| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
4. жуул̣ад̣̇угкагканд̇хасуд̇д̇аван̣н̣анаа
4. Cūḷadukkhakkhandhasuttavaṇṇanā
175. звам̣ мз суд̇анд̇и жуул̣ад̣̇угкагканд̇хасуд̇д̇ам̣. д̇ад̇т̇а саггзсууд̇и звам̣наамагз ж̇анабад̣̇з. со хи ж̇анабад̣̇о сагяаанам̣ рааж̇агумаараанам̣ васанадтаанад̇д̇аа сагяаад̇взва сан̇кяам̣ г̇ад̇о. сагяаанам̣ бана уббад̇д̇и амб̣адтасуд̇д̇з ааг̇ад̇аава. габилавад̇т̇усминд̇и звам̣наамагз наг̇арз. д̇ан̃хи габиласса исино ниваасадтаанз гад̇ад̇д̇аа габилавад̇т̇ууд̇и вуд̇д̇ам̣, д̇ам̣ г̇ожараг̇аамам̣ гад̇ваа. ниг̇род̇хаараамзд̇и ниг̇род̇хо наама сагго, со н̃аад̇исамааг̇амагаалз габилавад̇т̇ум̣ ааг̇ад̇з бхаг̇авад̇и ад̇д̇ано аараамз вихаарам̣ гаарзд̇ваа бхаг̇авад̇о нияяаад̇зси, д̇асмим̣ вихарад̇ийд̇и ад̇т̇о. махаанаамод̇и ануруд̣̇д̇хад̇т̇зрасса бхаад̇аа бхаг̇авад̇о жул̣абид̇убуд̇д̇о. суд̣̇д̇ход̣̇ано суггод̣̇ано саггод̣̇ано д̇ход̇од̣̇ано амид̇од̣̇анод̇и имз бан̃жа ж̇анаа бхаад̇аро. амид̇аа наама д̣̇звий д̇зсам̣ бхаг̇иний. д̇иссад̇т̇зро д̇ассаа буд̇д̇о. д̇ат̇ааг̇ад̇о жа нанд̣̇ад̇т̇зро жа суд̣̇д̇ход̣̇анасса буд̇д̇аа, махаанаамо жа ануруд̣̇д̇хад̇т̇зро жа суггод̣̇анасса. аананд̣̇ад̇т̇зро амид̇од̣̇анасса, со бхаг̇авад̇о ганидто. махаанаамо махаллагад̇аро сагад̣̇ааг̇аамий арияасааваго.
175.Evaṃme sutanti cūḷadukkhakkhandhasuttaṃ. Tattha sakkesūti evaṃnāmake janapade. So hi janapado sakyānaṃ rājakumārānaṃ vasanaṭṭhānattā sakyātveva saṅkhyaṃ gato. Sakyānaṃ pana uppatti ambaṭṭhasutte āgatāva. Kapilavatthusminti evaṃnāmake nagare. Tañhi kapilassa isino nivāsaṭṭhāne katattā kapilavatthūti vuttaṃ, taṃ gocaragāmaṃ katvā. Nigrodhārāmeti nigrodho nāma sakko, so ñātisamāgamakāle kapilavatthuṃ āgate bhagavati attano ārāme vihāraṃ kāretvā bhagavato niyyātesi, tasmiṃ viharatīti attho. Mahānāmoti anuruddhattherassa bhātā bhagavato cuḷapituputto. Suddhodano sukkodano sakkodano dhotodano amitodanoti ime pañca janā bhātaro. Amitā nāma devī tesaṃ bhaginī. Tissatthero tassā putto. Tathāgato ca nandatthero ca suddhodanassa puttā, mahānāmo ca anuruddhatthero ca sukkodanassa. Ānandatthero amitodanassa, so bhagavato kaniṭṭho. Mahānāmo mahallakataro sakadāgāmī ariyasāvako.
