| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ • Majjhimanikāya |
೪. ಚೂಳಗೋಪಾಲಕಸುತ್ತಂ
4. Cūḷagopālakasuttaṃ
೩೫೦. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ವಜ್ಜೀಸು ವಿಹರತಿ ಉಕ್ಕಚೇಲಾಯಂ ಗಙ್ಗಾಯ ನದಿಯಾ ತೀರೇ। ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ। ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ। ಭಗವಾ ಏತದವೋಚ –
350. Evaṃ me sutaṃ – ekaṃ samayaṃ bhagavā vajjīsu viharati ukkacelāyaṃ gaṅgāya nadiyā tīre. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ಭೂತಪುಬ್ಬಂ , ಭಿಕ್ಖವೇ, ಮಾಗಧಕೋ ಗೋಪಾಲಕೋ ದುಪ್ಪಞ್ಞಜಾತಿಕೋ, ವಸ್ಸಾನಂ ಪಚ್ಛಿಮೇ ಮಾಸೇ ಸರದಸಮಯೇ, ಅಸಮವೇಕ್ಖಿತ್ವಾ ಗಙ್ಗಾಯ ನದಿಯಾ ಓರಿಮಂ ತೀರಂ, ಅಸಮವೇಕ್ಖಿತ್ವಾ ಪಾರಿಮಂ ತೀರಂ, ಅತಿತ್ಥೇನೇವ ಗಾವೋ ಪತಾರೇಸಿ ಉತ್ತರಂ ತೀರಂ ಸುವಿದೇಹಾನಂ। ಅಥ ಖೋ, ಭಿಕ್ಖವೇ, ಗಾವೋ ಮಜ್ಝೇಗಙ್ಗಾಯ ನದಿಯಾ ಸೋತೇ ಆಮಣ್ಡಲಿಯಂ ಕರಿತ್ವಾ ತತ್ಥೇವ ಅನಯಬ್ಯಸನಂ ಆಪಜ್ಜಿಂಸು। ತಂ ಕಿಸ್ಸ ಹೇತು? ತಥಾ ಹಿ ಸೋ, ಭಿಕ್ಖವೇ, ಮಾಗಧಕೋ ಗೋಪಾಲಕೋ ದುಪ್ಪಞ್ಞಜಾತಿಕೋ, ವಸ್ಸಾನಂ ಪಚ್ಛಿಮೇ ಮಾಸೇ ಸರದಸಮಯೇ, ಅಸಮವೇಕ್ಖಿತ್ವಾ ಗಙ್ಗಾಯ ನದಿಯಾ ಓರಿಮಂ ತೀರಂ, ಅಸಮವೇಕ್ಖಿತ್ವಾ ಪಾರಿಮಂ ತೀರಂ, ಅತಿತ್ಥೇನೇವ ಗಾವೋ ಪತಾರೇಸಿ ಉತ್ತರಂ ತೀರಂ ಸುವಿದೇಹಾನಂ। ಏವಮೇವ ಖೋ, ಭಿಕ್ಖವೇ, ಯೇ ಹಿ ಕೇಚಿ 1 ಸಮಣಾ ವಾ ಬ್ರಾಹ್ಮಣಾ ವಾ ಅಕುಸಲಾ ಇಮಸ್ಸ ಲೋಕಸ್ಸ ಅಕುಸಲಾ ಪರಸ್ಸ ಲೋಕಸ್ಸ, ಅಕುಸಲಾ ಮಾರಧೇಯ್ಯಸ್ಸ ಅಕುಸಲಾ ಅಮಾರಧೇಯ್ಯಸ್ಸ, ಅಕುಸಲಾ ಮಚ್ಚುಧೇಯ್ಯಸ್ಸ ಅಕುಸಲಾ ಅಮಚ್ಚುಧೇಯ್ಯಸ್ಸ, ತೇಸಂ ಯೇ ಸೋತಬ್ಬಂ ಸದ್ದಹಾತಬ್ಬಂ ಮಞ್ಞಿಸ್ಸನ್ತಿ, ತೇಸಂ ತಂ ಭವಿಸ್ಸತಿ ದೀಘರತ್ತಂ ಅಹಿತಾಯ ದುಕ್ಖಾಯ।
‘‘Bhūtapubbaṃ , bhikkhave, māgadhako gopālako duppaññajātiko, vassānaṃ pacchime māse saradasamaye, asamavekkhitvā gaṅgāya nadiyā orimaṃ tīraṃ, asamavekkhitvā pārimaṃ tīraṃ, atittheneva gāvo patāresi uttaraṃ tīraṃ suvidehānaṃ. Atha kho, bhikkhave, gāvo majjhegaṅgāya nadiyā sote āmaṇḍaliyaṃ karitvā tattheva anayabyasanaṃ āpajjiṃsu. Taṃ kissa hetu? Tathā hi so, bhikkhave, māgadhako gopālako duppaññajātiko, vassānaṃ pacchime māse saradasamaye, asamavekkhitvā gaṅgāya nadiyā orimaṃ tīraṃ, asamavekkhitvā pārimaṃ tīraṃ, atittheneva gāvo patāresi uttaraṃ tīraṃ suvidehānaṃ. Evameva kho, bhikkhave, ye hi keci 2 samaṇā vā brāhmaṇā vā akusalā imassa lokassa akusalā parassa lokassa, akusalā māradheyyassa akusalā amāradheyyassa, akusalā maccudheyyassa akusalā amaccudheyyassa, tesaṃ ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ ahitāya dukkhāya.
