| Library / Tipiṭaka / တိပိဋက • Tipiṭaka / မဇ္ဈိမနိကာယ • Majjhimanikāya |
၃. စူဠမာလုက္ယသုတ္တံ
3. Cūḷamālukyasuttaṃ
၁၂၂. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ အထ ခော အာယသ္မတော မာလုက္ယပုတ္တသ္သ 1 ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ‘‘ယာနိမာနိ ဒိဋ္ဌိဂတာနိ ဘဂဝတာ အဗ္ယာကတာနိ ဌပိတာနိ ပဋိက္ခိတ္တာနိ – ‘သသ္သတော လောကော’တိပိ, ‘အသသ္သတော လောကော’တိပိ, ‘အန္တဝာ လောကော’တိပိ, ‘အနန္တဝာ လောကော’တိပိ, ‘တံ ဇီဝံ တံ သရီရ’န္တိပိ, ‘အညံ ဇီဝံ အညံ သရီရ’န္တိပိ, ‘ဟောတိ တထာဂတော ပရံ မရဏာ’တိပိ, ‘န ဟောတိ တထာဂတော ပရံ မရဏာ’တိပိ, ‘ဟောတိ စ န စ ဟောတိ တထာဂတော ပရံ မရဏာ’တိပိ, ‘နေဝ ဟောတိ န န ဟောတိ တထာဂတော ပရံ မရဏာ’တိပိ – တာနိ မေ ဘဂဝာ န ဗ္ယာကရောတိ။ ယာနိ မေ ဘဂဝာ န ဗ္ယာကရောတိ တံ မေ န ရုစ္စတိ, တံ မေ နက္ခမတိ။ သောဟံ ဘဂဝန္တံ ဥပသင္ကမိတ္ဝာ ဧတမတ္ထံ ပုစ္ဆိသ္သာမိ။ သစေ မေ ဘဂဝာ ဗ္ယာကရိသ္သတိ – ‘သသ္သတော လောကော’တိ ဝာ ‘အသသ္သတော လောကော’တိ ဝာ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ – ဧဝာဟံ ဘဂဝတိ ဗ္ရဟ္မစရိယံ စရိသ္သာမိ; နော စေ မေ ဘဂဝာ ဗ္ယာကရိသ္သတိ – ‘သသ္သတော လောကော’တိ ဝာ ‘အသသ္သတော လောကော’တိ ဝာ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ – ဧဝာဟံ သိက္ခံ ပစ္စက္ခာယ ဟီနာယာဝတ္တိသ္သာမီ’’တိ။
122. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmato mālukyaputtassa 2 rahogatassa paṭisallīnassa evaṃ cetaso parivitakko udapādi – ‘‘yānimāni diṭṭhigatāni bhagavatā abyākatāni ṭhapitāni paṭikkhittāni – ‘sassato loko’tipi, ‘asassato loko’tipi, ‘antavā loko’tipi, ‘anantavā loko’tipi, ‘taṃ jīvaṃ taṃ sarīra’ntipi, ‘aññaṃ jīvaṃ aññaṃ sarīra’ntipi, ‘hoti tathāgato paraṃ maraṇā’tipi, ‘na hoti tathāgato paraṃ maraṇā’tipi, ‘hoti ca na ca hoti tathāgato paraṃ maraṇā’tipi, ‘neva hoti na na hoti tathāgato paraṃ maraṇā’tipi – tāni me bhagavā na byākaroti. Yāni me bhagavā na byākaroti taṃ me na ruccati, taṃ me nakkhamati. Sohaṃ bhagavantaṃ upasaṅkamitvā etamatthaṃ pucchissāmi. Sace me bhagavā byākarissati – ‘sassato loko’ti vā ‘asassato loko’ti vā…pe… ‘neva hoti na na hoti tathāgato paraṃ maraṇā’ti vā – evāhaṃ bhagavati brahmacariyaṃ carissāmi; no ce me bhagavā byākarissati – ‘sassato loko’ti vā ‘asassato loko’ti vā…pe… ‘neva hoti na na hoti tathāgato paraṃ maraṇā’ti vā – evāhaṃ sikkhaṃ paccakkhāya hīnāyāvattissāmī’’ti.