д̣̇ийгхарад̇д̇анд̇и маяхам̣ сагад̣̇ааг̇аамипалуббад̇д̇ид̇о бадтааяа жирарад̇д̇ам̣ ж̇аанаамийд̇и д̣̇ассзд̇и. лобхад̇хаммаад̇и лобхасан̇каад̇аа д̇хаммаа, наанаббагаарагам̣ лобхам̣язва санд̇хааяа вад̣̇ад̇и. ид̇арзсуби д̣̇вийсу зсзва наяо. барияаад̣̇ааяа д̇идтанд̇ийд̇и кзбзд̇ваа д̇идтанд̇и. ид̣̇ан̃хи барияаад̣̇аанам̣ наама ‘‘саб̣б̣ам̣ хад̇т̇игааяам̣ барияаад̣̇ияид̇ваа саб̣б̣ам̣ ассагааяам̣ саб̣б̣ам̣ рат̇агааяам̣ саб̣б̣ам̣ бад̇д̇игааяам̣ барияаад̣̇ияид̇ваа ж̇ийванд̇ам̣язва нам̣ осаж̇ж̇зяяа’’нд̇и (сам̣. ни. 1.126) зд̇т̇а г̇ахан̣з ааг̇ад̇ам̣. ‘‘анижжасан̃н̃аа, бхигкавз, бхаавид̇аа б̣ахулийгад̇аа саб̣б̣ам̣ гаамарааг̇ам̣ барияаад̣̇ияад̇ий’’д̇и (сам̣. ни. 3.102) зд̇т̇а кзбанз. ид̇хааби кзбанз ад̇хиббзд̇ам̣. д̇зна вуд̇д̇ам̣ ‘‘барияаад̣̇ияид̇ваад̇и кзбзд̇ваа’’д̇и.
Dīgharattanti mayhaṃ sakadāgāmiphaluppattito paṭṭhāya cirarattaṃ jānāmīti dasseti. Lobhadhammāti lobhasaṅkhātā dhammā, nānappakārakaṃ lobhaṃyeva sandhāya vadati. Itaresupi dvīsu eseva nayo. Pariyādāya tiṭṭhantīti khepetvā tiṭṭhanti. Idañhi pariyādānaṃ nāma ‘‘sabbaṃ hatthikāyaṃ pariyādiyitvā sabbaṃ assakāyaṃ sabbaṃ rathakāyaṃ sabbaṃ pattikāyaṃ pariyādiyitvā jīvantaṃyeva naṃ osajjeyya’’nti (saṃ. ni. 1.126) ettha gahaṇe āgataṃ. ‘‘Aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’ti (saṃ. ni. 3.102) ettha khepane. Idhāpi khepane adhippetaṃ. Tena vuttaṃ ‘‘pariyādiyitvāti khepetvā’’ti.
язна мз згад̣̇аа лобхад̇хаммаабийд̇и язна маяхам̣ згзгасмим̣ гаалз лобхад̇хаммааби жид̇д̇ам̣ барияаад̣̇ааяа д̇идтанд̇ийд̇и бужчад̇и. аяам̣ гира рааж̇аа ‘‘сагад̣̇ааг̇аамимаг̇г̇зна лобхад̣̇осамохаа ниравасзсаа бахийяанд̇ий’’д̇и сан̃н̃ий ахоси, аяам̣ ‘‘аббахийнам̣ мз ад̇т̇ий’’д̇иби ж̇аанаад̇и, аббахийнагам̣ убаад̣̇ааяа бахийнагамби буна бажчад̇оваавад̇д̇ад̇ийд̇и сан̃н̃ий ход̇и. арияасаавагасса звам̣ санд̣̇зхо уббаж̇ж̇ад̇ийд̇и? аама уббаж̇ж̇ад̇и. гасмаа? бан̣н̣ад̇д̇ияаа аговид̣̇ад̇д̇аа. ‘‘аяам̣ гилзсо асугамаг̇г̇аваж̇жхо’’д̇и имиссаа бан̣н̣ад̇д̇ияаа аговид̣̇асса хи арияасаавагассаби звам̣ ход̇и. гим̣ д̇асса бажжавзгкан̣аа над̇т̇ийд̇и? ад̇т̇и. саа бана на саб̣б̣зсам̣ барибун̣н̣аа ход̇и. зго хи бахийнагилзсамзва бажжавзгкад̇и. зго авасидтагилзсамзва, зго маг̇г̇амзва, зго паламзва, зго ниб̣б̣аанамзва. имаасу бана бан̃жасу бажжавзгкан̣аасу згам̣ ваа д̣̇вз ваа но лад̣̇д̇хум̣ на ваддад̇и. ид̇и яасса бажжавзгкан̣аа на барибун̣н̣аа, д̇асса маг̇г̇аваж̇жхагилзсабан̣н̣ад̇д̇ияам̣ аговид̣̇ад̇д̇аа звам̣ ход̇и.
