| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
5. சூளகம்மவிப⁴ங்க³ஸுத்தவண்ணனா
5. Cūḷakammavibhaṅgasuttavaṇṇanā
289. அங்க³ஸுப⁴தாயாதி அங்கா³னங் ஹத்த²பாதா³தி³ஸரீராவயவானங் ஸுந்த³ரபா⁴வேன. யங் அபச்சங் குச்சி²தங் முத்³த⁴ங் வா, தத்த² லோகே மாணவவோஹாரோ, யேபு⁴ய்யேன ஸத்தா த³ஹரகாலே ஸுத்³த⁴தா⁴துகா ஹொந்தீதி வுத்தங், ‘‘தருணகாலே வோஹரிங்ஸூ’’தி. அதி⁴பதித்தாதி இஸ்ஸரபா⁴வதோ.
289.Aṅgasubhatāyāti aṅgānaṃ hatthapādādisarīrāvayavānaṃ sundarabhāvena. Yaṃ apaccaṃ kucchitaṃ muddhaṃ vā, tattha loke māṇavavohāro, yebhuyyena sattā daharakāle suddhadhātukā hontīti vuttaṃ, ‘‘taruṇakāle vohariṃsū’’ti. Adhipatittāti issarabhāvato.
ஸமாஹாரந்தி ஸன்னிசயங். பண்டி³தோ க⁴ரமாவஸேதி யஸ்மா அப்பதரேபி ப்³யயமானே போ⁴கா³ கீ²யந்தி, அப்பதரேபி ஸஞ்சயமானே வட்³ட⁴ந்தி, தஸ்மா விஞ்ஞுஜாதிகோ கிஞ்சி ப்³யயங் அகத்வா அயமேவ உப்பாதெ³ந்தோ க⁴ராவாஸங் அனுதிட்டெ²ய்யாதி லோபா⁴தே³ஸிதமத்த²ங் வத³தி.
Samāhāranti sannicayaṃ. Paṇḍito gharamāvaseti yasmā appatarepi byayamāne bhogā khīyanti, appatarepi sañcayamāne vaḍḍhanti, tasmā viññujātiko kiñci byayaṃ akatvā ayameva uppādento gharāvāsaṃ anutiṭṭheyyāti lobhādesitamatthaṃ vadati.
த⁴னலோபே⁴ன…பே॰… நிப்³ப³த்தோ. லோப⁴வஸிகஸ்ஸ ஹி க³தி நிரயோ வா திரச்சா²னயோனி வா. வுத்தஞ்ஹேதங் – ‘‘நிமித்தஸ்ஸாத³க³தி²தங் வா, பி⁴க்க²வே, விஞ்ஞாணங் திட்ட²மானங் திட்ட²தி அனுப்³யஞ்ஜனஸ்ஸாத³க³தி²தங் வா. தஸ்மிங் ஸமயே காலங்கரெய்ய, த்³வின்னங் க³தீனங் அஞ்ஞதரங் க³திங் வதா³மி – நிரயங் வா திரச்சா²னயோனிங் வா’’தி (ஸங்॰ நி॰ 4.235). நிரயே நிப்³ப³த்திஸ்ஸதி கதோகாஸஸ்ஸ கம்மஸ்ஸ படிபா³ஹிதுங் அஸக்குணெய்யபா⁴வதோ.
Dhanalobhena…pe… nibbatto. Lobhavasikassa hi gati nirayo vā tiracchānayoni vā. Vuttañhetaṃ – ‘‘nimittassādagathitaṃ vā, bhikkhave, viññāṇaṃ tiṭṭhamānaṃ tiṭṭhati anubyañjanassādagathitaṃ vā. Tasmiṃ samaye kālaṅkareyya, dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti (saṃ. ni. 4.235). Niraye nibbattissati katokāsassa kammassa paṭibāhituṃ asakkuṇeyyabhāvato.
பத்தக்க²ந்த⁴அதோ⁴முக²பா⁴வங் ஸந்தா⁴ய ‘‘ஓனாமெத்வா’’தி வுத்தங். ப்³ராஹ்மணசாரித்தஸ்ஸ பா⁴விததங் ஸந்தா⁴யாஹ ‘‘ப்³ரஹ்மலோகே நிப்³ப³த்தோ’’தி. தங் பவத்திங் புச்சீ²தி ஸுதமேதங் மயா, ‘‘மய்ஹங் பிதா ஸுனகோ² ஹுத்வா நிப்³ப³த்தோ’’தி, ஏதங் போ⁴தா கோ³தமேன வுத்தந்தி. கிமித³ங் வுத்தந்தி இமங் பவத்திங் புச்சி².
Pattakkhandhaadhomukhabhāvaṃ sandhāya ‘‘onāmetvā’’ti vuttaṃ. Brāhmaṇacārittassa bhāvitataṃ sandhāyāha ‘‘brahmaloke nibbatto’’ti. Taṃ pavattiṃ pucchīti sutametaṃ mayā, ‘‘mayhaṃ pitā sunakho hutvā nibbatto’’ti, etaṃ bhotā gotamena vuttanti. Kimidaṃ vuttanti imaṃ pavattiṃ pucchi.
