| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
5. жуул̣агаммавибхан̇г̇асуд̇д̇аван̣н̣анаа
5. Cūḷakammavibhaṅgasuttavaṇṇanā
289. звам̣ мз суд̇анд̇и жуул̣агаммавибхан̇г̇асуд̇д̇ам̣. д̇ад̇т̇а субход̇и со гира д̣̇ассанийяо ахоси баасаад̣̇иго, д̇знасса ан̇г̇асубхад̇ааяа субход̇взва наамам̣ агам̣су. маан̣авод̇и бана д̇ам̣ д̇арун̣агаалз вохарим̣су, со махаллагагаалзби д̇знзва вохаарзна вохарияад̇и. д̇од̣̇зяяабуд̇д̇од̇и д̇од̣̇зяяасса наама басзнад̣̇иран̃н̃о бурохид̇аб̣раахман̣асса буд̇д̇о. со гира саавад̇т̇ияаа авид̣̇уурз д̇уд̣̇иг̇аамо наама ад̇т̇и, д̇асса ад̇хибад̇ид̇д̇аа д̇од̣̇зяяод̇и сан̇кам̣ г̇ад̇о. махаад̇хано бана ход̇и сад̇д̇аасийд̇игодивибхаво барамамажчарий, ‘‘д̣̇ад̣̇ад̇о бхог̇аанам̣ абаригкаяо наама над̇т̇ий’’д̇и жинд̇зд̇ваа гассажи гин̃жи на д̣̇зд̇и. вуд̇д̇амби жзд̇ам̣ –
289.Evaṃme sutanti cūḷakammavibhaṅgasuttaṃ. Tattha subhoti so kira dassanīyo ahosi pāsādiko, tenassa aṅgasubhatāya subhotveva nāmaṃ akaṃsu. Māṇavoti pana taṃ taruṇakāle vohariṃsu, so mahallakakālepi teneva vohārena vohariyati. Todeyyaputtoti todeyyassa nāma pasenadirañño purohitabrāhmaṇassa putto. So kira sāvatthiyā avidūre tudigāmo nāma atthi, tassa adhipatittā todeyyoti saṅkhaṃ gato. Mahādhano pana hoti sattāsītikoṭivibhavo paramamaccharī, ‘‘dadato bhogānaṃ aparikkhayo nāma natthī’’ti cintetvā kassaci kiñci na deti. Vuttampi cetaṃ –
‘‘ан̃ж̇анаанам̣ каяам̣ д̣̇исваа, ваммигаанан̃жа сан̃жаяам̣;
‘‘Añjanānaṃ khayaṃ disvā, vammikānañca sañcayaṃ;
мад̇хуунан̃жа самаахаарам̣, бан̣д̣ид̇о гхарамаавасз’’д̇и.
Madhūnañca samāhāraṃ, paṇḍito gharamāvase’’ti.
звам̣ ад̣̇аанамзва сигкаабзси. д̇хуравихаарз васад̇о саммаасамб̣уд̣̇д̇хасса яааг̇уул̣ун̇г̇амад̇д̇ам̣ ваа бхад̇д̇агадажчумад̇д̇ам̣ ваа ад̣̇ад̇ваа д̇ханалобхзна гаалам̣ гад̇ваа д̇асмим̣язва гхарз сунако худ̇ваа ниб̣б̣ад̇д̇о. субхо д̇ам̣ сунакам̣ ад̇ивияа бияааяад̇и , ад̇д̇ано бхун̃ж̇анагабхад̇д̇ам̣язва бхож̇зд̇и, угкибид̇ваа варасаяанз саяаабзд̇и. ат̇а бхаг̇аваа згад̣̇ивасам̣ бажжуусасамаяз логам̣ вологзнд̇о д̇ам̣ сунакам̣ д̣̇исваа – ‘‘д̇од̣̇зяяаб̣раахман̣о д̇ханалобхзна ад̇д̇анова гхарз сунако худ̇ваа ниб̣б̣ад̇д̇о, аж̇ж̇а маяи субхасса гхарам̣ г̇ад̇з мам̣ д̣̇исваа сунако бхуггаарам̣ гариссад̇и, ат̇ассаахам̣ згам̣ важанам̣ вагкаами, со ‘ж̇аанаад̇и мам̣ саман̣о г̇од̇амо’д̇и г̇анд̇ваа уд̣̇д̇ханадтаанз нибаж̇ж̇иссад̇и. д̇ад̇онид̣̇аанам̣ субхасса маяаа сад̣̇д̇хим̣ зго гат̇аасаллаабо бхависсад̇и, со д̇хаммам̣ суд̇ваа саран̣зсу бад̇идтахиссад̇и, сунако бана гаалам̣ гад̇ваа нираяз ниб̣б̣ад̇д̇иссад̇ий’’д̇и имам̣ маан̣авасса саран̣зсу бад̇идтаанабхаавам̣ н̃ад̇ваа бхаг̇аваа д̇ам̣ д̣̇ивасам̣ сарийрабадиж̇аг̇г̇анам̣ гад̇ваа згагова г̇аамам̣ бависид̇ваа нигканд̇з маан̣авз д̇ам̣ гхарам̣ бин̣д̣ааяа баависи.
