| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৩. চূল়মালুক্যসুত্তৰণ্ণনা
3. Cūḷamālukyasuttavaṇṇanā
১২২. এৰং মে সুতন্তি মালুক্যসুত্তং। তত্থ মালুক্যপুত্তস্সাতি এৰংনামকস্স থেরস্স। ঠপিতানি পটিক্খিত্তানীতি দিট্ঠিগতানি নাম ন ব্যাকাতব্বানীতি এৰং ঠপিতানি চেৰ পটিক্খিত্তানি চ। তথাগতোতি সত্তো। তং মে ন রুচ্চতীতি তং অব্যাকরণং ময্হং ন রুচ্চতি। সিক্খং পচ্চক্খাযাতি সিক্খং পটিক্খিপিত্ৰা।
122.Evaṃme sutanti mālukyasuttaṃ. Tattha mālukyaputtassāti evaṃnāmakassa therassa. Ṭhapitāni paṭikkhittānīti diṭṭhigatāni nāma na byākātabbānīti evaṃ ṭhapitāni ceva paṭikkhittāni ca. Tathāgatoti satto. Taṃ me na ruccatīti taṃ abyākaraṇaṃ mayhaṃ na ruccati. Sikkhaṃpaccakkhāyāti sikkhaṃ paṭikkhipitvā.
১২৫. কো সন্তো কং পচ্চাচিক্খসীতি যাচকো ৰা হি যাচিতকং পচ্চাচিক্খেয্য, যাচিতকো ৰা যাচকং। ত্ৰং নেৰ যাচকো ন যাচিতকো, সো দানি ত্ৰং কো সন্তো কং পচ্চাচিক্খসীতি অত্থো।
125.Ko santo kaṃ paccācikkhasīti yācako vā hi yācitakaṃ paccācikkheyya, yācitako vā yācakaṃ. Tvaṃ neva yācako na yācitako, so dāni tvaṃ ko santo kaṃ paccācikkhasīti attho.
১২৬. ৰিদ্ধো অস্সাতি পরসেনায ঠিতেন ৰিদ্ধো ভৰেয্য। গাল়্হপলেপনেনাতি বহললেপনেন। ভিসক্কন্তি ৰেজ্জং। সল্লকত্তন্তি সল্লকন্তনং সল্লকন্তিযসুত্তৰাচকং। অক্কস্সাতি অক্কৰাকে গহেত্ৰা জিযং করোন্তি। তেন ৰুত্তং ‘‘অক্কস্সা’’তি। সণ্হস্সাতি ৰেণুৰিলীৰস্স। মরুৰাখীরপণ্ণীনম্পি ৰাকেহিযেৰ করোন্তি। তেন ৰুত্তং যদি ৰা মরুৰায যদি ৰা খীরপণ্ণিনোতি। গচ্ছন্তি পব্বতগচ্ছনদীগচ্ছাদীসু জাতং। রোপিমন্তি রোপেত্ৰা ৰড্ঢিতং সরৰনতো সরং গহেত্ৰা কতং। সিথিলহনুনোতি এৰংনামকস্স পক্খিনো। ভেরৰস্সাতি কাল়সীহস্স। সেম্হারস্সাতি মক্কটস্স। এৰং নোতি এতায দিট্ঠিযা সতি ন হোতীতি অত্থো।
126.Viddhoassāti parasenāya ṭhitena viddho bhaveyya. Gāḷhapalepanenāti bahalalepanena. Bhisakkanti vejjaṃ. Sallakattanti sallakantanaṃ sallakantiyasuttavācakaṃ. Akkassāti akkavāke gahetvā jiyaṃ karonti. Tena vuttaṃ ‘‘akkassā’’ti. Saṇhassāti veṇuvilīvassa. Maruvākhīrapaṇṇīnampi vākehiyeva karonti. Tena vuttaṃ yadi vā maruvāya yadi vā khīrapaṇṇinoti. Gacchanti pabbatagacchanadīgacchādīsu jātaṃ. Ropimanti ropetvā vaḍḍhitaṃ saravanato saraṃ gahetvā kataṃ. Sithilahanunoti evaṃnāmakassa pakkhino. Bheravassāti kāḷasīhassa. Semhārassāti makkaṭassa. Evaṃ noti etāya diṭṭhiyā sati na hotīti attho.