ததே²வ வத்வாதி யதா² ஸுனக²ஸ்ஸ வுத்தங், ததே²வ வத்வா. அவிஸங்வாத³னத்த²ந்தி, ‘‘தோதெ³ய்யப்³ராஹ்மணோ ஸுனகோ² ஜாதோ’’தி அத்தனோ வசனஸ்ஸ அவிஸங்வாத³னத்த²ங், விஸங்வாத³னாபா⁴வத³ஸ்ஸனத்த²ந்தி அதி⁴ப்பாயோ. ஞாதொம்ஹி இமினாதி இமினா மம புத்தேன மய்ஹங் புரிமஜாதியங் பிதாதி ஏவங் ஞாதோ அம்ஹீதி ஜானித்வா. பு³த்³தா⁴னுபா⁴வேன கிர ஸுனகோ² ததா² த³ஸ்ஸேதி, ந ஜாதிஸ்ஸரதாய. ப⁴க³வந்தங் தி³ஸ்வா பு⁴க்கரணங் பன புரிமஜாதிஸித்³த⁴வாஸனாய. ப⁴வபடிச்ச²ன்னந்தி ப⁴வந்தரபா⁴வேன படிச்ச²ன்னங். நாம-ஸத்³தோ³ ஸம்பா⁴வனே. படிஸந்தி⁴அந்தரந்தி அஞ்ஞஜாதிபடிஸந்தி⁴க்³க³ஹணேன ஹெட்டி²மஜாதங் க³திங். அங்க³விஜ்ஜாபாட²கோ கிரேஸ, தேன அப்பாயுகதீ³கா⁴யுகதாதி³வஸேன சுத்³த³ஸ பஞ்ஹே அபி⁴ஸங்க²ரி; ஏவங் கிரஸ்ஸ அஹோஸி, ‘‘இமேஸங் ஸத்தானங் அப்பாயுகதாத³யோ விஸேஸா அங்க³பச்சங்க³வஸேன ஸல்லக்கி²யந்தி. ந கோ² பனேதங் யுத்தங் ‘அங்க³பச்சங்கா³னி யாவ தேஸங் தேஸங் காரண’ந்தி; தஸ்மா ப⁴விதப்³ப³மெத்த² அஞ்ஞேனேவ காரணேன. ஸமணோ கோ³தமோ தங் காரணங் விப⁴ஜித்வா கதெ²ஸ்ஸதி, ஏவாயங் ஸப்³ப³ஞ்ஞூதி நிச்ச²யோ மே அபண்ணகோ ப⁴விஸ்ஸதீ’’தி. அபரே பன ப⁴ணந்தி, ‘‘திரச்சா²னக³தங் மனுஸ்ஸங் வா ஆவிஸித்வா இச்சி²தத்த²கஸாவனங் நாம மஹாமந்தவிஜ்ஜாவஸேன ஹோதி; தஸ்மா ந எத்தாவதா ஸமணஸ்ஸ கோ³தமஸ்ஸ ஸப்³ப³ஞ்ஞுதா ஸுனிச்சி²தா ஹோதி. யங் நூனாஹங் கம்மப²லமஸ்ஸ உத்³தி³ஸ்ஸ பஞ்ஹங் புச்செ²ய்யங், தத்த² ச மே சித்தங் ஆராதெ⁴ந்தோ பஞ்ஹங் ப்³யாகரிஸ்ஸதி. ஏவாயங் ஸப்³ப³ஞ்ஞூதி வினிச்ச²யோ மே ப⁴விஸ்ஸதீதி தே பஞ்ஹே புச்ச²தீ’’தி.
Tatheva vatvāti yathā sunakhassa vuttaṃ, tatheva vatvā. Avisaṃvādanatthanti, ‘‘todeyyabrāhmaṇo sunakho jāto’’ti attano vacanassa avisaṃvādanatthaṃ, visaṃvādanābhāvadassanatthanti adhippāyo. Ñātomhiimināti iminā mama puttena mayhaṃ purimajātiyaṃ pitāti evaṃ ñāto amhīti jānitvā. Buddhānubhāvena kira sunakho tathā dasseti, na jātissaratāya. Bhagavantaṃ disvā bhukkaraṇaṃ pana purimajātisiddhavāsanāya. Bhavapaṭicchannanti bhavantarabhāvena paṭicchannaṃ. Nāma-saddo sambhāvane. Paṭisandhiantaranti aññajātipaṭisandhiggahaṇena heṭṭhimajātaṃ gatiṃ. Aṅgavijjāpāṭhako kiresa, tena appāyukadīghāyukatādivasena cuddasa pañhe abhisaṅkhari; evaṃ kirassa ahosi, ‘‘imesaṃ sattānaṃ appāyukatādayo visesā aṅgapaccaṅgavasena sallakkhiyanti. Na kho panetaṃ yuttaṃ ‘aṅgapaccaṅgāni yāva tesaṃ tesaṃ kāraṇa’nti; tasmā bhavitabbamettha aññeneva kāraṇena. Samaṇo gotamo taṃ kāraṇaṃ vibhajitvā kathessati, evāyaṃ sabbaññūti nicchayo me apaṇṇako bhavissatī’’ti. Apare pana bhaṇanti, ‘‘tiracchānagataṃ manussaṃ vā āvisitvā icchitatthakasāvanaṃ nāma mahāmantavijjāvasena hoti; tasmā na ettāvatā samaṇassa gotamassa sabbaññutā sunicchitā hoti. Yaṃ nūnāhaṃ kammaphalamassa uddissa pañhaṃ puccheyyaṃ, tattha ca me cittaṃ ārādhento pañhaṃ byākarissati. Evāyaṃ sabbaññūti vinicchayo me bhavissatīti te pañhe pucchatī’’ti.