Evaṃ adānameva sikkhāpesi. Dhuravihāre vasato sammāsambuddhassa yāguuḷuṅgamattaṃ vā bhattakaṭacchumattaṃ vā adatvā dhanalobhena kālaṃ katvā tasmiṃyeva ghare sunakho hutvā nibbatto. Subho taṃ sunakhaṃ ativiya piyāyati , attano bhuñjanakabhattaṃyeva bhojeti, ukkhipitvā varasayane sayāpeti. Atha bhagavā ekadivasaṃ paccūsasamaye lokaṃ volokento taṃ sunakhaṃ disvā – ‘‘todeyyabrāhmaṇo dhanalobhena attanova ghare sunakho hutvā nibbatto, ajja mayi subhassa gharaṃ gate maṃ disvā sunakho bhukkāraṃ karissati, athassāhaṃ ekaṃ vacanaṃ vakkhāmi, so ‘jānāti maṃ samaṇo gotamo’ti gantvā uddhanaṭṭhāne nipajjissati. Tatonidānaṃ subhassa mayā saddhiṃ eko kathāsallāpo bhavissati, so dhammaṃ sutvā saraṇesu patiṭṭhahissati, sunakho pana kālaṃ katvā niraye nibbattissatī’’ti imaṃ māṇavassa saraṇesu patiṭṭhānabhāvaṃ ñatvā bhagavā taṃ divasaṃ sarīrapaṭijagganaṃ katvā ekakova gāmaṃ pavisitvā nikkhante māṇave taṃ gharaṃ piṇḍāya pāvisi.
сунако бхаг̇аванд̇ам̣ д̣̇исваа бхуггаарам̣ гаронд̇о бхаг̇авад̇о самийбам̣ г̇ад̇о. д̇ад̇о нам̣ бхаг̇аваа зд̇ад̣̇авожа – ‘‘д̇од̣̇зяяа д̇вам̣ буб̣б̣зби мам̣ бхо бход̇и барибхавид̇ваа сунако ж̇аад̇о, ид̣̇ааниби бхуггаарам̣ гад̇ваа авийжим̣ г̇амиссасий’’д̇и. сунако д̇ам̣ суд̇ваа – ‘‘ж̇аанаад̇и мам̣ саман̣о г̇од̇амо’’д̇и виббадисаарий худ̇ваа г̇ийвам̣ онаамзд̇ваа уд̣̇д̇хананд̇арз чааригааяам̣ нибанно. мануссаа угкибид̇ваа саяанз саяаабзд̇ум̣ наасагким̣су. субхо ааг̇анд̇ваа – ‘‘гзнааяам̣ сунако саяанаа оробид̇о’’д̇и ааха. мануссаа на гзнажийд̇и вад̇ваа д̇ам̣ бавад̇д̇им̣ аарожзсум̣. маан̣аво суд̇ваа – ‘‘мама бид̇аа б̣рахмалогз ниб̣б̣ад̇д̇о, д̇од̣̇зяяо наама сунако над̇т̇и. саман̣о бана г̇од̇амо бид̇арам̣ сунакам̣ гарод̇и, яам̣гин̃жи зса мукаарул̣хам̣ бхаасад̇ий’’д̇и гуж̇жхид̇ваа бхаг̇аванд̇ам̣ мусааваад̣̇зна ниг̇г̇ахзд̇угаамо вихаарам̣ г̇анд̇ваа д̇ам̣ бавад̇д̇им̣ бужчи.
Sunakho bhagavantaṃ disvā bhukkāraṃ karonto bhagavato samīpaṃ gato. Tato naṃ bhagavā etadavoca – ‘‘todeyya tvaṃ pubbepi maṃ bho bhoti paribhavitvā sunakho jāto, idānipi bhukkāraṃ katvā avīciṃ gamissasī’’ti. Sunakho taṃ sutvā – ‘‘jānāti maṃ samaṇo gotamo’’ti vippaṭisārī hutvā gīvaṃ onāmetvā uddhanantare chārikāyaṃ nipanno. Manussā ukkhipitvā sayane sayāpetuṃ nāsakkhiṃsu. Subho āgantvā – ‘‘kenāyaṃ sunakho sayanā oropito’’ti āha. Manussā na kenacīti vatvā taṃ pavattiṃ ārocesuṃ. Māṇavo sutvā – ‘‘mama pitā brahmaloke nibbatto, todeyyo nāma sunakho natthi. Samaṇo pana gotamo pitaraṃ sunakhaṃ karoti, yaṃkiñci esa mukhāruḷhaṃ bhāsatī’’ti kujjhitvā bhagavantaṃ musāvādena niggahetukāmo vihāraṃ gantvā taṃ pavattiṃ pucchi.