೩೫೧. ‘‘ಭೂತಪುಬ್ಬಂ, ಭಿಕ್ಖವೇ, ಮಾಗಧಕೋ ಗೋಪಾಲಕೋ ಸಪ್ಪಞ್ಞಜಾತಿಕೋ, ವಸ್ಸಾನಂ ಪಚ್ಛಿಮೇ ಮಾಸೇ ಸರದಸಮಯೇ, ಸಮವೇಕ್ಖಿತ್ವಾ ಗಙ್ಗಾಯ ನದಿಯಾ ಓರಿಮಂ ತೀರಂ, ಸಮವೇಕ್ಖಿತ್ವಾ ಪಾರಿಮಂ ತೀರಂ, ತಿತ್ಥೇನೇವ ಗಾವೋ ಪತಾರೇಸಿ ಉತ್ತರಂ ತೀರಂ ಸುವಿದೇಹಾನಂ। ಸೋ ಪಠಮಂ ಪತಾರೇಸಿ ಯೇ ತೇ ಉಸಭಾ ಗೋಪಿತರೋ ಗೋಪರಿಣಾಯಕಾ। ತೇ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು। ಅಥಾಪರೇ ಪತಾರೇಸಿ ಬಲವಗಾವೋ ದಮ್ಮಗಾವೋ। ತೇಪಿ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು। ಅಥಾಪರೇ ಪತಾರೇಸಿ ವಚ್ಛತರೇ ವಚ್ಛತರಿಯೋ। ತೇಪಿ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು। ಅಥಾಪರೇ ಪತಾರೇಸಿ ವಚ್ಛಕೇ ಕಿಸಾಬಲಕೇ 3। ತೇಪಿ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು। ಭೂತಪುಬ್ಬಂ, ಭಿಕ್ಖವೇ, ವಚ್ಛಕೋ ತರುಣಕೋ ತಾವದೇವ ಜಾತಕೋ ಮಾತುಗೋರವಕೇನ ವುಯ್ಹಮಾನೋ, ಸೋಪಿ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಾಸಿ। ತಂ ಕಿಸ್ಸ ಹೇತು? ತಥಾ ಹಿ ಸೋ, ಭಿಕ್ಖವೇ, ಮಾಗಧಕೋ ಗೋಪಾಲಕೋ ಸಪ್ಪಞ್ಞಜಾತಿಕೋ , ವಸ್ಸಾನಂ ಪಚ್ಛಿಮೇ ಮಾಸೇ ಸರದಸಮಯೇ, ಸಮವೇಕ್ಖಿತ್ವಾ ಗಙ್ಗಾಯ ನದಿಯಾ ಓರಿಮಂ ತೀರಂ, ಸಮವೇಕ್ಖಿತ್ವಾ ಪಾರಿಮಂ ತೀರಂ, ತಿತ್ಥೇನೇವ ಗಾವೋ ಪತಾರೇಸಿ ಉತ್ತರಂ ತೀರಂ ಸುವಿದೇಹಾನಂ। ಏವಮೇವ ಖೋ, ಭಿಕ್ಖವೇ, ಯೇ ಹಿ ಕೇಚಿ ಸಮಣಾ ವಾ ಬ್ರಾಹ್ಮಣಾ ವಾ ಕುಸಲಾ ಇಮಸ್ಸ ಲೋಕಸ್ಸ ಕುಸಲಾ ಪರಸ್ಸ ಲೋಕಸ್ಸ, ಕುಸಲಾ ಮಾರಧೇಯ್ಯಸ್ಸ ಕುಸಲಾ ಅಮಾರಧೇಯ್ಯಸ್ಸ, ಕುಸಲಾ ಮಚ್ಚುಧೇಯ್ಯಸ್ಸ ಕುಸಲಾ ಅಮಚ್ಚುಧೇಯ್ಯಸ್ಸ, ತೇಸಂ ಯೇ ಸೋತಬ್ಬಂ ಸದ್ದಹಾತಬ್ಬಂ ಮಞ್ಞಿಸ್ಸನ್ತಿ, ತೇಸಂ ತಂ ಭವಿಸ್ಸತಿ ದೀಘರತ್ತಂ ಹಿತಾಯ ಸುಖಾಯ।
351. ‘‘Bhūtapubbaṃ, bhikkhave, māgadhako gopālako sappaññajātiko, vassānaṃ pacchime māse saradasamaye, samavekkhitvā gaṅgāya nadiyā orimaṃ tīraṃ, samavekkhitvā pārimaṃ tīraṃ, tittheneva gāvo patāresi uttaraṃ tīraṃ suvidehānaṃ. So paṭhamaṃ patāresi ye te usabhā gopitaro gopariṇāyakā. Te tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi balavagāvo dammagāvo. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi vacchatare vacchatariyo. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi vacchake kisābalake 4. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Bhūtapubbaṃ, bhikkhave, vacchako taruṇako tāvadeva jātako mātugoravakena vuyhamāno, sopi tiriyaṃ gaṅgāya sotaṃ chetvā sotthinā pāraṃ agamāsi. Taṃ kissa hetu? Tathā hi so, bhikkhave, māgadhako gopālako sappaññajātiko , vassānaṃ pacchime māse saradasamaye, samavekkhitvā gaṅgāya nadiyā orimaṃ tīraṃ, samavekkhitvā pārimaṃ tīraṃ, tittheneva gāvo patāresi uttaraṃ tīraṃ suvidehānaṃ. Evameva kho, bhikkhave, ye hi keci samaṇā vā brāhmaṇā vā kusalā imassa lokassa kusalā parassa lokassa, kusalā māradheyyassa kusalā amāradheyyassa, kusalā maccudheyyassa kusalā amaccudheyyassa, tesaṃ ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ hitāya sukhāya.
೩೫೨. ‘‘ಸೇಯ್ಯಥಾಪಿ , ಭಿಕ್ಖವೇ, ಯೇ ತೇ ಉಸಭಾ ಗೋಪಿತರೋ ಗೋಪರಿಣಾಯಕಾ ತೇ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು, ಏವಮೇವ ಖೋ, ಭಿಕ್ಖವೇ, ಯೇ ತೇ ಭಿಕ್ಖೂ ಅರಹನ್ತೋ ಖೀಣಾಸವಾ ವುಸಿತವನ್ತೋ ಕತಕರಣೀಯಾ ಓಹಿತಭಾರಾ ಅನುಪ್ಪತ್ತಸದತ್ಥಾ ಪರಿಕ್ಖೀಣಭವಸಂಯೋಜನಾ ಸಮ್ಮದಞ್ಞಾ ವಿಮುತ್ತಾ, ತೇ ತಿರಿಯಂ ಮಾರಸ್ಸ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಗತಾ।
352. ‘‘Seyyathāpi , bhikkhave, ye te usabhā gopitaro gopariṇāyakā te tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, te tiriyaṃ mārassa sotaṃ chetvā sotthinā pāraṃ gatā.