ப⁴ண்ட³கந்தி ஸாபதெய்யங், ஸந்தகந்தி அத்தோ². கம்முனா தா³தப்³ப³ங் ஆதி³யந்தீதி கம்மதா³யாதா³, அத்தனா கதூபசிதகம்மப²லபா⁴கீ³தி அத்தோ². தங் பன கம்மதா³யஜ்ஜங் காரணோபசாரேன வத³ந்தோ, ‘‘கம்மங் ஏதேஸங் தா³யஜ்ஜங் ப⁴ண்ட³கந்தி அத்தோ²’’தி ஆஹ – யதா² ‘‘குஸலானங், பி⁴க்க²வே, த⁴ம்மானங் ஸமாதா³னஹேது ஏவமித³ங் புஞ்ஞங் பவட்³ட⁴தீ’’தி (தீ³॰ நி॰ 3.80). யவதி ப²லங் ஸபா⁴வதோ பி⁴ன்னம்பி அபி⁴ன்னங் விய மிஸ்ஸிதங் ஹோதி, ஏதேனாதி யோனீதி ஆஹ – ‘‘கம்மங் ஏதேஸங் யோனி காரண’’ந்தி. மமத்தவஸேன ப³ஜ்ஜ²தி ஸங்ப³ஜ்ஜ²தீதி ப³ந்து⁴, ஞாதி ஸாலோஹிதோ ச. கம்மங் பன ஏகந்தஸம்ப³ந்த⁴மேவாதி ஆஹ – ‘‘கம்மங் ஏதேஸங் ப³ந்தூ⁴’’தி. பதிட்டா²தி அவஸ்ஸயோ. கம்மஸதி³ஸோ ஹி ஸத்தானங் அவஸ்ஸயோ நத்தி², அஞ்ஞோ கோசி இஸ்ஸரோ ப்³ரஹ்மா வா ந கரோதி தாதி³ஸங் கத்துங் ஸஜ்ஜிதுங் அஸமத்த²பா⁴வதோ. யங் பனெத்த² வத்தப்³ப³ங், தங் விஸுத்³தி⁴மக்³க³ஸங்வண்ணனாயங் வுத்தனயேன வேதி³தப்³ப³ங். கம்மமேவாதி கஸ்மா அவதா⁴ரிதங், நனு கிலேஸாபி ஸத்தானங் ஹீனபணீதபா⁴வகாரணங், ந கேவலந்தி ? ஸச்சமேதங், கிலேஸபயோகே³ன விபாகவட்டங் நிப்³ப³த்தங் கம்மபவத்திதமேவாதி கத்வா வுத்தங். ‘‘கதி²தஸ்ஸ அத்த²ங் ந ஸஞ்ஜானாஸீ’’தி ஸங்கே²பதோ வத்வா நனு ப⁴க³வா மஹாகாருணிகோ பரேஸங் ஞாபனத்த²மேவ த⁴ம்மங் தே³ஸேதீதி ஆஹ – ‘‘மானநிஸ்ஸிதோ கிரேஸா’’திஆதி³.
Bhaṇḍakanti sāpateyyaṃ, santakanti attho. Kammunā dātabbaṃ ādiyantīti kammadāyādā, attanā katūpacitakammaphalabhāgīti attho. Taṃ pana kammadāyajjaṃ kāraṇopacārena vadanto, ‘‘kammaṃ etesaṃ dāyajjaṃ bhaṇḍakanti attho’’ti āha – yathā ‘‘kusalānaṃ, bhikkhave, dhammānaṃ samādānahetu evamidaṃ puññaṃ pavaḍḍhatī’’ti (dī. ni. 3.80). Yavati phalaṃ sabhāvato bhinnampi abhinnaṃ viya missitaṃ hoti, etenāti yonīti āha – ‘‘kammaṃ etesaṃ yoni kāraṇa’’nti. Mamattavasena bajjhati saṃbajjhatīti bandhu, ñāti sālohito ca. Kammaṃ pana ekantasambandhamevāti āha – ‘‘kammaṃ etesaṃ bandhū’’ti. Patiṭṭhāti avassayo. Kammasadiso hi sattānaṃ avassayo natthi, añño koci issaro brahmā vā na karoti tādisaṃ kattuṃ sajjituṃ asamatthabhāvato. Yaṃ panettha vattabbaṃ, taṃ visuddhimaggasaṃvaṇṇanāyaṃ vuttanayena veditabbaṃ. Kammamevāti kasmā avadhāritaṃ, nanu kilesāpi sattānaṃ hīnapaṇītabhāvakāraṇaṃ, na kevalanti ? Saccametaṃ, kilesapayogena vipākavaṭṭaṃ nibbattaṃ kammapavattitamevāti katvā vuttaṃ. ‘‘Kathitassa atthaṃ na sañjānāsī’’ti saṅkhepato vatvā nanu bhagavā mahākāruṇiko paresaṃ ñāpanatthameva dhammaṃ desetīti āha – ‘‘mānanissito kiresā’’tiādi.
290. ஸமத்தேனாதி பரியத்தேன, யதா² தங் ப²லங் தா³துங் ஸமத்த²ங் ஹோதி, ஏவங் கதேன, உபசிதேனாதி அத்தோ². தாதி³ஸங் பன அத்தனோ கிச்சே அனூனங் நாம ஹோதீதி ஆஹ ‘‘பரிபுண்ணேனா’’தி. ஸமாதி³ன்னேனாதி எத்த² ஸமாதா³னங் நாம தண்ஹாதி³ட்டீ²ஹி க³ஹணங் பராமஸனந்தி ஆஹ – ‘‘க³ஹிதேன பராமட்டே²னா’’தி. படிபஜ்ஜதி ஏதாய ஸுக³திது³க்³க³தீதி படிபதா³, கம்மங். ததா² ஹி தங் ‘‘கம்மபதோ²’’தி வுச்சதி.
290.Samattenāti pariyattena, yathā taṃ phalaṃ dātuṃ samatthaṃ hoti, evaṃ katena, upacitenāti attho. Tādisaṃ pana attano kicce anūnaṃ nāma hotīti āha ‘‘paripuṇṇenā’’ti. Samādinnenāti ettha samādānaṃ nāma taṇhādiṭṭhīhi gahaṇaṃ parāmasananti āha – ‘‘gahitena parāmaṭṭhenā’’ti. Paṭipajjati etāya sugatiduggatīti paṭipadā, kammaṃ. Tathā hi taṃ ‘‘kammapatho’’ti vuccati.
