| Library / Tipiṭaka / တိပိဋက • Tipiṭaka / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) |
၃. စူဠမာလုက္ယသုတ္တဝဏ္ဏနာ
3. Cūḷamālukyasuttavaṇṇanā
၁၂၂. ဧဝံ မေ သုတန္တိ မာလုက္ယသုတ္တံ။ တတ္ထ မာလုက္ယပုတ္တသ္သာတိ ဧဝံနာမကသ္သ ထေရသ္သ။ ဌပိတာနိ ပဋိက္ခိတ္တာနီတိ ဒိဋ္ဌိဂတာနိ နာမ န ဗ္ယာကာတဗ္ဗာနီတိ ဧဝံ ဌပိတာနိ စေဝ ပဋိက္ခိတ္တာနိ စ။ တထာဂတောတိ သတ္တော။ တံ မေ န ရုစ္စတီတိ တံ အဗ္ယာကရဏံ မယ္ဟံ န ရုစ္စတိ။ သိက္ခံ ပစ္စက္ခာယာတိ သိက္ခံ ပဋိက္ခိပိတ္ဝာ။
122.Evaṃme sutanti mālukyasuttaṃ. Tattha mālukyaputtassāti evaṃnāmakassa therassa. Ṭhapitāni paṭikkhittānīti diṭṭhigatāni nāma na byākātabbānīti evaṃ ṭhapitāni ceva paṭikkhittāni ca. Tathāgatoti satto. Taṃ me na ruccatīti taṃ abyākaraṇaṃ mayhaṃ na ruccati. Sikkhaṃpaccakkhāyāti sikkhaṃ paṭikkhipitvā.
၁၂၅. ကော သန္တော ကံ ပစ္စာစိက္ခသီတိ ယာစကော ဝာ ဟိ ယာစိတကံ ပစ္စာစိက္ခေယ္ယ, ယာစိတကော ဝာ ယာစကံ။ တ္ဝံ နေဝ ယာစကော န ယာစိတကော, သော ဒာနိ တ္ဝံ ကော သန္တော ကံ ပစ္စာစိက္ခသီတိ အတ္ထော။
125.Ko santo kaṃ paccācikkhasīti yācako vā hi yācitakaṃ paccācikkheyya, yācitako vā yācakaṃ. Tvaṃ neva yācako na yācitako, so dāni tvaṃ ko santo kaṃ paccācikkhasīti attho.
၁၂၆. ဝိဒ္ဓော အသ္သာတိ ပရသေနာယ ဌိတေန ဝိဒ္ဓော ဘဝေယ္ယ။ ဂာဠ္ဟပလေပနေနာတိ ဗဟလလေပနေန။ ဘိသက္ကန္တိ ဝေဇ္ဇံ။ သလ္လကတ္တန္တိ သလ္လကန္တနံ သလ္လကန္တိယသုတ္တဝာစကံ။ အက္ကသ္သာတိ အက္ကဝာကေ ဂဟေတ္ဝာ ဇိယံ ကရောန္တိ။ တေန ဝုတ္တံ ‘‘အက္ကသ္သာ’’တိ။ သဏ္ဟသ္သာတိ ဝေဏုဝိလီဝသ္သ။ မရုဝာခီရပဏ္ဏီနမ္ပိ ဝာကေဟိယေဝ ကရောန္တိ။ တေန ဝုတ္တံ ယဒိ ဝာ မရုဝာယ ယဒိ ဝာ ခီရပဏ္ဏိနောတိ။ ဂစ္ဆန္တိ ပဗ္ဗတဂစ္ဆနဒီဂစ္ဆာဒီသု ဇာတံ။ ရောပိမန္တိ ရောပေတ္ဝာ ဝဍ္ဎိတံ သရဝနတော သရံ ဂဟေတ္ဝာ ကတံ။ သိထိလဟနုနောတိ ဧဝံနာမကသ္သ ပက္ခိနော။ ဘေရဝသ္သာတိ ကာဠသီဟသ္သ။ သေမ္ဟာရသ္သာတိ မက္ကဋသ္သ။ ဧဝံ နောတိ ဧတာယ ဒိဋ္ဌိယာ သတိ န ဟောတီတိ အတ္ထော။
126.Viddhoassāti parasenāya ṭhitena viddho bhaveyya. Gāḷhapalepanenāti bahalalepanena. Bhisakkanti vejjaṃ. Sallakattanti sallakantanaṃ sallakantiyasuttavācakaṃ. Akkassāti akkavāke gahetvā jiyaṃ karonti. Tena vuttaṃ ‘‘akkassā’’ti. Saṇhassāti veṇuvilīvassa. Maruvākhīrapaṇṇīnampi vākehiyeva karonti. Tena vuttaṃ yadi vā maruvāya yadi vā khīrapaṇṇinoti. Gacchanti pabbatagacchanadīgacchādīsu jātaṃ. Ropimanti ropetvā vaḍḍhitaṃ saravanato saraṃ gahetvā kataṃ. Sithilahanunoti evaṃnāmakassa pakkhino. Bheravassāti kāḷasīhassa. Semhārassāti makkaṭassa. Evaṃ noti etāya diṭṭhiyā sati na hotīti attho.
