘‘kasmā’’tiādi. Orodhanāṭakā pajahanapaññāti ādīnavānupassanāñāṇamāha.
179. அஸ்ஸாதோ³பி கதி²தோ, ‘‘அப்பஸ்ஸாதா³’’தி ஹி இமினா யாவதகோ காமேஸு அஸ்ஸாதோ³, தங் ஸப்³ப³ங் அனவஸேஸதோ பரிக்³க³ஹெத்வா சஸ்ஸ பரித்தபா⁴வோ த³ஸ்ஸிதோதி ஆதீ³னவோபி கதி²தோ ஸங்கே²பேனேவ ஸேஸஸ்ஸஆதீ³னவஸ்ஸ த³ஸ்ஸிதத்தா. தங் கதே²துந்தி தங் நிஸ்ஸரணங் ‘‘ஏகந்தஸுக²படிஸங்வேதீ³’’தி இமினா கதே²துங். இமேஹி அந்தேஹீதி ‘‘பஞ்சிமே, மஹானாம, காமகு³ணா’’திஆதி³னா காமகு³ணத³ஸ்ஸனமுகே²ன காமஸுக²ல்லிகானுயோக³ங் ‘‘உப்³ப⁴ட்ட²கா ஹொந்தி ஆஸனபடிக்கி²த்தா’’திஆதி³னா அத்தகிலமதா²னுயோக³ஞ்ச த³ஸ்ஸெத்வா இமேஹி த்³வீஹி அந்தேஹி முத்தங் மம ஸாஸனந்தி, ப²லஸமாபத்திபரியோஸானத்தா ஸாஸனஸம்பத்தியா ‘‘உபரிப²லஸமாபத்திஸீஸேன ஸகலஸாஸனங் த³ஸ்ஸேது’’ந்தி ஆஹ. கி³ஜ்ஜ²ஸதி³ஸோ கூடோதி மஜ்ஜே²பத³லோபீஸமாஸோ யதா² ‘‘ஸாகபத்தி²வோ’’தி (பாணினி॰ 2.1.60). து³தியே பனெத்த² கி³ஜ்ஜ²வந்ததாய கி³ஜ்ஜா² கூடே ஏதஸ்ஸாதி கி³ஜ்ஜ²கூடோ. உத்³த⁴ங்யேவ திட்ட²னகா நிஸஜ்ஜாய வுட்டி²தகாலதோ பட்டா²ய ஏகட்டா²னேனேவ திட்ட²னகா. தேனாஹ ‘‘அனிஸின்னா’’தி. நிக³ண்ட²ஸ்ஸாதி நாடபுத்தஸ்ஸ. நத்தி² ஏதஸ்ஸ பரிஸேஸந்தி அபரிஸேஸங். ஏவங் ஸங்கா²ப⁴வசனமத்தமஸ்ஸாதி ஆஹ ‘‘அபரிஸேஸஸங்கா²த’’ந்தி. நிச்சட்டே²ன ஸதத-ஸத்³தே³ன அபி⁴ண்ஹப்பவத்தி ஜோதிதா ஸியாதி ‘‘ஸமித’’ந்தி வுத்தங். தேன நிரந்தரப்பவத்திங் த³ஸ்ஸேதீதி ஏவங் வா எத்த² அத்தோ² த³ட்ட²ப்³போ³.
