| Library / Tipiṭaka / तिपिटक • Tipiṭaka / जातकपाळि • Jātakapāḷi |
१२. द्वादसकनिपातो
12. Dvādasakanipāto
४६४. चूळकुणालजातकं (१)
464. Cūḷakuṇālajātakaṃ (1)
१.
1.
नादेवसत्तो पुरिसो, थीनं सद्धातुमरहति॥
Nādevasatto puriso, thīnaṃ saddhātumarahati.
२.
2.
न ता पजानन्ति कतं न किच्चं, न मातरं पितरं भातरं वा।
Na tā pajānanti kataṃ na kiccaṃ, na mātaraṃ pitaraṃ bhātaraṃ vā;
अनरिया समतिक्कन्तधम्मा, सस्सेव चित्तस्स वसं वजन्ति॥
Anariyā samatikkantadhammā, sasseva cittassa vasaṃ vajanti.
३.
3.
आवासु किच्चेसु च नं जहन्ति, तस्माहमित्थीनं न विस्ससामि॥
Āvāsu kiccesu ca naṃ jahanti, tasmāhamitthīnaṃ na vissasāmi.
४.
4.
थीनञ्हि चित्तं यथा वानरस्स, कन्नप्पकन्नं यथा रुक्खछाया।
Thīnañhi cittaṃ yathā vānarassa, kannappakannaṃ yathā rukkhachāyā;
चलाचलं हदयमित्थियानं, चक्कस्स नेमि विय परिवत्तति॥
Calācalaṃ hadayamitthiyānaṃ, cakkassa nemi viya parivattati.
५.
5.
यदा ता पस्सन्ति समेक्खमाना, आदेय्यरूपं पुरिसस्स वित्तं।
Yadā tā passanti samekkhamānā, ādeyyarūpaṃ purisassa vittaṃ;
सण्हाहि वाचाहि नयन्ति मेनं, कम्बोजका जलजेनेव अस्सं॥
Saṇhāhi vācāhi nayanti menaṃ, kambojakā jalajeneva assaṃ.
६.
6.
यदा न पस्सन्ति समेक्खमाना, आदेय्यरूपं पुरिसस्स वित्तं।
Yadā na passanti samekkhamānā, ādeyyarūpaṃ purisassa vittaṃ;
समन्ततो नं परिवज्जयन्ति, तिण्णो नदीपारगतोव कुल्लं॥
Samantato naṃ parivajjayanti, tiṇṇo nadīpāragatova kullaṃ.
७.
7.
सिलेसूपमा सिखिरिव सब्बभक्खा, तिक्खमाया नदीरिव सीघसोता।
Silesūpamā sikhiriva sabbabhakkhā, tikkhamāyā nadīriva sīghasotā;
सेवन्ति हेता पियमप्पियञ्च, नावा यथा ओरकूलं परञ्च॥
Sevanti hetā piyamappiyañca, nāvā yathā orakūlaṃ parañca.
८.
8.
न ता एकस्स न द्विन्नं, आपणोव पसारितो।
Na tā ekassa na dvinnaṃ, āpaṇova pasārito;
९.
9.
यथा नदी च पन्थो च, पानागारं सभा पपा।
Yathā nadī ca pantho ca, pānāgāraṃ sabhā papā;
१०.
10.
घतासनसमा एता, कण्हसप्पसिरूपमा।
Ghatāsanasamā etā, kaṇhasappasirūpamā;
गावो बहितिणस्सेव, ओमसन्ति वरं वरं॥
Gāvo bahitiṇasseva, omasanti varaṃ varaṃ.
११.
11.
घतासनं कुञ्जरं कण्हसप्पं, मुद्धाभिसित्तं पमदा च सब्बा।
Ghatāsanaṃ kuñjaraṃ kaṇhasappaṃ, muddhābhisittaṃ pamadā ca sabbā;
१२.
12.
नच्चन्तवण्णा न बहूनं कन्ता, न दक्खिणा पमदा सेवितब्बा।
Naccantavaṇṇā na bahūnaṃ kantā, na dakkhiṇā pamadā sevitabbā;
न परस्स भरिया न धनस्स हेतु, एतित्थियो पञ्च न सेवितब्बाति॥
Na parassa bhariyā na dhanassa hetu, etitthiyo pañca na sevitabbāti.
चूळकुणालजातकं पठमं।
Cūḷakuṇālajātakaṃ paṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४६४] १. चूळकुणालजातकवण्णना • [464] 1. Cūḷakuṇālajātakavaṇṇanā