Yena me ekadā lobhadhammāpīti yena mayhaṃ ekekasmiṃ kāle lobhadhammāpi cittaṃ pariyādāya tiṭṭhantīti pucchati. Ayaṃ kira rājā ‘‘sakadāgāmimaggena lobhadosamohā niravasesā pahīyantī’’ti saññī ahosi, ayaṃ ‘‘appahīnaṃ me atthī’’tipi jānāti, appahīnakaṃ upādāya pahīnakampi puna pacchatovāvattatīti saññī hoti. Ariyasāvakassa evaṃ sandeho uppajjatīti? Āma uppajjati. Kasmā? Paṇṇattiyā akovidattā. ‘‘Ayaṃ kileso asukamaggavajjho’’ti imissā paṇṇattiyā akovidassa hi ariyasāvakassapi evaṃ hoti. Kiṃ tassa paccavekkhaṇā natthīti? Atthi. Sā pana na sabbesaṃ paripuṇṇā hoti. Eko hi pahīnakilesameva paccavekkhati. Eko avasiṭṭhakilesameva, eko maggameva, eko phalameva, eko nibbānameva. Imāsu pana pañcasu paccavekkhaṇāsu ekaṃ vā dve vā no laddhuṃ na vaṭṭati. Iti yassa paccavekkhaṇā na paripuṇṇā, tassa maggavajjhakilesapaṇṇattiyaṃ akovidattā evaṃ hoti.
176. со зва ко д̇зд̇и соязва лобхо д̣̇осо мохо жа д̇ава санд̇аанз аббахийно, д̇вам̣ бана бахийнасан̃н̃ий ахосийд̇и д̣̇ассзд̇и. со жа хи д̇зд̇и со д̇уяхам̣ лобхад̣̇осамохад̇хаммо. гаамзд̇и д̣̇увид̇хз гаамз. на барибхун̃ж̇зяяаасийд̇и маяам̣ вияа баб̣б̣аж̇зяяаасийд̇и д̣̇ассзд̇и.
176.Soeva kho teti soyeva lobho doso moho ca tava santāne appahīno, tvaṃ pana pahīnasaññī ahosīti dasseti. So ca hi teti so tuyhaṃ lobhadosamohadhammo. Kāmeti duvidhe kāme. Na paribhuñjeyyāsīti mayaṃ viya pabbajeyyāsīti dasseti.
177. аббассаад̣̇аад̇и барид̇д̇асукаа. б̣ахуд̣̇угкаад̇и д̣̇идтад̇хаммигасамбарааяигад̣̇угкамзвзд̇т̇а б̣ахугам̣. б̣ахубааяаасаад̇и д̣̇идтад̇хаммигасамбарааяиго убааяаасагилзсоязвзд̇т̇а б̣аху. аад̣̇ийнавод̇и д̣̇идтад̇хаммигасамбарааяиго убад̣̇д̣̇аво. зд̇т̇а бхияяод̇и зд̇зсу гаамзсу аяам̣ аад̣̇ийнавоязва б̣аху. ассаад̣̇о бана химаванд̇ам̣ убанид̇хааяа саасабо вияа аббо, барид̇д̇аго. ид̇и жзби махаанаамаад̇и махаанаама звам̣ жзби арияасаавагасса. яат̇аабхууд̇анд̇и яат̇аасабхаавам̣. саммаа наязна гааран̣зна бан̃н̃ааяа судту д̣̇идтам̣ ход̇ийд̇и д̣̇ассзд̇и. д̇ад̇т̇а бан̃н̃ааяаад̇и вибассанаабан̃н̃ааяа, хздтаамаг̇г̇ад̣̇ваяан̃аан̣знаад̇и ад̇т̇о. со жаад̇и со зва маг̇г̇ад̣̇ваязна д̣̇идтагаамаад̣̇ийнаво арияасааваго. бийд̇исуканд̇и иминаа саббийд̇игаани д̣̇вз жхаанаани д̣̇ассзд̇и. ан̃н̃ам̣ ваа д̇ад̇о санд̇ад̇аранд̇и д̇ад̇о жхаанад̣̇ваяад̇о санд̇ад̇арам̣ ан̃н̃ам̣ убарижхаанад̣̇ваяан̃жзва маг̇г̇ад̣̇ваяан̃жа. нзва д̇аава анааваддий гаамзсу ход̇ийд̇и ат̇а ко со д̣̇вз маг̇г̇з бадивиж̇жхид̇ваа тид̇оби арияасааваго убари жхаанаанам̣ ваа маг̇г̇аанам̣ ваа анад̇хиг̇ад̇ад̇д̇аа нзва д̇аава гаамзсу анааваддий ход̇и, анааваддино анаабхог̇о на ход̇и. ааваддино саабхог̇оязва ход̇и. гасмаа? жад̇уухи жхаанзхи вигкамбханаббахаанасса, д̣̇вийхи маг̇г̇зхи самужчзд̣̇аббахаанасса абхааваа.
