| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ • Majjhimanikāya |
੪. ਚੂਲ਼ਗੋਪਾਲਕਸੁਤ੍ਤਂ
4. Cūḷagopālakasuttaṃ
੩੫੦. ਏવਂ ਮੇ ਸੁਤਂ – ਏਕਂ ਸਮਯਂ ਭਗવਾ વਜ੍ਜੀਸੁ વਿਹਰਤਿ ਉਕ੍ਕਚੇਲਾਯਂ ਗਙ੍ਗਾਯ ਨਦਿਯਾ ਤੀਰੇ। ਤਤ੍ਰ ਖੋ ਭਗવਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖવੋ’’ਤਿ। ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗવਤੋ ਪਚ੍ਚਸ੍ਸੋਸੁਂ। ਭਗવਾ ਏਤਦવੋਚ –
350. Evaṃ me sutaṃ – ekaṃ samayaṃ bhagavā vajjīsu viharati ukkacelāyaṃ gaṅgāya nadiyā tīre. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ਭੂਤਪੁਬ੍ਬਂ , ਭਿਕ੍ਖવੇ, ਮਾਗਧਕੋ ਗੋਪਾਲਕੋ ਦੁਪ੍ਪਞ੍ਞਜਾਤਿਕੋ, વਸ੍ਸਾਨਂ ਪਚ੍ਛਿਮੇ ਮਾਸੇ ਸਰਦਸਮਯੇ, ਅਸਮવੇਕ੍ਖਿਤ੍વਾ ਗਙ੍ਗਾਯ ਨਦਿਯਾ ਓਰਿਮਂ ਤੀਰਂ, ਅਸਮવੇਕ੍ਖਿਤ੍વਾ ਪਾਰਿਮਂ ਤੀਰਂ, ਅਤਿਤ੍ਥੇਨੇવ ਗਾવੋ ਪਤਾਰੇਸਿ ਉਤ੍ਤਰਂ ਤੀਰਂ ਸੁવਿਦੇਹਾਨਂ। ਅਥ ਖੋ, ਭਿਕ੍ਖવੇ, ਗਾવੋ ਮਜ੍ਝੇਗਙ੍ਗਾਯ ਨਦਿਯਾ ਸੋਤੇ ਆਮਣ੍ਡਲਿਯਂ ਕਰਿਤ੍વਾ ਤਤ੍ਥੇવ ਅਨਯਬ੍ਯਸਨਂ ਆਪਜ੍ਜਿਂਸੁ। ਤਂ ਕਿਸ੍ਸ ਹੇਤੁ? ਤਥਾ ਹਿ ਸੋ, ਭਿਕ੍ਖવੇ, ਮਾਗਧਕੋ ਗੋਪਾਲਕੋ ਦੁਪ੍ਪਞ੍ਞਜਾਤਿਕੋ, વਸ੍ਸਾਨਂ ਪਚ੍ਛਿਮੇ ਮਾਸੇ ਸਰਦਸਮਯੇ, ਅਸਮવੇਕ੍ਖਿਤ੍વਾ ਗਙ੍ਗਾਯ ਨਦਿਯਾ ਓਰਿਮਂ ਤੀਰਂ, ਅਸਮવੇਕ੍ਖਿਤ੍વਾ ਪਾਰਿਮਂ ਤੀਰਂ, ਅਤਿਤ੍ਥੇਨੇવ ਗਾવੋ ਪਤਾਰੇਸਿ ਉਤ੍ਤਰਂ ਤੀਰਂ ਸੁવਿਦੇਹਾਨਂ। ਏવਮੇવ ਖੋ, ਭਿਕ੍ਖવੇ, ਯੇ ਹਿ ਕੇਚਿ 1 ਸਮਣਾ વਾ ਬ੍ਰਾਹ੍ਮਣਾ વਾ ਅਕੁਸਲਾ ਇਮਸ੍ਸ ਲੋਕਸ੍ਸ ਅਕੁਸਲਾ ਪਰਸ੍ਸ ਲੋਕਸ੍ਸ, ਅਕੁਸਲਾ ਮਾਰਧੇਯ੍ਯਸ੍ਸ ਅਕੁਸਲਾ ਅਮਾਰਧੇਯ੍ਯਸ੍ਸ, ਅਕੁਸਲਾ ਮਚ੍ਚੁਧੇਯ੍ਯਸ੍ਸ ਅਕੁਸਲਾ ਅਮਚ੍ਚੁਧੇਯ੍ਯਸ੍ਸ, ਤੇਸਂ ਯੇ ਸੋਤਬ੍ਬਂ ਸਦ੍ਦਹਾਤਬ੍ਬਂ ਮਞ੍ਞਿਸ੍ਸਨ੍ਤਿ, ਤੇਸਂ ਤਂ ਭવਿਸ੍ਸਤਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ।
‘‘Bhūtapubbaṃ , bhikkhave, māgadhako gopālako duppaññajātiko, vassānaṃ pacchime māse saradasamaye, asamavekkhitvā gaṅgāya nadiyā orimaṃ tīraṃ, asamavekkhitvā pārimaṃ tīraṃ, atittheneva gāvo patāresi uttaraṃ tīraṃ suvidehānaṃ. Atha kho, bhikkhave, gāvo majjhegaṅgāya nadiyā sote āmaṇḍaliyaṃ karitvā tattheva anayabyasanaṃ āpajjiṃsu. Taṃ kissa hetu? Tathā hi so, bhikkhave, māgadhako gopālako