179.Assādopi kathito, ‘‘appassādā’’ti hi iminā yāvatako kāmesu assādo, taṃ sabbaṃ anavasesato pariggahetvā cassa parittabhāvo dassitoti ādīnavopi kathito saṅkhepeneva sesassaādīnavassa dassitattā. Taṃ kathetunti taṃ nissaraṇaṃ ‘‘ekantasukhapaṭisaṃvedī’’ti iminā kathetuṃ. Imehi antehīti ‘‘pañcime, mahānāma, kāmaguṇā’’tiādinā kāmaguṇadassanamukhena kāmasukhallikānuyogaṃ ‘‘ubbhaṭṭhakā honti āsanapaṭikkhittā’’tiādinā attakilamathānuyogañca dassetvā imehi dvīhi antehi muttaṃ mama sāsananti, phalasamāpattipariyosānattā sāsanasampattiyā ‘‘upariphalasamāpattisīsena sakalasāsanaṃ dassetu’’nti āha. Gijjhasadiso kūṭoti majjhepadalopīsamāso yathā ‘‘sākapatthivo’’ti (pāṇini. 2.1.60). Dutiye panettha gijjhavantatāya gijjhā kūṭe etassāti gijjhakūṭo. Uddhaṃyeva tiṭṭhanakā nisajjāya vuṭṭhitakālato paṭṭhāya ekaṭṭhāneneva tiṭṭhanakā. Tenāha ‘‘anisinnā’’ti. Nigaṇṭhassāti nāṭaputtassa. Natthi etassa parisesanti aparisesaṃ. Evaṃ saṅkhābhavacanamattamassāti āha ‘‘aparisesasaṅkhāta’’nti. Niccaṭṭhena satata-saddena abhiṇhappavatti jotitā siyāti ‘‘samita’’nti vuttaṃ. Tena nirantarappavattiṃ dassetīti evaṃ vā ettha attho daṭṭhabbo.
180. யங் கரோதி, தங் ஜானாதீதி து³க்க²ஸ்ஸ நிஜ்ஜரணகே²பனங் நாம விஞ்ஞூனங் கிச்சங், விஞ்ஞுனா ச புரிஸேன கதாகதங் ஜானிதப்³ப³ங், தஸ்மா தும்ஹேஹி புராணானங் கம்மானங் ப்³யந்திபா⁴வங் கரொந்தேஹி பட²மங் தாவ எத்தகானி புராணானி கம்மானீதி ஜானிதப்³பா³னி, ததோ ‘‘எத்தகங் காலங் கதேன தபஸா எத்தகானி தானி ப்³யந்திகதானி, இதா³னி எத்தகானி காதப்³பா³னீ’’திஆதி³னா அயங் விதி⁴ புரிஸேன விய அத்தனா காதப்³ப³கிச்சங் பரிச்சி²ந்தி³தப்³ப³ந்தி த³ஸ்ஸேதி. தேனாஹ ‘‘தும்ஹேஹிபி ததா² ஞாதப்³ப³ங் ஸியா’’தி. ஸுத்³த⁴ந்தந்தி ஸுத்³த⁴கொட்டா²ஸங், ஆயதிங் அனவஸ்ஸவஸித்³த⁴ங் கம்மக்க²யங், ததோ வா து³க்க²க்க²யந்தி அத்தோ². ஸுத்³த⁴ந்தங் பத்தோ அத்தீ²தி புச்ச²தீதி இமினா அகுஸலானங் பஹானங், குஸலானங் பா⁴வனா ச ஸப்³பே³ன ஸப்³ப³ங் நிக³ண்ட²ஸமயே நத்தி² ஸப்³ப³ஸோ விஸுத்³தி⁴பா⁴வனாய அபா⁴வதோ, தஸ்மா குதோ து³க்க²க்க²யஸ்ஸ ஸம்ப⁴வோதி த³ஸ்ஸேதி.
180.Yaṃ karoti, taṃ jānātīti dukkhassa nijjaraṇakhepanaṃ nāma viññūnaṃ kiccaṃ, viññunā ca purisena katākataṃ jānitabbaṃ, tasmā tumhehi purāṇānaṃ kammānaṃ byantibhāvaṃ karontehi paṭhamaṃ tāva ettakāni purāṇāni kammānīti jānitabbāni, tato ‘‘ettakaṃ kālaṃ katena tapasā ettakāni tāni byantikatāni, idāni ettakāni kātabbānī’’tiādinā ayaṃ vidhi purisena viya attanā kātabbakiccaṃ paricchinditabbanti dasseti. Tenāha ‘‘tumhehipi tathā ñātabbaṃ siyā’’ti. Suddhantanti suddhakoṭṭhāsaṃ, āyatiṃ anavassavasiddhaṃ kammakkhayaṃ, tato vā dukkhakkhayanti attho. Suddhantaṃ patto atthīti pucchatīti iminā akusalānaṃ pahānaṃ, kusalānaṃ bhāvanā ca sabbena sabbaṃ nigaṇṭhasamaye natthi sabbaso visuddhibhāvanāya abhāvato, tasmā kuto dukkhakkhayassa sambhavoti dasseti.