177.Appassādāti parittasukhā. Bahudukkhāti diṭṭhadhammikasamparāyikadukkhamevettha bahukaṃ. Bahupāyāsāti diṭṭhadhammikasamparāyiko upāyāsakilesoyevettha bahu. Ādīnavoti diṭṭhadhammikasamparāyiko upaddavo. Ettha bhiyyoti etesu kāmesu ayaṃ ādīnavoyeva bahu. Assādo pana himavantaṃ upanidhāya sāsapo viya appo, parittako. Iti cepi mahānāmāti mahānāma evaṃ cepi ariyasāvakassa. Yathābhūtanti yathāsabhāvaṃ. Sammā nayena kāraṇena paññāya suṭṭhu diṭṭhaṃ hotīti dasseti. Tattha paññāyāti vipassanāpaññāya, heṭṭhāmaggadvayañāṇenāti attho. Socāti so eva maggadvayena diṭṭhakāmādīnavo ariyasāvako. Pītisukhanti iminā sappītikāni dve jhānāni dasseti. Aññaṃ vā tato santataranti tato jhānadvayato santataraṃ aññaṃ uparijhānadvayañceva maggadvayañca. Neva tāva anāvaṭṭī kāmesu hotīti atha kho so dve magge paṭivijjhitvā ṭhitopi ariyasāvako upari jhānānaṃ vā maggānaṃ vā anadhigatattā neva tāva kāmesu anāvaṭṭī hoti, anāvaṭṭino anābhogo na hoti. Āvaṭṭino sābhogoyeva hoti. Kasmā? Catūhi jhānehi vikkhambhanappahānassa, dvīhi maggehi samucchedappahānassa abhāvā.
маяхамби код̇и на гзвалам̣ д̇уяхзва, ат̇а ко маяхамби. буб̣б̣зва самб̣од̇хаад̇и маг̇г̇асамб̣од̇хид̇о батамад̇арамзва. бан̃н̃ааяа суд̣̇идтам̣ ход̇ийд̇и зд̇т̇а ород̇ханаадагаа баж̇аханабан̃н̃аа ад̇хиббзд̇аа. бийд̇исукам̣ нааж̇жхаг̇аманд̇и саббийд̇игаани д̣̇вз жхаанаани на бадилабхим̣. ан̃н̃ам̣ ваа д̇ад̇о санд̇ад̇аранд̇и ид̇ха убари жхаанад̣̇ваяам̣ жзва жад̇д̇ааро жа маг̇г̇аа ад̇хиббзд̇аа. бажжан̃н̃аасинд̇и бадиан̃н̃аасим̣.
Mayhampikhoti na kevalaṃ tuyheva, atha kho mayhampi. Pubbeva sambodhāti maggasambodhito paṭhamatarameva. Paññāya sudiṭṭhaṃ hotīti ettha orodhanāṭakā pajahanapaññā adhippetā. Pītisukhaṃ nājjhagamanti sappītikāni dve jhānāni na paṭilabhiṃ. Aññaṃ vā tato santataranti idha upari jhānadvayaṃ ceva cattāro ca maggā adhippetā. Paccaññāsinti paṭiaññāsiṃ.