duppaññajātiko, vassānaṃ pacchime māse saradasamaye, asamavekkhitvā gaṅgāya nadiyā orimaṃ tīraṃ, asamavekkhitvā pārimaṃ tīraṃ, atittheneva gāvo patāresi uttaraṃ tīraṃ suvidehānaṃ. Evameva kho, bhikkhave, ye hi keci 2 samaṇā vā brāhmaṇā vā akusalā imassa lokassa akusalā parassa lokassa, akusalā māradheyyassa akusalā amāradheyyassa, akusalā maccudheyyassa akusalā amaccudheyyassa, tesaṃ ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ ahitāya dukkhāya.
੩੫੧. ‘‘ਭੂਤਪੁਬ੍ਬਂ, ਭਿਕ੍ਖવੇ, ਮਾਗਧਕੋ ਗੋਪਾਲਕੋ ਸਪ੍ਪਞ੍ਞਜਾਤਿਕੋ, વਸ੍ਸਾਨਂ ਪਚ੍ਛਿਮੇ ਮਾਸੇ ਸਰਦਸਮਯੇ, ਸਮવੇਕ੍ਖਿਤ੍વਾ ਗਙ੍ਗਾਯ ਨਦਿਯਾ ਓਰਿਮਂ ਤੀਰਂ, ਸਮવੇਕ੍ਖਿਤ੍વਾ ਪਾਰਿਮਂ ਤੀਰਂ, ਤਿਤ੍ਥੇਨੇવ ਗਾવੋ ਪਤਾਰੇਸਿ ਉਤ੍ਤਰਂ ਤੀਰਂ ਸੁવਿਦੇਹਾਨਂ। ਸੋ ਪਠਮਂ ਪਤਾਰੇਸਿ ਯੇ ਤੇ ਉਸਭਾ ਗੋਪਿਤਰੋ ਗੋਪਰਿਣਾਯਕਾ। ਤੇ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ। ਅਥਾਪਰੇ ਪਤਾਰੇਸਿ ਬਲવਗਾવੋ ਦਮ੍ਮਗਾવੋ। ਤੇਪਿ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ। ਅਥਾਪਰੇ ਪਤਾਰੇਸਿ વਚ੍ਛਤਰੇ વਚ੍ਛਤਰਿਯੋ। ਤੇਪਿ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ। ਅਥਾਪਰੇ ਪਤਾਰੇਸਿ વਚ੍ਛਕੇ ਕਿਸਾਬਲਕੇ 3। ਤੇਪਿ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ। ਭੂਤਪੁਬ੍ਬਂ, ਭਿਕ੍ਖવੇ, વਚ੍ਛਕੋ ਤਰੁਣਕੋ ਤਾવਦੇવ ਜਾਤਕੋ ਮਾਤੁਗੋਰવਕੇਨ વੁਯ੍ਹਮਾਨੋ, ਸੋਪਿ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਾਸਿ। ਤਂ ਕਿਸ੍ਸ ਹੇਤੁ? ਤਥਾ ਹਿ ਸੋ, ਭਿਕ੍ਖવੇ, ਮਾਗਧਕੋ ਗੋਪਾਲਕੋ ਸਪ੍ਪਞ੍ਞਜਾਤਿਕੋ , વਸ੍ਸਾਨਂ ਪਚ੍ਛਿਮੇ ਮਾਸੇ ਸਰਦਸਮਯੇ, ਸਮવੇਕ੍ਖਿਤ੍વਾ ਗਙ੍ਗਾਯ ਨਦਿਯਾ ਓਰਿਮਂ ਤੀਰਂ, ਸਮવੇਕ੍ਖਿਤ੍વਾ ਪਾਰਿਮਂ ਤੀਰਂ, ਤਿਤ੍ਥੇਨੇવ ਗਾવੋ ਪਤਾਰੇਸਿ ਉਤ੍ਤਰਂ ਤੀਰਂ ਸੁવਿਦੇਹਾਨਂ। ਏવਮੇવ ਖੋ, ਭਿਕ੍ਖવੇ, ਯੇ ਹਿ ਕੇਚਿ ਸਮਣਾ વਾ ਬ੍ਰਾਹ੍ਮਣਾ વਾ ਕੁਸਲਾ ਇਮਸ੍ਸ ਲੋਕਸ੍ਸ ਕੁਸਲਾ ਪਰਸ੍ਸ ਲੋਕਸ੍ਸ, ਕੁਸਲਾ ਮਾਰਧੇਯ੍ਯਸ੍ਸ ਕੁਸਲਾ ਅਮਾਰਧੇਯ੍ਯਸ੍ਸ, ਕੁਸਲਾ ਮਚ੍ਚੁਧੇਯ੍ਯਸ੍ਸ ਕੁਸਲਾ ਅਮਚ੍ਚੁਧੇਯ੍ਯਸ੍ਸ, ਤੇਸਂ ਯੇ ਸੋਤਬ੍ਬਂ ਸਦ੍ਦਹਾਤਬ੍ਬਂ ਮਞ੍ਞਿਸ੍ਸਨ੍ਤਿ, ਤੇਸਂ ਤਂ ਭવਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯ।