၁၂၃. အထ ခော အာယသ္မာ မာလုက္ယပုတ္တော သာယန္ဟသမယံ ပဋိသလ္လာနာ ဝုဋ္ဌိတော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ မာလုက္ယပုတ္တော ဘဂဝန္တံ ဧတဒဝောစ –
123. Atha kho āyasmā mālukyaputto sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā mālukyaputto bhagavantaṃ etadavoca –
၁၂၄. ‘‘ဣဓ မယ္ဟံ, ဘန္တေ, ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ယာနိမာနိ ဒိဋ္ဌိဂတာနိ ဘဂဝတာ အဗ္ယာကတာနိ ဌပိတာနိ ပဋိက္ခိတ္တာနိ – ‘သသ္သတော လောကော’တိပိ, ‘အသသ္သတော လောကော’တိပိ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာ’တိပိ – တာနိ မေ ဘဂဝာ န ဗ္ယာကရောတိ။ ယာနိ မေ ဘဂဝာ န ဗ္ယာကရောတိ တံ မေ န ရုစ္စတိ, တံ မေ နက္ခမတိ။ သောဟံ ဘဂဝန္တံ ဥပသင္ကမိတ္ဝာ ဧတမတ္ထံ ပုစ္ဆိသ္သာမိ။ သစေ မေ ဘဂဝာ ဗ္ယာကရိသ္သတိ – ‘သသ္သတော လောကော’တိ ဝာ, ‘အသသ္သတော လောကော’တိ ဝာ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ – ဧဝာဟံ ဘဂဝတိ, ဗ္ရဟ္မစရိယံ စရိသ္သာမိ။ နော စေ မေ ဘဂဝာ ဗ္ယာကရိသ္သတိ – ‘သသ္သတော လောကော’တိ ဝာ, ‘အသသ္သတော လောကော’တိ ဝာ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ – ဧဝာဟံ သိက္ခံ ပစ္စက္ခာယ ဟီနာယာဝတ္တိသ္သာမီတိ။ သစေ ဘဂဝာ ဇာနာတိ – ‘သသ္သတော လောကော’တိ, ‘သသ္သတော လောကော’တိ မေ ဘဂဝာ ဗ္ယာကရောတု; သစေ ဘဂဝာ ဇာနာတိ – ‘အသသ္သတော လောကော’တိ, ‘အသသ္သတော လောကော’တိ မေ ဘဂဝာ ဗ္ယာကရောတု။ နော စေ ဘဂဝာ ဇာနာတိ – ‘သသ္သတော လောကော’တိ ဝာ, ‘အသသ္သတော လောကော’တိ ဝာ, အဇာနတော ခော ပန အပသ္သတော ဧတဒေဝ ဥဇုကံ ဟောတိ ယဒိဒံ – ‘န ဇာနာမိ, န ပသ္သာမီ’တိ။ သစေ ဘဂဝာ ဇာနာတိ – ‘အန္တဝာ လောကော’တိ, ‘အနန္တဝာ လောကော’တိ မေ ဘဂဝာ ဗ္ယာကရောတု; သစေ ဘဂဝာ ဇာနာတိ – ‘အနန္တဝာ လောကော’တိ, ‘အနန္တဝာ လောကော’တိ မေ ဘဂဝာ ဗ္ယာကရောတု။ နော စေ ဘဂဝာ ဇာနာတိ – ‘အန္တဝာ လောကော’တိ ဝာ, ‘အနန္တဝာ လောကော’တိ ဝာ, အဇာနတော ခော ပန အပသ္သတော ဧတဒေဝ ဥဇုကံ ဟောတိ ယဒိဒံ – ‘န ဇာနာမိ, န ပသ္သာမီ’တိ။ သစေ ဘဂဝာ ဇာနာတိ – ‘တံ ဇီဝံ တံ သရီရ’န္တိ, ‘တံ ဇီဝံ တံ သရီရ’န္တိ မေ ဘဂဝာ ဗ္ယာကရောတု; သစေ ဘဂဝာ ဇာနာတိ – ‘အညံ ဇီဝံ အညံ သရီရ’န္တိ, ‘အညံ ဇီဝံ အညံ သရီရ’န္တိ မေ ဘဂဝာ ဗ္ယာကရောတု။ နော စေ ဘဂဝာ ဇာနာတိ – ‘တံ ဇီဝံ တံ သရီရ’န္တိ ဝာ, ‘အညံ ဇီဝံ အညံ သရီရ’န္တိ ဝာ, အဇာနတော ခော ပန အပသ္သတော ဧတဒေဝ ဥဇုကံ ဟောတိ ယဒိဒံ – ‘န ဇာနာမိ, န ပသ္သာမီ’တိ။ သစေ ဘဂဝာ ဇာနာတိ – ‘ဟောတိ တထာဂတော ပရံ မရဏာ’တိ, ‘ဟောတိ တထာဂတော ပရံ မရဏာ’တိ မေ ဘဂဝာ ဗ္ယာကရောတု; သစေ ဘဂဝာ ဇာနာတိ – ‘န ဟောတိ တထာဂတော ပရံ မရဏာ’တိ, ‘န ဟောတိ တထာဂတော ပရံ မရဏာ’တိ မေ ဘဂဝာ ဗ္ယာကရောတု။ နော စေ ဘဂဝာ ဇာနာတိ – ‘ဟောတိ တထာဂတော ပရံ မရဏာ’တိ ဝာ, ‘န ဟောတိ တထာဂတော ပရံ မရဏာ’တိ ဝာ, အဇာနတော ခော ပန အပသ္သတော ဧတဒေဝ ဥဇုကံ ဟောတိ ယဒိဒံ – ‘န ဇာနာမိ န ပသ္သာမီ’တိ။ သစေ ဘဂဝာ ဇာနာတိ – ‘ဟောတိ စ န စ ဟောတိ တထာဂတော ပရံ မရဏာ’တိ, ‘ဟောတိ စ န စ ဟောတိ တထာဂတော ပရံ မရဏာ’တိ မေ ဘဂဝာ ဗ္ယာကရောတု; သစေ ဘဂဝာ ဇာနာတိ – ‘နေဝ ဟောတိ န န ဟောတိ တထာဂတော ပရံ မရဏာ’တိ, ‘နေဝ ဟောတိ န န ဟောတိ တထာဂတော ပရံ မရဏာ’တိ မေ ဘဂဝာ ဗ္ယာကရောတု။ နော စေ ဘဂဝာ ဇာနာတိ – ‘ဟောတိ စ န စ ဟောတိ တထာဂတော ပရံ မရဏာ’တိ ဝာ, ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ, အဇာနတော ခော ပန အပသ္သတော ဧတဒေဝ ဥဇုကံ ဟောတိ ယဒိဒံ – ‘န ဇာနာမိ, န ပသ္သာမီ’’’တိ။