179. згамид̣̇аахам̣ махаанаама самаяанд̇и гасмаа аарад̣̇д̇хам̣? аяам̣ баадиязгго анусанд̇хи. хздтаа гаамаанам̣ ассаад̣̇оби аад̣̇ийнавоби гат̇ид̇о , ниссаран̣ам̣ на гат̇ид̇ам̣, д̇ам̣ гат̇зд̇ум̣ аяам̣ д̣̇зсанаа аарад̣̇д̇хаа. гаамасукаллигаануяог̇о хи зго анд̇о ад̇д̇агиламат̇аануяог̇о згод̇и имзхи анд̇зхи муд̇д̇ам̣ мама саасананд̇и убари паласамаабад̇д̇исийсзна сагаласаасанам̣ д̣̇ассзд̇умби аяам̣ д̣̇зсанаа аарад̣̇д̇хаа.
179.Ekamidāhaṃ mahānāma samayanti kasmā āraddhaṃ? Ayaṃ pāṭiyekko anusandhi. Heṭṭhā kāmānaṃ assādopi ādīnavopi kathito , nissaraṇaṃ na kathitaṃ, taṃ kathetuṃ ayaṃ desanā āraddhā. Kāmasukhallikānuyogo hi eko anto attakilamathānuyogo ekoti imehi antehi muttaṃ mama sāsananti upari phalasamāpattisīsena sakalasāsanaṃ dassetumpi ayaṃ desanā āraddhā.
г̇иж̇жхагуудз баб̣б̣ад̇зд̇и д̇асса баб̣б̣ад̇асса г̇иж̇жхасад̣̇исам̣ гуудам̣ ад̇т̇и, д̇асмаа г̇иж̇жхагуудод̇и вужжад̇и. г̇иж̇жхаа ваа д̇асса гуудзсу нивасанд̇ийд̇иби г̇иж̇жхагуудод̇и вужжад̇и. исиг̇илибассзд̇и исиг̇илибаб̣б̣ад̇асса бассз. гаал̣асилааяанд̇и гаал̣аван̣н̣з бидтибаасаан̣з. уб̣бхадтагаа хонд̇ийд̇и уд̣̇д̇хам̣язва тид̇агаа хонд̇и анисиннаа. обаггамигаад̇и уб̣бхадтагаад̣̇инаа ад̇д̇ано убаггамзна ниб̣б̣ад̇д̇ид̇аа. ниг̇ан̣то, аавусод̇и ан̃н̃ам̣ гааран̣ам̣ вад̇д̇ум̣ асаггонд̇аа ниг̇ан̣тасса убари багкибим̣су. саб̣б̣ан̃н̃уу саб̣б̣ад̣̇ассаавийд̇и со амхаагам̣ сад̇т̇аа ад̇ийд̇аанааг̇ад̇абажжуббаннам̣ саб̣б̣ам̣ ж̇аанаад̇и бассад̇ийд̇и д̣̇ассзд̇и. абарисзсам̣ н̃аан̣ад̣̇ассанам̣ бадиж̇аанаад̇ийд̇и со амхаагам̣ сад̇т̇аа абарисзсам̣ д̇хаммам̣ ж̇аананд̇о абарисзсасан̇каад̇ам̣ н̃аан̣ад̣̇ассанам̣ бадиж̇аанаад̇и, бадиж̇аананд̇о жа звам̣ бадиж̇аанаад̇и ‘‘жарад̇о жа мз д̇идтад̇о жа…бз… бажжубадтид̇а’’нд̇и. д̇ад̇т̇а сад̇ад̇анд̇и нижжам̣. самид̇анд̇и д̇ассзва взважанам̣.
Gijjhakūṭe pabbateti tassa pabbatassa gijjhasadisaṃ kūṭaṃ atthi, tasmā gijjhakūṭoti vuccati. Gijjhā vā tassa kūṭesu nivasantītipi gijjhakūṭoti vuccati. Isigilipasseti isigilipabbatassa passe. Kāḷasilāyanti kāḷavaṇṇe piṭṭhipāsāṇe. Ubbhaṭṭhakā hontīti uddhaṃyeva ṭhitakā honti anisinnā. Opakkamikāti ubbhaṭṭhakādinā attano upakkamena nibbattitā. Nigaṇṭho, āvusoti aññaṃ kāraṇaṃ vattuṃ asakkontā nigaṇṭhassa upari pakkhipiṃsu. Sabbaññū sabbadassāvīti so amhākaṃ satthā atītānāgatapaccuppannaṃ sabbaṃ jānāti passatīti dasseti. Aparisesaṃ ñāṇadassanaṃ paṭijānātīti so amhākaṃ satthā aparisesaṃ dhammaṃ jānanto aparisesasaṅkhātaṃ ñāṇadassanaṃ paṭijānāti, paṭijānanto ca evaṃ paṭijānāti ‘‘carato ca me tiṭṭhato ca…pe… paccupaṭṭhita’’nti. Tattha satatanti niccaṃ. Samitanti tasseva vevacanaṃ.