бхаг̇авааби д̇асса д̇ат̇зва вад̇ваа ависам̣ваад̣̇анад̇т̇ам̣ ааха – ‘‘ад̇т̇и бана д̇з маан̣ава бид̇араа анагкаад̇ам̣ д̇хана’’нд̇и . ад̇т̇и, бхо г̇од̇ама, сад̇асахассаг̇гханигаа суван̣н̣амаалаа сад̇асахассаг̇гханигаа суван̣н̣абаад̣̇угаа сад̇асахассаг̇гханигаа суван̣н̣абаад̇и сад̇асахассан̃жа гахаабан̣анд̇и. г̇ажча д̇ам̣ сунакам̣ аббод̣̇агабааяаасам̣ бхож̇аабзд̇ваа саяанз ааробзд̇ваа ийсагам̣ нид̣̇д̣̇ам̣ огганд̇агаалз бужча, саб̣б̣ам̣ д̇з аажигкиссад̇и. ат̇а нам̣ ж̇аанзяяааси ‘‘бид̇аа мз зсо’’д̇и. маан̣аво – ‘‘сажз сажжам̣ бхависсад̇и, д̇ханам̣ лажчаами, но жз, саман̣ам̣ г̇од̇амам̣ мусааваад̣̇зна ниг̇г̇ан̣хиссаамий’’д̇и д̣̇вийхиби гааран̣зхи д̇удто г̇анд̇ваа д̇ат̇аа агааси. сунако – ‘‘н̃аад̇омхи иминаа’’д̇и род̣̇ид̇ваа хум̣ хунд̇и гаронд̇о д̇хананид̇хаанадтаанам̣ г̇анд̇ваа баад̣̇зна бат̇авим̣ кан̣ид̇ваа сан̃н̃ам̣ ад̣̇ааси, маан̣аво д̇ханам̣ г̇ахзд̇ваа – ‘‘бхавабадижчаннам̣ наама звам̣ сукумам̣ бадисанд̇хианд̇арам̣ баагадам̣ саман̣асса г̇од̇амасса, ад̣̇д̇хаа зса саб̣б̣ан̃н̃уу’’д̇и бхаг̇авад̇и басаннажид̇д̇о жуд̣̇д̣̇аса бан̃хз абхисан̇кари. ан̇г̇авиж̇ж̇аабаатаго гирзса, д̇знасса зд̇ад̣̇ахоси – ‘‘ид̣̇ам̣ д̇хаммабан̣н̣аагаарам̣ г̇ахзд̇ваа саман̣ам̣ г̇од̇амам̣ бан̃хз бужчиссаамий’’д̇и д̣̇уд̇ияаг̇аманзна язна бхаг̇аваа д̇знубасан̇гами, д̇зна будтабан̃хз бана бхаг̇аваа згаббахаарзнзва виссаж̇ж̇знд̇о гаммассагаад̇иаад̣̇имааха.
Bhagavāpi tassa tatheva vatvā avisaṃvādanatthaṃ āha – ‘‘atthi pana te māṇava pitarā anakkhātaṃ dhana’’nti . Atthi, bho gotama, satasahassagghanikā suvaṇṇamālā satasahassagghanikā suvaṇṇapādukā satasahassagghanikā suvaṇṇapāti satasahassañca kahāpaṇanti. Gaccha taṃ sunakhaṃ appodakapāyāsaṃ bhojāpetvā sayane āropetvā īsakaṃ niddaṃ okkantakāle puccha, sabbaṃ te ācikkhissati. Atha naṃ jāneyyāsi ‘‘pitā me eso’’ti. Māṇavo – ‘‘sace saccaṃ bhavissati, dhanaṃ lacchāmi, no ce, samaṇaṃ gotamaṃ musāvādena niggaṇhissāmī’’ti dvīhipi kāraṇehi tuṭṭho gantvā tathā akāsi. Sunakho – ‘‘ñātomhi iminā’’ti roditvā huṃ hunti karonto dhananidhānaṭṭhānaṃ gantvā pādena pathaviṃ khaṇitvā saññaṃ adāsi, māṇavo dhanaṃ gahetvā – ‘‘bhavapaṭicchannaṃ nāma evaṃ sukhumaṃ paṭisandhiantaraṃ pākaṭaṃ samaṇassa gotamassa, addhā esa sabbaññū’’ti bhagavati pasannacitto cuddasa pañhe abhisaṅkhari. Aṅgavijjāpāṭhako kiresa, tenassa etadahosi – ‘‘idaṃ dhammapaṇṇākāraṃ gahetvā samaṇaṃ gotamaṃ pañhe pucchissāmī’’ti dutiyagamanena yena bhagavā tenupasaṅkami, tena puṭṭhapañhe pana bhagavā ekappahāreneva vissajjento kammassakātiādimāha.
д̇ад̇т̇а гаммам̣ зд̇зсам̣ сагам̣ ад̇д̇ано бхан̣д̣аганд̇и гаммассагаа. гаммасса д̣̇ааяаад̣̇аад̇и гаммад̣̇ааяаад̣̇аа, гаммам̣ зд̇зсам̣ д̣̇ааяаж̇ж̇ам̣ бхан̣д̣аганд̇и ад̇т̇о. гаммам̣ зд̇зсам̣ яони гааран̣анд̇и гаммаяоний. гаммам̣ зд̇зсам̣ б̣анд̇хууд̇и гаммаб̣анд̇хуу, гамман̃аад̇агаад̇и ад̇т̇о. гаммам̣ зд̇зсам̣ бадисаран̣ам̣ бад̇идтаад̇и гаммабадисаран̣аа. яад̣̇ид̣̇ам̣ хийнаббан̣ийд̇ад̇ааяаад̇и яам̣ ид̣̇ам̣ ‘‘д̇вам̣ хийно бхава, д̇вам̣ бан̣ийд̇о, д̇вам̣ аббааяуго, д̇вам̣ д̣̇ийгхааяуго…бз… д̇вам̣ д̣̇уббан̃н̃о бхава, д̇вам̣ бан̃н̃аваа’’д̇и звам̣ хийнаббан̣ийд̇ад̇ааяа вибхаж̇анам̣, д̇ам̣ на ан̃н̃о гожи гарод̇и, гаммамзва звам̣ сад̇д̇з вибхаж̇ад̇ийд̇и ад̇т̇о. на маан̣аво гат̇ид̇асса ад̇т̇ам̣ сан̃ж̇аанааси, гханад̣̇уссабаддзнасса мукам̣ б̣анд̇хид̇ваа мад̇хурам̣ бурад̇о табид̇ам̣ вияа ахоси. маананиссид̇о гирзса бан̣д̣ид̇амааний, ад̇д̇анаа самам̣ на бассад̇и. ат̇асса ‘‘гим̣ саман̣о г̇од̇амо гат̇зд̇и, яамахам̣ ж̇аанаами, д̇ад̣̇зва гат̇зд̇ийд̇и аяам̣ маано маа ахосий’’д̇и маанабхан̃ж̇анад̇т̇ам̣ бхаг̇аваа ‘‘аад̣̇ид̇ова д̣̇уббадивиж̇жхам̣ гад̇ваа гат̇зссаами, д̇ад̇о ‘наахам̣ бхо г̇од̇ама ж̇аанаами, вид̇т̇аарзна мз баагадам̣ гад̇ваа гат̇зт̇аа’д̇и мам̣ яаажиссад̇и, ат̇ассаахам̣ яаажид̇агаалз гат̇зссаами, зван̃жасса саад̇т̇агам̣ бхависсад̇ий’’д̇и д̣̇уббадивиж̇жхам̣ гад̇ваа гат̇зси.