124. ‘‘Idha mayhaṃ, bhante, rahogatassa paṭisallīnassa evaṃ cetaso parivitakko udapādi – yānimāni diṭṭhigatāni bhagavatā abyākatāni ṭhapitāni paṭikkhittāni – ‘sassato loko’tipi, ‘asassato loko’tipi…pe… ‘neva hoti na na hoti tathāgato paraṃ maraṇā’tipi – tāni me bhagavā na byākaroti. Yāni me bhagavā na byākaroti taṃ me na ruccati, taṃ me nakkhamati. Sohaṃ bhagavantaṃ upasaṅkamitvā etamatthaṃ pucchissāmi. Sace me bhagavā byākarissati – ‘sassato loko’ti vā, ‘asassato loko’ti vā…pe… ‘neva hoti na na hoti tathāgato paraṃ maraṇā’ti vā – evāhaṃ bhagavati, brahmacariyaṃ carissāmi. No ce me bhagavā byākarissati – ‘sassato loko’ti vā, ‘asassato loko’ti vā…pe… ‘neva hoti na na hoti tathāgato paraṃ maraṇā’ti vā – evāhaṃ sikkhaṃ paccakkhāya hīnāyāvattissāmīti. Sace bhagavā jānāti – ‘sassato loko’ti, ‘sassato loko’ti me bhagavā byākarotu; sace bhagavā jānāti – ‘asassato loko’ti, ‘asassato loko’ti me bhagavā byākarotu. No ce bhagavā jānāti – ‘sassato loko’ti vā, ‘asassato loko’ti vā, ajānato kho pana apassato etadeva ujukaṃ hoti yadidaṃ – ‘na jānāmi, na passāmī’ti. Sace bhagavā jānāti – ‘antavā loko’ti, ‘anantavā loko’ti me bhagavā byākarotu; sace bhagavā jānāti – ‘anantavā loko’ti, ‘anantavā loko’ti me bhagavā byākarotu. No ce bhagavā jānāti – ‘antavā loko’ti vā, ‘anantavā loko’ti vā, ajānato kho pana apassato etadeva ujukaṃ hoti yadidaṃ – ‘na jānāmi, na passāmī’ti. Sace bhagavā jānāti – ‘taṃ jīvaṃ taṃ sarīra’nti, ‘taṃ jīvaṃ taṃ sarīra’nti me bhagavā byākarotu; sace bhagavā jānāti – ‘aññaṃ jīvaṃ aññaṃ sarīra’nti, ‘aññaṃ jīvaṃ aññaṃ sarīra’nti me bhagavā byākarotu. No ce bhagavā jānāti – ‘taṃ jīvaṃ taṃ sarīra’nti vā, ‘aññaṃ jīvaṃ aññaṃ sarīra’nti vā, ajānato kho pana apassato etadeva ujukaṃ hoti yadidaṃ – ‘na jānāmi, na passāmī’ti. Sace bhagavā jānāti – ‘hoti tathāgato paraṃ maraṇā’ti, ‘hoti tathāgato paraṃ maraṇā’ti me bhagavā byākarotu; sace bhagavā jānāti – ‘na hoti tathāgato paraṃ maraṇā’ti, ‘na hoti tathāgato paraṃ maraṇā’ti me bhagavā byākarotu. No ce bhagavā jānāti – ‘hoti tathāgato paraṃ maraṇā’ti vā, ‘na hoti tathāgato paraṃ maraṇā’ti vā, ajānato kho pana apassato etadeva ujukaṃ hoti yadidaṃ – ‘na jānāmi na passāmī’ti. Sace bhagavā jānāti – ‘hoti ca na ca hoti tathāgato paraṃ maraṇā’ti, ‘hoti ca na ca hoti tathāgato paraṃ maraṇā’ti me bhagavā byākarotu; sace bhagavā jānāti – ‘neva hoti na na hoti tathāgato paraṃ maraṇā’ti, ‘neva hoti na na hoti tathāgato paraṃ maraṇā’ti me bhagavā byākarotu. No ce bhagavā jānāti – ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā, ajānato kho pana apassato etadeva ujukaṃ hoti yadidaṃ – ‘na jānāmi, na passāmī’’’ti.