180. гим̣ бана д̇умхз, аавусо, ниг̇ан̣таа ж̇аанаат̇а зд̇д̇агам̣ ваа д̣̇угкам̣ ниж̇ж̇ин̣н̣анд̇и ид̣̇ам̣ бхаг̇аваа бурисо наама яам̣ гарод̇и, д̇ам̣ ж̇аанаад̇и. вийсад̇игахаабан̣з ин̣ам̣ г̇ахзд̇ваа д̣̇аса д̣̇ад̇ваа ‘‘д̣̇аса мз д̣̇иннаа д̣̇аса авасидтаа’’д̇и ж̇аанаад̇и, д̇зби д̣̇ад̇ваа ‘‘саб̣б̣ам̣ д̣̇инна’’нд̇и ж̇аанаад̇и. кзд̇д̇асса д̇ад̇ияабхааг̇ам̣ лааяид̇ваа ‘‘зго бхааг̇о лааяид̇о, д̣̇вз авасидтаа’’д̇и ж̇аанаад̇и. буна згам̣ лааяид̇ваа ‘‘д̣̇вз лааяид̇аа, зго авасидто’’д̇и ж̇аанаад̇и. д̇асмимби лааяид̇з ‘‘саб̣б̣ам̣ нидтид̇а’’нд̇и ж̇аанаад̇и, звам̣ саб̣б̣агижжзсу гад̇ан̃жа агад̇ан̃жа ж̇аанаад̇и, д̇умхзхиби д̇ат̇аа н̃аад̇аб̣б̣ам̣ сияаад̇и д̣̇ассзд̇и. агусалаанам̣ д̇хаммаанам̣ бахаананд̇и иминаа агусалам̣ бахааяа гусалам̣ бхаавзд̇ваа суд̣̇д̇ханд̇ам̣ бад̇д̇о ниг̇ан̣то наама д̇умхаагам̣ саасанз ад̇т̇ийд̇и бужчад̇и.
180.Kiṃ pana tumhe, āvuso, nigaṇṭhā jānātha ettakaṃ vā dukkhaṃ nijjiṇṇanti idaṃ bhagavā puriso nāma yaṃ karoti, taṃ jānāti. Vīsatikahāpaṇe iṇaṃ gahetvā dasa datvā ‘‘dasa me dinnā dasa avasiṭṭhā’’ti jānāti, tepi datvā ‘‘sabbaṃ dinna’’nti jānāti. Khettassa tatiyabhāgaṃ lāyitvā ‘‘eko bhāgo lāyito, dve avasiṭṭhā’’ti jānāti. Puna ekaṃ lāyitvā ‘‘dve lāyitā, eko avasiṭṭho’’ti jānāti. Tasmimpi lāyite ‘‘sabbaṃ niṭṭhita’’nti jānāti, evaṃ sabbakiccesu katañca akatañca jānāti, tumhehipi tathā ñātabbaṃ siyāti dasseti. Akusalānaṃ dhammānaṃ pahānanti iminā akusalaṃ pahāya kusalaṃ bhāvetvā suddhantaṃ patto nigaṇṭho nāma tumhākaṃ sāsane atthīti pucchati.
звам̣ санд̇зд̇и д̇умхаагам̣ звам̣ аж̇аананабхаавз сад̇и. луд̣̇д̣̇аад̇и луд̣̇д̣̇аажаараа. лохид̇абаан̣инод̇и баан̣з ж̇ийвид̇аа воробзнд̇аа лохид̇зна магкид̇абаан̣ино. баан̣ам̣ хи хананд̇ассаби яасса лохид̇зна баан̣и на магкияад̇и , соби лохид̇абаан̣ийд̇взва вужжад̇и. гуруурагамманд̇аад̇и д̣̇аарун̣агаммаа. маад̇ари бид̇ари д̇хаммигасаман̣аб̣раахман̣аад̣̇ийсу жа гад̇аабараад̇хаа. мааг̇авигаад̣̇аяо ваа гагкал̣агаммаа.