‘‘ಸೇಯ್ಯಥಾಪಿ ತೇ, ಭಿಕ್ಖವೇ, ಬಲವಗಾವೋ ದಮ್ಮಗಾವೋ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು, ಏವಮೇವ ಖೋ, ಭಿಕ್ಖವೇ, ಯೇ ತೇ ಭಿಕ್ಖೂ ಪಞ್ಚನ್ನಂ ಓರಮ್ಭಾಗಿಯಾನಂ ಸಂಯೋಜನಾನಂ ಪರಿಕ್ಖಯಾ ಓಪಪಾತಿಕಾ ತತ್ಥ ಪರಿನಿಬ್ಬಾಯಿನೋ ಅನಾವತ್ತಿಧಮ್ಮಾ ತಸ್ಮಾ ಲೋಕಾ, ತೇಪಿ ತಿರಿಯಂ ಮಾರಸ್ಸ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಗಮಿಸ್ಸನ್ತಿ।
‘‘Seyyathāpi te, bhikkhave, balavagāvo dammagāvo tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā, tepi tiriyaṃ mārassa sotaṃ chetvā sotthinā pāraṃ gamissanti.
‘‘ಸೇಯ್ಯಥಾಪಿ ತೇ, ಭಿಕ್ಖವೇ, ವಚ್ಛತರಾ ವಚ್ಛತರಿಯೋ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು, ಏವಮೇವ ಖೋ, ಭಿಕ್ಖವೇ, ಯೇ ತೇ ಭಿಕ್ಖೂ ತಿಣ್ಣಂ ಸಂಯೋಜನಾನಂ ಪರಿಕ್ಖಯಾ ರಾಗದೋಸಮೋಹಾನಂ ತನುತ್ತಾ ಸಕದಾಗಾಮಿನೋ ಸಕಿಂದೇವ ಇಮಂ ಲೋಕಂ ಆಗನ್ತ್ವಾ ದುಕ್ಖಸ್ಸನ್ತಂ ಕರಿಸ್ಸನ್ತಿ, ತೇಪಿ ತಿರಿಯಂ ಮಾರಸ್ಸ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಗಮಿಸ್ಸನ್ತಿ।
‘‘Seyyathāpi te, bhikkhave, vacchatarā vacchatariyo tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino sakiṃdeva imaṃ lokaṃ āgantvā dukkhassantaṃ karissanti, tepi tiriyaṃ mārassa sotaṃ chetvā sotthinā pāraṃ gamissanti.
‘‘ಸೇಯ್ಯಥಾಪಿ ತೇ, ಭಿಕ್ಖವೇ, ವಚ್ಛಕಾ ಕಿಸಾಬಲಕಾ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಂಸು, ಏವಮೇವ ಖೋ, ಭಿಕ್ಖವೇ, ಯೇ ತೇ ಭಿಕ್ಖೂ ತಿಣ್ಣಂ ಸಂಯೋಜನಾನಂ ಪರಿಕ್ಖಯಾ ಸೋತಾಪನ್ನಾ ಅವಿನಿಪಾತಧಮ್ಮಾ ನಿಯತಾ ಸಮ್ಬೋಧಿಪರಾಯನಾ, ತೇಪಿ ತಿರಿಯಂ ಮಾರಸ್ಸ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಗಮಿಸ್ಸನ್ತಿ।
‘‘Seyyathāpi te, bhikkhave, vacchakā kisābalakā tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyanā, tepi tiriyaṃ mārassa sotaṃ chetvā sotthinā pāraṃ gamissanti.
‘‘ಸೇಯ್ಯಥಾಪಿ ಸೋ, ಭಿಕ್ಖವೇ, ವಚ್ಛಕೋ ತರುಣಕೋ ತಾವದೇವ ಜಾತಕೋ ಮಾತುಗೋರವಕೇನ ವುಯ್ಹಮಾನೋ ತಿರಿಯಂ ಗಙ್ಗಾಯ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಅಗಮಾಸಿ, ಏವಮೇವ ಖೋ, ಭಿಕ್ಖವೇ, ಯೇ ತೇ ಭಿಕ್ಖೂ ಧಮ್ಮಾನುಸಾರಿನೋ ಸದ್ಧಾನುಸಾರಿನೋ, ತೇಪಿ ತಿರಿಯಂ ಮಾರಸ್ಸ ಸೋತಂ ಛೇತ್ವಾ ಸೋತ್ಥಿನಾ ಪಾರಂ ಗಮಿಸ್ಸನ್ತಿ।
‘‘Seyyathāpi so, bhikkhave, vacchako taruṇako tāvadeva jātako mātugoravakena vuyhamāno tiriyaṃ gaṅgāya sotaṃ chetvā sotthinā pāraṃ agamāsi, evameva kho, bhikkhave, ye te bhikkhū dhammānusārino saddhānusārino, tepi tiriyaṃ mārassa sotaṃ chetvā sotthinā pāraṃ gamissanti.