၁၂၅. ‘‘ကိံ နု 3 တာဟံ, မာလုက္ယပုတ္တ, ဧဝံ အဝစံ – ‘ဧဟိ တ္ဝံ, မာလုက္ယပုတ္တ, မယိ ဗ္ရဟ္မစရိယံ စရ, အဟံ တေ ဗ္ယာကရိသ္သာမိ – ‘သသ္သတော လောကော’တိ ဝာ, ‘အသသ္သတော လောကော’တိ ဝာ, ‘အန္တဝာ လောကော’တိ ဝာ, ‘အနန္တဝာ လောကော’တိ ဝာ, ‘တံ ဇီဝံ တံ သရီရ’န္တိ ဝာ, ‘အညံ ဇီဝံ အညံ သရီရ’န္တိ ဝာ, ‘ဟောတိ တထာဂတော ပရံ မရဏာ’တိ ဝာ, ‘န ဟောတိ တထာဂတော ပရံ မရဏာ’တိ ဝာ, ‘ဟောတိ စ န စ ဟောတိ တထာဂတော ပရံ မရဏာ’တိ ဝာ, ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ’’တိ? ‘‘နော ဟေတံ, ဘန္တေ’’။ ‘‘တ္ဝံ ဝာ ပန မံ ဧဝံ အဝစ – အဟံ, ဘန္တေ, ဘဂဝတိ ဗ္ရဟ္မစရိယံ စရိသ္သာမိ , ဘဂဝာ မေ ဗ္ယာကရိသ္သတိ – ‘သသ္သတော လောကော’တိ ဝာ, ‘အသသ္သတော လောကော’တိ ဝာ, ‘အန္တဝာ လောကော’တိ ဝာ, ‘အနန္တဝာ လောကော’တိ ဝာ, ‘တံ ဇီဝံ တံ သရီရ’န္တိ ဝာ, ‘အညံ ဇီဝံ အညံ သရီရ’န္တိ ဝာ, ‘ဟောတိ တထာဂတော ပရံ မရဏာ’တိ ဝာ, ‘န ဟောတိ တထာဂတော ပရံ မရဏာ’တိ ဝာ, ‘ဟောတိ စ န စ ဟောတိ တထာဂတော ပရံ မရဏာ’တိ ဝာ, ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ’’တိ? ‘‘နော ဟေတံ, ဘန္တေ’’။ ‘‘ဣတိ ကိရ, မာလုက္ယပုတ္တ, နေဝာဟံ တံ ဝဒာမိ – ဧဟိ တ္ဝံ, မာလုက္ယပုတ္တ, မယိ ဗ္ရဟ္မစရိယံ စရ, အဟံ တေ ဗ္ယာကရိသ္သာမိ – ‘သသ္သတော လောကော’တိ ဝာ, ‘အသသ္သတော လောကော’တိ ဝာ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာတိ ဝာ’တိ; နပိ ကိရ မံ တ္ဝံ ဝဒေသိ – အဟံ, ဘန္တေ, ဘဂဝတိ ဗ္ရဟ္မစရိယံ စရိသ္သာမိ, ဘဂဝာ မေ ဗ္ယာကရိသ္သတိ – ‘သသ္သတော လောကော’တိ ဝာ ‘အသသ္သတော လောကော’တိ ဝာ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ’’တိ။ ဧဝံ သန္တေ, မောဃပုရိသ, ကော သန္တော ကံ ပစ္စာစိက္ခသိ?
125. ‘‘Kiṃ nu 4 tāhaṃ, mālukyaputta, evaṃ avacaṃ – ‘ehi tvaṃ, mālukyaputta, mayi brahmacariyaṃ cara, ahaṃ te byākarissāmi – ‘sassato loko’ti vā, ‘asassato loko’ti vā, ‘antavā loko’ti vā, ‘anantavā loko’ti vā, ‘taṃ jīvaṃ taṃ sarīra’nti vā, ‘aññaṃ jīvaṃ aññaṃ sarīra’nti vā, ‘hoti tathāgato paraṃ maraṇā’ti vā, ‘na hoti tathāgato paraṃ maraṇā’ti vā, ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā’’ti? ‘‘No hetaṃ, bhante’’. ‘‘Tvaṃ vā pana maṃ evaṃ avaca – ahaṃ, bhante, bhagavati brahmacariyaṃ carissāmi , bhagavā me byākarissati – ‘sassato loko’ti vā, ‘asassato loko’ti vā, ‘antavā loko’ti vā, ‘anantavā loko’ti vā, ‘taṃ jīvaṃ taṃ sarīra’nti vā, ‘aññaṃ jīvaṃ aññaṃ sarīra’nti vā, ‘hoti tathāgato paraṃ maraṇā’ti vā, ‘na hoti tathāgato paraṃ maraṇā’ti vā, ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā’’ti? ‘‘No hetaṃ, bhante’’. ‘‘Iti kira, mālukyaputta, nevāhaṃ taṃ vadāmi – ehi tvaṃ, mālukyaputta, mayi brahmacariyaṃ cara, ahaṃ te byākarissāmi – ‘sassato loko’ti vā, ‘asassato loko’ti vā…pe… ‘neva hoti na na hoti tathāgato paraṃ maraṇāti vā’ti; napi kira maṃ tvaṃ vadesi – ahaṃ, bhante, bhagavati brahmacariyaṃ carissāmi, bhagavā me byākarissati – ‘sassato loko’ti vā ‘asassato loko’ti vā…pe… ‘neva hoti na na hoti tathāgato paraṃ maraṇā’ti vā’’ti. Evaṃ sante, moghapurisa, ko santo kaṃ paccācikkhasi?