Tattha kammaṃ etesaṃ sakaṃ attano bhaṇḍakanti kammassakā. Kammassa dāyādāti kammadāyādā, kammaṃ etesaṃ dāyajjaṃ bhaṇḍakanti attho. Kammaṃ etesaṃ yoni kāraṇanti kammayonī. Kammaṃ etesaṃ bandhūti kammabandhū, kammañātakāti attho. Kammaṃ etesaṃ paṭisaraṇaṃ patiṭṭhāti kammapaṭisaraṇā. Yadidaṃhīnappaṇītatāyāti yaṃ idaṃ ‘‘tvaṃ hīno bhava, tvaṃ paṇīto, tvaṃ appāyuko, tvaṃ dīghāyuko…pe… tvaṃ duppañño bhava, tvaṃ paññavā’’ti evaṃ hīnappaṇītatāya vibhajanaṃ, taṃ na añño koci karoti, kammameva evaṃ satte vibhajatīti attho. Na māṇavo kathitassa atthaṃ sañjānāsi, ghanadussapaṭṭenassa mukhaṃ bandhitvā madhuraṃ purato ṭhapitaṃ viya ahosi. Mānanissito kiresa paṇḍitamānī, attanā samaṃ na passati. Athassa ‘‘kiṃ samaṇo gotamo katheti, yamahaṃ jānāmi, tadeva kathetīti ayaṃ māno mā ahosī’’ti mānabhañjanatthaṃ bhagavā ‘‘āditova duppaṭivijjhaṃ katvā kathessāmi, tato ‘nāhaṃ bho gotama jānāmi, vitthārena me pākaṭaṃ katvā kathethā’ti maṃ yācissati, athassāhaṃ yācitakāle kathessāmi, evañcassa sātthakaṃ bhavissatī’’ti duppaṭivijjhaṃ katvā kathesi.
ид̣̇аани со ад̇д̇ано аббадивид̣̇д̇хабхаавам̣ багаасзнд̇о на ко аханд̇иаад̣̇имааха.
Idāni so attano appaṭividdhabhāvaṃ pakāsento na kho ahantiādimāha.
290. самад̇д̇знаад̇и барибун̣н̣зна. самаад̣̇иннзнаад̇и г̇ахид̇зна бараамадтзна. аббааяугасам̣вад̇д̇анигаа зсаа, маан̣ава, бадибад̣̇аа яад̣̇ид̣̇ам̣ баан̣аад̇ибаад̇ийд̇и яам̣ ид̣̇ам̣ баан̣аад̇ибаад̇агаммам̣, зсаа аббааяугасам̣вад̇д̇анигаа бадибад̣̇аад̇и.
290.Samattenāti paripuṇṇena. Samādinnenāti gahitena parāmaṭṭhena. Appāyukasaṃvattanikā esā, māṇava, paṭipadā yadidaṃ pāṇātipātīti yaṃ idaṃ pāṇātipātakammaṃ, esā appāyukasaṃvattanikā paṭipadāti.
гат̇ам̣ банзсаа аббааяугад̇ам̣ гарод̇и? жад̇д̇аари хи гаммаани убабийл̣агам̣ убажчзд̣̇агам̣ ж̇анагам̣ убад̇т̇амбхаганд̇и. б̣алавагаммзна хи ниб̣б̣ад̇д̇ам̣ бавад̇д̇з убабийл̣агам̣ ааг̇анд̇ваа ад̇т̇ад̇о звам̣ вад̣̇ад̇и наама – ‘‘сажаахам̣ батамад̇арам̣ ж̇аанзяяам̣, на д̇з ид̇ха ниб̣б̣ад̇д̇ид̇ум̣ д̣̇ад̣̇зяяам̣, жад̇уусуязва д̇ам̣ абааязсу ниб̣б̣ад̇д̇аабзяяам̣. ход̇у, д̇вам̣ яад̇т̇а гад̇т̇ажи ниб̣б̣ад̇д̇а, ахам̣ убабийл̣агагаммам̣ наама д̇ам̣ бийл̣зд̇ваа нирож̇ам̣ нияуусам̣ гасадам̣ гариссаамий’’д̇и. д̇ад̇о бадтааяа д̇ам̣ д̇аад̣̇исам̣ гарод̇и. гим̣ гарод̇и? бариссаяам̣ убанзд̇и, бхог̇з винаасзд̇и.
Kathaṃ panesā appāyukataṃ karoti? Cattāri hi kammāni upapīḷakaṃ upacchedakaṃ janakaṃ upatthambhakanti. Balavakammena hi nibbattaṃ pavatte upapīḷakaṃ āgantvā atthato evaṃ vadati nāma – ‘‘sacāhaṃ paṭhamataraṃ jāneyyaṃ, na te idha nibbattituṃ dadeyyaṃ, catūsuyeva taṃ apāyesu nibbattāpeyyaṃ. Hotu, tvaṃ yattha katthaci nibbatta, ahaṃ upapīḷakakammaṃ nāma taṃ pīḷetvā nirojaṃ niyūsaṃ kasaṭaṃ karissāmī’’ti. Tato paṭṭhāya taṃ tādisaṃ karoti. Kiṃ karoti? Parissayaṃ upaneti, bhoge vināseti.
д̇ад̇т̇а д̣̇аарагасса маад̇угужчияам̣ ниб̣б̣ад̇д̇агаалад̇о бадтааяа маад̇у ассаад̣̇о ваа сукам̣ ваа на ход̇и, маад̇аабид̇уунам̣ бийл̣аава уббаж̇ж̇ад̇и. звам̣ бариссаяам̣ убанзд̇и. д̣̇аарагасса бана маад̇угужчимхи ниб̣б̣ад̇д̇агаалад̇о бадтааяа г̇зхз бхог̇аа уд̣̇агам̣ бад̇ваа лон̣ам̣ вияа рааж̇аад̣̇ийнам̣ васзна нассанд̇и, гумбхад̣̇оханад̇хзнуяо кийрам̣ на д̣̇знд̇и, суурад̇аа г̇он̣аа жан̣д̣аа хонд̇и, гаан̣аа хонд̇и, куж̇ж̇аа хонд̇и, г̇оман̣д̣алз рог̇о бад̇ад̇и, д̣̇аасаад̣̇аяо важанам̣ на гаронд̇и, ваабид̇ам̣ сассам̣ на ж̇ааяад̇и, г̇зхаг̇ад̇ам̣ г̇зхз, аран̃н̃аг̇ад̇ам̣ аран̃н̃з нассад̇и, анубуб̣б̣зна гхаасажчаад̣̇анамад̇д̇ам̣ д̣̇уллабхам̣ ход̇и, г̇аб̣бхабарихааро на ход̇и, виж̇аад̇агаалз маад̇ут̇ан̃н̃ам̣ чиж̇ж̇ад̇и, д̣̇аараго барихаарам̣ алабханд̇о бийл̣ид̇о нирож̇о нияуусо гасадо ход̇и, ид̣̇ам̣ убабийл̣агагаммам̣ наама.
Tattha dārakassa mātukucchiyaṃ nibbattakālato paṭṭhāya mātu assādo vā sukhaṃ vā na hoti, mātāpitūnaṃ pīḷāva uppajjati. Evaṃ parissayaṃ upaneti. Dārakassa pana mātukucchimhi nibbattakālato paṭṭhāya gehe bhogā udakaṃ patvā loṇaṃ viya rājādīnaṃ vasena nassanti, kumbhadohanadhenuyo khīraṃ na denti, sūratā goṇā caṇḍā honti, kāṇā honti, khujjā honti, gomaṇḍale rogo patati, dāsādayo vacanaṃ na karonti, vāpitaṃ sassaṃ na jāyati, gehagataṃ gehe, araññagataṃ araññe nassati, anupubbena ghāsacchādanamattaṃ dullabhaṃ hoti, gabbhaparihāro na hoti, vijātakāle mātuthaññaṃ chijjati, dārako parihāraṃ alabhanto pīḷito nirojo niyūso kasaṭo hoti, idaṃ upapīḷakakammaṃ nāma.
д̣̇ийгхааяугагаммзна бана ниб̣б̣ад̇д̇асса убажчзд̣̇агагаммам̣ ааг̇анд̇ваа ааяум̣ чинд̣̇ад̇и. яат̇аа хи бурисо адтусабхаг̇аманам̣ гад̇ваа сарам̣ кибзяяа д̇аман̃н̃о д̇хануд̇о вимуд̇д̇амад̇д̇ам̣ муг̇г̇арзна бахарид̇ваа д̇ад̇т̇зва баад̇зяяа, звам̣ д̣̇ийгхааяугагаммзна ниб̣б̣ад̇д̇асса убажчзд̣̇агагаммам̣ ааяум̣ чинд̣̇ад̇и. гим̣ гарод̇и? жораанам̣ адавим̣ бавзсзд̇и, ваал̣амажчод̣̇агам̣ од̇аарзд̇и, ан̃н̃ад̇арам̣ ваа бана сабариссаяадтаанам̣ убанзд̇и, ид̣̇ам̣ убажчзд̣̇агагаммам̣ наама, ‘‘убагхаад̇ага’’нд̇иби зд̇ассзва наамам̣.