Evaṃ santeti tumhākaṃ evaṃ ajānanabhāve sati. Luddāti luddācārā. Lohitapāṇinoti pāṇe jīvitā voropentā lohitena makkhitapāṇino. Pāṇaṃ hi hanantassapi yassa lohitena pāṇi na makkhiyati , sopi lohitapāṇītveva vuccati. Kurūrakammantāti dāruṇakammā. Mātari pitari dhammikasamaṇabrāhmaṇādīsu ca katāparādhā. Māgavikādayo vā kakkhaḷakammā.
на ко, аавусо, г̇од̇амаад̇и ид̣̇ам̣ ниг̇ан̣таа ‘‘аяам̣ амхаагам̣ ваад̣̇з д̣̇осам̣ д̣̇зд̇и, маяамбисса д̣̇осам̣ ааробзмаа’’д̇и ман̃н̃амаанаа аарабхим̣су. д̇ассад̇т̇о, ‘‘аавусо, г̇од̇ама яат̇аа д̇умхз бан̣ийд̇ажийвараани д̇хаарзнд̇аа саалимам̣сод̣̇анам̣ бхун̃ж̇анд̇аа д̣̇звавимаанаван̣н̣ааяа г̇анд̇хагудияаа васамаанаа сукзна сукам̣ ад̇хиг̇ажчат̇а, на звам̣ сукзна сукам̣ ад̇хиг̇анд̇аб̣б̣ам̣. яат̇аа бана маяам̣ уггудигаббад̇хаанаад̣̇ийхи наанаббагааран̣ам̣ д̣̇угкам̣ анубхаваама, звам̣ д̣̇угкзна сукам̣ ад̇хиг̇анд̇аб̣б̣а’’нд̇и. сукзна жа хаавусод̇и ид̣̇ам̣ сажз сукзна жа сукам̣ ад̇хиг̇анд̇аб̣б̣ам̣ сияаа. рааж̇аа ад̇хиг̇ажчзяяаад̇и д̣̇ассанад̇т̇ам̣ вуд̇д̇ам̣ . д̇ад̇т̇а мааг̇ад̇ход̇и маг̇ад̇харадтасса иссаро. сзнияод̇и д̇асса наамам̣. б̣имб̣ийд̇и ад̇д̇абхаавасса наамам̣. со д̇асса саарабхууд̇о д̣̇ассанийяо баасаад̣̇иго ад̇д̇абхаавасамид̣̇д̇хияаа б̣имб̣исаарод̇и вужжад̇и. сукавихаарид̇арод̇и ид̣̇ам̣ д̇з ниг̇ан̣таа ран̃н̃о д̇ийсу баасаад̣̇зсу д̇ивид̇хаваязхи наадагзхи сад̣̇д̇хим̣ самбад̇д̇ианубхаванам̣ санд̇хааяа вад̣̇анд̇и. ад̣̇д̇хаад̇и згам̣сзна. сахасаа аббадисан̇каад̇и саахасам̣ гад̇ваа, аббажжавзгкид̇ваава яат̇аа рад̇д̇о рааг̇авасзна д̣̇удто д̣̇осавасзна муул̣хо мохавасзна бхаасад̇и, звамзвам̣ ваажаа бхаасид̇аад̇и д̣̇ассзд̇и.