၁၂၆. ‘‘ယော ခော, မာလုက္ယပုတ္တ, ဧဝံ ဝဒေယ္ယ – ‘န တာဝာဟံ ဘဂဝတိ ဗ္ရဟ္မစရိယံ စရိသ္သာမိ ယာဝ မေ ဘဂဝာ န ဗ္ယာကရိသ္သတိ – ‘‘သသ္သတော လောကော’’တိ ဝာ, ‘‘အသသ္သတော လောကော’’တိ ဝာ။ပေ.။ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ ဝာတိ, အဗ္ယာကတမေဝ တံ, မာလုက္ယပုတ္တ, တထာဂတေန အသ္သ, အထ သော ပုဂ္ဂလော ကာလံ ကရေယ္ယ။ သေယ္ယထာပိ, မာလုက္ယပုတ္တ, ပုရိသော သလ္လေန ဝိဒ္ဓော အသ္သ သဝိသေန ဂာဠ္ဟပလေပနေန။ တသ္သ မိတ္တာမစ္စာ ဉာတိသာလောဟိတာ ဘိသက္ကံ သလ္လကတ္တံ ဥပဋ္ဌပေယ္ယုံ။ သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ပုရိသံ ဇာနာမိ ယေနမ္ဟိ ဝိဒ္ဓော, ခတ္တိယော ဝာ ဗ္ရာဟ္မဏော ဝာ ဝေသ္သော ဝာ သုဒ္ဒော ဝာ’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ပုရိသံ ဇာနာမိ ယေနမ္ဟိ ဝိဒ္ဓော, ဧဝံနာမော ဧဝံဂောတ္တော ဣတိ ဝာ’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ပုရိသံ ဇာနာမိ ယေနမ္ဟိ ဝိဒ္ဓော, ဒီဃော ဝာ ရသ္သော ဝာ မဇ္ဈိမော ဝာ’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ပုရိသံ ဇာနာမိ ယေနမ္ဟိ ဝိဒ္ဓော, ကာဠော ဝာ သာမော ဝာ မင္ဂုရစ္ဆဝီ ဝာ’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ပုရိသံ ဇာနာမိ ယေနမ္ဟိ ဝိဒ္ဓော, အမုကသ္မိံ ဂာမေ ဝာ နိဂမေ ဝာ နဂရေ ဝာ’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ဓနုံ ဇာနာမိ ယေနမ္ဟိ ဝိဒ္ဓော, ယဒိ ဝာ စာပော ယဒိ ဝာ ကောဒဏ္ဍော’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ဇိယံ ဇာနာမိ ယာယမ္ဟိ ဝိဒ္ဓော , ယဒိ ဝာ အက္ကသ္သ ယဒိ ဝာ သဏ္ဟသ္သ 5 ယဒိ ဝာ န္ဟာရုသ္သ ယဒိ ဝာ မရုဝာယ ယဒိ ဝာ ခီရပဏ္ဏိနော’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ကဏ္ဍံ ဇာနာမိ ယေနမ္ဟိ ဝိဒ္ဓော, ယဒိ ဝာ ဂစ္ဆံ ယဒိ ဝာ ရောပိမ’န္တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ကဏ္ဍံ ဇာနာမိ ယေနမ္ဟိ ဝိဒ္ဓော, ယသ္သ ပတ္တေဟိ ဝာဇိတံ 6 ယဒိ ဝာ ဂိဇ္ဈသ္သ ယဒိ ဝာ ကင္ကသ္သ ယဒိ ဝာ ကုလလသ္သ ယဒိ ဝာ မောရသ္သ ယဒိ ဝာ သိထိလဟနုနော’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ ကဏ္ဍံ ဇာနာမိ ယေနမ္ဟိ ဝိဒ္ဓော, ယသ္သ န္ဟာရုနာ ပရိက္ခိတ္တံ ယဒိ ဝာ ဂဝသ္သ ယဒိ ဝာ မဟိံသသ္သ ယဒိ ဝာ ဘေရဝသ္သ 7 ယဒိ ဝာ သေမ္ဟာရသ္သာ’တိ; သော ဧဝံ ဝဒေယ္ယ – ‘န တာဝာဟံ ဣမံ သလ္လံ အာဟရိသ္သာမိ ယာဝ န တံ သလ္လံ ဇာနာမိ ယေနမ္ဟိ ဝိဒ္ဓော, ယဒိ ဝာ သလ္လံ ယဒိ ဝာ ခုရပ္ပံ ယဒိ ဝာ ဝေကဏ္ဍံ ယဒိ ဝာ နာရာစံ ယဒိ ဝာ ဝစ္ဆဒန္တံ ယဒိ ဝာ ကရဝီရပတ္တ’န္တိ – အညာတမေဝ တံ, မာလုက္ယပုတ္တ, တေန ပုရိသေန အသ္သ, အထ သော ပုရိသော ကာလံ ကရေယ္ယ။ ဧဝမေဝ ခော, မာလုက္ယပုတ္တ, ယော ဧဝံ ဝဒေယ္ယ – ‘န တာဝာဟံ ဘဂဝတိ ဗ္ရဟ္မစရိယံ စရိသ္သာမိ ယာဝ မေ ဘဂဝာ န ဗ္ယာကရိသ္သတိ – ‘‘သသ္သတော လောကော’’တိ ဝာ ‘‘အသသ္သတော လောကော’’တိ ဝာ။ပေ.။ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ ဝာတိ – အဗ္ယာကတမေဝ တံ, မာလုက္ယပုတ္တ, တထာဂတေန အသ္သ, အထ သော ပုဂ္ဂလော ကာလင္ကရေယ္ယ။
126. ‘‘Yo kho, mālukyaputta, evaṃ vadeyya – ‘na tāvāhaṃ bhagavati brahmacariyaṃ carissāmi yāva me bhagavā na byākarissati – ‘‘sassato loko’’ti vā, ‘‘asassato loko’’ti vā…pe… ‘‘neva hoti na na hoti tathāgato paraṃ maraṇā’’ti vāti, abyākatameva taṃ, mālukyaputta, tathāgatena assa, atha so puggalo kālaṃ kareyya. Seyyathāpi, mālukyaputta, puriso sallena viddho assa savisena gāḷhapalepanena. Tassa mittāmaccā ñātisālohitā bhisakkaṃ sallakattaṃ upaṭṭhapeyyuṃ. So evaṃ vadeyya – ‘na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho, khattiyo vā brāhmaṇo vā vesso vā suddo vā’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho, evaṃnāmo evaṃgotto iti vā’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho, dīgho vā rasso vā majjhimo vā’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho, kāḷo vā sāmo vā maṅguracchavī vā’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ purisaṃ jānāmi yenamhi viddho, amukasmiṃ gāme vā nigame vā nagare vā’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ dhanuṃ jānāmi yenamhi viddho, yadi vā cāpo yadi vā kodaṇḍo’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ jiyaṃ jānāmi yāyamhi viddho , yadi vā akkassa yadi vā saṇhassa 8 yadi vā nhārussa yadi vā maruvāya yadi vā khīrapaṇṇino’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ kaṇḍaṃ jānāmi yenamhi viddho, yadi vā gacchaṃ yadi vā ropima’nti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ kaṇḍaṃ jānāmi yenamhi viddho, yassa pattehi vājitaṃ 9 yadi vā gijjhassa yadi vā kaṅkassa yadi vā kulalassa yadi vā morassa yadi vā sithilahanuno’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ kaṇḍaṃ jānāmi yenamhi viddho, yassa nhārunā parikkhittaṃ yadi vā gavassa yadi vā mahiṃsassa yadi vā bheravassa 10 yadi vā semhārassā’ti; so evaṃ vadeyya – ‘na tāvāhaṃ imaṃ sallaṃ āharissāmi yāva na taṃ sallaṃ jānāmi yenamhi viddho, yadi vā sallaṃ yadi vā khurappaṃ yadi vā vekaṇḍaṃ yadi vā nārācaṃ yadi vā vacchadantaṃ yadi vā karavīrapatta’nti – aññātameva taṃ, mālukyaputta, tena purisena assa, atha so puriso kālaṃ kareyya. Evameva kho, mālukyaputta, yo evaṃ vadeyya – ‘na tāvāhaṃ bhagavati brahmacariyaṃ carissāmi yāva me bhagavā na byākarissati – ‘‘sassato loko’’ti vā ‘‘asassato loko’’ti vā…pe… ‘‘neva hoti na na hoti tathāgato paraṃ maraṇā’’ti vāti – abyākatameva taṃ, mālukyaputta, tathāgatena assa, atha so puggalo kālaṅkareyya.
၁၂၇. ‘‘‘သသ္သတော လောကော’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ , ဧဝံ ‘နော အသသ္သတော လောကော’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝမ္ပိ ‘နော သသ္သတော လောကော’တိ ဝာ, မာလုက္ယပုတ္တ, ဒိဋ္ဌိယာ သတိ, ‘အသသ္သတော လောကော’တိ ဝာ ဒိဋ္ဌိယာ သတိ အတ္ထေဝ ဇာတိ, အတ္ထိ ဇရာ, အတ္ထိ မရဏံ, သန္တိ သောကပရိဒေဝဒုက္ခဒောမနသ္သုပာယာသာ; ယေသာဟံ ဒိဋ္ဌေဝ ဓမ္မေ နိဃာတံ ပညပေမိ ။ ‘အန္တဝာ လောကော’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝံ ‘နော အနန္တဝာ လောကော’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝမ္ပိ ‘နော အန္တဝာ လောကော’တိ ဝာ, မာလုက္ယပုတ္တ, ဒိဋ္ဌိယာ သတိ, ‘အနန္တဝာ လောကော’တိ ဝာ ဒိဋ္ဌိယာ သတိ အတ္ထေဝ ဇာတိ, အတ္ထိ ဇရာ, အတ္ထိ မရဏံ, သန္တိ သောကပရိဒေဝဒုက္ခဒောမနသ္သုပာယာသာ; ယေသာဟံ ဒိဋ္ဌေဝ ဓမ္မေ နိဃာတံ ပညပေမိ။ ‘တံ ဇီဝံ တံ သရီရ’န္တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝံ ‘နော အညံ ဇီဝံ အညံ သရီရ’န္တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝမ္ပိ ‘နော တံ ဇီဝံ တံ သရီရ’န္တိ ဝာ, မာလုက္ယပုတ္တ, ဒိဋ္ဌိယာ သတိ, ‘အညံ ဇီဝံ အညံ သရီရ’န္တိ ဝာ ဒိဋ္ဌိယာ သတိ အတ္ထေဝ ဇာတိ။ပေ.