ஏவங் அஜானநபா⁴வே ஸதீதி ‘‘அஹுவம்ஹேவ மய’’ந்திஆதி³னா வுத்தப்பகாரஸ்ஸ அஜானநே ஸதி, தஸ்மிங் தும்ஹேஹி அஞ்ஞாயமானேதி அத்தோ². லுத்³தா³தி கோ⁴ரா. தே பன யஸ்மா காயவாசாஹி நிஹீனமேவ கரொந்தி, தஸ்மா வுத்தங் ‘‘லுத்³தா³சாரா’’தி. லோஹிதபாணித்வேவ வுச்சதி தஜ்ஜாகிரியாசரணதோ. மாக³விககேவட்டசோரகா⁴தகாத³யோ மாக³விகாத³யோ. கக்க²ளகம்மாதி ப²ருஸகம்மா. தே நிக³ண்டே²ஸு பப்³ப³ஜந்தீதி புப்³பே³ மஹாது³க்க²ஸங்வத்தனியகம்மஸ்ஸ கதத்தா ஹி தும்ஹே ஏதரஹி ஈதி³ஸங் மஹாது³க்க²ங் பச்சனுப⁴வதா²தி த³ஸ்ஸேதி.
Evaṃ ajānanabhāve satīti ‘‘ahuvamheva maya’’ntiādinā vuttappakārassa ajānane sati, tasmiṃ tumhehi aññāyamāneti attho. Luddāti ghorā. Te pana yasmā kāyavācāhi nihīnameva karonti, tasmā vuttaṃ ‘‘luddācārā’’ti. Lohitapāṇitveva vuccati tajjākiriyācaraṇato. Māgavikakevaṭṭacoraghātakādayo māgavikādayo. Kakkhaḷakammāti pharusakammā. Te nigaṇṭhesu pabbajantīti pubbe mahādukkhasaṃvattaniyakammassa katattā hi tumhe etarahi īdisaṃ mahādukkhaṃ paccanubhavathāti dasseti.
வாதே³தி தி³ட்டி²யங், ஸமயேதி அத்தோ². ஸுகே²ன ஸுக²ந்தி எத்த² ஸுகே²னாதி படிபத்திஸுகே²ன, ஸுகா²ய படிபத்தியாதி அத்தோ². ஸுக²ந்தி விமொக்க²ஸுக²ங், இத⁴ லோகே ஸுக²ங் அதி⁴க³ச்ச²ந்தா கஸிவணிஜ்ஜாதி³து³க்க²படிபத்தியாவ அதி⁴க³ச்ச²ந்தி, ஏவங் மொக்க²ஸுக²ம்பீதி அதி⁴ப்பாயோ. ஸரீராவயவஸம்பத்தியாபி பி³ம்பி³னோ ஸாரோதி பி³ம்பி³ஸாரோ. தே நிக³ண்டா²…பே॰… ஸந்தா⁴ய வத³ந்தி, ந பன ப⁴க³வதோ அச்சந்தஸந்தபணீதங் நிப்³பா³னஸுக²படிவேத³னங் ஜானந்தி. ஸஹஸாதி ரவா. அப்படிஸங்கா²தி ந படிஸங்கா²ய அவிசாரெத்வா. தேனாஹ ‘‘ஸாஹஸங் கத்வா’’திஆதி³.