১২৭. অত্থেৰ জাতীতি এতায দিট্ঠিযা সতি ব্রহ্মচরিযৰাসোৰ নত্থি, জাতি পন অত্থিযেৰ। তথা জরামরণাদীনীতি দস্সেতি। যেসাহন্তি যেসং অহং। নিঘাতন্তি উপঘাতং ৰিনাসং। মম সাৰকা হি এতেসু নিব্বিন্না ইধেৰ নিব্বানং পাপুণন্তীতি অধিপ্পাযো।
127.Attheva jātīti etāya diṭṭhiyā sati brahmacariyavāsova natthi, jāti pana atthiyeva. Tathā jarāmaraṇādīnīti dasseti. Yesāhanti yesaṃ ahaṃ. Nighātanti upaghātaṃ vināsaṃ. Mama sāvakā hi etesu nibbinnā idheva nibbānaṃ pāpuṇantīti adhippāyo.
১২৮. তস্মাতিহাতি যস্মা অব্যাকতমেতং, চতুসচ্চমেৰ মযা ব্যাকতং, তস্মাতি অত্থো। ন হেতং মালুক্যপুত্ত অত্থসংহিতন্তি এতং দিট্ঠিগতং ৰা এতং ব্যাকরণং ৰা কারণনিস্সিতং ন হোতি। ন আদিব্রহ্মচরিযকন্তি ব্রহ্মচরিযস্স আদিমত্তম্পি পুব্বভাগসীলমত্তম্পি ন হোতি। ন নিব্বিদাযাতিআদীসু ৰট্টে নিব্বিন্দনত্থায ৰা ৰিরজ্ঝনত্থায ৰা ৰট্টনিরোধায ৰা রাগাদিৰূপসমনত্থায ৰা অভিঞ্ঞেয্যে ধম্মে অভিজাননত্থায ৰা চতুমগ্গসঙ্খাতসম্বোধত্থায ৰা অসঙ্খতনিব্বানসচ্ছিকিরিযত্থায ৰা ন হোতি। এতং হীতি এতং চতুসচ্চব্যাকরণং। আদিব্রহ্মচরিযকন্তি ব্রহ্মচরিযস্স আদিভূতং পুব্বপদট্ঠানং। সেসং ৰুত্তপটিৰিপক্খনযেন ৰেদিতব্বং। ইমম্পি দেসনং ভগৰা নেয্যপুগ্গলৰসেন নিট্ঠাপেসীতি।
128.Tasmātihāti yasmā abyākatametaṃ, catusaccameva mayā byākataṃ, tasmāti attho. Na hetaṃ mālukyaputta atthasaṃhitanti etaṃ diṭṭhigataṃ vā etaṃ byākaraṇaṃ vā kāraṇanissitaṃ na hoti. Na ādibrahmacariyakanti brahmacariyassa ādimattampi pubbabhāgasīlamattampi na hoti. Na nibbidāyātiādīsu vaṭṭe nibbindanatthāya vā virajjhanatthāya vā vaṭṭanirodhāya vā rāgādivūpasamanatthāya vā abhiññeyye dhamme abhijānanatthāya vā catumaggasaṅkhātasambodhatthāya vā asaṅkhatanibbānasacchikiriyatthāya vā na hoti. Etaṃ hīti etaṃ catusaccabyākaraṇaṃ. Ādibrahmacariyakanti brahmacariyassa ādibhūtaṃ pubbapadaṭṭhānaṃ. Sesaṃ vuttapaṭivipakkhanayena veditabbaṃ. Imampi desanaṃ bhagavā neyyapuggalavasena niṭṭhāpesīti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
চূল়মালুক্যসুত্তৰণ্ণনা নিট্ঠিতা।
Cūḷamālukyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৩. চূল়মালুক্যসুত্তং • 3. Cūḷamālukyasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৩. চূল়মালুক্যসুত্তৰণ্ণনা • 3. Cūḷamālukyasuttavaṇṇanā