။ နိဃာတံ ပညပေမိ။ ‘ဟောတိ တထာဂတော ပရံ မရဏာ’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝံ ‘နော န ဟောတိ တထာဂတော ပရံ မရဏာ’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝမ္ပိ ‘နော ဟောတိ တထာဂတော ပရံ မရဏာ’တိ ဝာ, မာလုက္ယပုတ္တ, ဒိဋ္ဌိယာ သတိ, ‘န ဟောတိ တထာဂတော ပရံ မရဏာ’တိ ဝာ ဒိဋ္ဌိယာ သတိ အတ္ထေဝ ဇာတိ။ပေ.။ ယေသာဟံ ဒိဋ္ဌေဝ ဓမ္မေ နိဃာတံ ပညပေမိ။ ‘ဟောတိ စ န စ ဟောတိ တထာဂတော ပရံ မရဏာ’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝံ ‘နော နေဝ ဟောတိ န န ဟောတိ တထာဂတော ပရံ မရဏာ’တိ, မာလုက္ယပုတ္တ, ဒိဋ္ဌိယာ သတိ ဗ္ရဟ္မစရိယဝာသော အဘဝိသ္သာတိ, ဧဝမ္ပိ ‘နော ဟောတိ စ န စ ဟောတိ တထာဂတော ပရံ မရဏာ’တိ, မာလုက္ယပုတ္တ, ဒိဋ္ဌိယာ သတိ, ‘နေဝ ဟောတိ န န ဟောတိ တထာဂတော ပရံ မရဏာ’တိ ဝာ ဒိဋ္ဌိယာ သတိ အတ္ထေဝ ဇာတိ။ပေ.။ ယေသာဟံ ဒိဋ္ဌေဝ ဓမ္မေ နိဃာတံ ပညပေမိ။
127. ‘‘‘Sassato loko’ti, mālukyaputta, diṭṭhiyā sati brahmacariyavāso abhavissāti , evaṃ ‘no asassato loko’ti, mālukyaputta, diṭṭhiyā sati brahmacariyavāso abhavissāti, evampi ‘no sassato loko’ti vā, mālukyaputta, diṭṭhiyā sati, ‘asassato loko’ti vā diṭṭhiyā sati attheva jāti, atthi jarā, atthi maraṇaṃ, santi sokaparidevadukkhadomanassupāyāsā; yesāhaṃ diṭṭheva dhamme nighātaṃ paññapemi . ‘Antavā loko’ti, mālukyaputta, diṭṭhiyā sati brahmacariyavāso abhavissāti, evaṃ ‘no anantavā loko’ti, mālukyaputta, diṭṭhiyā sati brahmacariyavāso abhavissāti, evampi ‘no antavā loko’ti vā, mālukyaputta, diṭṭhiyā sati, ‘anantavā loko’ti vā diṭṭhiyā sati attheva jāti, atthi jarā, atthi maraṇaṃ, santi sokaparidevadukkhadomanassupāyāsā; yesāhaṃ diṭṭheva dhamme nighātaṃ paññapemi. ‘Taṃ jīvaṃ taṃ sarīra’nti, mālukyaputta, diṭṭhiyā sati brahmacariyavāso abhavissāti, evaṃ ‘no aññaṃ jīvaṃ aññaṃ sarīra’nti, mālukyaputta, diṭṭhiyā sati brahmacariyavāso abhavissāti, evampi ‘no taṃ jīvaṃ taṃ sarīra’nti vā, mālukyaputta, diṭṭhiyā sati, ‘aññaṃ jīvaṃ aññaṃ sarīra’nti vā diṭṭhiyā sati attheva jāti…pe… nighātaṃ paññapemi. ‘Hoti tathāgato paraṃ maraṇā’ti, mālukyaputta, diṭṭhiyā sati brahmacariyavāso abhavissāti, evaṃ ‘no na hoti tathāgato paraṃ maraṇā’ti, mālukyaputta, diṭṭhiyā sati brahmacariyavāso abhavissāti, evampi ‘no hoti tathāgato paraṃ maraṇā’ti vā, mālukyaputta, diṭṭhiyā sati, ‘na hoti tathāgato paraṃ maraṇā’ti vā diṭṭhiyā sati attheva jāti…pe… yesāhaṃ diṭṭheva dhamme nighātaṃ paññapemi. ‘Hoti ca na ca hoti tathāgato paraṃ maraṇā’ti, mālukyaputta, diṭṭhiyā sati brahmacariyavāso abhavissāti, evaṃ ‘no neva hoti na na hoti tathāgato paraṃ maraṇā’ti, mālukyaputta, diṭṭhiyā sati brahmacariyavāso abhavissāti, evampi ‘no hoti ca na ca hoti tathāgato paraṃ maraṇā’ti, mālukyaputta, diṭṭhiyā sati, ‘neva hoti na na hoti tathāgato paraṃ maraṇā’ti vā diṭṭhiyā sati attheva jāti…pe… yesāhaṃ diṭṭheva dhamme nighātaṃ paññapemi.
