| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. சூளமாலுக்யஸுத்தவண்ணனா
3. Cūḷamālukyasuttavaṇṇanā
122. ஏவங் ட²பிதானீதி ‘‘ஸஸ்ஸதோ லோகோ’’திஆதி³னயப்பவத்தானி தி³ட்டி²க³தானி அனிய்யானிகதாய ந ப்³யாகாதப்³பா³னி ந கதே²தப்³பா³னி, ஏவங் ட²பனீயபக்கே² ட²பிதானி சேவ நிய்யானிகஸாஸனே ச²ட்³ட³னீயதாய படிக்கி²த்தானி ச, அபிசெத்த² அத்த²தோ படிக்கே²போ ஏவ ப்³யாகாதப்³ப³தோ. யதா² ஏகோ கம்மகிலேஸவஸேன இத்த²த்தங் ஆக³தோ, ததா² அபரோபி அபரோபீதி ஸத்தோ ததா²க³தோ வுச்சதீதி ஆஹ – ‘‘ததா²க³தோதி ஸத்தோ’’தி. தங் அப்³யாகரணங் மய்ஹங் ந ருச்சதீதி யதி³ ஸஸ்ஸதோ லோகோ, ஸஸ்ஸதோ லோகோதி, அஸஸ்ஸதோ லோகோ, அஸஸ்ஸதோ லோகோதி ஜானாமாதி ப்³யாகாதப்³ப³மேவ, யங் பன உப⁴யதா² அப்³யாகரணங், தங் மே சித்தங் ந ஆராதே⁴தி அஜானநஹேதுகத்தா அப்³யாகரணஸ்ஸ. தேனாஹ – ‘‘அஜானதோ கோ² பன அபஸ்ஸதோ ஏததே³வ உஜுகங், யதி³த³ங் ந ஜானாமி ந பஸ்ஸாமீ’’தி. ஸஸ்ஸதோதிஆதீ³ஸு ஸஸ்ஸதோதி ஸப்³ப³காலிகோ, நிச்சோ து⁴வோ அவிபரிணாமத⁴ம்மோதி அத்தோ². ஸோ ஹி தி³ட்டி²க³திகேஹி லோகீயந்தி எத்த² புஞ்ஞபாபதப்³பி³பாகா, ஸயங் வா தப்³பி³பாகாகராதி³பா⁴வேன அவியுத்தேஹி லோகீயதீதி லோகோதி அதி⁴ப்பேதோ. ஏதேன சத்தாரோபி ஸஸ்ஸதவாதா³ த³ஸ்ஸிதா ஹொந்தி. அஸஸ்ஸதோதி ந ஸஸ்ஸதோ, அனிச்சோ அத்³து⁴வோ பே⁴த³னத⁴ம்மோதி அத்தோ², அஸஸ்ஸதோதி ச ஸஸ்ஸதபா⁴வபடிக்கே²பேன உச்சே²தோ³ தீ³பிதோதி ஸத்தபி உச்சே²த³வாதா³ த³ஸ்ஸிதா ஹொந்தி. அந்தவாதி பரிவடுமோ பரிச்சி²ன்னபரிமாணோ, அஸப்³ப³க³தோதி அத்தோ². தேன ‘‘ஸரீரபரிமாணோ, அங்கு³ட்ட²பரிமாணோ, யவபரிமாணோ பரமாணுபரிமாணோ அத்தா’’தி (உதா³॰ அட்ட²॰ 54; தீ³॰ நி॰ டீ॰ 1.76-77) ஏவமாதி³வாதா³ த³ஸ்ஸிதா ஹொந்தி.