ஏஸாதி படிபதா³. து³ப்³ப³லங் உபகா⁴தகமேவ ஸியாதி உபபீளகஸ்ஸ விஸயங் த³ஸ்ஸேதுங், ‘‘ப³லவகம்மேனா’’திஆதி³ வுத்தங். ப³லவகம்மேனாதி புஞ்ஞகம்மேன. வத³தி நாமாதி வத³ந்தோ விய ஹோதி . நிப்³ப³த்தாபெய்யந்தி கஸ்மா வுத்தங், நனு உபபீளகஸபா⁴வங் கம்மங் ஜனகஸபா⁴வங் ந ஹோதீதி? ஸப்³ப³மேதங் பரிகப்பனவசனங், யதா² மனுஸ்ஸா பச்சத்தி²கங் படிபக்க²ங் கிஞ்சி காதுங் அஸமத்தா²பி கேசி ஆலம்ப³னவஸேன ஸமத்தா² விய அத்தானங் த³ஸ்ஸெந்தி, ஏவங்ஸம்பத³மித³ந்தி கேசி. அபரே பன ப⁴ணந்தி – யஸ்ஸித³ங் கம்மஸ்ஸவிபாகங் பீளேதி, ஸசே தஸ்மிங் அனோகாஸே ஏவ ஸயங் விபச்சிதுங் ஓகாஸங் லபெ⁴ய்ய, அபாயேஸு ஏவ தங்ஸமங்கி³புக்³க³லங் நிப்³ப³த்தாபெய்ய, யஸ்மா தங் கம்மங் ப³லவங் ஹுத்வா அவஸேஸபச்சயஸமவாயேன விபச்சிதுங் ஆரத்³த⁴ங், தஸ்மா இதரங் தஸ்ஸ விபாகங் விபா³தெ⁴ந்தங் உபபீளகங் நாம ஜாதங். ஏதத³த்த²மேவ செத்த² ‘‘ப³லவகம்மேன நிப்³ப³த்த’’ந்தி ப³லவக்³க³ஹணங் கதங். கிச்சவஸேன ஹி நேஸங் கம்மானங் ஏதா ஸமஞ்ஞா, யதி³த³ங் உபபீளகங் உபச்சே²த³கங் ஜனகங் உபத்த²ம்ப⁴கந்தி, ந குஸலானி விய உபத்த²ம்பா⁴னி ஹொந்தி நிப்³ப³த்தத்தா²ய. பீளெத்வாதி விஹேடெ²த்வா படிகா⁴டனாதி³வஸேன உச்சு²தேலயந்தாத³யோ விய உச்சு²திலாதி³கே விபா³தெ⁴த்வா. நிரோஜந்தி நித்தேஜங். நியூஸந்தி நிரஸங். கஸடந்தி நிஸ்ஸாரங். பரிஸ்ஸயந்தி உபத்³த³வங்.
Esāti paṭipadā. Dubbalaṃ upaghātakameva siyāti upapīḷakassa visayaṃ dassetuṃ, ‘‘balavakammenā’’tiādi vuttaṃ. Balavakammenāti puññakammena. Vadati nāmāti vadanto viya hoti . Nibbattāpeyyanti kasmā vuttaṃ, nanu upapīḷakasabhāvaṃ kammaṃ janakasabhāvaṃ na hotīti? Sabbametaṃ parikappanavacanaṃ, yathā manussā paccatthikaṃ paṭipakkhaṃ kiñci kātuṃ asamatthāpi keci ālambanavasena samatthā viya attānaṃ dassenti, evaṃsampadamidanti keci. Apare pana bhaṇanti – yassidaṃ kammassavipākaṃ pīḷeti, sace tasmiṃ anokāse eva sayaṃ vipaccituṃ okāsaṃ labheyya, apāyesu eva taṃsamaṅgipuggalaṃ nibbattāpeyya, yasmā taṃ kammaṃ balavaṃ hutvā avasesapaccayasamavāyena vipaccituṃ āraddhaṃ, tasmā itaraṃ tassa vipākaṃ vibādhentaṃ upapīḷakaṃ nāma jātaṃ. Etadatthameva cettha ‘‘balavakammena nibbatta’’nti balavaggahaṇaṃ kataṃ. Kiccavasena hi nesaṃ kammānaṃ etā samaññā, yadidaṃ upapīḷakaṃ upacchedakaṃ janakaṃ upatthambhakanti, na kusalāni viya upatthambhāni honti nibbattatthāya. Pīḷetvāti viheṭhetvā paṭighāṭanādivasena ucchutelayantādayo viya ucchutilādike vibādhetvā. Nirojanti nittejaṃ. Niyūsanti nirasaṃ. Kasaṭanti nissāraṃ. Parissayanti upaddavaṃ.
இதா³னி பரிஸ்ஸயஸ்ஸ உபனயனாகாரங் த³ஸ்ஸெந்தேன தத்த², ‘‘தா³ரகஸ்ஸா’’திஆதி³ங் வத்வா போ⁴கா³னங் வினாஸனாகாரங் த³ஸ்ஸேதுங், புன ‘‘தா³ரகஸ்ஸா’’திஆதி³ வுத்தங். கும்ப⁴தோ³ஹனாதி கும்ப⁴பூரகீ²ரா. கோ³மண்ட³லேதி கோ³யூதே².