351. ‘‘Bhūtapubbaṃ, bhikkhave, māgadhako gopālako sappaññajātiko, vassānaṃ pacchime māse saradasamaye, samavekkhitvā gaṅgāya nadiyā orimaṃ tīraṃ, samavekkhitvā pārimaṃ tīraṃ, tittheneva gāvo patāresi uttaraṃ tīraṃ suvidehānaṃ. So paṭhamaṃ patāresi ye te usabhā gopitaro gopariṇāyakā. Te tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi balavagāvo dammagāvo. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi vacchatare vacchatariyo. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi vacchake kisābalake 4. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Bhūtapubbaṃ, bhikkhave, vacchako taruṇako tāvadeva jātako mātugoravakena vuyhamāno, sopi tiriyaṃ gaṅgāya sotaṃ chetvā sotthinā pāraṃ agamāsi. Taṃ kissa hetu? Tathā hi so, bhikkhave, māgadhako gopālako sappaññajātiko , vassānaṃ pacchime māse saradasamaye, samavekkhitvā gaṅgāya nadiyā orimaṃ tīraṃ, samavekkhitvā pārimaṃ tīraṃ, tittheneva gāvo patāresi uttaraṃ tīraṃ suvidehānaṃ. Evameva kho, bhikkhave, ye hi keci samaṇā vā brāhmaṇā vā kusalā imassa lokassa kusalā parassa lokassa, kusalā māradheyyassa kusalā amāradheyyassa, kusalā maccudheyyassa kusalā amaccudheyyassa, tesaṃ ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ hitāya sukhāya.
੩੫੨. ‘‘ਸੇਯ੍ਯਥਾਪਿ , ਭਿਕ੍ਖવੇ, ਯੇ ਤੇ ਉਸਭਾ ਗੋਪਿਤਰੋ ਗੋਪਰਿਣਾਯਕਾ ਤੇ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ, ਏવਮੇવ ਖੋ, ਭਿਕ੍ਖવੇ, ਯੇ ਤੇ ਭਿਕ੍ਖੂ ਅਰਹਨ੍ਤੋ ਖੀਣਾਸવਾ વੁਸਿਤવਨ੍ਤੋ ਕਤਕਰਣੀਯਾ ਓਹਿਤਭਾਰਾ ਅਨੁਪ੍ਪਤ੍ਤਸਦਤ੍ਥਾ ਪਰਿਕ੍ਖੀਣਭવਸਂਯੋਜਨਾ ਸਮ੍ਮਦਞ੍ਞਾ વਿਮੁਤ੍ਤਾ, ਤੇ ਤਿਰਿਯਂ ਮਾਰਸ੍ਸ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਗਤਾ।
352. ‘‘Seyyathāpi , bhikkhave, ye te usabhā gopitaro gopariṇāyakā te tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, te tiriyaṃ mārassa sotaṃ chetvā sotthinā pāraṃ gatā.