122.Evaṃṭhapitānīti ‘‘sassato loko’’tiādinayappavattāni diṭṭhigatāni aniyyānikatāya na byākātabbāni na kathetabbāni, evaṃ ṭhapanīyapakkhe ṭhapitāni ceva niyyānikasāsane chaḍḍanīyatāya paṭikkhittāni ca, apicettha atthato paṭikkhepo eva byākātabbato. Yathā eko kammakilesavasena itthattaṃ āgato, tathā aparopi aparopīti satto tathāgato vuccatīti āha – ‘‘tathāgatoti satto’’ti. Taṃ abyākaraṇaṃ mayhaṃ na ruccatīti yadi sassato loko, sassato lokoti, asassato loko, asassato lokoti jānāmāti byākātabbameva, yaṃ pana ubhayathā abyākaraṇaṃ, taṃ me cittaṃ na ārādheti ajānanahetukattā abyākaraṇassa. Tenāha – ‘‘ajānato kho pana apassato etadeva ujukaṃ, yadidaṃ na jānāmi na passāmī’’ti. Sassatotiādīsu sassatoti sabbakāliko, nicco dhuvo avipariṇāmadhammoti attho. So hi diṭṭhigatikehi lokīyanti ettha puññapāpatabbipākā, sayaṃ vā tabbipākākarādibhāvena aviyuttehi lokīyatīti lokoti adhippeto. Etena cattāropi sassatavādā dassitā honti. Asassatoti na sassato, anicco addhuvo bhedanadhammoti attho, asassatoti ca sassatabhāvapaṭikkhepena ucchedo dīpitoti sattapi ucchedavādā dassitā honti. Antavāti parivaṭumo paricchinnaparimāṇo, asabbagatoti attho. Tena ‘‘sarīraparimāṇo, aṅguṭṭhaparimāṇo, yavaparimāṇo paramāṇuparimāṇo attā’’ti (udā. aṭṭha. 54; dī. ni. ṭī. 1.76-77) evamādivādā dassitā honti.
ததா²க³தோ பரங் மரணாதி ததா²க³தோ ஜீவோ அத்தா மரணதோ இமஸ்ஸ காயஸ்ஸ பே⁴த³தோ பரங் உத்³த⁴ங் ஹோதி அத்தி² ஸங்விஜ்ஜதீதி அத்தோ². ஏதேன ஸஸ்ஸதபா⁴வமுகே²ன ஸோளஸ ஸஞ்ஞீவாதா³, அட்ட² அஸஞ்ஞீவாதா³, அட்ட² ச நேவஸஞ்ஞீனாஸஞ்ஞீவாதா³ த³ஸ்ஸிதா ஹொந்தி. ந ஹோதீதி நத்தி² ந உபலப்³ப⁴தி. ஏதேன உச்சே²த³வாதோ³ த³ஸ்ஸிதோ ஹோதி. அபிச ஹோதி ச ந ச ஹோதீதி அத்தி² நத்தி² சாதி. ஏதேன ஏகச்சஸஸ்ஸதவாதோ³ த³ஸ்ஸிதோ. நேவ ஹோதி ந ந ஹோதீதி பன இமினா அமராவிக்கே²பவாதோ³ த³ஸ்ஸிதோதி வேதி³தப்³ப³ங். ப⁴க³வதா பன அனிய்யானிகத்தா அனத்த²ஸங்ஹிதானி இமானி த³ஸ்ஸனானீதி தானி ந ப்³யாகதானி, தங் அப்³யாகரணங் ஸந்தா⁴யாஹ அயங் தே²ரோ ‘‘தங் மே ந ருச்சதீ’’தி. ஸிக்க²ங் படிக்கி²பித்வா யதா²ஸமாதி³ன்னஸிக்க²ங் பஹாய.
Tathāgato paraṃ maraṇāti tathāgato jīvo attā maraṇato imassa kāyassa bhedato paraṃ uddhaṃ hoti atthi saṃvijjatīti attho. Etena sassatabhāvamukhena soḷasa saññīvādā, aṭṭha asaññīvādā, aṭṭha ca nevasaññīnāsaññīvādā dassitā honti. Na hotīti natthi na upalabbhati. Etena ucchedavādo dassito hoti. Apica hoti ca na ca hotīti atthi natthi cāti. Etena ekaccasassatavādo dassito. Neva hoti na na hotīti pana iminā amarāvikkhepavādo dassitoti veditabbaṃ. Bhagavatā pana aniyyānikattā anatthasaṃhitāni imāni dassanānīti tāni na byākatāni, taṃ abyākaraṇaṃ sandhāyāha ayaṃ thero ‘‘taṃ me na ruccatī’’ti. Sikkhaṃ paṭikkhipitvā yathāsamādinnasikkhaṃ pahāya.
125. த்வங் நேவ யாசகோதி அஹங் ப⁴ந்தே ப⁴க³வதி ப்³ரஹ்மசரியங் சரிஸ்ஸாமீதிஆதி³னா. ந யாசிதகோதி த்வங் மாலுக்யபுத்த மயி ப்³ரஹ்மசரியங் சராதிஆதி³னா.