၁၂၇. အတ္ထေဝ ဇာတီတိ ဧတာယ ဒိဋ္ဌိယာ သတိ ဗ္ရဟ္မစရိယဝာသောဝ နတ္ထိ, ဇာတိ ပန အတ္ထိယေဝ။ တထာ ဇရာမရဏာဒီနီတိ ဒသ္သေတိ။ ယေသာဟန္တိ ယေသံ အဟံ။ နိဃာတန္တိ ဥပဃာတံ ဝိနာသံ။ မမ သာဝကာ ဟိ ဧတေသု နိဗ္ဗိန္နာ ဣဓေဝ နိဗ္ဗာနံ ပာပုဏန္တီတိ အဓိပ္ပာယော။
127.Attheva jātīti etāya diṭṭhiyā sati brahmacariyavāsova natthi, jāti pana atthiyeva. Tathā jarāmaraṇādīnīti dasseti. Yesāhanti yesaṃ ahaṃ. Nighātanti upaghātaṃ vināsaṃ. Mama sāvakā hi etesu nibbinnā idheva nibbānaṃ pāpuṇantīti adhippāyo.
၁၂၈. တသ္မာတိဟာတိ ယသ္မာ အဗ္ယာကတမေတံ, စတုသစ္စမေဝ မယာ ဗ္ယာကတံ, တသ္မာတိ အတ္ထော။ န ဟေတံ မာလုက္ယပုတ္တ အတ္ထသံဟိတန္တိ ဧတံ ဒိဋ္ဌိဂတံ ဝာ ဧတံ ဗ္ယာကရဏံ ဝာ ကာရဏနိသ္သိတံ န ဟောတိ။ န အာဒိဗ္ရဟ္မစရိယကန္တိ ဗ္ရဟ္မစရိယသ္သ အာဒိမတ္တမ္ပိ ပုဗ္ဗဘာဂသီလမတ္တမ္ပိ န ဟောတိ။ န နိဗ္ဗိဒာယာတိအာဒီသု ဝဋ္ဋေ နိဗ္ဗိန္ဒနတ္ထာယ ဝာ ဝိရဇ္ဈနတ္ထာယ ဝာ ဝဋ္ဋနိရောဓာယ ဝာ ရာဂာဒိဝူပသမနတ္ထာယ ဝာ အဘိညေယ္ယေ ဓမ္မေ အဘိဇာနနတ္ထာယ ဝာ စတုမဂ္ဂသင္ခာတသမ္ဗောဓတ္ထာယ ဝာ အသင္ခတနိဗ္ဗာနသစ္ဆိကိရိယတ္ထာယ ဝာ န ဟောတိ။ ဧတံ ဟီတိ ဧတံ စတုသစ္စဗ္ယာကရဏံ။ အာဒိဗ္ရဟ္မစရိယကန္တိ ဗ္ရဟ္မစရိယသ္သ အာဒိဘူတံ ပုဗ္ဗပဒဋ္ဌာနံ။ သေသံ ဝုတ္တပဋိဝိပက္ခနယေန ဝေဒိတဗ္ဗံ။ ဣမမ္ပိ ဒေသနံ ဘဂဝာ နေယ္ယပုဂ္ဂလဝသေန နိဋ္ဌာပေသီတိ။
128.Tasmātihāti yasmā abyākatametaṃ, catusaccameva mayā byākataṃ, tasmāti attho. Na hetaṃ mālukyaputta atthasaṃhitanti etaṃ diṭṭhigataṃ vā etaṃ byākaraṇaṃ vā kāraṇanissitaṃ na hoti. Na ādibrahmacariyakanti brahmacariyassa ādimattampi pubbabhāgasīlamattampi na hoti. Na nibbidāyātiādīsu vaṭṭe nibbindanatthāya vā virajjhanatthāya vā vaṭṭanirodhāya vā rāgādivūpasamanatthāya vā abhiññeyye dhamme abhijānanatthāya vā catumaggasaṅkhātasambodhatthāya vā asaṅkhatanibbānasacchikiriyatthāya vā na hoti. Etaṃ hīti etaṃ catusaccabyākaraṇaṃ. Ādibrahmacariyakanti brahmacariyassa ādibhūtaṃ pubbapadaṭṭhānaṃ. Sesaṃ vuttapaṭivipakkhanayena veditabbaṃ. Imampi desanaṃ bhagavā neyyapuggalavasena niṭṭhāpesīti.
ပပဉ္စသူဒနိယာ မဇ္ဈိမနိကာယဋ္ဌကထာယ
Papañcasūdaniyā majjhimanikāyaṭṭhakathāya
စူဠမာလုက္ယသုတ္တဝဏ္ဏနာ နိဋ္ဌိတာ။
Cūḷamālukyasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၃. စူဠမာလုက္ယသုတ္တံ • 3. Cūḷamālukyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၃. စူဠမာလုက္ယသုတ္တဝဏ္ဏနာ • 3. Cūḷamālukyasuttavaṇṇanā