၁၂၈. ‘‘တသ္မာတိဟ, မာလုက္ယပုတ္တ, အဗ္ယာကတဉ္စ မေ အဗ္ယာကတတော ဓာရေထ; ဗ္ယာကတဉ္စ မေ ဗ္ယာကတတော ဓာရေထ။ ကိဉ္စ, မာလုက္ယပုတ္တ, မယာ အဗ္ယာကတံ? ‘သသ္သတော လောကော’တိ မာလုက္ယပုတ္တ, မယာ အဗ္ယာကတံ; ‘အသသ္သတော လောကော’တိ – မယာ အဗ္ယာကတံ; ‘အန္တဝာ လောကော’တိ – မယာ အဗ္ယာကတံ; ‘အနန္တဝာ လောကော’တိ – မယာ အဗ္ယာကတံ; ‘တံ ဇီဝံ တံ သရီရ’န္တိ – မယာ အဗ္ယာကတံ; ‘အညံ ဇီဝံ အညံ သရီရ’န္တိ – မယာ အဗ္ယာကတံ; ‘ဟောတိ တထာဂတော ပရံ မရဏာ’တိ – မယာ အဗ္ယာကတံ; ‘န ဟောတိ တထာဂတော ပရံ မရဏာ’တိ – မယာ အဗ္ယာကတံ; ‘ဟောတိ စ န စ ဟောတိ တထာဂတော ပရံ မရဏာ’တိ – မယာ အဗ္ယာကတံ; ‘နေဝ ဟောတိ န န ဟောတိ တထာဂတော ပရံ မရဏာ’တိ – မယာ အဗ္ယာကတံ။ ကသ္မာ စေတံ, မာလုက္ယပုတ္တ, မယာ အဗ္ယာကတံ? န ဟေတံ, မာလုက္ယပုတ္တ, အတ္ထသံဟိတံ န အာဒိဗ္ရဟ္မစရိယကံ န 11 နိဗ္ဗိဒာယ န ဝိရာဂာယ န နိရောဓာယ န ဥပသမာယ န အဘိညာယ န သမ္ဗောဓာယ န နိဗ္ဗာနာယ သံဝတ္တတိ။ တသ္မာ တံ မယာ အဗ္ယာကတံ။ ကိဉ္စ, မာလုက္ယပုတ္တ, မယာ ဗ္ယာကတံ? ‘ဣဒံ ဒုက္ခ’န္တိ, မာလုက္ယပုတ္တ, မယာ ဗ္ယာကတံ; ‘အယံ ဒုက္ခသမုဒယော’တိ – မယာ ဗ္ယာကတံ; ‘အယံ ဒုက္ခနိရောဓော’တိ – မယာ ဗ္ယာကတံ; ‘အယံ ဒုက္ခနိရောဓဂာမိနီ ပဋိပဒာ’တိ – မယာ ဗ္ယာကတံ။ ကသ္မာ စေတံ, မာလုက္ယပုတ္တ, မယာ ဗ္ယာကတံ? ဧတဉ္ဟိ, မာလုက္ယပုတ္တ, အတ္ထသံဟိတံ ဧတံ အာဒိဗ္ရဟ္မစရိယကံ နိဗ္ဗိဒာယ ဝိရာဂာယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တတိ။ တသ္မာ တံ မယာ ဗ္ယာကတံ။ တသ္မာတိဟ, မာလုက္ယပုတ္တ , အဗ္ယာကတဉ္စ မေ အဗ္ယာကတတော ဓာရေထ; ဗ္ယာကတဉ္စ မေ ဗ္ယာကတတော ဓာရေထာ’’တိ။
128. ‘‘Tasmātiha, mālukyaputta, abyākatañca me abyākatato dhāretha; byākatañca me byākatato dhāretha. Kiñca, mālukyaputta, mayā abyākataṃ? ‘Sassato loko’ti mālukyaputta, mayā abyākataṃ; ‘asassato loko’ti – mayā abyākataṃ; ‘antavā loko’ti – mayā abyākataṃ; ‘anantavā loko’ti – mayā abyākataṃ; ‘taṃ jīvaṃ taṃ sarīra’nti – mayā abyākataṃ; ‘aññaṃ jīvaṃ aññaṃ sarīra’nti – mayā abyākataṃ; ‘hoti tathāgato paraṃ maraṇā’ti – mayā abyākataṃ; ‘na hoti tathāgato paraṃ maraṇā’ti – mayā abyākataṃ; ‘hoti ca na ca hoti tathāgato paraṃ maraṇā’ti – mayā abyākataṃ; ‘neva hoti na na hoti tathāgato paraṃ maraṇā’ti – mayā abyākataṃ. Kasmā cetaṃ, mālukyaputta, mayā abyākataṃ? Na hetaṃ, mālukyaputta, atthasaṃhitaṃ na ādibrahmacariyakaṃ na 12 nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Tasmā taṃ mayā abyākataṃ. Kiñca, mālukyaputta, mayā byākataṃ? ‘Idaṃ dukkha’nti, mālukyaputta, mayā byākataṃ; ‘ayaṃ dukkhasamudayo’ti – mayā byākataṃ; ‘ayaṃ dukkhanirodho’ti – mayā byākataṃ; ‘ayaṃ dukkhanirodhagāminī paṭipadā’ti – mayā byākataṃ. Kasmā cetaṃ, mālukyaputta, mayā byākataṃ? Etañhi, mālukyaputta, atthasaṃhitaṃ etaṃ ādibrahmacariyakaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati. Tasmā taṃ mayā byākataṃ. Tasmātiha, mālukyaputta , abyākatañca me abyākatato dhāretha; byākatañca me byākatato dhārethā’’ti.
ဣဒမဝောစ ဘဂဝာ။ အတ္တမနော အာယသ္မာ မာလုက္ယပုတ္တော ဘဂဝတော ဘာသိတံ အဘိနန္ဒီတိ။
Idamavoca bhagavā. Attamano āyasmā mālukyaputto bhagavato bhāsitaṃ abhinandīti.
စူဠမာလုက္ယသုတ္တံ နိဋ္ဌိတံ တတိယံ။
Cūḷamālukyasuttaṃ niṭṭhitaṃ tatiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) / ၃. စူဠမာလုက္ယသုတ္တဝဏ္ဏနာ • 3. Cūḷamālukyasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၃. စူဠမာလုက္ယသုတ္တဝဏ္ဏနာ • 3. Cūḷamālukyasuttavaṇṇanā