Idāni parissayassa upanayanākāraṃ dassentena tattha, ‘‘dārakassā’’tiādiṃ vatvā bhogānaṃ vināsanākāraṃ dassetuṃ, puna ‘‘dārakassā’’tiādi vuttaṃ. Kumbhadohanāti kumbhapūrakhīrā. Gomaṇḍaleti goyūthe.
அட்டு²ஸப⁴க³மனங் கத்வாதி அட்ட²உஸப⁴ப்பமாணங் பதே³ஸங் பச்சத்தி²கங் உத்³தி³ஸ்ஸ த⁴னுக்³க³ஹோ அனுயாயிங் கத்வா. தந்தி ஸரங். அஞ்ஞோதி பச்சத்தி²கோ. தத்தே²வ பாதெய்ய அச்சாஸன்னங் கத்வா ஸரஸ்ஸ கி²த்தத்தா. வாளமச்சோ²த³கந்தி மகராதி³வாளமச்ச²வந்தங் உத³கங்.
Aṭṭhusabhagamanaṃkatvāti aṭṭhausabhappamāṇaṃ padesaṃ paccatthikaṃ uddissa dhanuggaho anuyāyiṃ katvā. Tanti saraṃ. Aññoti paccatthiko. Tattheva pāteyya accāsannaṃ katvā sarassa khittattā. Vāḷamacchodakanti makarādivāḷamacchavantaṃ udakaṃ.
படிஸந்தி⁴னிப்³ப³த்தகங் கம்மங் ஜனககம்மங் நாம பரிபுண்ணவிபாகதா³யிபா⁴வதோ, ந பவத்திவிபாகமத்தனிப்³ப³த்தகங். போ⁴க³ஸம்பதா³தீ³தி ஆதி³-ஸத்³தே³ன ஆரொக்³யஸம்பதா³தி³-பரிவாரஸம்பதா³தீ³னி க³ண்ஹாதி. ந தீ³கா⁴யுகதாதீ³னி ஹி அப்பாயுகதாஸங்வத்தனிகேன கம்முனா நிப்³ப³த்தானி; அஞ்ஞங் தீ³கா⁴யுகதாகரணேன உபத்த²ம்பே⁴துங் ஸக்கோதி; ந அதிது³ப்³ப³ண்ணங் அப்பேஸக்க²ங் நீசகுலீனங் து³ப்பஞ்ஞங் வா வண்ணவந்ததாதி³வஸேன. ததா² ஹி வக்க²தி, ‘‘இமஸ்மிங் பன பஞ்ஹவிஸ்ஸஜ்ஜனே’’திஆதி³, தங் பன நித³ஸ்ஸனவஸேன வுத்தந்தி த³ட்ட²ப்³ப³ங்.
Paṭisandhinibbattakaṃ kammaṃ janakakammaṃ nāma paripuṇṇavipākadāyibhāvato, na pavattivipākamattanibbattakaṃ. Bhogasampadādīti ādi-saddena ārogyasampadādi-parivārasampadādīni gaṇhāti. Na dīghāyukatādīni hi appāyukatāsaṃvattanikena kammunā nibbattāni; aññaṃ dīghāyukatākaraṇena upatthambhetuṃ sakkoti; na atidubbaṇṇaṃ appesakkhaṃ nīcakulīnaṃ duppaññaṃ vā vaṇṇavantatādivasena. Tathā hi vakkhati, ‘‘imasmiṃ pana pañhavissajjane’’tiādi, taṃ pana nidassanavasena vuttanti daṭṭhabbaṃ.
புரிமானீதி உபபீளகோபச்சே²த³கானி. உபபீளகுபகா⁴தா நாம குஸலவிபாகபடிபா³ஹகாதி அதி⁴ப்பாயேன ‘‘த்³வே அகுஸலானேவா’’தி வுத்தங். உபத்த²ம்ப⁴கங் குஸலமேவாதி எத்த² யதா² ஜனகங் உப⁴யஸபா⁴வங், ஏவங் இதரேஸம்பி உப⁴யஸபா⁴வதாய வுச்சமானாய ந கோசி விரோதோ⁴. தே³வத³த்தாதீ³னஞ்ஹி நாகா³தீ³னங் இதோ அனுப்பவச்சி²தானங் பேதாதீ³னஞ்ச நரகாதீ³ஸு அகுஸலகம்மவிபாகஸ்ஸ உபத்த²ம்ப⁴னுபபீளனுபகா⁴தனானி ந ந ஸம்ப⁴வந்தி. ஏவஞ்ச கத்வா யா ஹெட்டா² ப³ஹூஸு ஆனந்தரியேஸு ஏகேன க³ஹிதபடிஸந்தி⁴கஸ்ஸ இதரேஸங் தஸ்ஸ அனுப³லப்பதா³யிதா வுத்தா, ஸாபி ஸமத்தி²தா ஹோதி. யஸ்மிஞ்ஹி கம்மே கதே ஜனகனிப்³ப³த்தங் குஸலப²லங் வா அகுஸலப²லங் வா ப்³யாதி⁴தா⁴துஸமதாதி³னிமித்தங் விபா³தீ⁴யதி, தமுபத்த²ம்ப⁴கங். யஸ்மிங் பன கதே ஜாதிஸமத்த²ஸ்ஸ படிஸந்தி⁴யங் பவத்தியஞ்ச விபாககடத்தாரூபானங் உப்பத்தி ஹோதி, தங் ஜனகங். யஸ்மிங் பன கதே அஞ்ஞேன ஜனிதஸ்ஸ இட்ட²ஸ்ஸ வா அனிட்ட²ஸ்ஸ வா ப²லஸ்ஸ விபா³தா⁴விச்சே²த³பச்சயானுப்பத்தியா உபப்³ரூஹனபச்சயுப்பத்தியா ச ஜனகஸாமத்தி²யானுரூபங் பரிவுத்திசிரதரபப³ந்தா⁴ ஹோதி, ஏதங் உபத்த²ம்ப⁴கங். ததா² யஸ்மிங் கதே ஜனகனிப்³ப³த்தங் குஸலப²லங் அகுஸலப²லங் வா ப்³யாதி⁴தா⁴துஸமதாதி³னிமித்தங் விபா³தீ⁴யதி, தங் உபபீளகங். யஸ்மிங் பன கதே ஜனகஸாமத்தி²யவஸேன சிரதரபப³ந்தா⁴ரஹம்பி ஸமானங் ப²லங் விச்சே²த³கபச்சயுப்பத்தியா விச்சி²ஜ்ஜதி, தங் உபகா⁴தகந்தி அயமெத்த² ஸாரோ.