Dīghāyukakammena pana nibbattassa upacchedakakammaṃ āgantvā āyuṃ chindati. Yathā hi puriso aṭṭhusabhagamanaṃ katvā saraṃ khipeyya tamañño dhanuto vimuttamattaṃ muggarena paharitvā tattheva pāteyya, evaṃ dīghāyukakammena nibbattassa upacchedakakammaṃ āyuṃ chindati. Kiṃ karoti? Corānaṃ aṭaviṃ paveseti, vāḷamacchodakaṃ otāreti, aññataraṃ vā pana saparissayaṭṭhānaṃ upaneti, idaṃ upacchedakakammaṃ nāma, ‘‘upaghātaka’’ntipi etasseva nāmaṃ.
бадисанд̇хиниб̣б̣ад̇д̇агам̣ бана гаммам̣ ж̇анагагаммам̣ наама. аббабхог̇агулаад̣̇ийсу ниб̣б̣ад̇д̇асса бхог̇асамбад̣̇аад̣̇игаран̣зна убад̇т̇амбхагагаммам̣ убад̇т̇амбхагагаммам̣ наама.
Paṭisandhinibbattakaṃ pana kammaṃ janakakammaṃ nāma. Appabhogakulādīsu nibbattassa bhogasampadādikaraṇena upatthambhakakammaṃ upatthambhakakammaṃ nāma.
имзсу жад̇уусу буримаани д̣̇вз агусалаанзва, ж̇анагам̣ гусаламби агусаламби, убад̇т̇амбхагам̣ гусаламзва. д̇ад̇т̇а баан̣аад̇ибаад̇агаммам̣ убажчзд̣̇агагаммзна аббааяугасам̣вад̇д̇анигам̣ ход̇и. баан̣аад̇ибаад̇инаа ваа гад̇ам̣ гусалагаммам̣ ул̣аарам̣ на ход̇и, д̣̇ийгхааяугабадисанд̇хим̣ ж̇анзд̇ум̣ на саггод̇и. звам̣ баан̣аад̇ибаад̇о аббааяугасам̣вад̇д̇аниго ход̇и. бадисанд̇химзва ваа нияаамзд̇ваа аббааяугам̣ гарод̇и, саннидтаанажзд̇анааяа ваа нираяз ниб̣б̣ад̇д̇ад̇и, буб̣б̣аабаражзд̇анаахи вуд̇д̇анаязна аббааяуго ход̇и.
Imesu catūsu purimāni dve akusalāneva, janakaṃ kusalampi akusalampi, upatthambhakaṃ kusalameva. Tattha pāṇātipātakammaṃ upacchedakakammena appāyukasaṃvattanikaṃ hoti. Pāṇātipātinā vā kataṃ kusalakammaṃ uḷāraṃ na hoti, dīghāyukapaṭisandhiṃ janetuṃ na sakkoti. Evaṃ pāṇātipāto appāyukasaṃvattaniko hoti. Paṭisandhimeva vā niyāmetvā appāyukaṃ karoti, sanniṭṭhānacetanāya vā niraye nibbattati, pubbāparacetanāhi vuttanayena appāyuko hoti.
д̣̇ийгхааяугасам̣вад̇д̇анигаа зсаа маан̣ава бадибад̣̇аад̇и зд̇т̇а барид̇д̇агаммзнаби ниб̣б̣ад̇д̇ам̣ бавад̇д̇з зд̇ам̣ баан̣аад̇ибаад̇аа вирад̇игаммам̣ ааг̇анд̇ваа ад̇т̇ад̇о звам̣ вад̣̇ад̇и наама – ‘‘сажаахам̣ батамад̇арам̣ ж̇аанзяяам̣, на д̇з ид̇ха ниб̣б̣ад̇д̇ид̇ум̣ д̣̇ад̣̇зяяам̣, д̣̇звалогзязва д̇ам̣ ниб̣б̣ад̇д̇аабзяяам̣. ход̇у, д̇вам̣ яад̇т̇а гад̇т̇ажи ниб̣б̣ад̇д̇и, ахам̣ убад̇т̇амбхагагаммам̣ наама т̇амбхам̣ д̇з гариссаамий’’д̇и убад̇т̇амбхам̣ гарод̇и. гим̣ гарод̇и? бариссаяам̣ наасзд̇и, бхог̇з уббаад̣̇зд̇и.
Dīghāyukasaṃvattanikā esā māṇava paṭipadāti ettha parittakammenapi nibbattaṃ pavatte etaṃ pāṇātipātā viratikammaṃ āgantvā atthato evaṃ vadati nāma – ‘‘sacāhaṃ paṭhamataraṃ jāneyyaṃ, na te idha nibbattituṃ dadeyyaṃ, devalokeyeva taṃ nibbattāpeyyaṃ. Hotu, tvaṃ yattha katthaci nibbatti, ahaṃ upatthambhakakammaṃ nāma thambhaṃ te karissāmī’’ti upatthambhaṃ karoti. Kiṃ karoti? Parissayaṃ nāseti, bhoge uppādeti.