125.Tvaṃnevayācakoti ahaṃ bhante bhagavati brahmacariyaṃ carissāmītiādinā. Na yācitakoti tvaṃ mālukyaputta mayi brahmacariyaṃ carātiādinā.
126. பரஸேனாய டி²தேன புரிஸேன. ப³ஹலலேபனேனாதி ப³ஹலவிலேபனேன. மஹாஸுபியாதி³ ஸப்³போ³ முது³ஹித³கோ வேணுவிஸேஸோ ஸண்ஹோ. மருவாதி மகசி. கீ²ரபண்ணினோதி கீ²ரபண்ணியா, யஸ்ஸா சி²ந்த³னமத்தே பண்ணே கீ²ரங் பக்³க⁴ரதி. க³ச்ச²ந்தி க³ச்ச²தோ ஜாதங் ஸயங்ஜாதகு³ம்ப³தோ க³ஹிதந்தி அதி⁴ப்பாயோ. ஸிதி²லஹனு நாம த³த்தா கண்ணோ பதங்கோ³. ஏதாய தி³ட்டி²யா ஸதி ந ஹோதீதி ‘‘ஸஸ்ஸதோ லோகோ’’தி ஏதாய தி³ட்டி²யா ஸதி மக்³க³ப்³ரஹ்மசரியவாஸோ ந ஹோதி, தங் பஹாய ஏவ பத்தப்³ப³தோ.
126.Parasenāya ṭhitena purisena. Bahalalepanenāti bahalavilepanena. Mahāsupiyādi sabbo muduhidako veṇuviseso saṇho. Maruvāti makaci. Khīrapaṇṇinoti khīrapaṇṇiyā, yassā chindanamatte paṇṇe khīraṃ paggharati. Gacchanti gacchato jātaṃ sayaṃjātagumbato gahitanti adhippāyo. Sithilahanu nāma dattā kaṇṇo pataṅgo. Etāya diṭṭhiyā sati na hotīti ‘‘sassato loko’’ti etāya diṭṭhiyā sati maggabrahmacariyavāso na hoti, taṃ pahāya eva pattabbato.
127. அத்தே²வ ஜாதீதிஆதி³னா ஏதா தி³ட்டி²யோ பச்சேகம்பி ஸங்ஸாரபரிப்³ரூஹனா கடஸிவட்³ட⁴னா நிப்³பா³னவிப³ந்த⁴னாதி த³ஸ்ஸேதி.
127.Attheva jātītiādinā etā diṭṭhiyo paccekampi saṃsāraparibrūhanā kaṭasivaḍḍhanā nibbānavibandhanāti dasseti.
128. தஸ்மாதிஹாதி இத³ங் அட்டா²னே உத்³த⁴டங், டா²னேயேவ பன ‘‘வுத்தபடிபக்க²னயேன வேதி³தப்³ப³’’ந்தி இமஸ்ஸ பரதோ கத்வா ஸங்வண்ணேதப்³ப³ங். அத்தனோ ப²லேன அரணீயதோ அனுக³ந்தப்³ப³தோ காரணம்பி ‘‘அத்தோ²’’தி வுச்சதீதி ஆஹ ‘‘காரணனிஸ்ஸித’’ந்தி. தேனாஹ ‘‘ப்³ரஹ்மசரியஸ்ஸ ஆதி³மத்தம்பீ’’தி. புப்³ப³பத³ட்டா²னந்தி பட²மாரம்போ⁴. ஸேஸங் ஸுவிஞ்ஞெய்யமேவ.
128.Tasmātihāti idaṃ aṭṭhāne uddhaṭaṃ, ṭhāneyeva pana ‘‘vuttapaṭipakkhanayena veditabba’’nti imassa parato katvā saṃvaṇṇetabbaṃ. Attano phalena araṇīyato anugantabbato kāraṇampi ‘‘attho’’ti vuccatīti āha ‘‘kāraṇanissita’’nti. Tenāha ‘‘brahmacariyassa ādimattampī’’ti. Pubbapadaṭṭhānanti paṭhamārambho. Sesaṃ suviññeyyameva.
சூளமாலுக்யஸுத்தவண்ணனாய லீனத்த²ப்பகாஸனா ஸமத்தா.
Cūḷamālukyasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. சூளமாலுக்யஸுத்தங் • 3. Cūḷamālukyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. சூளமாலுக்யஸுத்தவண்ணனா • 3. Cūḷamālukyasuttavaṇṇanā