Purimānīti upapīḷakopacchedakāni. Upapīḷakupaghātā nāma kusalavipākapaṭibāhakāti adhippāyena ‘‘dve akusalānevā’’ti vuttaṃ. Upatthambhakaṃ kusalamevāti ettha yathā janakaṃ ubhayasabhāvaṃ, evaṃ itaresampi ubhayasabhāvatāya vuccamānāya na koci virodho. Devadattādīnañhi nāgādīnaṃ ito anuppavacchitānaṃ petādīnañca narakādīsu akusalakammavipākassa upatthambhanupapīḷanupaghātanāni na na sambhavanti. Evañca katvā yā heṭṭhā bahūsu ānantariyesu ekena gahitapaṭisandhikassa itaresaṃ tassa anubalappadāyitā vuttā, sāpi samatthitā hoti. Yasmiñhi kamme kate janakanibbattaṃ kusalaphalaṃ vā akusalaphalaṃ vā byādhidhātusamatādinimittaṃ vibādhīyati, tamupatthambhakaṃ. Yasmiṃ pana kate jātisamatthassa paṭisandhiyaṃ pavattiyañca vipākakaṭattārūpānaṃ uppatti hoti, taṃ janakaṃ. Yasmiṃ pana kate aññena janitassa iṭṭhassa vā aniṭṭhassa vā phalassa vibādhāvicchedapaccayānuppattiyā upabrūhanapaccayuppattiyā ca janakasāmatthiyānurūpaṃ parivutticiratarapabandhā hoti, etaṃ upatthambhakaṃ. Tathā yasmiṃ kate janakanibbattaṃ kusalaphalaṃ akusalaphalaṃ vā byādhidhātusamatādinimittaṃ vibādhīyati, taṃ upapīḷakaṃ. Yasmiṃ pana kate janakasāmatthiyavasena ciratarapabandhārahampi samānaṃ phalaṃ vicchedakapaccayuppattiyā vicchijjati, taṃ upaghātakanti ayamettha sāro.
தத்தா²தி தேஸு கம்மேஸு. உபச்சே²த³ககம்மேனாதி ஆயுனோ உபகா⁴தககம்மேன. ஸ்வாயமுபகா⁴தகபா⁴வோ த்³விதா⁴ இச்சி²தப்³போ³தி தங் த³ஸ்ஸேதுங் ‘‘பாணாதிபாதினா’’திஆதி³ வுத்தங். ந ஸக்கோதி பாணாதிபாதகம்முனா ஸந்தானஸ்ஸ ததா²பி⁴ஸங்க²தத்தா. யஸ்மிஞ்ஹி ஸந்தானே நிப்³ப³த்தங், தஸ்ஸ தேன அபி⁴ஸங்க²ததா அவஸ்ஸங் இச்சி²தப்³பா³ தத்தே²வ தஸ்ஸ விபாகஸ்ஸ வினிப³ந்த⁴னதோ. ஏதேன குஸலஸ்ஸ கம்மஸ்ஸ ஆயூஹனக்க²ணேயேவ பாணாதிபாதோ தாதி³ஸங் ஸாமத்தி²யுபகா⁴தங் கரோதீதி த³ஸ்ஸேதி, ததோ கம்மங் அப்பப²லங் ஹோதி. ‘‘தீ³கா⁴யுகா’’திஆதி³னா உபகா⁴தஸாமத்தி²யேன கெ²த்தே உப்பன்னஸஸ்ஸங் விய உபபத்தினியாமகா த⁴ம்மாதி த³ஸ்ஸேதி. உபபத்தி நியதவிஸேஸே விபச்சிதுங் ஓகாஸே கரொந்தே ஏவ குஸலகம்மே ஆகட்³டி⁴யமானபடிஸந்தி⁴கங் பாணாதிபாதகம்மங் அப்பாயுகத்தா²ய நியமேதீதி ஆஹ – ‘‘படிஸந்தி⁴மேவ வா நியாமெத்வா அப்பாயுகங் கரோதீ’’தி. பாணாதிபாதசேதனாய அச்சந்தகடுகவிபாகத்தா ஸன்னிட்டா²னசேதனாய நிரயே நிப்³ப³த்ததி தஸ்ஸா அத்த²ஸ்ஸ கீ²ணாபா⁴வதோ; இதரே பன ந ததா² பா⁴ரியாதி ஆஹ – ‘‘புப்³பா³…பே॰… ஹோதீ’’தி. இத⁴ பன யங் ஹெட்டா² வுத்தஸதி³ஸங், தங் வுத்தனயேன வேதி³தப்³ப³ங்.