д̇ад̇т̇а д̣̇аарагасса маад̇угужчияам̣ ниб̣б̣ад̇д̇агаалад̇о бадтааяа маад̇аабид̇уунам̣ сукамзва саад̇амзва ход̇и. язби багад̇ияаа мануссаамануссабариссаяаа хонд̇и, д̇з саб̣б̣з абаг̇ажчанд̇и. звам̣ бариссаяам̣ наасзд̇и. д̣̇аарагасса бана маад̇угужчимхи ниб̣б̣ад̇д̇агаалад̇о бадтааяа г̇зхз бхог̇аанам̣ бамаан̣ам̣ на ход̇и, нид̇хигумбхияо бурад̇оби бажчад̇оби г̇зхам̣ баваддамаанаа бависанд̇и. маад̇аабид̇аро барзхи табид̇ад̇ханассааби саммукийбхаавам̣ г̇ажчанд̇и. д̇хзнуяо б̣ахукийраа хонд̇и, г̇он̣аа сукасийлаа хонд̇и, ваббадтаанз сассаани самбаж̇ж̇анд̇и. вад̣дхияаа ваа самбаяуд̇д̇ам̣, д̇аавагаалигам̣ ваа д̣̇иннам̣ д̇ханам̣ ажод̣̇ид̇аа саяамзва аахарид̇ваа д̣̇знд̇и, д̣̇аасаад̣̇аяо суважаа хонд̇и, гамманд̇аа на барихааяанд̇и. д̣̇аараго г̇аб̣бхад̇о бадтааяа барихаарам̣ лабхад̇и, гомааригавзж̇ж̇аа саннихид̇аава хонд̇и. г̇ахабад̇игулз ж̇аад̇о сздтидтаанам̣, амажжагулаад̣̇ийсу ж̇аад̇о сзнаабад̇идтаанаад̣̇ийни лабхад̇и. звам̣ бхог̇з уббаад̣̇зд̇и. со абариссаяо сабхог̇о жирам̣ ж̇ийвад̇ийд̇и. звам̣ абаан̣аад̇ибаад̇агаммам̣ д̣̇ийгхааяугасам̣вад̇д̇анигам̣ ход̇и.
Tattha dārakassa mātukucchiyaṃ nibbattakālato paṭṭhāya mātāpitūnaṃ sukhameva sātameva hoti. Yepi pakatiyā manussāmanussaparissayā honti, te sabbe apagacchanti. Evaṃ parissayaṃ nāseti. Dārakassa pana mātukucchimhi nibbattakālato paṭṭhāya gehe bhogānaṃ pamāṇaṃ na hoti, nidhikumbhiyo puratopi pacchatopi gehaṃ pavaṭṭamānā pavisanti. Mātāpitaro parehi ṭhapitadhanassāpi sammukhībhāvaṃ gacchanti. Dhenuyo bahukhīrā honti, goṇā sukhasīlā honti, vappaṭṭhāne sassāni sampajjanti. Vaḍḍhiyā vā sampayuttaṃ, tāvakālikaṃ vā dinnaṃ dhanaṃ acoditā sayameva āharitvā denti, dāsādayo suvacā honti, kammantā na parihāyanti. Dārako gabbhato paṭṭhāya parihāraṃ labhati, komārikavejjā sannihitāva honti. Gahapatikule jāto seṭṭhiṭṭhānaṃ, amaccakulādīsu jāto senāpatiṭṭhānādīni labhati. Evaṃ bhoge uppādeti. So aparissayo sabhogo ciraṃ jīvatīti. Evaṃ apāṇātipātakammaṃ dīghāyukasaṃvattanikaṃ hoti.
абаан̣аад̇ибаад̇инаа ваа гад̇ам̣ ан̃н̃амби гусалам̣ ул̣аарам̣ ход̇и, д̣̇ийгхааяугабадисанд̇хим̣ ж̇анзд̇ум̣ саггод̇и, звамби д̣̇ийгхааяугасам̣вад̇д̇анигам̣ ход̇и. бадисанд̇химзва ваа нияаамзд̇ваа д̣̇ийгхааяугам̣ гарод̇и. саннидтаанажзд̇анааяа ваа д̣̇звалогз ниб̣б̣ад̇д̇ад̇и, буб̣б̣аабаражзд̇анаахи вуд̇д̇анаязна д̣̇ийгхааяуго ход̇и. иминаа наязна саб̣б̣абан̃хависсаж̇ж̇анзсу ад̇т̇о взд̣̇ид̇аб̣б̣о.
Apāṇātipātinā vā kataṃ aññampi kusalaṃ uḷāraṃ hoti, dīghāyukapaṭisandhiṃ janetuṃ sakkoti, evampi dīghāyukasaṃvattanikaṃ hoti. Paṭisandhimeva vā niyāmetvā dīghāyukaṃ karoti. Sanniṭṭhānacetanāya vā devaloke nibbattati, pubbāparacetanāhi vuttanayena dīghāyuko hoti. Iminā nayena sabbapañhavissajjanesu attho veditabbo.
вихзтанагаммаад̣̇ийниби хи бавад̇д̇з ааг̇анд̇ваа ад̇т̇ад̇о д̇ат̇зва вад̣̇амаанаани вияа убабийл̣анзна ниб̣бхог̇ад̇ам̣ аабаад̣̇зд̇ваа бадиж̇аг̇г̇анам̣ алабханд̇асса рог̇уббаад̣̇анаад̣̇ийхи ваа, вихзтагаад̣̇ийхи гад̇асса гусаласса анул̣аарад̇ааяа ваа, аад̣̇ид̇ова бадисанд̇хинияааманзна ваа, вуд̇д̇анаязнзва буб̣б̣аабаражзд̇анаавасзна ваа б̣ахвааб̣аад̇хад̇аад̣̇ийни гаронд̇и, абаан̣аад̇ибаад̇о вияа жа авихзтанаад̣̇ийниби аббааб̣аад̇хад̇аад̣̇ийнийд̇и.