Vādeti diṭṭhiyaṃ, samayeti attho. Sukhena sukhanti ettha sukhenāti paṭipattisukhena, sukhāya paṭipattiyāti attho. Sukhanti vimokkhasukhaṃ, idha loke sukhaṃ adhigacchantā kasivaṇijjādidukkhapaṭipattiyāva adhigacchanti, evaṃ mokkhasukhampīti adhippāyo. Sarīrāvayavasampattiyāpi bimbino sāroti bimbisāro. Te nigaṇṭhā…pe… sandhāya vadanti, na pana bhagavato accantasantapaṇītaṃ nibbānasukhapaṭivedanaṃ jānanti. Sahasāti ravā. Appaṭisaṅkhāti na paṭisaṅkhāya avicāretvā. Tenāha ‘‘sāhasaṃ katvā’’tiādi.
அஞ்ஞாஹி வேத³னாஹி அவோமிஸ்ஸங் ஏகந்தங் ஸுக²ங் ஏகந்தஸுக²ங், தஸ்ஸ படிஸங்வேதீ³. தேனாஹ ‘‘நிரந்தரஸுக²படிஸங்வேதீ³’’தி. கதா²பதிட்டா²பனத்த²ந்தி ‘‘ஏகந்தஸுக²படிஸங்வேதீ³’’தி ஏவங் ஆரத்³த⁴கதா²ய பதிட்டா²பனத்த²ங். ராஜவாரேதி ராஜானங் உத்³தி³ஸ்ஸ ஆக³ததே³ஸனாவாரே. ஸுக²ங் புச்சி²துங் ஹோதீதி ‘‘யதி³ ஸத்த ரத்திந்தி³வானி நப்பஹோதி, கிங் ச² ரத்திந்தி³வானி பஹோதீ’’திஆதி³னா புச்ச²னஸுக²ங் ஹோதி. ‘‘அஹங் கோ²’’திஆதி³னா பவத்தோ ஸுத்³த⁴வாரோ ஸுத்³த⁴னிஸ்ஸந்த³ஸ்ஸ ப²லஸமாபத்திஸுக²ஸ்ஸ வஸேன ஆக³தத்தா. அனச்ச²ரியங் ஹோதி, ஸத்த ரத்திந்தி³வானி பஹொந்தஸ்ஸ ஏகஸ்மிங் ரத்திந்தி³வே கிங் வத்தப்³ப³ந்தி. உத்தானத்த²மேவ வுத்தனயத்தா ஸுவிஞ்ஞெய்யத்தா.
Aññāhi vedanāhi avomissaṃ ekantaṃ sukhaṃ ekantasukhaṃ, tassa paṭisaṃvedī. Tenāha ‘‘nirantarasukhapaṭisaṃvedī’’ti. Kathāpatiṭṭhāpanatthanti ‘‘ekantasukhapaṭisaṃvedī’’ti evaṃ āraddhakathāya patiṭṭhāpanatthaṃ. Rājavāreti rājānaṃ uddissa āgatadesanāvāre. Sukhaṃ pucchituṃ hotīti ‘‘yadi satta rattindivāni nappahoti, kiṃ cha rattindivāni pahotī’’tiādinā pucchanasukhaṃ hoti. ‘‘Ahaṃ kho’’tiādinā pavatto suddhavāro suddhanissandassa phalasamāpattisukhassa vasena āgatattā. Anacchariyaṃ hoti, satta rattindivāni pahontassa ekasmiṃ rattindive kiṃ vattabbanti. Uttānatthameva vuttanayattā suviññeyyattā.
சூளது³க்க²க்க²ந்த⁴ஸுத்தவண்ணனாய லீனத்த²ப்பகாஸனா ஸமத்தா.
Cūḷadukkhakkhandhasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. சூளது³க்க²க்க²ந்த⁴ஸுத்தங் • 4. Cūḷadukkhakkhandhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. சூளது³க்க²க்க²ந்த⁴ஸுத்தவண்ணனா • 4. Cūḷadukkhakkhandhasuttavaṇṇanā