Tatthāti tesu kammesu. Upacchedakakammenāti āyuno upaghātakakammena. Svāyamupaghātakabhāvo dvidhā icchitabboti taṃ dassetuṃ ‘‘pāṇātipātinā’’tiādi vuttaṃ. Na sakkoti pāṇātipātakammunā santānassa tathābhisaṅkhatattā. Yasmiñhi santāne nibbattaṃ, tassa tena abhisaṅkhatatā avassaṃ icchitabbā tattheva tassa vipākassa vinibandhanato. Etena kusalassa kammassa āyūhanakkhaṇeyeva pāṇātipāto tādisaṃ sāmatthiyupaghātaṃ karotīti dasseti, tato kammaṃ appaphalaṃ hoti. ‘‘Dīghāyukā’’tiādinā upaghātasāmatthiyena khette uppannasassaṃ viya upapattiniyāmakā dhammāti dasseti. Upapatti niyatavisese vipaccituṃ okāse karonte eva kusalakamme ākaḍḍhiyamānapaṭisandhikaṃ pāṇātipātakammaṃ appāyukatthāya niyametīti āha – ‘‘paṭisandhimeva vā niyāmetvā appāyukaṃ karotī’’ti. Pāṇātipātacetanāya accantakaṭukavipākattā sanniṭṭhānacetanāya niraye nibbattati tassā atthassa khīṇābhāvato; itare pana na tathā bhāriyāti āha – ‘‘pubbā…pe… hotī’’ti. Idha pana yaṃ heṭṭhā vuttasadisaṃ, taṃ vuttanayena veditabbaṃ.
மனுஸ்ஸாமனுஸ்ஸபரிஸ்ஸயாதி மானுஸகா அமானுஸகா ச உபத்³த³வா. புரதோதி புப்³ப³த்³வாரதோ. பச்ச²தோதி பச்சி²மவத்து²தோ. பவட்டமானாதி பரிஜனஸ்ஸ, தே³வதானங் வா தே³ஸேன பவட்டமானா. பரேஹீதி புராதனேஹி பரேஹி. ஸம்முகீ²பா⁴வந்தி ஸாமிபா⁴வவஸேன பச்சக்க²த்தங். ஆஹரித்வா தெ³ந்தி இணாயிகா. கம்மந்தாதி வணிஜ்ஜாதி³கம்மானி. அபாணாதிபாதகம்மந்தி பாணாதிபாதஸ்ஸ படிபக்க²பூ⁴தங் கம்மங்; பாணாதிபாதா விரதிவஸேன பவத்திதகம்மந்தி அத்தோ². தீ³கா⁴யுகஸங்வத்தனிகங் ஹோதி விபாகஸ்ஸ கம்மஸரிக்க²பா⁴வதோ . இமினா நயேனாதி இமினா அப்பாயுகதீ³கா⁴யுகஸங்வத்தனிகேஸு கம்மேஸு யதா²வுத்தேன தங் ஸங்வத்தனிகவிபா⁴வனநயேன.
Manussāmanussaparissayāti mānusakā amānusakā ca upaddavā. Puratoti pubbadvārato. Pacchatoti pacchimavatthuto. Pavaṭṭamānāti parijanassa, devatānaṃ vā desena pavaṭṭamānā. Parehīti purātanehi parehi. Sammukhībhāvanti sāmibhāvavasena paccakkhattaṃ. Āharitvā denti iṇāyikā. Kammantāti vaṇijjādikammāni. Apāṇātipātakammanti pāṇātipātassa paṭipakkhabhūtaṃ kammaṃ; pāṇātipātā virativasena pavattitakammanti attho. Dīghāyukasaṃvattanikaṃ hoti vipākassa kammasarikkhabhāvato . Iminā nayenāti iminā appāyukadīghāyukasaṃvattanikesu kammesu yathāvuttena taṃ saṃvattanikavibhāvananayena.
விஹேட²னகம்மாதீ³னிபீதி பி-ஸத்³தே³ன கோத⁴இஸ்ஸாமனகமச்சே²ரத²த்³த⁴அவித்³த³ஸுபா⁴வவஸேன பவத்திதகம்மானி ஸங்க³ண்ஹாதி. ததே²வாதி யதா² பாணாதிபாதகம்மங் அத்த²தோ ஏவங் வத³தி நாமாதி வுத்தங், ததே²வ வத³மானானி விய. ‘‘யங் யதே³வாதிபத்தெ²ந்தி, ஸப்³ப³மேதேன லப்³ப⁴தீ’’தி (கு²॰ பா॰ 8.10) வசனதோ யதா² ஸப்³ப³குஸலங் ஸப்³பா³ஸங் ஸம்பத்தீனங் உபனிஸ்ஸயோ, ஏவங் ஸப்³ப³ங் அகுஸலங் ஸப்³பா³ஸங் விபத்தீனங் உபனிஸ்ஸயோதி, ‘‘உபபீளனேன நிப்³போ⁴க³தங் ஆபாதெ³த்வா’’திஆதி³ வுத்தங் . ததா² ஹி பாணாதிபாதகம்மவஸேனபி அயங் நயோ த³ஸ்ஸிதோ. அவிஹேட²னாதீ³னீதி எத்த² ஆதி³-ஸத்³தே³ன அக்கோத⁴ன-அனிஸ்ஸாமன-தா³ன-அனதிமான-வித்³த³ஸுபா⁴வேன பவத்தகம்மானி ஸங்க³ண்ஹாதி.
Viheṭhanakammādīnipīti pi-saddena kodhaissāmanakamaccherathaddhaaviddasubhāvavasena pavattitakammāni saṅgaṇhāti. Tathevāti yathā pāṇātipātakammaṃ atthato evaṃ vadati nāmāti vuttaṃ, tatheva vadamānāni viya. ‘‘Yaṃ yadevātipatthenti, sabbametena labbhatī’’ti (khu. pā. 8.10) vacanato yathā sabbakusalaṃ sabbāsaṃ sampattīnaṃ upanissayo, evaṃ sabbaṃ akusalaṃ sabbāsaṃ vipattīnaṃ upanissayoti, ‘‘upapīḷanena nibbhogataṃ āpādetvā’’tiādi vuttaṃ . Tathā hi pāṇātipātakammavasenapi ayaṃ nayo dassito. Aviheṭhanādīnīti ettha ādi-saddena akkodhana-anissāmana-dāna-anatimāna-viddasubhāvena pavattakammāni saṅgaṇhāti.