Viheṭhanakammādīnipi hi pavatte āgantvā atthato tatheva vadamānāni viya upapīḷanena nibbhogataṃ āpādetvā paṭijagganaṃ alabhantassa roguppādanādīhi vā, viheṭhakādīhi katassa kusalassa anuḷāratāya vā, āditova paṭisandhiniyāmanena vā, vuttanayeneva pubbāparacetanāvasena vā bahvābādhatādīni karonti, apāṇātipāto viya ca aviheṭhanādīnipi appābādhatādīnīti.
293. зд̇т̇а бана иссааманагод̇и иссаасамбаяуд̇д̇ажид̇д̇о. убад̣̇уссад̇ийд̇и иссаавасзнзва убаггосанд̇о д̣̇уссад̇и. иссам̣ б̣анд̇хад̇ийд̇и яавагалаабам̣ б̣анд̇ханд̇о вияа яат̇аа на нассад̇и звам̣ б̣анд̇хид̇ваа вияа табзд̇и. аббзсагкод̇и аббабаривааро, рад̇д̇им̣ кид̇д̇о вияа саро на бан̃н̃ааяад̇и, ужчидтахад̇т̇о нисийд̣̇ид̇ваа уд̣̇агад̣̇ааяагамби на лабхад̇и.
293. Ettha pana issāmanakoti issāsampayuttacitto. Upadussatīti issāvaseneva upakkosanto dussati. Issaṃ bandhatīti yavakalāpaṃ bandhanto viya yathā na nassati evaṃ bandhitvā viya ṭhapeti. Appesakkhoti appaparivāro, rattiṃ khitto viya saro na paññāyati, ucchiṭṭhahattho nisīditvā udakadāyakampi na labhati.
294. на д̣̇аад̇аа ход̇ийд̇и мажчарияавасзна на д̣̇аад̇аа ход̇и. д̇зна гаммзнаад̇и д̇зна мажчарияагаммзна.
294.Nadātā hotīti macchariyavasena na dātā hoti. Tena kammenāti tena macchariyakammena.
295. абхиваад̣̇зд̇аб̣б̣анд̇и абхиваад̣̇анаарахам̣ б̣уд̣̇д̇хам̣ ваа бажжзгаб̣уд̣̇д̇хам̣ ваа арияасаавагам̣ ваа. бажжудтаад̇аб̣б̣аад̣̇ийсуби зсзва наяо. имасмим̣ бана бан̃хависсаж̇ж̇анз убабийл̣агаубад̇т̇амбхагагаммаани на г̇ахзд̇аб̣б̣аани. на хи бавад̇д̇з нийжагулинам̣ ваа ужжаагулинам̣ ваа саггаа гаад̇ум̣, бадисанд̇химзва бана нияаамзд̇ваа нийжагулияам̣ гаммам̣ нийжагулз ниб̣б̣ад̇д̇зд̇и, ужжаагулияам̣ гаммам̣ ужжаагулз.
295.Abhivādetabbanti abhivādanārahaṃ buddhaṃ vā paccekabuddhaṃ vā ariyasāvakaṃ vā. Paccuṭṭhātabbādīsupi eseva nayo. Imasmiṃ pana pañhavissajjane upapīḷakaupatthambhakakammāni na gahetabbāni. Na hi pavatte nīcakulinaṃ vā uccākulinaṃ vā sakkā kātuṃ, paṭisandhimeva pana niyāmetvā nīcakuliyaṃ kammaṃ nīcakule nibbatteti, uccākuliyaṃ kammaṃ uccākule.
296. на барибужчид̇аа ход̇ийд̇и зд̇т̇а бана абарибужчанзна нираяз на ниб̣б̣ад̇д̇ад̇и. абарибужчаго бана ‘‘ид̣̇ам̣ гаад̇аб̣б̣ам̣, ид̣̇ам̣ на гаад̇аб̣б̣а’’нд̇и на ж̇аанаад̇и, аж̇аананд̇о гаад̇аб̣б̣ам̣ на гарод̇и, агаад̇аб̣б̣ам̣ гарод̇и. д̇зна нираяз ниб̣б̣ад̇д̇ад̇и, ид̇аро саг̇г̇з. ид̇и ко, маан̣ава…бз… яад̣̇ид̣̇ам̣ хийнаббан̣ийд̇ад̇ааяаад̇и сад̇т̇аа д̣̇зсанам̣ яат̇аанусанд̇хим̣ баабзси. сзсам̣ саб̣б̣ад̇т̇а уд̇д̇аанамзваад̇и.
296.Na paripucchitā hotīti ettha pana aparipucchanena niraye na nibbattati. Aparipucchako pana ‘‘idaṃ kātabbaṃ, idaṃ na kātabba’’nti na jānāti, ajānanto kātabbaṃ na karoti, akātabbaṃ karoti. Tena niraye nibbattati, itaro sagge. Iti kho, māṇava…pe… yadidaṃ hīnappaṇītatāyāti satthā desanaṃ yathānusandhiṃ pāpesi. Sesaṃ sabbattha uttānamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
жуул̣агаммавибхан̇г̇асуд̇д̇аван̣н̣анаа нидтид̇аа.
Cūḷakammavibhaṅgasuttavaṇṇanā niṭṭhitā.
субхасуд̇д̇анд̇иби вужжад̇и.
Subhasuttantipi vuccati.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 5. жуул̣агаммавибхан̇г̇асуд̇д̇ам̣ • 5. Cūḷakammavibhaṅgasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 5. жуул̣агаммавибхан̇г̇асуд̇д̇аван̣н̣анаа • 5. Cūḷakammavibhaṅgasuttavaṇṇanā