‘‘ಅಹಂ ಖೋ ಪನ, ಭಿಕ್ಖವೇ, ಕುಸಲೋ ಇಮಸ್ಸ ಲೋಕಸ್ಸ ಕುಸಲೋ ಪರಸ್ಸ ಲೋಕಸ್ಸ, ಕುಸಲೋ ಮಾರಧೇಯ್ಯಸ್ಸ ಕುಸಲೋ ಅಮಾರಧೇಯ್ಯಸ್ಸ, ಕುಸಲೋ ಮಚ್ಚುಧೇಯ್ಯಸ್ಸ ಕುಸಲೋ ಅಮಚ್ಚುಧೇಯ್ಯಸ್ಸ। ತಸ್ಸ ಮಯ್ಹಂ, ಭಿಕ್ಖವೇ, ಯೇ ಸೋತಬ್ಬಂ ಸದ್ದಹಾತಬ್ಬಂ ಮಞ್ಞಿಸ್ಸನ್ತಿ, ತೇಸಂ ತಂ ಭವಿಸ್ಸತಿ ದೀಘರತ್ತಂ ಹಿತಾಯ ಸುಖಾಯಾ’’ತಿ।
‘‘Ahaṃ kho pana, bhikkhave, kusalo imassa lokassa kusalo parassa lokassa, kusalo māradheyyassa kusalo amāradheyyassa, kusalo maccudheyyassa kusalo amaccudheyyassa. Tassa mayhaṃ, bhikkhave, ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ hitāya sukhāyā’’ti.
ಇದಮವೋಚ ಭಗವಾ। ಇದಂ ವತ್ವಾ ಸುಗತೋ ಅಥಾಪರಂ ಏತದವೋಚ ಸತ್ಥಾ –
Idamavoca bhagavā. Idaṃ vatvā sugato athāparaṃ etadavoca satthā –
‘‘ಅಯಂ ಲೋಕೋ ಪರೋ ಲೋಕೋ, ಜಾನತಾ ಸುಪ್ಪಕಾಸಿತೋ।
‘‘Ayaṃ loko paro loko, jānatā suppakāsito;
ಯಞ್ಚ ಮಾರೇನ ಸಮ್ಪತ್ತಂ, ಅಪ್ಪತ್ತಂ ಯಞ್ಚ ಮಚ್ಚುನಾ॥
Yañca mārena sampattaṃ, appattaṃ yañca maccunā.
‘‘ಸಬ್ಬಂ ಲೋಕಂ ಅಭಿಞ್ಞಾಯ, ಸಮ್ಬುದ್ಧೇನ ಪಜಾನತಾ।
‘‘Sabbaṃ lokaṃ abhiññāya, sambuddhena pajānatā;
ವಿವಟಂ ಅಮತದ್ವಾರಂ, ಖೇಮಂ ನಿಬ್ಬಾನಪತ್ತಿಯಾ॥
Vivaṭaṃ amatadvāraṃ, khemaṃ nibbānapattiyā.
‘‘ಛಿನ್ನಂ ಪಾಪಿಮತೋ ಸೋತಂ, ವಿದ್ಧಸ್ತಂ ವಿನಳೀಕತಂ।
‘‘Chinnaṃ pāpimato sotaṃ, viddhastaṃ vinaḷīkataṃ;
ಪಾಮೋಜ್ಜಬಹುಲಾ ಹೋಥ, ಖೇಮಂ ಪತ್ತತ್ಥ 5 ಭಿಕ್ಖವೋ’’ತಿ॥
Pāmojjabahulā hotha, khemaṃ pattattha 6 bhikkhavo’’ti.
ಚೂಳಗೋಪಾಲಕಸುತ್ತಂ ನಿಟ್ಠಿತಂ ಚತುತ್ಥಂ।
Cūḷagopālakasuttaṃ niṭṭhitaṃ catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) / ೪. ಚೂಳಗೋಪಾಲಕಸುತ್ತವಣ್ಣನಾ • 4. Cūḷagopālakasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೪. ಚೂಳಗೋಪಾಲಕಸುತ್ತವಣ್ಣನಾ • 4. Cūḷagopālakasuttavaṇṇanā