‘‘ਸੇਯ੍ਯਥਾਪਿ ਤੇ, ਭਿਕ੍ਖવੇ, ਬਲવਗਾવੋ ਦਮ੍ਮਗਾવੋ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ, ਏવਮੇવ ਖੋ, ਭਿਕ੍ਖવੇ, ਯੇ ਤੇ ਭਿਕ੍ਖੂ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ ਓਪਪਾਤਿਕਾ ਤਤ੍ਥ ਪਰਿਨਿਬ੍ਬਾਯਿਨੋ ਅਨਾવਤ੍ਤਿਧਮ੍ਮਾ ਤਸ੍ਮਾ ਲੋਕਾ, ਤੇਪਿ ਤਿਰਿਯਂ ਮਾਰਸ੍ਸ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਗਮਿਸ੍ਸਨ੍ਤਿ।
‘‘Seyyathāpi te, bhikkhave, balavagāvo dammagāvo tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā, tepi tiriyaṃ mārassa sotaṃ chetvā sotthinā pāraṃ gamissanti.
‘‘ਸੇਯ੍ਯਥਾਪਿ ਤੇ, ਭਿਕ੍ਖવੇ, વਚ੍ਛਤਰਾ વਚ੍ਛਤਰਿਯੋ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ, ਏવਮੇવ ਖੋ, ਭਿਕ੍ਖવੇ, ਯੇ ਤੇ ਭਿਕ੍ਖੂ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਰਾਗਦੋਸਮੋਹਾਨਂ ਤਨੁਤ੍ਤਾ ਸਕਦਾਗਾਮਿਨੋ ਸਕਿਂਦੇવ ਇਮਂ ਲੋਕਂ ਆਗਨ੍ਤ੍વਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਨ੍ਤਿ, ਤੇਪਿ ਤਿਰਿਯਂ ਮਾਰਸ੍ਸ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਗਮਿਸ੍ਸਨ੍ਤਿ।
‘‘Seyyathāpi te, bhikkhave, vacchatarā vacchatariyo tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino sakiṃdeva imaṃ lokaṃ āgantvā dukkhassantaṃ karissanti, tepi tiriyaṃ mārassa sotaṃ chetvā sotthinā pāraṃ gamissanti.
‘‘ਸੇਯ੍ਯਥਾਪਿ ਤੇ, ਭਿਕ੍ਖવੇ, વਚ੍ਛਕਾ ਕਿਸਾਬਲਕਾ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਂਸੁ, ਏવਮੇવ ਖੋ, ਭਿਕ੍ਖવੇ, ਯੇ ਤੇ ਭਿਕ੍ਖੂ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨਾ ਅવਿਨਿਪਾਤਧਮ੍ਮਾ ਨਿਯਤਾ ਸਮ੍ਬੋਧਿਪਰਾਯਨਾ, ਤੇਪਿ ਤਿਰਿਯਂ ਮਾਰਸ੍ਸ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਗਮਿਸ੍ਸਨ੍ਤਿ।
‘‘Seyyathāpi te, bhikkhave, vacchakā kisābalakā tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyanā, tepi tiriyaṃ mārassa sotaṃ chetvā sotthinā pāraṃ gamissanti.
‘‘ਸੇਯ੍ਯਥਾਪਿ ਸੋ, ਭਿਕ੍ਖવੇ, વਚ੍ਛਕੋ ਤਰੁਣਕੋ ਤਾવਦੇવ ਜਾਤਕੋ ਮਾਤੁਗੋਰવਕੇਨ વੁਯ੍ਹਮਾਨੋ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਅਗਮਾਸਿ, ਏવਮੇવ ਖੋ, ਭਿਕ੍ਖવੇ, ਯੇ ਤੇ ਭਿਕ੍ਖੂ ਧਮ੍ਮਾਨੁਸਾਰਿਨੋ ਸਦ੍ਧਾਨੁਸਾਰਿਨੋ, ਤੇਪਿ ਤਿਰਿਯਂ ਮਾਰਸ੍ਸ ਸੋਤਂ ਛੇਤ੍વਾ ਸੋਤ੍ਥਿਨਾ ਪਾਰਂ ਗਮਿਸ੍ਸਨ੍ਤਿ।
‘‘Seyyathāpi so, bhikkhave, vacchako taruṇako tāvadeva jātako mātugoravakena vuyhamāno tiriyaṃ gaṅgāya sotaṃ chetvā sotthinā pāraṃ agamāsi, evameva kho, bhikkhave, ye te bhikkhū dhammānusārino saddhānusārino, tepi tiriyaṃ mārassa sotaṃ chetvā sotthinā pāraṃ gamissanti.