293. இஸ்ஸா மனோ ஏதஸ்ஸாதி இஸ்ஸாமனகோதி ஆஹ ‘‘இஸ்ஸாஸம்பயுத்தசித்தோ’’தி. உபக்கோஸந்தோதி அக்கோஸவத்தூ²ஹி அக்கோஸந்தோ. இஸ்ஸங் ப³ந்த⁴தீதி இஸ்ஸங் அனுப³ந்த⁴தி இஸ்ஸாஸஹிதமேவ சித்தங் அனுபவத்தேதி. அப்பேஸக்கோ²தி அப்பானுபா⁴வோ அப்பஞ்ஞாதோ. தேனாஹ ‘‘ந பஞ்ஞாயதீ’’தி. ஸா பனஸ்ஸ அப்பானுபா⁴வதா பரிவாராபா⁴வேன பாகடா ஹோதீதி ஆஹ ‘‘அப்பபரிவாரோ’’தி.
293. Issā mano etassāti issāmanakoti āha ‘‘issāsampayuttacitto’’ti. Upakkosantoti akkosavatthūhi akkosanto. Issaṃ bandhatīti issaṃ anubandhati issāsahitameva cittaṃ anupavatteti. Appesakkhoti appānubhāvo appaññāto. Tenāha ‘‘na paññāyatī’’ti. Sā panassa appānubhāvatā parivārābhāvena pākaṭā hotīti āha ‘‘appaparivāro’’ti.
294. மச்ச²ரியவஸேன ந தா³தா ஹோதீதி ஸப்³ப³ஸோ தெ³ய்யத⁴ம்மஸ்ஸ அபா⁴வேன ந தா³தா ந ஹோதி. அமச்ச²ரீ ஹி புக்³க³லோ ஸதி தெ³ய்யத⁴ம்மே யதா²ரஹங் தே³தியேவ.
294.Macchariyavasena na dātā hotīti sabbaso deyyadhammassa abhāvena na dātā na hoti. Amaccharī hi puggalo sati deyyadhamme yathārahaṃ detiyeva.
295. அபி⁴வாதே³தப்³ப³ங் கெ²த்தவஸேன மத்த²கப்பத்தங் த³ஸ்ஸேதுங், ‘‘பு³த்³த⁴ங் வா’’திஆதி³ வுத்தங். அஞ்ஞேபி மாதுபிதுஜெட்ட²பா⁴தராத³யோ அபி⁴வாத³னாதி³அரஹா ஸந்தி, தேஸு த²த்³தா⁴தி³வஸேன கரணங் நீசகுலஸங்வத்தனிகமேவ. ந ஹி பவத்தே ஸக்கா காதுந்தி ஸம்ப³ந்தோ⁴. தேன பவத்திவிபாகதா³யினோ கம்மஸ்ஸ விஸயோ ஏஸோதி த³ஸ்ஸேதி. தேனாஹ ‘‘படிஸந்தி⁴மேவ பனா’’திஆதி³.
295. Abhivādetabbaṃ khettavasena matthakappattaṃ dassetuṃ, ‘‘buddhaṃ vā’’tiādi vuttaṃ. Aññepi mātupitujeṭṭhabhātarādayo abhivādanādiarahā santi, tesu thaddhādivasena karaṇaṃ nīcakulasaṃvattanikameva. Na hi pavatte sakkā kātunti sambandho. Tena pavattivipākadāyino kammassa visayo esoti dasseti. Tenāha ‘‘paṭisandhimeva panā’’tiādi.
296. அபரிபுச்ச²னேனாதி அபரிபுச்சா²மத்தேன நிரயே ந நிப்³ப³த்ததி; அபரிபுச்சா²ஹேது பன கத்தப்³பா³கரணாதீ³ஹி ஸியா நிரயனிப்³ப³த்தீதி பாளியங், ‘‘ந பரிபுச்சி²தா ஹோதீ’’திஆதி³ வுத்தந்தி த³ஸ்ஸெந்தோ, ‘‘அபரிபுச்ச²கோ பனா’’திஆதி³மாஹ. யதா²னுஸந்தி⁴ங் பாபேஸீதி தே³ஸனங் யதா²னுஸந்தி⁴னிட்டா²னங் பாபேஸி. ஸேஸங் வுத்தனயத்தா ஸுவிஞ்ஞெய்யமேவ.
296.Aparipucchanenāti aparipucchāmattena niraye na nibbattati; aparipucchāhetu pana kattabbākaraṇādīhi siyā nirayanibbattīti pāḷiyaṃ, ‘‘na paripucchitā hotī’’tiādi vuttanti dassento, ‘‘aparipucchako panā’’tiādimāha. Yathānusandhiṃ pāpesīti desanaṃ yathānusandhiniṭṭhānaṃ pāpesi. Sesaṃ vuttanayattā suviññeyyameva.
சூளகம்மவிப⁴ங்க³ஸுத்தவண்ணனாய லீனத்த²ப்பகாஸனா ஸமத்தா.
Cūḷakammavibhaṅgasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. சூளகம்மவிப⁴ங்க³ஸுத்தங் • 5. Cūḷakammavibhaṅgasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 5. சூளகம்மவிப⁴ங்க³ஸுத்தவண்ணனா • 5. Cūḷakammavibhaṅgasuttavaṇṇanā