Na kho, āvuso, gotamāti idaṃ nigaṇṭhā ‘‘ayaṃ amhākaṃ vāde dosaṃ deti, mayampissa dosaṃ āropemā’’ti maññamānā ārabhiṃsu. Tassattho, ‘‘āvuso, gotama yathā tumhe paṇītacīvarāni dhārentā sālimaṃsodanaṃ bhuñjantā devavimānavaṇṇāya gandhakuṭiyā vasamānā sukhena sukhaṃ adhigacchatha, na evaṃ sukhena sukhaṃ adhigantabbaṃ. Yathā pana mayaṃ ukkuṭikappadhānādīhi nānappakāraṇaṃ dukkhaṃ anubhavāma, evaṃ dukkhena sukhaṃ adhigantabba’’nti. Sukhena ca hāvusoti idaṃ sace sukhena ca sukhaṃ adhigantabbaṃ siyā. Rājā adhigaccheyyāti dassanatthaṃ vuttaṃ . Tattha māgadhoti magadharaṭṭhassa issaro. Seniyoti tassa nāmaṃ. Bimbīti attabhāvassa nāmaṃ. So tassa sārabhūto dassanīyo pāsādiko attabhāvasamiddhiyā bimbisāroti vuccati. Sukhavihāritaroti idaṃ te nigaṇṭhā rañño tīsu pāsādesu tividhavayehi nāṭakehi saddhiṃ sampattianubhavanaṃ sandhāya vadanti. Addhāti ekaṃsena. Sahasā appaṭisaṅkhāti sāhasaṃ katvā, appaccavekkhitvāva yathā ratto rāgavasena duṭṭho dosavasena mūḷho mohavasena bhāsati, evamevaṃ vācā bhāsitāti dasseti.
д̇ад̇т̇а бадибужчиссаамийд̇и д̇асмим̣ ад̇т̇з бужчиссаами. яат̇аа во камзяяаад̇и яат̇аа д̇умхаагам̣ ружжзяяа. баход̇ийд̇и саггод̇и.
Tattha paṭipucchissāmīti tasmiṃ atthe pucchissāmi. Yathā vo khameyyāti yathā tumhākaṃ rucceyya. Pahotīti sakkoti.
анин̃ж̇амаанод̇и ажаламаано. зганд̇асукам̣ бадисам̣взд̣̇ийд̇и ниранд̇арасукам̣ бадисам̣взд̣̇ий. ‘‘ахам̣ ко , аавусо, ниг̇ан̣таа бахоми…бз… зганд̇асукам̣ бадисам̣взд̣̇ий’’д̇и ид̣̇ам̣ ад̇д̇ано паласамаабад̇д̇исукам̣ д̣̇ассзнд̇о ааха. зд̇т̇а жа гат̇аабад̇идтаабанад̇т̇ам̣ рааж̇аваарз сад̇д̇а аад̣̇им̣ гад̇ваа бужчаа гад̇аа. сад̇д̇а рад̇д̇инд̣̇иваани наббаход̇ийд̇и хи вуд̇д̇з ча бан̃жа жад̇д̇аарийд̇и сукам̣ бужчид̇ум̣ ход̇и. суд̣̇д̇хаваарз бана сад̇д̇аад̇и вуд̇д̇з буна ча бан̃жа жад̇д̇аарийд̇и вужжамаанам̣ анажчарияам̣ ход̇и, д̇асмаа згам̣ аад̣̇им̣ гад̇ваа д̣̇зсанаа гад̇аа. сзсам̣ саб̣б̣ад̇т̇а уд̇д̇аанад̇т̇амзваад̇и.
Aniñjamānoti acalamāno. Ekantasukhaṃ paṭisaṃvedīti nirantarasukhaṃ paṭisaṃvedī. ‘‘Ahaṃ kho , āvuso, nigaṇṭhā pahomi…pe… ekantasukhaṃ paṭisaṃvedī’’ti idaṃ attano phalasamāpattisukhaṃ dassento āha. Ettha ca kathāpatiṭṭhāpanatthaṃ rājavāre satta ādiṃ katvā pucchā katā. Satta rattindivāni nappahotīti hi vutte cha pañca cattārīti sukhaṃ pucchituṃ hoti. Suddhavāre pana sattāti vutte puna cha pañca cattārīti vuccamānaṃ anacchariyaṃ hoti, tasmā ekaṃ ādiṃ katvā desanā katā. Sesaṃ sabbattha uttānatthamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
жуул̣ад̣̇угкагканд̇хасуд̇д̇аван̣н̣анаа нидтид̇аа.
Cūḷadukkhakkhandhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 4. жуул̣ад̣̇угкагканд̇хасуд̇д̇ам̣ • 4. Cūḷadukkhakkhandhasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 4. жуул̣ад̣̇угкагканд̇хасуд̇д̇аван̣н̣анаа • 4. Cūḷadukkhakkhandhasuttavaṇṇanā