‘‘ਅਹਂ ਖੋ ਪਨ, ਭਿਕ੍ਖવੇ, ਕੁਸਲੋ ਇਮਸ੍ਸ ਲੋਕਸ੍ਸ ਕੁਸਲੋ ਪਰਸ੍ਸ ਲੋਕਸ੍ਸ, ਕੁਸਲੋ ਮਾਰਧੇਯ੍ਯਸ੍ਸ ਕੁਸਲੋ ਅਮਾਰਧੇਯ੍ਯਸ੍ਸ, ਕੁਸਲੋ ਮਚ੍ਚੁਧੇਯ੍ਯਸ੍ਸ ਕੁਸਲੋ ਅਮਚ੍ਚੁਧੇਯ੍ਯਸ੍ਸ। ਤਸ੍ਸ ਮਯ੍ਹਂ, ਭਿਕ੍ਖવੇ, ਯੇ ਸੋਤਬ੍ਬਂ ਸਦ੍ਦਹਾਤਬ੍ਬਂ ਮਞ੍ਞਿਸ੍ਸਨ੍ਤਿ, ਤੇਸਂ ਤਂ ਭવਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ।
‘‘Ahaṃ kho pana, bhikkhave, kusalo imassa lokassa kusalo parassa lokassa, kusalo māradheyyassa kusalo amāradheyyassa, kusalo maccudheyyassa kusalo amaccudheyyassa. Tassa mayhaṃ, bhikkhave, ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ hitāya sukhāyā’’ti.
ਇਦਮવੋਚ ਭਗવਾ। ਇਦਂ વਤ੍વਾ ਸੁਗਤੋ ਅਥਾਪਰਂ ਏਤਦવੋਚ ਸਤ੍ਥਾ –
Idamavoca bhagavā. Idaṃ vatvā sugato athāparaṃ etadavoca satthā –
‘‘ਅਯਂ ਲੋਕੋ ਪਰੋ ਲੋਕੋ, ਜਾਨਤਾ ਸੁਪ੍ਪਕਾਸਿਤੋ।
‘‘Ayaṃ loko paro loko, jānatā suppakāsito;
ਯਞ੍ਚ ਮਾਰੇਨ ਸਮ੍ਪਤ੍ਤਂ, ਅਪ੍ਪਤ੍ਤਂ ਯਞ੍ਚ ਮਚ੍ਚੁਨਾ॥
Yañca mārena sampattaṃ, appattaṃ yañca maccunā.
‘‘ਸਬ੍ਬਂ ਲੋਕਂ ਅਭਿਞ੍ਞਾਯ, ਸਮ੍ਬੁਦ੍ਧੇਨ ਪਜਾਨਤਾ।
‘‘Sabbaṃ lokaṃ abhiññāya, sambuddhena pajānatā;
વਿવਟਂ ਅਮਤਦ੍વਾਰਂ, ਖੇਮਂ ਨਿਬ੍ਬਾਨਪਤ੍ਤਿਯਾ॥
Vivaṭaṃ amatadvāraṃ, khemaṃ nibbānapattiyā.
‘‘ਛਿਨ੍ਨਂ ਪਾਪਿਮਤੋ ਸੋਤਂ, વਿਦ੍ਧਸ੍ਤਂ વਿਨਲ਼ੀਕਤਂ।
‘‘Chinnaṃ pāpimato sotaṃ, viddhastaṃ vinaḷīkataṃ;
ਪਾਮੋਜ੍ਜਬਹੁਲਾ ਹੋਥ, ਖੇਮਂ ਪਤ੍ਤਤ੍ਥ 5 ਭਿਕ੍ਖવੋ’’ਤਿ॥
Pāmojjabahulā hotha, khemaṃ pattattha 6 bhikkhavo’’ti.
ਚੂਲ਼ਗੋਪਾਲਕਸੁਤ੍ਤਂ ਨਿਟ੍ਠਿਤਂ ਚਤੁਤ੍ਥਂ।
Cūḷagopālakasuttaṃ niṭṭhitaṃ catutthaṃ.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੪. ਚੂਲ਼ਗੋਪਾਲਕਸੁਤ੍ਤવਣ੍ਣਨਾ • 4. Cūḷagopālakasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੪. ਚੂਲ਼ਗੋਪਾਲਕਸੁਤ੍ਤવਣ੍ਣਨਾ • 4. Cūḷagopālakasuttavaṇṇanā
